Genesis 25

Lenae Ebarahami

1Ebarahami sa reike vele keike quolekutae, taritongoa oye Ketura. 2Oye sa vapuodo koyna oye Zimurani, Jokisani, Medani, Midiani, Isibako no Sua. 3Jokisani sa vapuodo Seba no Dedani; no oyra sokutu arasumae Dedani, oyra boysi ni Asurimu, oyra boysi ni Letusimu no oyra boysi ni Leumimu. 4Oyra toytu Midiani ne, Epa, Epoy, Hanoki, Abida no Eleda. Oyra taba goyti ka sokutu arasumae Ketura.

5Ebarahami sa vasoypani beito Aisake taba pita oye sa tungene. 6Ba sada oye saba tu, oye sa kea kavia keke te kue oyra toytuleike ka puodo te kue keri quolesika, no sa peqani kesini oyra te kue toytuleike oye Aisake te vodu neva sa pukae me ngada.

7Tunurinia ave Ebarahami sa tu sa keikeubi vetungulu loyma ave. 8Sinani Ebarahami sa lei sada oye sa valaka varoka, no ka luodo oye te ngoyni ka luodoni oyra ona boysi. 9Keri toytuleike oye, Aisake no Isimeli kuru luodo oye te lenga ni Makapela, vatanga Mamere, te lua te Eporoni toytu Zoha boysi ni Hiti, 10lua Ebarahami sa ngota moyna te kue oyra boysi ni Hiti. Ebarahami no ona quolekutae oye Sera ka luodo kire oyru te ngoyni noyene 11Te rokusua leinae Ebarahami, Bangara sa manani toytuleike oye Aisake, oye sa la kuo vatanga Bia-Lai Roi.

Oyra Toytuleike Isimeli

12Goyti toritoria Isimeli, toytuleike Ebarahami, oye sa puodo te kue Ega quole ni Ijipi, ona quolesika Sera, sa vapuodo te kue Ebarahami.

13Goyti taritongoa doyra oyra toytuleike Isimeli, ka vatutele oyra te aravatutoloa doyra puodo: Neboti soleike puodo kinaka te Isimeli; no Keda, Adibeli, Mibusuma, 14Misima, Duma, Masa, 15Hadadi, Tema, Jetu, Napisi, no Kedema. 16Goyti oyra toytuleike Isimeli no goyti oyra taritongoa doyra oyra manokeri boysi kinakinaka te doyra kumala no pupu. 17Tunurinia ave sa tu Isimeli, sa keikeubi tolongonu vetu ave; sinani oye sa lei, no ka luodo oye te ngoyni ka luodo ni oyra ona boysi. 18Oyra sokutu arasumae oye ka kuo te kolabae Havila doka Soy, vatanga te arapasenae Ijipi sa zo voy la Aseria. No oyra kama kuo vakeike doyra oyra likae doyra.

Jikope no Iso

19Goyti toritoria Aisake toytuleike Ebarahami.

Ebarahami sa vapuodo Aisake, 20no Aisake sa vatingulu avea sada oye sa reke Ribeka toytuquole Betuele boysi ni Aramu te vodu ni Paddani Aramu,#25.20 Te oyra sada rokusua ngoyni goyti ka kelikini Mesopotamia. vavinia Lebani boysi ni Aramu.

21Aisake sa vivisini la ona quolekutae te kue Iaova bati oye sa moymoyre. Sinani Iaova sa tuqini ona vivisi, no ona quolekutae oye Ribeka sa iro so. 22Keri so kuru araqora te pipisia oye, no Ribeka sa voy, <<Be sa voy pita goyti sa doka te kue ro?>> si, oye sa tanani la Iaova.

23Sa voy goyti Iaova te kue oye,

<<Keri tubia boysi kuru kuo te luoboro pipisim re, no keri boysi kuru kuo te kue re muru aravoylaka;

Keike te oyru me karapota koyini keike,

No oye sa kaji me nabuluni oye sa so,>> sa voy.

24Sa voto sada oye me vapuodo so, da soy, keri toytuleike vaqe kuru kuo te pipisia oye. 25Soleike sa puodo kinaka sa mesiri, no koypae oye sa poro polu sa seva bubute vulu; no sa voy ta oye, ka vataritingini Iso. 26Te rokusua ta, likae oye sa puodo, Oye sa pale toyro obae nikini Iso; si, oye ka vataritingini Jikope.#25.26 Te ngelu ni Iburu lolopoa taritongo Jikope ne, oye sa papala taru vanadu te oba. Aisake sa unomongulu avea sada Ribeka sa vapuodo Iso no Jikope.

27Oyru keri so leike kuru nuokoro puka te kaji, no Iso sa taruini saraka te sanoyqa, sa boysi kaluarani saraka te sanoyqa, ba Jikope sa boysi mamaduili, sa kuovakapo te toypaka pua. 28Aisake sa noyne vamajele Iso bati sa noyini oyke zioa pitaperu, ba Ribeka sa noyne vamajele Jikope.

29Keike sada Jikope sa vamoja kasakasa, Iso sa seipele me te sanoyqa, oye sa saqo. 30Iso sa voy goyti te kue Jikope, <<Dada, mo koyna aqo ro kavia kasakasa mesiri ta! Aro ko saqo varoka.>> (Ta te soy oye ka vataritingini vele oye Idomu.#25.30 Te ngelu ni Iburu lolopoa taritongo Idomu ne, mesiri.)

31Jikope sa vatavele la, <<Kinakasua mo ngungutae te kue ro tava ini mo pita tutungono ka vasukumatani soleike puodo kinaka,>> sa voy.

32Sa voy goyti Iso, <<Mia aro vatanga me lei, ata pita me saetini aqo ro pita tutungono ka vasukumatani soleike puodo kinaka ne?>> Sa voy.

33Sa voy goyti Jikope, <<Kinakasua re mo maulu te kue ro>> Oye sa maulu te kue Jikope, no sa ngungutae ona pita tutungono ka vasukumatani soleike puodo kinaka te kue Jikope.

34Sinani Jikope sa koyna oye kavia bereti no kavia kasakasa. Oye sa aki no sa turepe bi, no sa deire sa zo to. Sa voy ta oye, Iso kama noyne vamajele vo pita tutungono ka vasukumatani soleike puodo kinaka.

Currently Selected:

Genesis 25: BAA

Highlight

Copy