Genesis 35

Jikope Sa vele napu la Betele

1Sinani sa voy goyti Bangara te kue Jikope, <<Mo zo la Betele no mo la kuo gei, no mo la vadere koyna Bangara, keike sara taboyna te ngoyni gei, oye sa takabula moyna te kue re sada re ko poykini likam Iso,>> sa voy.

2Si Jikope sa soynani oyra ona pupu no taba oyra ka kuo una oye, sa voy goyti oye, <<Mam toyro sia taba oyra bangara mololo te oyra vodu veke ram kam tungene, no ram mam vadoylo noypo tanamina no mam soka oyra mina bubute, sa voy 3Sinani ram mam zo me, ita mata zo la Betele, ngoyni aro me vadere ni sara taboyna koyna Bangara, oye sa tuqini aqo ro te sada aro ko noyqata no oye sa zo koype aqo ro te tabae ngoyni aro ko tae,>> sa voy. 4Si oyra ka koyna bito Jikope taba oyra doyra bangara mololo ka iro me te vodu veke no oyra doyra moto te talangae doyra no Jikope sa luodo peka oyra te sarajuoloa azu oaki ni Sekemu. 5Sinani oyra ka tasoybaka, no Bangara sa vapoytini oyra isi oyra kumala lata ka kuo te aralequtua doyra, soy kareo ka oye me koyle rokisini oyra.

6Jikope no oyra boysi taba ka kuo una oye ka me doka Luzu (ka kelikini Betele) te vodu ni Kenani. 7Te ngoyni noyene Jikope sa vadere keike sara taboyna, no oye sa vataritingini Eli Betele,#35.7 Te ngelu ni Iburu lolopoa ngeoro Eli Betele ne Bangara ni Betele. bati te ngoyni ta Bangara sa takabulae moyna te kue oye sada oye sa poykini likae.

8Nabulu quole sa asetoyini moyna Ribeka, ka kelikini Dibora, sa lei te ngoyni noyene no ka luodo oye te sarajuoloa azu oaki vatanga Betele. Sa voy ta oye si, ka vataritingini ngoyni ta Aloni Bakuti.#35.8 Te ngelu ni Iburu lolopoa ngeoro Aloni Bakuti ne azua qila.

9Te rokusua Jikope sa kesini me vodu ni Paddani Aramu,#35.9 Te oyra sada rokusua ngoyni goyti ka kelikini Mesopotamia. sa seipele vele, Bangara sa takabula napu me te kue oye no sa manani oye. 10No sa voy goyti Bangara te kue oye, <<Toritongom re Jikope, ba re sinani kasi doyra kelikini amo Jikope; toritongom re Izireli.>> Sa voy ta oye si, Bangara sa vataritingini oye Izireli.

11No sa voy goyti Bangara te kue oye, <<Aro Bangara varavaranga, mo vere vataba no zadava. Tubia boysi no taba oyra tubia boysi moyra tae me te kue re, no oyra buoe lata moyra sokutu tae me te kue re. 12Vodu aro ko koyna moyna Ebarahami no Aisake no Aro ko koyna vele amo re, no Aro me koyna oyra sokutu arasumam re vodu goyti,>> sa voy. 13Sinani Bangara sa kesini oye te ngoyni oye sa vakangiere ni oye.

14Jikope sa vadere keike katora vojele te ngoyni Bangara sa vakangiere ni oye, no oye sa jilingini la vavakatu luka vaini te sarapokae katora vojele no oye sa jilingini vele la oela te sarapokae katora vojele. 15Jikope sa kelikini ngoyni Bangara sa vakangiere ni oye Betele.

Lenae Riseli no Aisake

16Sinani oyra ka kesini Betele. No sada oyra aba ka kuo vakoyuni ngoyni kumala ni Eparati, sa doka sada Riseli me puodopuodo no sa taka varoka me puodo so. 17No sada oye sa taka varoka me vapuodo so, quole sa mia toyke Riseli sa soynani oye, <<Kasi isi, re ko tungene noypo vele keike soleike,>> sa voy. 18Sada Riseli sa angasae no sa lei, oye sa vataritingini soleike Beni-oni, ba tamae sa vataritingini oye Bejimani.

19Si Riseli sa lei ka luodo oye te tavelea zoka sa tae la Eparati (ta ne Betilema) 20Te sarapokae kokoboa oye Jikope sa vadere ni keike katora vojele, katora vojele ta sa lalae kokoboa Riseli sa doka te tava ini.

21Sinani Izireli sa nukoro napu la sa joyjuni ona toypaka pua te nevae la pade vako ni Eda. 22Sada Izireli aba kuo te kolaba noyene, Rubeni sa la vakapoymo Bila, ona quolesika tamae no Izireli sa ase pita goyti.

Jikope sa tungene manokeri toytuleike: 23Oyra toytuleike Lia.

Rubeni soleike puodo kinaka te Jikope.

Simioni, Livai, Juda, Aesaka no Zebuloni. 24Oyru toytuleike Riseli.

Josepa no Bejimani. 25Oyru toytuleike Bila, quolesika te Riseli.

Dani no Naputalae 26Oyru toytuleike Zilipa quolesika te Lia.

Gadi no Asa.

Goyti oyra toytuleike Jikope ka puodo te vodu ni Paddani Aramu.#35.26 Te oyra sada rokusua ngoyni goyti ka kelikini Mesopotamia.

27Jikope sa seipele vele me te kue tamae oye Aisake te kumala ni Mamere vatanga Kiriati Aba (ta ne Heboroni) ngoyni Ebarahami no Aisake kuru kue moyna. 28Tunurinia ave Aisake sa tu sa keike ubi viungulu ave. 29Oye sa beito ona ngasapua no sa lei no ka luodo oye te ngoyni ka luodoni oyra ona boysi, oye sa valaka varoka sinani oye sa lei. No keri toytuleike oye Iso no Jikope kuru luodo oye.

Currently Selected:

Genesis 35: BAA

Highlight

Copy