Genesis 49

Jikope Sa Manani Oyra toytuleike

1Jikope sa keleke me oyra toytuleike, no sa voy goyti oye: <<Mam araququni me, no aro me soynani ram pita me doka te kue ram te oyra tava sa kuo me.

2<<Araququni me no ase vanata ram toytuleike Jikope;

Mam vanata tamaemina Izireli.

3<<Rubeni re ko qo soleike puodo kinaka,

Qo karapota, ko lalae qo karapota,

Poyu sua te majamajala, poyu sua te karapota.

4<<Tututolo seva bi sa aqe, re kama majala mo kinaka,

Bati re ko puka la te ona visu tamam,

Te zabua qo visu no ko joyjuni jaju roka.

5<<Simioni no Livae kuru kamake,

Doyru lato aratara sa jaju te varokae oyra pita.

6Aro kama voyqo una oyra toritori kuru joyjuni peka oyru.

Aro kama tuqini qo me vatovato una oyru te doyru toritori.

Bati oyru kuru voyevale oyra boysi sada kuru moma,

No kuru voye vajokoleike bulumakao,

Kuru vasevani keike napi sa vagasi oyru.

7Dango me kuo te doyru moma, sa karapota varoka,

No te doyru ngengiri, sa barokeqili!

Aro me va piriparakata oyru te vodu te Jikope

No me pirete oyru te kue oyra Izireli.

8<<Juda, oyra likam moyra vasera amo re;

Koyrisim re me ngodo kokunua doyra oyra mo kana;

Oyra likam moyra kapata juolo te tarakenakam re.

9Juda; re ko seva keike laeoni,

Re ko vele napu te voyevalea pita ko pale, toquleike.

Sa seva laeoni sa tongunu juolo no sa bokolo,

Ada ka oye sa majala aleve oye?

10Puru te buoe lata kasi me takesi te kue Juda,

Oyra sokutu arasumae oye moyra kuo mata tabasada,

Me doka te sada me la me oye me buoe lata,

No oyra tubia boysi moyra vauteve oye.

11Oye sa duke toyro ona toytu dongki te keike voyqe azu vaini.

Ona dongki te voyqe vaini sa noyi sua;

Oye me toboni luka vaini oyra ona bubute,

Oyra ona bubute me mesiri seva luka vaini.

12Matae oye me mesiri koye mesiria vaini,

Kekerea oye me sile koye meleke.

13<<Zebuloni me kuo vatanga te masi,

Oyra luqu te ona ngoyni moyra lekae oyra vaka;

Arapasenae ona vodu me doka Saidoni.

14<<Aesaka sa seva keike dongki karapota

Sa bokolo juolo te arakaluoboroa keri tanga ero.

15Sada oye sa mia ona ngoyni zezengona noyi,

No vodu te oye sa aravakima.

Oye me kuputu no iro te avarae ero

No moyra vasisideke oye, me jaju seva sika.

16<<Dani me vatakabola tutungono te kue oyra ona boysi,

Sa seva keike sinaqi ni Izireli.

17Dani me seva keike duole te tavelea zoka,

Keike duole paza sa kuo te ngavae zoka.

Sa lube obae nikini ose

Soy boysi sa gae ose me suru kadika la.

18<<Kei, Iaova, aro ko perini mo aravakavele re.

19<<Qadi moyra suqe oye keike kuae doyra oyra boysi aravaisoko,

Ba oye me suqe oyra, me koyle sia la oyra.

20<<Pitatitiba te Asa me masuru,

Oye me vanama pitanaki sa gae buoe lata.

21<<Napatalae me seva keike dia peru sa talopu,

Sa soyqe oyra toytu noyinoyi.

22<<Josepa me seva keike oyzu vaini,

Sa peta vanoyi, sa diere vatanga te tavelea bi,

Voyqea sa puka la te dodu.

23Oyra ona kana ka puke varoka oye;

Oyra ka poyqo oye moyra vaseka oye.

24Ba ona tona kama alava vo,

Koyrisia oye sa karapota sua,

Te karapotae koyrisi Bangara te Jikope,

Te ona aramitoyki sepati, no bakoso ni Izireli.

25Te ona aramitaki Bangara te tamam, oye sa saete amo re,

Te ona karapota Bangara varavaranga oye sa manani amo re

Te mana sa tae me te rani zaka sua,

Mana te luka lavora sa tae te sara juolo lua,

Mana te ngenge pukae oyra toytum no oyra mo pitapupura.

26Mana te tamam sa koye mana te oyra supu ni tori,

Sa koye oyra pita noyi te oyra supu ka kuo tori moyna.

Oyra taba mana goyti mara voyko la te boytu Josepa,

Te neneqae toytu buoe

Te luboroa doyra oyra likae.

27<<Bejimani me seva keike kokosolaqoto aravalei;

Te saruku oye sa oyke oyra pita pupura,

Te vilu oye sa ota oyra pita oye sa pale.>>

28Oyra goyti manokeri sinaqi ni Izireli, no goyti pita tamae doyra sa soynani oyra sada oye sa manani no sa koyna oyra mana te susupae pita sa gae oye.

Lenae Jikope

29Sa voy ta oye, Jikope sa koyna oyra aravautini goyti: <<Sinani aro vatanga to me lei me la kuo una oyra toraqu ka lei moyna. Ram mam luodo aqo te ngoyni ka ludoni oyra tamaqu te lenga sa kuo te lua te Eporoni boysi ni Hiti, 30te lenga te lua ni Makapela, vatanga Mamere te vodu ni Kenani, lenga Ebarahami sa ngota toringini lua te kue Eporoni, boysi ni Hiti, me keike ngoyni luludona. 31Te ngoyni noyene ka ludoni moyna Ebarahami no ona quolekutae oye Sera. Te ngoyni noyene ka ludoni vele Aisake no ona quolekutae oye Ribeka, no te ngoyni noyene aro ko ludoni vele Lia. 32Lua no lenga soy te ngoyni ta ka ngota te kue oyra boysi ni Hiti.>>

33Sada Jikope sa beito varuini oyra toytuleike, oye sa kutopoka la nikini te visu sa lei, no ka luodo oye te ngoyni ka luodoni oyra ona boysi.

Currently Selected:

Genesis 49: BAA

Highlight

Copy