Genesis 50

1Josepa sa noyqata varoka sa onge tamae no oye sa qila no sa noko oye. 2Sinani Josepa sa vasoypani oyra boysi araole ka jaju te kue oye, moyra tilini somuku momoqutua tamae oye Izireli voy kasi vo tavuzaka, si oyra boysi araole ka tilini somuku momoqutua oye. 3No oyra ka joyjuni jaju goyti sa gae vatingulu tava, bati ta sa voy muinia sada ka joyjuni jaju goyti. No oyra boysi ni Ijipi ka neqiti ni Izireli vetungulu tava.

4Sa paqolo soypa sada ka noyqata, Josepa sa soynani oyra boysi matamata te Pero, <<Sada ram kam kemani aqo ro ne, ram mam iro qo vatana goyti te kue Pero. Mam soynani oye, 5<Sada tamaqu sa vatanga lei, oye sa soynani aqo ro me maulu no sa voy, <<Vanata! Aro vatanga me lei; re mo luodo aqo ro te kokobo aro ko vanama moyna te vodu ni Kenani.>> Sinani mo vamoyo aqo ro me la luodo ne tamaqu; no beito ta me vele napu me,> >> sa voy.

6Pero sa voy, <<Mo zo puka la no luodo tamam, sa seva oye sa soynani amo re ko maulu ni moyna,>> sa voy.

7Si Josepa sa zo puka la me la luodo tamae. Taba oyra boysi matamata te Pero, oyra kajikaji arasosodae no oyra taba boysi ka kinikini jaju te vodu ni Ijipi ka zo puka una oye, 8oyra pupu te Josepa no oyra likae no oyra pupu te tamae, ka zo una. Oyra doyra so, no oyra pita pupura to ka kuo sua te vodu ni Qoseni. 9Oyra sekitulutulu no oyra boysi ka gae ose ka zo puka una oye. Taba varoka boysi ka koype oye. 10Sada oyra ka me doka Atadi te ngoyni ka boritini vuiti, vatanga Jodani, te ngoyni ta oyra ka taburanga vapoyu, no oyra ka noyqata varoka; no Josepa sa noyne toyro neqitinia tamae te ngoyni noyene vetu tava. 11Sada oyra boysi ni Kenani ka mia taburanga te ngoyni ka boritini vuiti Atadi, ka voy goyti oyra, <<Te ngoyni goyti oyra boysi ni Ijipi ka noyne toyruni sadae noyqata poyu sua,>> ka voy. Sa voy ta oye si, te ngoyni ta vatanga Jodani, ka vataritingini Ebolo- Miziremu.#50.11 Te ngelu ni Iburu lolopoa ngeoro Ebolo- Miziremu ne noyqata te oyra boysi ni Ijipi.

12Si oyra toytu Jikope ka joyjuni pita oye sa voytuni moyna oyra. 13Oyra ka iro la momoqutua oye te vodu ni Kenani, no ka la luodo oye te lenga te lua ni Makapela, vatanga Mamere, lenga Ebarahami sa ngota toringini moyna takodekea lua me ngoyni luludona te kue Eporoni boysi ni Hiti. 14Te rokusua Josepa sa luodo tamae, oye sa vele napu la Ijipi, sa koype oyra likae no taba oyra boysi ka koype una oye te luodua tamae.

Josepa sa vasisiele isi te oyra likae

15Sada oyra likae ka mia tamae doyra sa lei moyna, ka voy goyti oyra, <<Ata pita me doka sada Josepa aba kolini ita no sa noyne me soka te kue ita taba oyra jaju roka ita kata joyjuni moyna te kue oye, ne?>> ka voy 16Sa voy ta oye, oyra ka peqani la ngeoro goyti te kue Josepa, ka voy, <<Tamam sa koyna rami vatana goyti sada korovita leivo: 17<Goyti pita ram mam soynani Josepa: Aro ko pine amo re mo marovelini zaqalae doyra oyra likam te pita roka oyra ka joyjuni moyna te kue re,> sa voy. Sinani kami pine amo re mo marovelini zaqala te rami nabulu te Bangara te tamam,>> ka voy. Sada Josepa sa pale doyra vatana, oye sa qila.

18Sinani oyra likae ka me, no ka kapata la te tarakenakae oye. <<Rami oyra mo sika re,>> ka voy.

19Ba sa voy goyti Josepa te kue oyra, <<Kasi isi. Be sa voy ko pale deideirena te Bangara te ro ne? 20Ram kam noyne mam varoka aqo ro, ba Bangara sa sokani pita noyi, soy me voto te pita sa doka sinani, me vakavele tu te taba boysi, sa voy. 21Sinani, moyna kam isi. Aro me miatoyke ram no oyra mina so,>> sa voy. No oye sa vasisiele oyra no sa ngeoro emoso te kue oyra soy.

Lenae Josepa

22Josepa sa kuo una oyra pupu te tamae te vodu ni Ijipi. Oye sa doka keikeubi mano avea 23no oye sa mia tulu sapokoa oyra toytu Eparemu. Sa seva to oyra toytu Makoy toytuleike Manasa oye sa vene oyra moyra ona so vatasuku tani.

24Sa voy goyti Josepa te kue oyra likae, <<Aro vatanga me lei. Ba Bangara me tude ram, no me koype kesini ram te vodu goyti te vodu oye sa puini moyna te kue Ebarahami, Aisake no Jikope.>> 25No Josepa sa soynani oyra toytuleike Izireli moyra maulu no sa voy, <<Bangara me tude ram, no ram mam iro la poydaqu sada ram kam kesini ngoyni goyti,>> sa voy.

26Si Josepa sa lei sada oye sa keikeubi mano avea. No rokusua oyra ka tilini somuku momoqutua oye soy kasi vo tavuzaka, oye ka toyro te doulu te vodu ni Ijipi.

Currently Selected:

Genesis 50: BAA

Highlight

Copy