Leviticus 4

Vavakatu Zaqala

1Sinani Iaova savoy te kue Mosese, 2Soynani oyra boysi ni Izireli: Sada ka boysi sa zaqala ba kama solini vo no sa joyjuni ka pita sa kupene tamana te Iaova oye me joyjuni mana to oyra vavakatu goyti.

3Sada boysi sisiama taboyna sa zaqala, oye sa vame zaqala te kue oyra boysi, oye me kea me te kue Iaova kieke bulumakao lieke varoqa kama makomako vo sa seva kieke vavakatu zaqala te zaqala oye sa joyjuni. 4Oye me iro me bulumakao lieke te ngoyni ka puka tae te toypaka variere te vakomamanae Iaova. Oye me vakapete koyrisi te boytu bulumakao, no me voyevale te vakomamanae Iaova. 5Bito ta boysi Sisiama taboyna me pale kavia madakae bulumakao no me iro la te toypaka variere. 6Oye me vapujere la pirokete koyrisi te madaka no me repeni kavia madaka vetu sada te vakomamanae Iaova, te tarakenakae pua dodua ngoyni taboyna. 7Boysi sisiama me toyro la kavia madaka te oyra kekeo te sara barasia pita nanabu noyi te vakomamanae Iaova te luoboro toypaka variere. Sikia madaka oye me jilingini la te kotae sara barasia vavakatu katunuro te ngoyni ka puka tae te toypaka variere. 8Oye me palesia bieto voae bulumakao vavakatu zaqala- voa sa sapene koba ba sa sumoto te koba, 9keri koromemi no voae doyru vatanga te keri ziopota, no tomanasuae kola, oye me palesia toringini keri koromemi- 10Sa seva voa ka palesia te bulumakao ka vavakatua te vavakatu arakitaki. Savoy ta oye boysi sisiama me noyko oyra te sara barasia vavakatu katunuro. 11Ba koykoypae bulumakao no totongonia senini, sa seva to boytu no keri nikini, oyra pita ka kuo te luboro senini no kobae- 12Ta, oyra sikia bulumakao oye me iro vajele la te paqarania ngoyni ka kue te ngoyni sa taboynae, ka sia ni kau, no me vakete te nako te kuae kau.

13Sada votungua doyra oyra boysi ni Izireli ka zaqala ba kama solini doyra no ka joyjuni ka pita sa kupene tamana te Iaova, pitaulomo oyra boysi taba kama utini doyra nanaziae zaqala ta, ba oyra ka zaqala to. 14Sada oyra ka utini zaqala oyra ka joyjuni, votungua doyra oyra boysi ni Izireli, mara iro me kieke bulumakao varoqa me doyra vavakatu zaqala no mara iro me te vakomamanae toypaka variere. 15Oyra boysi kajikaji mara vakapete la koyrisi doyra te boytu bulumakao te vakomamanae Iaova, no bulumakao mara voyevale te vakomamanae Iaova. 16Savoy ta oye boysi sisiama taboyna me iro la ngoynisoi madakae bulumakao te luboro toypaka variere. 17Oye me vapujere pirokete koyrisi te madakae bulumakao no me repeni te vakomamanae Iaova vetu sada te tarakenakae pua dodu. 18Oye me toyro la ngoynisoi madaka te oyra kekeoa sara barasi te vakomamanae Iaova te toypaka variere. Sikia madaka oye me jilingini la te kotae sara barasi vavakatu katunuro te ngoyni ka puka tae te toypaka variere. 19Oye me palekesini tabae to voae bulumakao no me noyko te sara barasi, 20no oye me joyjuni te bulumakao goyti, sa seva oye sa joyjuni te bulumakao vavakatu zaqala. Te zoka goyti boysi sisiama me joyjuni sioroa doyra zaqala oyra, no Iaova me marovelini oyra. 21Savoy ta oye oye me iro la Bulumakao te paqarania ngoyni ka kue no me noyko sa seva oye sa noyko bulumakao kinaka. Goyti sa vavakatu zaqala te oyra boysi ni Izireli.

22Sada kieke boysi kinakinaka sa zaqala ba kama solini vo no sa joyjuni ka pita sa kupene tamana te Iaova ona Bangara ne, oye sa zaqala to. 23Sada oye sa utini zaqala oye sa joyjuni, oye me iro moyna meto ona keke, kieke qoti lieke kama makomako vo. 24Oye me vakapete la koyrisi te boytu qoti no me voyevale te ngoyni ka voyevale ni pitapupura ka vavakatu katunuroa te vakomamanae Iaova. Goyti sa kieke vavakatu zaqala. 25Savoy ta oye boysi sisiama me pale ngoynisoi madakae vavakatu zaqala te pirokete koyrisi no me toyro la te oyra kekeo te sara barasi vavakatu katunuro no me jilingini la sikia madaka te kotae sara barasi. 26Oye me noyko tabae voa te sara barasi sa seva oye sa noyko voae vavakatu arakitaki. Te zoka goyti boysi sisiama me joyjuni sioroa zaqala te boysi, no Iaova me marovelini oye.

27Sada kieke boysi ni Izireli sa zaqala ba kama solini vo no sa joyjuni ka pita sa kupene tamana, oye sa zaqala to. 28Sada oye sa utini zaqala oye sa joyjuni, oye me iro moyna me to ona keke te zaqala oye sa joyjuni, kieke qoti quole kama makomako vo. 29Oye me vakapete la koyrisi te boytu vavakatu zaqala no me voyevale te ngoyni ka vavakatu katunuroa. 30Savoy ta oye boysi sisiama me pale ngoynisoi madaka te pirokete koyrisi no me toyro la te oyra kekeoa sara barasi, vavakatu katunuro no me jilingini la sikia madaka te kotae sara barasi. 31Oye me pale kesini bieto voa, sa seva oye sa joyjuni voyna te vavakatu arakitaki, no boysi sisiama me noyko te sara barasi, kakaurua sa vakima Iaova. Te zoka goyti boysi sisiama me joyjuni sioroa zaqala te boysi ta, no Iaova me marovelini oye.

32Sada oye sa iro me kieke lami sa seva ona vavakatu zaqala, oye me iro me lami quole kama makomako vo. 33Oye me vakapete la koyrisi te boytu lami no me voyevale lamia vavakatu zaqala te ngoyni ka voyevaleni vavakatu katunuro. 34Savoy ta oye boysi sisiama me pale ngoynisoi madakae vavakatu zaqala te pirokete koyrisi no me toyro la te oyra kekeoa sara barasi vavakatu katunuro no me jilingini la sikia madaka te kotae sara barasi. 35Oye me pale kesini bieto voa, sa seva oye sa joyjuni voyna te lami vavakatu arakitaki, no boysi sisiama me noyko toringini te sara barasi keke ka joyjuni te nako te kue Iaova. Te zoka goyti boysi sisiama me joyjuni sioroa zaqala te boysi ta, no Iaova me marovelini oye.

Currently Selected:

Leviticus 4: BAA

Highlight

Copy