Leviticus 23

1Iaova savoy te kue Mosese, 2Soynani oyra boysi ni Izireli: Goyti qo tava poyu ro ko vene, tava poyu te Iaova sa vene, ram mam araququni no vazaka aqo ro.

Tava Taboyna

3Unomo tava ram mam jaju, ba te vavetua tava sa tava taboyna tava mamana, tava araququni no vazaka. Ram kasi mina joyjuni ka jaju; te ngoyni ram kam kue, sa tava taboyna te Iaova.

Paqolokoye no Bereti sa kareo Isitia

4Goyti tava poyu te Iaova sa vene, tava araququni ram mam soyna vaga la te oyra sada sa taveni: 5Paqolokoye te Iaova sa toto te jolupua ngada te vamanovatia tava te ukene kinaka. 6Te vamanoloymae tava te ukene ta sa toto tava poyu te Iaova te Bereti sa kareo Isitia; te luboro vetu tava ram mam oyke bereti sa kareo isitia. 7Te tava kinaka ram mam araququni no mam vazaka aqo ro no kasi joyjuni ka jaju. 8Te vetu tava ta ram mam kea la mina vavakatu kam joyjuni te kue Iaova te nako. No te vavetua tava ram mam araququni no mam vazaka aqo ro no kasi joyjuni ka jaju.

Oyra vere kinaka

9Iaova savoy te kue Mosese, 10Soynani oyra boysi ni Izireli: Sada ram kam puka la te vodu Aro me koyna ram no sada kam pale lezu ba vuiti, mina iro me te kue boysi sisiama uke kinakae lezu ba vuiti ram kam pale. 11Oye me kajara puka ni uke ta te vakomamanae Iaova voy Iaova me tuqini ram, boysi sisiama me kajara puka ni la uke ta te tava bielanae tava taboyna. 12Te tava ram kam kajara puka ni ukea lezu ba vuiti, ram mam vavakatua lami lieke sa kieke avea kama makomako vo, sa seva vavakatu katunuro te kue Iaova 13mam kea toringini la vavakatu vere keri kilogaramu palava ka aralomirini oela vavakatu ka joyjuni te kue Iaova te nako, sa kakauru no mina kea toringini vati kema luka vaini. 14Ram kasi mina oyke bereti, ba lezu ka vanoqa ba vuiti varoqa, me doka te tava mina iro me oyra keke goyti te kue Bangara. Tamana goyti mara miatoyke oyra sapoko aba ka kuo me ne, te oyra ngoyni ram kam kue.

Tava poyu te vavetua vuiki.

15Te tava bielanae tava taboyna, ngea vetu vuiki totongoni tava ram mam iro me ukea vavakatu kajara puka. 16Ngea loymagnulu tava doka bielanae vavetua tava taboyna, no ram mam vala mina kekea vuiti varoqa te kue Iaova. 17Te oyra ngoyni ram kam kue, iro la keri puobo kam joyjuni ni keri kilogaramu palava, mara aralomirini isiti, sa seva kieke vavakatu kajara puka te vere kinaka te kue Iaova. 18Kea toringini bereti goyti vetu lami lieke sa kieke avea doyra no kama makomako doyra, kieke toytu bulumakao no keri qoti lieke. Oyra pita goyti mara vavakatu katunuroa te kue Iaova, mara vala toringini doyra vavakatu vere no vavakatu luka, vavakatu ka joyjuni te nako, kakaurua sa vakima Iaova. 19Bieto ta mam vavakatua kieke qoti lieke ona vavakatu zaqala no keri lami, me kieke avea doyru ona vavakatu arakitaki. 20Boysi sisiama me kajara puka ni keri lami te vakomamanae Iaova sa seva kieke vavakatu kajara puka, me kea toringini beretia vere kinaka. Oyra keke goyti ka taboyna te kue Iaova mara oyke to oyra boysi sisiama. 21Te tava ta ram mam araququni no vazaka aqo ro no kasi joyjuni ka jaju. Tamana goyti mara miatoyke oyra sapoko aba ka kuo me ne, te oyra ngoyni ram kam kue.

