Genesis 26

Aisake no Abimeleki

1Sinani sada saqosaqo sa doka napu te vodu, sa seva sa doka moyna te sada te Ebarahami- no Aisake sa zo la te kue Abimeleki buoe lata ni pilisitia, te kolabae Qera. 2Iaova sa takabula te kue Aisake no sa soynani oye, <<Moyna ko juolo la Ijipi; mo kuo te vodu Aro ko soynani amo mo kue. 3Mo kuo aba ne te vodu goyti, no aro me kuo una amo no me manani amo bati aro me koyna amo re no oyra sokutu arasumam vodu goyti no aro me vadere qo maulu ko joyjuni moyna te kue tamam Ebarahami. 4Aro me vazadeve oyra sokutu arasumam re, tabae doyra me seva oyra sisiriputu te rani no me koyna beito oyra poyua vodu goyti, no te sokutu arasumam re taba oyra tubia boysi te vodu ni te lua moyra pale mana, 5bati Ebarahami sa ase vuanga qu ro no oye sa joyjuni oyra pita aro ko soynani oye me joyjuni, sa miatoyke oyra qo vato, oyra ngeoro aro ko ngirini no oyra qo tamana>> 6Si Aisake sa la kuo Qera.

7Sada oyra leike te ngoyni noyene ka tana qoylo zozoa ona quolekutae, sa voy goyti oye, <<Oye sa vaviniqu,>> bati oye sa isini soynae, <<Ribeka sa qo quolekutae.>> Oye sa nanana, <<Moyna voy oyra leike te ngoyni goyti ka voyevale aqo soy moyra pale Ribeka, bati oye sa quole kaluole,>> sa voy.

8Sada Aisake sa kuo vamonini te ngoyni noyene, Abimeleki buoe lata ni pilisitiani sa mi juolo la te poranae ona toke, no da soy oye sa mia Aisake sa noko no vabeire Ribeka ona quolekutae. 9Abimeleki sa keleike me Aisake no sa soynani oye, <<Vanata! Sa tuna oye sa mo quolekutae moyna re! Be sa voy re ko soyna, oye sa vavinim ne?>> Aisake sa vataveleni la oye, <<Bati aro ko nanana, aro moyra voyevale toyini aqo zozoa oye,>> sa voy.

10Sa voy goyti Abimeleki, <<Be sa voy re ko joyjuni pita goyti te kue rami? Be voy keike te oyra qo boysi me vakapoymo moyna mo quolekutae, no re mo vadoka zaqala te kue rami,>> sa voy.

11Abimeleki sa vabanabanani oyra boysi taba: <<Ka boysi sa tebe leike goyti no ona quolekutae, sa tuna to me lei,>> sa voy.

12Aisake sa teba ona barue te vodu ta no te ave noyene ona papala sa koyini pita oye sa teba, sa gae keikeubi sada, bati Iaova sa manani oye. 13Oye sa boysi tutupari, no ona tutupari sa nukoro puka doka sada oye sa tutupari sua. 14Oye sa tungene taba varoka oyra vaua sipi no bulumakao no taba oyra ona nabulu soy, sa voy ta oye, oyra boysi ni pilisitia ka nananaqorani oye. 15Si taba oyra quarae bi ka para moyna oyra nabulu te sada te Ebarahami tamae oye, oyra boysi ni Pilisitia ka kupene no ka luodo sapinini lua.

16Sinani Abimeleki sa soynani Aisake, <<Mo kesini rami; re sinani ko karapota koye rami,>> sa voy.

17Sa voy ta oye, Aisake sa kesini ngoyni noyene no sa la papamui te malaku ni Qera no sa la kuo te ngoyni ta. 18Aisake sa para noypo oyra quarae bi ka para moyna te sada te tamae oye Ebarahami, no ka luodo moyna oyra boysi ni pilisitia te rokusua Ebarahami sa lei, no oye sa vataritingini oyra quarae bi oyra taritongo sa kelikini moyna oyra tamae.

19Oyra nabulu te Aisake ka para quara te malaku no ka tepere te gnoyni ta bi noyi. 20Ba oyra boysi ni Qera ka mia toyke oyra pita pupura ka vatoqa oyra boysi ka mia toyke pita pupura te Aisake no ka voy goyti, <<Bi goyti sa mami moyna to rami.>> Sa voy ta oye, Aisake sa vataritingini bi noyene <<Aravatuqa,>> bati oyra ka vatoqa oye. 21Sinani oyra ka para noypo vele keike bi quara, no ka aravatuqa napu to; si oye sa kelikini ngoyni ta Sitina.#26.21 Te ngelu ni Iburu lolopoa taritongo Sitina ne arasotoa. 22Oye sa kesini ngoyni noyene no sa la para noypo vele keike bi quara, no kareo ka oye sa arakituqani vele. Oye sa vataritingini Reoboti,#26.22 Te ngelu ni Iburu lolopoa taritongo Reoboti ne taqala. oye sa voy, <<Sinani Iaova sa koyna ita ngoyni sa taqala no ita mata zopuka vanoyia te vodu goyti,>> sa voy.

23Oye sa kesini ngoyni noyene no sa zo la Biaseba. 24Te kose noyene Iaova sa takabula te kue oye no sa voy, <<Aro ko Bangara te tamam Ebarahami. Kasi isi, bati aro ko kuo una amo re; Aro me manani amo re no me vazadeve oyra sokutu arasumam bati Ebarahami sa nabulu ni aqo ro,>> sa voy.

25Aisake sa vadere keike sara taboyna te ngoyni noyene no sa keleke taritongoa Iaova. Beito oye sa joyjuni ona toypaka pua te ngoyni noyene no oyra ona nabulu ka para vele keike quarae bi soy.

26Keike sada, Abimeleki sa kesini me Qera, sa koype ona boysi arasosodae Ahuzati, no Pikolo buoea doyra oyra ona vai. 27Aisake sa tanani oyra, <<Be sa voy ram kam me te kue ro, ram kam kanani aqo no kam sure vazo aqo?>> sa voy.

28Oyra ka vatavele la, <<Rami kami mia vanoyi Iaova sa kuo una amo re; si rami kami voy, <Ita mata maulu te arakaluboroa dia>- te arakaluboroa mami rami no re soy. Rami mami vadere vato- arapokitini te kue re 29re kasi mo joyjuni ka pita roka te kue rami, sa seva rami kama joyjuni mami ka pita roka te kue re ba rami kami noyne no saete amo re, no kami vazo amo te bole. Sinani Iaova sa manani amo re>> ka voy.

30Aisake sa vanama koyna oyra aki poyu, no oyra ka aki no turepe luka soy. 31Beilanae, te saruku pipi oyra leike ka ara maulu napua tana doyra. Sinani Aisake sa peqani va zo oyra, no oyra ka kesini oye te luoboro bole.

32Te tava noyene, oyra nabulu te Aisake ka me no ka soynani oye zozoa keike quarae bi oyra ka ba para to. Ka voy goyti, <<Rami kami tepere bi!>> 33Aisake sa kelikini quara bi Siba no te tava ini ka vataritingini kumala lata ni Biaseba.

34Sada Iso sa vatingulu avea, oye sa reke Juditi toytuquole Biari boysi ni Hiti, no Basemati toytuquole Eloni boysi ni Hiti. 35Oyru kuru vaneqete toyro Aisake no Ribeka.

Currently Selected:

Genesis 26: BAA

Highlight

Copy