Leviticus 7

Vavakatu supaka

1Goyti oyra tamanae vavakatu supaka, sa tataboyna sua: 2Vavakatu supaka mara voyevale te ngoyni ka voyevale ni vavakatu katunuro, no madakae mara repeni te aralequtua sara barasi taboyna. 3Taba voa mara vala bieto: voa te peputu no voa sa sapene koba, 4Keri koromemi no voae doyru, vatanga te keri ziopota no tomanasuae kola, mara pale kesini toringini keri koromemi. 5Boysi sisiama me noyko te sara barasi, sa seva kieke vavakatu ka joyjuni te nako te kue Iaova. Goyti vavakatu supaka. 6Ka lieke te pupu te oyra boysi sisiama sa majala oyke zio goyti, ba me oyke moyna to te ngoyni tataboyna; pitanaki goyti sa tataboyna sua.

7Sa araviri to tamana sa taveni te vavakatu zaqala no vavakatu supaka: Zioa keri vavakatu goyti ne, ona to boysi sisiama sa joyjuni sioroa vavakatu noyene. 8Boysi sisiama sa joyjuni koyna ka oye vavakatu katunuro me sute ae tani koypae pita pupura. 9Susupae vavakatu vere ka niqete te raka ba ka vamoja te sireke tepatepa ba sireke ae boysi sisiama sa joyjuni vavakatu noyene, 10no susupae vavakatu vere, moyna ka aralomirini oela ba kareoa oela, doyra oyra toytu lieke Eroni, mara kena aravirini.

Vavakatu Arakitaki

11Goyti oyra tamanae vavakatu arakitaki boysi sa majala kea la te kue Iaova.

12Sada oye sa kea keke goyti sa lalae ona kima ne, te luboroa ona vavakatu ngeoro kima oye me kea bereti sa kareo isitia no me lomirini oela olivi, bisikiti kasi vo lae isiti no me tilieni oela olivi, oyra keki ka joyjuni ni palava no me lomirini oela olivi. 13Sumae ona vavakatu arakitakia ngeoro kima oye me kea toringini ona keke bereti me lomirini isiti. 14Oye me iro me kieke te susupae adoa bereti sa seva kieke keke, ka kea la te kue Iaova; keke goyti ne ona boysi sisiama sa repeni madakae vavakatu arakitaki te sara barasi. 15Zioa vavakatu arakitakia ngeoro kima mara oyke bieto te tava noyene; kasi vo kuo sua ka pita me doka te saruku.

16Ba sada oye sa joyjuni ona vavakatu voy oye me vavoto pui oye sa puini mana ba keke te ona vato tani, vavakatu mara oyke te tava oye sa joyjuni vavakatu, ba ka pita sa kuo sua ka majala oyke te tava belanae. 17Ka zioa vavakatu sa kuo sua sa doka te vatulua tava mara sebe sia. 18Ka zioa vavakatu arakitaki ka oyke te vatulua tava ne, Iaova kama tuqini vo. Keke oye sa kea sa kareo majalae, bati kama dalo vo; boysi sa oyke ka zioa pita pupura noyene me pale takae ona zaqala.

19Zioa pita pupura sa tebe ka pita kama dalo vo te tamana kasi doyra oyke; mara sebe sia to. Te ka adoa vele zioa pita pupura ka vavakatua, ka boysi sa dalo te tamana sa majala oyke. 20Ba sada ka boysi kama dalo vo sa oyke ka zioa vavakatu arakitaki te Iaova, boysi ta me vaikudoko te kue oyra ona boysi vatasuku. 21Sada ka boysi sa tebe pita sa poto, moyna potoa boysi ba pita pupura kama dalo vo ba ka pita poto, no sa oyke ka zioa vavakatu arakitaki te Iaova ne, boysi ta me vaikudoko te kue oyra ona boysi vatasuku.

Oykea Voa no Madaka sa Taboyna te Tamana

22Iaova savoy te kue Mosese, 23Soynani oyra boysi ni Izireli: Kasi oyke ka voae doyra oyra bulumakao, sipi ba qoti. 24Voae pita pupura sa lie to tani ba sa voyevale ka oyra pita peru ka majala vajaju te ka zoka veke, ba ram kasi mina oyke. 25Ka boysi sa oyke voae kieke pita pupura sa taveni mara vavakatua te kue Iaova ne, me vaikudoko te kue oyra ona boysi vatasuku. 26No te ka ngoyni ram kam kue, ram kasi mina oyke madakae ka roroko ba pita pupura. 27Sada ka boysi sa oyke madaka, oye me vaikudoko te kue oyra ona boysi vatasuku.

Kenae Boysi Sisiama

28Iaova savoy te kue Mosese, 29Soynani oyra boysi ni Izireli: Ka boysi sa iro me vavakatu arakitaki te kue Iaova ne, me iro me takodekea pita pupura sa seva ona vavakatu te kue Iaova. 30Oye me iro me te koyrisi tani keke mara joyjuni te nako te kue Iaova; oye me iro me voa. Me iro toringini me mamanae no me kajara ni la mamana te vakomamanae Iaova sa seva vavakatu kajara puka. 31Boysi sisiama me noyko voa te sara barasi taboyna, ba mamanae ona Eroni no oyra toytulieke. 32Re mo kea doyli dekanae mo vavakatu arakitaki te kue boysi sisiama sa seva kieke kenakena. 33Toytu lieke Eroni oye sa taveni me vavakatua madaka no voae vavakatu arakitaki me pale doyli dekanae sa seva ona kenakena. 34Te vavakatu arakitaki te oyra boysi ni Izireli, aro ko pale mamanae ka kajara poka ni no doylia pita pupura sa taveni veke no ko kea Eroni boysi sisiama no oyra toytulieke sa seva kenae doyra oyra boysi sisiama sa tae me te kue oyra boysi ni Izireli taba sadasada.

35Goyti to tautae keke ka joyjuni te nako te kue Iaova ka kea te kue Eroni no oyra toytulieke te tava ka vatoybo oyra mara nabulu ni Iaova sa seva oyra boysi sisiama. 36Te tava ka vatoybo oyra, Iaova sa voytuni oyra boysi ni Izireli mara kea vavakatu ta te kue oyra sa seva kenae doyra me doka te oyra sapoko aba ka kuo me.

37Savoy ta oye, ta oyra tamanae vavakatu katunuro, vavakatu vere, vavakatu zaqala, vavakatu supaka, vavakatu vavatabu no vavakatu arakitaki, 38sa kea Mosese Iaova te supu ni sainai te tava oye sa voytuni oyra boysi ni Izireli mara iro me doyra vavakatu te kue Iaova, te kadalesana ni sainai.

Currently Selected:

Leviticus 7: BAA

Highlight

Copy