Genesis 47

1Josepa sa zo la no sa la soynani Pero, <<Tamaqu ro no oyra likaqu, ka koype oyra doyra sipi no oyra doyra bulumakao no oyra pisipita taba oyra ka tungene, ka tae me te vodu ni Kenani sinani ka kuo te kolabae Qoseni,>> sa voy. 2Oye sa vene loyma oyra likae no sa vatakabola oyra te tarakenakae Pero.

3Pero sa tanani oyra kamake, <<Ata mina jaju ne?>>

Oyra ka vatavele la te kue Pero, <<Rami mo nabulu kami oyra sepati, sa seva ka joyjuni moyna me oyra tamaetamae mami,>> ka voy.

4Ka voy vele goyti oyra te kue Pero, <<Rami mami me kuo ne to ngoyni te vodu goyti, bati sada saqosaqo sa taka varoka te vodu ni Kenani no rami mo nabulu sa kareo sisiu moyra oyke oyra mami pitapupura. Si, sinani, mo vamoyoni rami mo nabulu mami kuo te kolabae Qoseni,>> ka voy.

5Sinani Pero sa soynani Josepa, <<Sinani tamam no oyra likam soy kame te kue re, 6no vodu ni Ijipi sa kuo te karapota te re; mo toyro tamam no oyra likam te ngoyni sa noyi sua te takodekea vodu ta. Vamoyo oyra moyra kuo Qoseni. Sada re ko utini ka kuo te kue oyra kavia boysi ka majilini miatoyke pitapupura ne, re mo vasoypani oyra moyra miatoyke oyra pitapupura te ro,>> sa voy.

7Sinani Josepa sa kinikini la Jikope tamae oye no sa vadere oye te tarakenakae Pero. Rokusua Jikope sa manani Pero, 8Pero sa tanani Jikope, <<Ada via avem re?>> Sa voy.

9No sa voy goyti Jikope te kue Pero, <<Avea qo teiloteilo ro sa keikeubi tolongonu ave. Avequ sa kavia no sa taka, no kama araviri vo oyra doyra ave teiloteilo oyra tamaqu.>> 10Sinani Jikope sa manani Pero no sa kesini oye.

11Si Josepa sa toyro vanoyi tamae no oyra likae te vodu ni Ijipi no sa koyna oyra ngoyni sa noyi suae lua te vodu noyene, te kumala ni Ramese, sa seva Pero sa voytuni oye. 12Josepa sa koyna vele tamae no oyra likae no oyra taba pupu te tamae no oyra doyra so soy pitanaki.

Josepa no sada saqosaqo

13Sada saqosaqo sa karapota varoka si, kama zari vo pitanaki te totongonia kolaba noyene, oyra Ijipi no Kenani ka kuo taka bati sa karapota sada saqosaqo. 14Josepa sa quqene beito tabae kisa ka ngotani poytu lezu oyra boysi ni Ijipi no Kenani, no sa iro la te pade buoe te Pero. 15Sada kisa te oyra boysi ni Ijipi no Kenani sa bosi, oyra boysi ni Ijipi ka me te kue Josepa no ka voy, <<Koyna rami pitanaki. Be sa voy rami mami lei to te tarakenakae matam re? Oyra mami kisa sa bosi vasua to,>> ka voy.

16Josepa sa vatavele la, <<Sinani vame oyra mina pitapupura, Soy aro me arasokani pitanaki oyra mina pitapupura, bati sa kareo sua to mina kisa,>> sa voy. 17Si oyra ka iro me oyra doyra pitapupura te kue Josepa, no oye sa koyna oyra pitanaki sa sokani oyra doyra ose, sipi, no qoti, no oyra doyra bulumakao no oyra doyra dongki soy. Te ave noyene oye sa koyna oyra pitanaki sa arasokani tabae oyra doyra pitapupura.

18Sada sa paqolo soypa la ave noyene, oyra ka me soynani noypo Josepa, <<Rami kama soyko mami pekani amo re buoe pita sa tuna, mami kisa sa bosi moyna, no oyra mami pitapupura ko tungene beito to re, kareo vele to ka pita kami majala koyna amo re buoe, ba seninia mami to no mami lua soy sa kuo sua, ka voy. 19Be sa voy rami mami lei te tarakenakam re, rami no mami lua soy? Mo ngota rami no mami lua soy mami arasukani pitanaki, no rami mami kuo sika te kue Pero no oye me tungene mami lua soy. Mo koyna rami oyra poytu soy rami mami tu no kasi mami lei, no soy mami lua kasi vo kuo ulomo,>> ka voy.

20Si Josepa sa ngota beito koyna Pero tabae lua te vodu ni Ijipi. Voduvua doyra oyra boysi ni Ijipi ka ngungutae doyra lua, bati sada saqosaqo sa karapota varoka te kue oyra. Tabae lua te vodu ni Ijipi sa tungene Pero, 21no Josepa sa vaseka oyra boysi ka jaju koyna Pero, toto te keike tomana doka te keike tomanae vodu ni Ijipi. 22Ba, Lua te oyra boysi sisiama to kama ngotavo oye, bati Pero sa koyna moyna to oyra kisa, no oyra sa zari doyra kisae pitanaki Pero sa koyna oyra. Ta soy oye oyra kama ngungutae doyra lua.

23Sa voy goyti Josepa te kue oyra boysi, <<Vanata! Tava ini, aro ko ngota ram no mina lua soy koyna Pero, goyti oyra poytu ram mam la teba te lua. 24Ba sada sa miqa oyra mina pitatitiba, ram mam koyna Pero keike te susupae loyma. Vati ne me kuo te kue ram, mam teba soma la te mina baruoe no me mina pitanaki ram no oyra mina pupu no oyra mina so soy,>> sa voy.

25<<Re ko vakavele mami tu, mo kemani rami mami buoe; rami mami kuo sika te kue Pero,>> ka voy.

26Si Josepa sa vadere keike tamana te zozoa lua te vodu ni Ijipi sa doka te tava ini- keike loyma te oyra doyra pitatitiba sa ona Pero. Doyra lua to oyra boysi sisiama kama tungene vo Pero.

27Sinani oyra boysi ni Izireli ka kuo te vodu ni Ijipi te kolabae Qoseni. Oyra ka tungene taba oyra pita no sa ngenge puka tabae doyra no ka taba sua.

28Jikope sa kuo te vodu ni Ijipi manovetu ave, oye sa doka te keikeubi vatingulu vetu avea. 29Sa vatanga sada Izireli me lei, oye sa keleike Josepa toytuleike no sa voy goyti te kue oye, <<Sada re ko kemani aqo ro ne, mo toyro teteparae koyrisim te sarajuoloa doyli qu ro, no mo puini aqo ro, re mo vatakabola vato noyi no kuo vanadu. Kasi luodo aqo ro te vodu ni Ijipi, 30ba sada aro ko mamana una oyra tamaqu ka lei moyna, mo iro kesini aqo Ijipi, no mo luodo aqo te ngoyni ka luoduni oyra,>> sa voy.

Josepa sa vatavele la, <<Aro me vavoto pita re ko soyna.>>

31Sa voy goyti Jikope, <<Mo maulu te kue ro.>> Josepa sa maulu te kue oye, no Izireli sa vazaka Bangara sada oye sa kapata juolo te sarapokae ona visu.

Currently Selected:

Genesis 47: BAA

Highlight

Copy