Genesis 39

Josepa No Quolekutae te Potipa

1Sinani oyra boysi ni Isimeli ka koype vajele la Josepa Ijipi no ka ngungutae oye te kue Potipa boysi ni Ijipi, keike te oyra boysi matamata te Pero, oye buoe te oyra palata.

2Iaova sa kuo una Josepa, no oye sa kuo vanoyi, no Josepa sa kuo te toke te ona buoe, boysi ni Ijipi. 3Sada ona buoe sa mia Iaova sa kuo una Josepa no Iaova sa vamajele oye te pisipita taba oye sa joyjuni, 4Potipa sa kemani Josepa no sa vene oye me nabulu ni tani no sa toyro oye sa voyvoytoni pisipita taba oye sa tungene. 5Pasina te sada ona buoe sa vamata Josepa te ona toke no te pisipita taba oye sa tungene, Iaova sa manani oyra pisipita taba te boysi ni Ijipi. Mana te Iaova sa kuo te taba pita Potipa sa tungene, te ona toke, no te ona barue soy bati Josepa sa kuo koype oye. 6Potipa sa vasoypani tabae pisipita sa tungene te aramitoyke te Josepa, no oye kama voytuni vele vo ka pita ba pitanaki oye sa oyke to. Josepa sa poreketea leike no sa miminoyi soy.

7Ba kama muini vo quolekutae te ona buoe sa toto mia vale no sa soyko oye, no sa voy goyti, <<Me vakapoyto aqo ro te qo visu!>> sa voy.

8Ba Josepa sa pejae no oye sa voy te kue quolekutae te ona buoe, <<Qo buoe kama voytuni vele vo ka pita te ona toke, taba pisipita oye sa tungene sa vasoypani aqo ro me miatoyke. 9Kareo ka oye sa majala koye aqo ro te toke goyti. Qo buoe kama korini vo aqo ro me tebe ka pita oye sa tungene, ba re to kama mao vo aro me tebe amo, bati re ko ona quolekutae. Be sa voy aro me joyjuni vele pita roka sua goyti no me zaqala te kue Bangara ne?>> Sa voy. 10Quole sa pine Josepa susupae tava, ba oye kama tuqini vo me vakapoyto oye te ona visu, ba vakakue oye.

11Ba keike tava, sada Josepa sa puka la te toke, sa joyjuni ona jaju, no kareo neto ka nabulu sa kuo te luoboro toke. 12Quole sa la zadeke ona bubute Josepa no sa voy, <<Me vakapoyto aqo ro te visu!>> Ba Josepa sa paki sa jikele juolo kesini toke, ba ona bubute sa kuo te koyrisia quole.

13Sada quole sa mia oye sa toyro sia me ona bubute te koyrisi oye no sa jikele juolo kesini toke, 14oye sa keleike la oyra ona nabulu, sa voy goyti oye, <<Me mia pita goyti, boysi ni Iburu ka koype me te kue ita me arakabelini ita! Oye sa puka me goyti me pam koype aqo ro sa voy, ba aro ko ukulu. 15Sada oye sa ase aro ko ukulu vakarapota, oye sa toyrosia me ona bubute te tavele qu ro, no sa jikele juolo kesini toke,>> sa voy.

16Quole sa sute ona bubute Josepa te tavelea, sa doka sada ona buoe Josepa sa vele napu me te toke. 17Sinani quole sa soynani oye vatana: <<Sika ni Iburu re ko koype me te kue ita sa me te kue ro me arakabelini aqo ro sa voy. 18Ba sada aro ko ukulu vakarapota, oye sa toyrosia me ona bubute te tavele qu ro no sa jikele juolo kesini toke,>> sa voy.

19Sada ona buoe Josepa sa ase vatana ona quolekutae sa soynani oye zozoa pita Josepa sa joyjuni, oye sa muma varoka. 20Oye sa kinikini Josepa no sa la toyro oye te pade aranukoso, te ngoyni buoe lata sa toyruni oyra ona boysi aranukoso.

Ba sada Josepa sa kuo te pade aranukoso, 21Iaova sa kuo una oye; sa vatakabolani oye vato noyi, no boysi sa mia toyke pade aranukoso sa kemani Josepa. 22Si boysi sa miatoyke pade aranukoso sa vasoypani Josepa me perini oyra taba boysi ka kuo te pade aranukoso, no oye me kinikini taba oyra jaju ka joyjuni te ngoyni ta. 23Boysi sa miatoyke pade aranukoso kama soynatoyini vo to ka pita sa kuo te ona aramitaki Josepa, bati Iaova sa una Josepa no sa vamajele oye te taba pita oye sa joyjuni.

Currently Selected:

Genesis 39: BAA

Highlight

Copy