Leviticus 3

Vavakatu Arakitaki

1Sada ka oye sa kea me ona vavakatu arakitaki, no sa kea kieke bulumakao lieke ba quole, oye me kea me te kue Iaova pitapupura kama makomako vo. 2Oye me vakapete koyrisi te boytu ona pitapupura no me voyevale te ngoyni ka puka tae te toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna. 3Te vavakatu arakitaki oye me kea la vavakatu ka joyjuni te nako te kue Iaova: taba voa ka sapene koba no ka sumoto te koba, 4keri koromemi no voae doyru, no tomanasuae kola, oye me palekesini toringini keri koromemi. 5Sinani oyra toytulieke Eroni mara noyko te sara barasi keri koromemi no voae doyru ka noyko toringini vavakatu katunuro te nako katu, sa seva keke ka joyjuni te nako, kakaurua sa vakima Iaova.

6Sada oye sa kea kieke toytu sipi sa seva kieke vavakatu arakitaki te kue Iaova, oye me kea kieke pitapupura quole ba lieke kama makomako vo. 7Sada oye sa kea kieke sipi, oye me kea la te vakomamanae Iaova. 8Oye me vakapete la koyrisi te boytu ona pitapupura no me voyevale te tarakenakae toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna.

9Te vavakatu arakitaki oye me iro me vavakatu ka joyjuni te nako te kue Iaova. Voae, totongonia voa te peputu ka pote kudeke vatanga te poyda luboro, taba voa ka sapene koba ba ka sumoto te koba, 10keri koromemi no voae doyru, no tomanasuae kola, oye me palekesini toringini keri koromemi. 11Boysi sisiama me noyko te sara barasi keri koromemi no voae doyru sa seva pitanaki, vavakatu ka joyjuni te nako te kue Iaova.

12Sada ona keke oye kieke qoti, oye me kea la te vakomamanae Iaova. 13Oye me vakapete la koyrisi te boytu pitapupura no me voyevale te tarakenakae toypaka variere. No oyra toytulieke Eroni ka boysi sisiama mara repe leqitini madaka te sara barasi taboyna. 14Te oyra pita oye sa kea oye me joyjuni keke goyti te kue Iaova te nako: taba voa sa sapene koba ba sa sumoto te koba, 15keri koromemi no voae doyru vatanga te keri ziopota, no tomanasuae kola, oye me palekesini toringini keri koromemi. 16Boysi sisiama me noyko te sara barasi taboyna sa seva pitanaki, vavakatu ka joyjuni te nako, sa kakauru. Tabae voa ona Iaova.

17Tamana goyti me kuo sua taba sadasada te oyra sapoko aba kala kuo me, be ka ngoyni kam kue: ram kasi mina oyke ka voa ba madaka.

Currently Selected:

Leviticus 3: BAA

Highlight

Copy