Genesis 34

Daina no oyra boysi ni Sekemu

1Keike tava Daina, toytuquole Lia sa vapuodo te kue Jikope sa zo me la tude oyra quole ni te vodu noyene. 2Sada Sekemu toytuleike Ama boysi ni Hivaiti, buoea vodu noyene, sa mia oye, oye sa koype oye no oye sa vakapoyto oye no oye sa joyjuni jaju roka te kue oye. 3Pongoa oye sa la te kue Daina toytuquole Jikope no oye sa noyne oye no sa ngeoro emoso te kue oye. 4Sa voy goyti Sekemu te kue tamae oye Ama, <<Mo pale koyna aqo ro soquole goyti me qo quolekutae,>> sa voy.

5Sada Jikope sa ase ona soquole ka vapoto, oyra toytuleike ka kuo te sanoyqa ka perini oyra pita pupura, Jikope sa kuo vakapo to sa doka sada oyra toytuleike ka seipele me te kumala.

6Sa voy ta oye, Ama tamae Sekemu sa zola voy mela vakangiere Jikope. 7Sinani oyra toytuleike Jikope ka seipele me te sanoyqa no oyra ka ase pita sa doka. Oyra ka neqitini no ka moma varoka bati Sekemu sa joyjuni pita aravamamaqatae goyti te kue oyra Izireli, oye sa vakapoyto toytuquole Jikope- pita kama gae vo me doka.

8Ba sa voy goyti Ama te kue oyra, <<Toqulieke ro Sekemu sa poyu ona noyni te kue mina soquole ram. Kei, ram mam vamoyo oye me ona quolekutae. 9Ram mam arareki me te kue rami; no ram mam vamoyuni rami mami pale oyra toytuquole mina no ram mam pale oyra toytuquole mami rami. 10Ram mam kuo koype rami; vodu goyti sa mao te kue ram, mam kuo te vodu, mam ngunguta no ngungutae no mam tungene taba oyra pisipita ka kuo te vodu goyti,>> sa voy.

11Sinani sa voy goyti Sekemu te kue tamae Daina no oyra vavini, <<Mam kemani aqo ro, no aro me koyna ram ka pita ram kam soyko. 12Mam koduni ngutae quole no keke aro me vanama te pasi pada ram kam soykuni, no aro me ngota ka pita ram kam soyko ni aqo. Koyna aqo ro quole goyti me qo quolekutae,>> sa voy.

13Bati vavinia doyra Daina sa poto moyna, oyra toytuleike Jikope ka soyna taba oyra ngeoro tatakiu te kue Sekemu no tamae oye Ama. 14Ka voy goyti oyra te kue oyru, <<Rami kama majala mami joyjuni oyra pita goyti; rami kama majala mami kea vavini mami te kue boysi kama pote vo koykoypa kopikae. Goyti sa pita aravamamaqatae te kue rami, ka voy. 15Rami kami majala tuqini ram sada ram mam seva rami mina pote tabae oyra mina leike. 16Sa seva goyti rami kami majala tuqini oyra toytuquolea mami moyra arareki te kue ram no rami mami pale oyra toytuquolea mina ram. No rami mami me kuo koype ram no kata majala seva to keike boysi te kue ram. 17Ba sada ram kama tuqini mina mam pote koykoypa kopikae mina, rami mami koype velini vavini mami no mami zo,>> ka voy.

18Oyra doyra ngeoro sa asa noyi te kue Ama no toytuleike oye Sekemu. 19Soleike varoqa goyti ka padapadani tabae oyra pupu te tamae, oye kama peri vo te joyjunia pita ka soyna oyra, bati oye sa soyko varoka toytuquole Jikope. 20Sa voy ta oye Ama no toytuleike oye Sekemu kuru zola te mataqamanae kumala kuru la va aseni oyra boysi te kumala lata. 21Oyru kuru voy <<Oyra boysi goyti ka arakitaki vanoyi te kue ita, mata vamoyo oyra moyra kuo te dia vodu no moyra ngunguta no ngungutae te dia vodu; dia vodu ita sa taqala ka majala kue oyra. Ita kata majala reike oyra toytuquolea doyra no oyra ka majala reike oyra dia soquole ita soy. 22Ba oyra boysi goyti moyra tuqini moyra kuo una ita mata seva to keike boysi sada oyra dia leike ka pote koykoypa kopikae doyra, seva oyra ka pote koykoypa kopikae doyra. 23Oyra doyra bulumakao, oyra pita ka tugnene no taba vele oyra doyra pita pupura soy me dia ita. Si ita mata tuqini oyra moyra me kuo koype ita>> kuru voy.

24Sa voy ta oye, tabae doyra oyra leike ka juolo la te mataqamanae kumala lata ka tuqini pita Ama no toytuleike oye Sekemu kuru soyna, no tabae doyra oyra leike te kumala lata ka pote koykoypa kopikae doyra.

25Sa paqolo soypa tulu tava, sada tabae doyra oyra aba sa voyra seninia doyra, keri toytuleike Jikope, Simioni no Livai, keri vavinia Daina, kuru iro doyru lato aratara no kuru la voye vapulese kumala lata no kuru voyevale beito tabae doyra oyra leike. 26Oyru kuru voyevale Ama no toytuleikea oye Sekemu te doyru lato aratara no kuru la koype velini Daina te ona toke Sekemu no kuru zo. 27Oyra toytuleike Jikope ka la vavaoro te kumala lata ngoyni ka vapotoni vavinia doyra. 28Oyra ka la pale oyra doyra pitapupura no oyra bulumakao no dongki no taba oyra pita ka tungene te kumala lata no te oyra doyra barue. 29Oyra ka iro beito oyra doyra tutupari no ka koype tabae oyra doyra quole no oyra doyra so, no ka iro tabae pita te oyra toke.

30Sa voy goyti Jikope te kue oyru Simioni no Livai, <<Rabu kabu vame taka te kue ro, kabu vananabu roka aqo ro te kue oyra boysi ni Kenani no oyra boysi ni Perizi, oyra boysi ka kuo te vodu goyti. Ita kata kavia to no sada oyra ka araququni me moyra me voye aqo ro, aro no oyra boysi te qo pupu mami upu,>> sa voy.

31Ba kuru voy goyti oyru, <<Be sa voy oye sa vasevani vavinia maru raru quole aravabu ne?>> Kuru voy.

Currently Selected:

Genesis 34: BAA

Highlight

Copy