Genesis 48

Manasa no Eparemu

1Te rokusua sada ta, oyra ka soynani Josepa, <<Vanata!Tamam re sa moro.>> Oye sa koype keri toytuleike Manasa no Eparemu oyra ka zo la. 2Sada oyra ka soynani Jikope, <<Mia! Tomleike Josepa sa me doka te kue re.>> Izireli sa karapota no talasara napu, sa tapatongunu me te ona visu.

3Sa voy goyti Jikope te kue Josepa, <<Bangara varavaranga sa takabula moyna me te kue ro te kumala ni Luzu te vodu ni Kenani, no ngoyni oye sa manani aqo ro 4no sa voy goyti oye te kue ro, <Vanata! Re mo vere vataba no me zadava oyra mo boysi. Re mo tamaea doyra oyra boysi te sinaqi lata, no aro me koyna oyra vodu goyti me doyra vodu vatasuku oyra sokutu arasumam re tabasadasada,> sa voy.

5<<Sa voy ta oye, Jikope sa soynani Josepa, Keri tomleike kuru puodo moyna te vodu ni Ijipi korovita me qo ro goyti sa kini te ro; Eparemu no Manasa me qo ro, sa seva to Rubeni no Simioni kuru kini ta ro. 6Ka so re ko vapuodo vele te rokusua doyru oyru moyra so te re; oyra moyra pale una to kenakena te kue keri likae doyra. 7Sada aro ko kuo Paddani,#48.7 Te oyra sada rokusua ngoyni goyti ka kelikini Mesopotamia. ko seipele me, aro ko tepere noyqata poyu, sada Riseli sa lei te vodu ni Kenani, sada ita kata koyuni me ngoyni Eparata. Si aro ko luodo oye te ngoyni noyene te tavelea zoka sa zo voy la Eparata,>> sa voy. (Ta ne kumala ni Betelema.)

8Sada Izireli sa mia keri toytuleike Josepa, oye sa tana, <<Ada oyru goyti ne?>> sa voy.

9Josepa sa vatavele la te kue tamae, <<Oyru keri qo so ro Bangara sa koyna aqo te ngoyni goyti.>>

Sa voy goyti Izireli, <<Mo koype me oyru te kue ro soy aro me manani oyru,>> sa voy.

10Matae Izireli sa borososa bati oye sa valaka varoka, no oye kama mia vanoyi vo ka pita. Si Josepa sa koype vatenge me keri toytuleike te kue oye, no tamae sa noko no sa kange oyru. 11Izireli sa soynani Josepa, <<Aro kama noyne qo me mia vele matam re, no mia! Sinani Bangara sa vamoyo te kue ro me mia vele keri mo so,>> sa voy.

12Sinani Josepa sa vanukere kesini oyru te popukua Izireli no sa kapata juolo la te lua te tarakenakae oye. 13No Josepa sa kinikini me oyru, sa toyro Eparemu te neva dekanae tani sa taliqe voy la te koyrisi moyria Izireli no Manasa te neva moyria tani sa taliqe voy la te neva dekanae koyrisi Izireli, no sa kinikini vatenge me oyru te kue oye. 14Ba Izireli sa arapiuru ni koyrisi no sa voyko koyrisi dekanae te boytu Eparemu oye sa so, no koyrisi moyria sa voyko te boytu Manasa soleike puodo kinaka soy.

15Sinani oye sa manani Josepa no sa voy,

<<Tani Bangara te oyru tamaqu, oye

Ebarahami no Aisake kuru nabuluni,

Bangara sa qo sepati

Te ngavae qo tu doka tava ini,

16Matizana sa vakavele moyna aqo te tabae pita taka

Me manani keri soleike goyti.

Moyra kelekeni oyru taritongoqu ro no taritongoa doyru oyru tamaqu

Ebarahami no Aisake,

No oyru muru zadava te vodu ni te lua,>> sa voy.

17Sada Josepa sa mia tamae sa vakapete la koyrisi dekanae te boytua Eparemu; oye kama kemani varoka vo, si oye sa pale toyro koyrisi tamae me vakesini te boytu Eparemu me vetere la te boytu Manasa, sa voy 18Sa voy goyti oye te kue tamae, <<Kasi voyna ta, mama, oye goyti sa soleike puodo kinaka si; mo vakapeteni re koyrisi dekanam te boytu oye,>> sa voy.

19Ba tamae sa pejae, no sa voy goyti oye, <<Aro ko utini, toquleike, aro ko utini. Oye me keike tubia boysi, no me karapota. Ba likae oye sa so me karapota koyini oye, no oyra sokutu arasumae oye moyra vapuqele me oyra tubia boysi,>> sa voy. 20Si oye sa manani oyru te tava noyene no sa voy,

<<Te taritongoa mibu rabu oyra boysi ni Izireli moyra pine ni mana:

Bangara me manani ram seva Eparemu no Manasa moyra voy,>> sa voy.

Si Izireli sa vakineke Eparemu koyini Manasa.

21Sinani Izireli sa soynani Josepa, <<Vanata! Aro vatanga me lei, ba Bangara me una ram no me kinikini vavelini la ram te vodu te oyra mina vavapoudo. 22No te kue re, sa seva ko koye oyra likam, aro me koyna amo re lua aro ko pale moyna te kue oyra boysi ni Amori te aratara,>> sa voy.

Currently Selected:

Genesis 48: BAA

Highlight

Copy