22Sada ram kam toto pale oyra pita titiba ram kam teba, kasi papala doka te tomana suae mina barue ba kasi jojoka vele napu. Toyro koyna oyra boysi oza no kuokapa. Aro Iaova mina Bangara.

Tava poyu te ave Varoqa

23Iaova savoy te kue Mosese, 24Soynani oyra boysi ni Izireli: Te tava kinaka te vavetua ukene ram mam miatoyke kieke tava mam mamana, Ram mam araququni no vazaka aqo ro sada sa qila kuili. 25Kasi joyjuni ka jaju sa seva ram kam joyjuni susupae sada, ba kea la mina keke kam joyjuni te kue Iaova te nako.

Tava ka Sivere zaqala

26Iaova savoy te kue Mosese, 27Te vamanoa tava te vavetua ukene sa tava mara sivere zaqala. Ram mam araququni no vazaka aqo ro no kasi oyke ka pitanaki, no mam kea mina keke kam joyjuni te kue Iaova te nako. 28Kasi joyjuni ka jaju te tava noyene, bati tava noyene sa tavae mara sivere mina zaqala te vakomamanae Iaova mina Bangara. 29Ka oye sa oyke pitanaki te tava noyene me vaikuodoko moyna to te kue oyra ona boysi. 30Aro me voyevale te kue oyra ona boysi ka oye sa joyjuni ka jaju te tava noyene. 31Ram kasi mina joyjuni ka jaju. Tamana goyti mara miatoyke oyra sapoko aba ka kuo me ne, te oyra ngoyni ram kam kue. 32Tava goyti sa kieke tava poyu ram mam mamana, ram kasi mina oyke ka pitanaki. Te viluvilu vaziae tava te ukene noyene me doka te viluvilua tava bielanae ram mam noyne toyro mina tava taboyna.

Tava poyu te Toypaka kakaolo

33Iaova savoy te kue Mosese, 34Soynani oyra boysi ni Izireli: Te vamanoloymae tava te vavetua ukene tava poyu te toypaka kakaolo te Iaova sa toto, no me doka te vavetua tava. 35Tava kinaka ram mam araququni no vazaka aqo ro; kasi mina joyjuni ka jaju. 36Te vetu tava mam kea la mina keke kam joyjuni te kue Iaova te nako, no te vaviua tava ram mam araququni no vazaka aqo ro no mam kea la mina keke kam joyjuni te kue Iaova te nako. Tava ta sa kukupanae araququni; kasi mina joyjuni ka jaju.

37Goyti oyra tava poyu te Iaova sa taveni, ram mam tarimini sa seva mina araququni no vazaka aqo ro no mam iro me oyra mina keke kam joyjuni te kue Iaova te nako, vavakatu katunuro no vavakatu vere, vavakatu arakitaki no vavakatu luka sa taveni te susupae tava. 38Oyra keke goyti ka torangae oyra mina keke te tava taboyna te Iaova no torangae oyra mina keke no ka pita ram kam puini no oyra keke tutuna te pongo ram kam kea te kue Iaova.

39Si toto te vamanoloymae tava te vavetua ukene, sada ram kam pale soypa verea mina barue, mam noyne toyro tava poyu te kue Iaova te vetu tava; te tava kinaka sa tava mamana, no te vaviua tava sa tava mamana napu to soy. 40Te tava kinaka ram mam pale vere sa noyi sua te oyra azu, no kavia borungu, voyqea azu sa kue voyrangae no bobosu vevere te tavele vuru, no mam kola te vakomamanae Iaova mina Bangara te vetu tava. 41Mam noyne toyro sada goyti sa kieke tava poyu te kue Iaova vetu tava te susupae ave. Tamana goyti mara miatoyke oyra sapoko aba ka kuo me ne, noyne toyro te vavetua ukene. 42Mam kuo te toypaka vetu tava: Tabae mina ram boysi vatasuku ni Izireli mam kuo te toypaka 43voy oyra sokutu arasumae mina mara utini aro ko toyro ram boysi ni Izireli te toypaka te sada aro ko koype kesini ram Ijipi. Aro Iaova mina Bangara.

44Si Mosese sa soyna vatakabola te kue oyra boysi ni Izireli oyra tava poyu te Iaova sa taveni.

Currently Selected:

Leviticus 23: BAA

Highlight

Copy