Leviticus 5

1Sada kieke boysi sa ase aratanae sa gae me soyna vatakabola pita oye sa mia no sa utini zozoa ba kama soyna vatakabola vo, oye sa zaqala, me pale lipulipua ona zaqala.

2Ba sada kieke boysi sa tebe ka pita kama dalo vo te tamana moyna seninia pita peru sa lie ba pitapupura ba ka pita qaqara te lua moyna oye kama mia taevo, oye sa zaqala to.

3Ba sada oye sa tebe pita kama dalo vo te senini boysi ka pita sa majala vapoto oye- moyna oye kama mia tae vo, sada oye sa noyneutini pita oye sa joyjuni oye sa zaqala to.

4Ba sada kieke boysi kama noyne vanoyi vo sa maulu me joyjuni ka pita, moyna pita noyi ba pita roka- te ka pita oye sa maulu ulomoa- moyna oye kama mia tae vo, sada oye sa noyneutini ona zaqala ne oye sa zaqala to.

5Sada ka boysi sa zaqala te kieke te oyra ado goyti, oye me varingini ata pita oye sa zaqalae 6no supakae zaqala oye sa joyjuni ne, oye me iro me te kue Iaova kieke sipi quole ba kieke qoti quole sa seva vavakatu zaqala; no boysi sisiama me vavakatu koyna oye me sioroa ona zaqala.

7Sada oye kama moyuni vo me kea lami oye me iro me keri kokoru kau ba keri kokoru qutuni varoqa te kue Iaova sa seva supakae ona zaqala- kieke ona vavakatu zaqala no kieke ona vavakatu katunuro. 8Oye me iro me te kue boysi sisiama, boysi sisiama me kea kineke kokoru sa tavena te vavakatu zaqala. Oye me kubele kokunu, kasi vo kudeke soypa, 9no me repeni la ngoynisoi madakae vavakatu zaqala te nevae sara barasi; sikia madaka mara jilingini la te kotae sara barasi. Keke goyti sa vavakatu zaqala. 10Boysi sisiama me vavakatua la vakeria roroko sa seva kieke vavakatu katunuro me koype tamanae vavakatu no me joyjuni vavakatu me sioroa zaqala te boysi sa joyjuni zaqala, no Iaova me marovelini oye.

11Sada oye kama majala vo kea keri kokoru kau ba keri kokoru qutuni varoqa, oye me iro me kekea ona zaqala kieke kiloqaramu palavae vuiti ona vavakatu zaqala. Oye kasi vo valaeni oela ba pitananabu noyi te palava, bati goyti sa vavakatu zaqala. 12Oye me iro me te kue boysi sisiama, boysi sisiama me gara kieke puda koyrisi sa seva tautae keke nanataru no me noyko toringini te sara barasi vavakatu ka joyjuni te nako te kue Iaova. Goyti sa vavakatu zaqala. 13Te zoka goyti boysi sisiama me joyjuni koyna oye vavakatu me sioroa ka zaqala oye sa joyjuni, no Iaova me marovelini oye. Sikia keke ne, ona boysi sisiama, sa seva ka voyna te vavakatu vere.

Vavakatu supaka

14Iaova savoy te kue Mosese: 15Sada kieke boysi kama kea vo ka pita taboyna sa tavena mara kea te kue Iaova ba kama solini vo, oye sa zaqala to, oye me iro me te kue Iaova sa seva supaka kieke sipi te vau me kareo makomakoa no te pada sa gae majalae siliva ka pada te pada noyqata te oyra boysi sisiama. 16Oye me kea supakae oyra pita oye kama kea moyna vo, te oyra pita taboyna, oye me kea poka pada gae kieke loyma te ngutae no me kea bieto la te kue boysi sisiama, boysi sisiama me vavakatua sipi sa seva vavakatu supaka me sivere ona zaqala oye no Iaova me marovelini boysi noyene.

17Sada kieke boysi sa zaqala no sa joyjuni ka pita sa kupene tamana te Iaova, pitaulomo oye kama noyne voyna vo, oye sa zaqala no me pale ngutae ona zaqala. 18Oye me iro me te kue boysi sisiama sa seva vavakatu supaka, kieke sipi lieke kama makomako vo no te pada sa gae. Te zoka goyti boysi sisiama me joyjuni vavakatu me sivere zaqala oye kama solini vo sa joyjuni no oye mara marovelini. 19Goyti vavakatu supaka; bati boysi goyti sa noyneutini ona zaqala te kue Iaova.

Currently Selected:

Leviticus 5: BAA

Highlight

Copy