Roiti 10

I Pita beto i Koniliasi

1Ego na suverena tugu pa Sizaria sa kai tinoni na isongona i Koniliasi, na mamata tinoni mamata gogoto, ko na minete tinoni vaipera isa sa qai gigalania na Minete Itali. 2Kai tinoni nabuna pa vatarasaena na Tamasa beto ko isa beto ko ira na ona tatamana sa qai pangagania tugu sa na Tamasa. Sa toania tugu isa sa na totokaniria ira na tinoni Jiu vavaivasevidi beto doru totoso sa vavara lao tana Tamasa sisa. 3Pana kai rane padana kue koloko jola korapa rane, sa sa batia isa pa dodogoro sa kai mateana tana Tamasa sa lame tana ko pira sau, <<Koniliasi!>> saunia.

4Poni sa dogoro vatogasa laoa i Koniliasi sisa, beto pa ona matagutu sa pira sau, <<Ai vei, Bangara?>> sau.

Poni sa oe lao tana sa na mateana, <<Ira na vavara tamu beto na mua roiti vaitokai tadira na tinoni vavaivasevidi sa qai vei na memeru qai vaqerai na Tamasa. 5Ko kopira mu garunu laoniria pa Jopa sira kaki tinoni, ko mai toni valamea sa kai tinoni na isongona i Saimone Pita. 6Sa korapa suvereona pa ruma ti Saimone, kai tinoni roroiti kopo manugu, sisa. Ko na ruma tana sa sa tata pa nole,>> sau sa na mateana.

7Ego ko tonai sa taloa riu sa na mateana sa kole parangia, poni sa sa kuku tekuria i Koniliasi sira karu ona nabulu beto kai solodia sa sosomana verania na garunu tana. Ko na solodia isa ba na nabuna tugu vei pa ona rarange. 8Ko pa liguna sa poja vakabere vaniria sira doru vei sa pojania na mateana, poni sa sa garunu valaoria pa Jopa.

9Ego ko sa jola kai bongi ko na ranena qai korapa rerege lao sira pira ko totonai qai tata kamu pa gusu Jopa, poni sa sae pa batuna na ruma pa manogarua koloko si Pita ko sa vavara. 10Sa vaia na burana si Pita ko sa kole nyorogua teteku. Ko totonai qai korapa vatanania ira sa na tetekuna, sa sa batia isa sa kai dodogoro. 11Sa batia isa sa na oka sa tarevanga beto kai sava sa vevei kai poko rerevatana lavata sa sa titi gore lagerenia ka made uquna ko sa lagere toga pa peso. 12Ko pa korapana na udude isa qai kole sira doru manugu mamade nenedi, ira na manugu qai gavere na gotolo, beto ira qai tatava. 13Beto sa lame sa kai ovovele tana, <<Pita, mu turu! Kubolo ko mu teteku!>> sau.

14Poni sa oe lao si Pita, <<Tapata jola, Bangara! Ura qa oqoro isongo tekuria ara sira na sakasa qai paji beto qaike lioso vei aipira,>> sau.

15Poni sa paranga mule na vinarua totoso sa na ovovele, <<Ira na sakasava sa tei valiosoria tu na Tamasa, sa ao muke vapajiria,>> sau. 16Ego ko kue totoso sa sa vei inara beto sa sa tateku vamule sae pa noka sa na poko rerevatana isa.

17Ego ko totonai sa korapa nyunyalania i Pita sa na ginuana na dodogoro sa batia, poni sa ira na tinoni sa garunuria i Koniliasi sa qai tei nanasa votunia tu ko qai tei batia tu sa na ruma ketakoi sa suveria i Pita, ko qai tei korapa tu turudia pa moena na bara pa ruma isa. 18Qai kuku ko qai korapa nanasania sa ketakoi tugu beka sa suvere si Saimone isa kai isongona si Pita qarigu.

19Ko totonai sa korapa rove vailivutainia i Pita sa na dodogoro api, poni sa paranga tana sa na Gagala, <<Doro, ira kue tinoni sa qai korapa nyaqogo ao. 20Mu sisiqarai gore gosororia ko muna tutiria sira. Munake ruarabeke, ura ara tugu qa garunu valameria sinara,>> sau.

21Ego ko sa gore kamuria i Pita sira, ko sa parangaria, <<Api sara qu korapa nyaqosiu. Ko na sa sa na kutana na lame tamugou?>> sauniria.

22Poni qai oe lao sira, <<I Koniliasi, na tinoni mamata gogoto, sa garunugei sagei. Kai tinoni tuvisina ko sa pangagania na Tamasa sisa, beto ko qai doro valavatia tugu ira doru tinoni Jiu sisa. Kai mateana tabuna sa ule vamoenia sisa ko isa sa sorugo sao ko muna lao pa nona ruma, ko isa mina nongororia sira vei muna lao pojaria ao sau,>> qarigu. 23Ego beto sa kuku vatomeria i Pita sira, ko qai ipumeka tu tana.

Ego sa jola kai bongi ko sa rane poni sa sa taloa ko sa tutiria ira si Pita. Ko kaki ira na tinoni tana Bangara pa Jopa sa qai somana tutia tugu i Pita. 24Ego sa jola kai bongi ko na ranena poni sa qai lao kamu pa Sizaria. I Koniliasi sa tei soru vakamuria tu sira na turana beto ira na ona baere, ko sa korapa veraniria sira mai lame. 25Ko isa tugu mi tome lao pa leo ruma sau si Pita, poni sa sa lao si Koniliasi ko sa gogosoria beto sa toqo sori ko sa valavatia sisa. 26Ba sa aru vaturua i Pita sisa, beto pira saunia, <<Mu turu, ara ba kai tinoni gu,>> saunia.

