Leviticus 12

Vadoyloa Sinae So sada sa bieto puodopuodo

1Iaova savoy te kue Mosese, 2Soynani oyra boysi ni Izireli: Sada kieke quole sa araero no sa vapuodo kieke solieke ne kama dalo vo vetu tava, sa seva oye kama dalo vo te sada oye sa pale moro te oyra quole. 3Te vaviua tava solieke mara pote nubia. 4Quole ta me peri tolongonu tulu tava sinani me dalo te sada oye sa vapuodo so. Oye kasi vo tebe ka pita sa tataboyna ba kasi vo la te ngoyni taboyna doykana me paqolo ona sada vavadalo. 5Sada oye sa vapuodo kieke so quole, keri vuiki quole ta kama dalo vo, sa seva te sada oye sa pale moro te oyra quole. Oye me peri moyna to unomongulu-unomo tava sinani oye me dalo te sada oye sa vapuodo so.

6Sada sa paqolo soypa ona sada vavadalo te kue toytulieke ba toytuquole, oye me iro me te kue boysi sisiama te ngoyni ka puka tae te toypaka variere lami me kieke avea ona vavakatu katunuro no kieke kokoru qutuni ba kieke kokoru kau ona vavakatu zaqala. 7Boysi sisiama me vavakatua la te vakomamanae Iaova me sivere ona zaqala quole noyene, no doykana oye me dalo te sada oye sa vapuodo so. Goyti oyra tamanae quole sa vapudo kieke solieke ba so quole.

8Sada oye kama majala vo kea lami, oye me iro me keri kokoru kau ba keri kokoru qutuni varoqa, kieke ona vavakatu katunuro no kieke ona vavakatu zaqala. Te zoka goyti boysi sisiama me joyjuni vavakatu me sivere ona zaqala oye, no oye me dalo.

Currently Selected:

Leviticus 12: BAA

Highlight

Copy