27Qai kole vaipaparanga sira karu, beto sa mi tome lao sau si Pita poni sa sa batiria ira na kubo tinoni sa qai tei vaikamu vera tu. 28Sa paranga lao tadira si Pita, <<Agou qu gigilaimiu sa sa tabunana pa tinarae tamigei na Jiu sa vei kai tinoni Jiu mina suvere tavitiria babi somana baereria ira na tinoni karovodi. Ba ara sa na Tamasa sa tei vabatinisiu tu ko manake gigalania sa paji babi sake lioso sa kai goto tinoni. 29Ko sa vei sa totonai sa lame na nyaqo poni sa qake daiqua, goto qa lame gu. Ko kopira sa qa nyorogua gigilai ara sisa vei beto qu nyaqonisiu agou,>> sau si Pita.

30Poni sa paranga si Koniliasi, <<Pa nue ko na totoso vei tugu kopira, sa qa kole vavara pa qua ruma na kue koloko jola korapa rane sara, poni sa votu turu pa moequ ara sa kai tinoni sa poko kikilanga. 31Ko pira sau sisa, <Koniliasi, sa tei tanongoro tu tana Tamasa sa na mua vavara, beto ko ira na mua roiti vaitokai lao tadira na tinoni vavaivasevidi sa qai vei na memeru sa vaqerai na Tamasa. 32Ko mu garunu laoniria pa Jopa sira kaki ko mai kuku valamea si Saimone, kai isongona si Pita. Na tinoni isa sa sa korapa suvere pa ruma ti Saimone na tinoni sa roroiti kopo manugu, ko na ona ruma sa sa tata gu pa nole,> sau. 33Ko sa vei gu sa qa garunu tinoni ko qai riu nyaqogo sao, ko sa jongana jola sa qu lame kamugei. Ko kopira sa agei doru sa qe vaikamu beto pa moena na Tamasa ko mene nongororia sira doru sakasava vei sa garununigo na Bangara ao ko muna pojaria,>> sau si Koniliasi.

Na paranga ti Pita

34Ego poni sa paranga si Pita, <<Kopira qa vakabere vatalea ara sa sa sosoto tugu sa na Tamasa sake totoka kalenia kai tinoni gu. 35Goto pa doru pupuku tinoni sa na tinoni sa pangagania sa na Tamasa beto sa roitinia sisa sa tuvisi, poni sa isa sa na tinoni sa vaqerai na Tamasa sisa. 36Qu tei gigilaimiu tu agou sa na nongoro sa garunu laonia na Tamasa tadira na tinoni Izireli, na nongoro jongana na veveina na bule ti Jisu Karisito, isa na Bangara tadira doru tinoni. 37Ko qu tei gigilaimiu tugu agou sisa vei sa pidoko doru eqa pa pikata gugusu Jiudia, sa podalai tugu pa Qalili pa liguna sa tarae vevelania na paputaiso i Jone. 38Ko qu gigilaimiu tugu agou si Jisu pa Nazareti, isa na tinoni sa udukia na Tamasa ko sa vapugelenia na Gagala Tabuna beto na neqi. Ko sa lekogo lao lameria isa sa doru eqa ko sa roitiniria sa na roiti jongadi beto sa salanaria sira doru sa nganguluria na tomate ikerena, ura na Tamasa sa kole somana tana.

39Ko agei sa na tinoni qe batiria ko qe vavakatoniria sira doru sakasava sa roitiniria isa pa Jerusalema beto kaki gugusu mule pa Jiudia. Isa tugu sa qai vatitia pa korosi ko qai vamatea, 40ba isa tugu sa sa vaturu mulea na Tamasa na rane vinaue, beto sa vabati votunigei na Tamasa sisa. 41Nake tadira doru tinoni sa sa votu isa, ba tadira gu na tinoni sa tei vileria tu perangana ko mai vavakatonia sisa. Ko tamigei gu sa sa votu isa, agei qe teteku na buku tavitia sisa pa liguna sa turu mule pa mate. 42Beto sa sa garunugei isa sagei ko mene tarae vevelania beto mene poja vaneneqinia sa isa tugu sa sa vilea na Tamasa ko mina pituria sira na tinoni toadi beto na matedi sau. 43Ko na veveina tugu isa sa ira doru tinoni kokorotai sa qai vavakatonia, ko ira doru mai vasosotoa isa sa mai taleoso sira na dia sela pa isongona isa qarigu,>> sau si Pita.

Ira na Tinoni Karovodi qai tekua na Gagala Tabuna

44Ego ko totonai sa korapa pojaria i Pita sira na sakasava pira, sa sa goreria na Gagala Tabuna sira doru qai korapa nonogoro pa paranga tana. 45Ko qai gabara jola sira na tinoni Jiu qai vasosotoa na Bangara beto ko qai koko tuti lamea i Pita pa Jopa, ura qai batia sa tadira na tinoni karovodi ba sa vagorea tugu na Tamasa sa nona vaivana, na Gagala Tabuna. 46Ura qai nongororia sa ira na tinoni karovodi sa qai okoto paranganiria na gogoto parangadi beto qai kole vatarasae valavatia sa na Tamasa.

Poni sa paranga si Pita, 47<<I sei mina boka suqutuniria na kolo ko maike boka paputaiso sira pira? Ura ira pira sa qai tekua na Gagala Tabuna vei puputa tugu sa taroiti tadagita,>> sau. 48Beto sa pojaniria i Pita sira ko qai tapaputaiso pa nisongona i Jisu Karisito. Pa liguna sa vei inara, sa qai tepai ira si Pita ko mi suvere mai tadira kaki rane qarigunia.

Currently Selected:

Roiti 10: LGA

Highlight

Copy