Genesis 24

Aisake no Ribeka

1Te sada goyti Ebarahami sa valaka varoka, no Iaova sa manani oye te pisipita taba oye sa joyjuni. 2Sa voy goyti Ebarahami te kue ona nabulu sa kajisua ni oyra te toke oye sa matani pisipita taba oye sa tungene, <<Voyko me koyrisim te sarajuoloa doyli qu ro. 3Aro ko soyko re mo maulu te kue Iaova, Bangara ni rani no vodu ni te lua, soy re moyna ko poyta koyna ona quolekutae toquleike ro te kue toytuquolea doyra oyra boysi ni Kenani, oyra boysi aro ko kuo koype. 4Ba re mo la te qo vodu vatasuku no oyra toraqu soy, mo la poyta koyna quolekutae toquleike Aisake,>> sa voy.

5Ba sa voy goyti nabulu, <<Be sa voy sada quole ta kama tuqini vo me koype me aqo ro te vodu goyti? Be sa voy aro me koype velini la tomleike re te vodu re ko la kesini moyna me sadane ba?>> Sa voy.

6Ebarahami sa vatavele la, <<Mo noyne toyro kasi koype vavelini la toquleike te ngoyni noyene, 7Iaova, Bangara ni rani, sa koype vajele moyna aqo ro te kue oyra boysi te tamaqu no te qo vodu vatasuku no oye sa puini moyna te kue ro, sa maulu te kue ro, sa voy goyti, <Te kue oyra sokutu arasumam re Aro me koyna oyra vodu goyti>- oye me peqani ona matizana me kinikini amo re soy re mo majala pale koyna toquleike ro keike quolekutae te vodu ta. 8Ba moyna quole kama tuqevo me koype amo re, sinani re mo talopu te maulu goyti re ko pokitini te kue ro. Ba moyna to ko koype vavelini la toquleike ro te ngoyni gei,>> sa voy. 9Oye si, nabulu sa voyko la koyrisi te sarajuoloa doylia ona buoe oye Ebarahami, no sa pokitini ona maulu me joyjuni pita Ebarahami sa soyku ni oye.

10Sinani nabulu sa pale mano kamele te ona buoe, no sa iro taba oyra pita majamajala te kue ona buoe. Oye sa tasoybaka la Aramu Naharaimu#24.10 Te oyra sada rokusua ngoyni goyti ka kelikini Mesopotamia. no sa zo la te kumala lata ni Naoa. 11Oye sa vatongene vajele oyra kamele vatanga te quarae bi te paqarania kumala lata; kati zo voy te vilu sa voto sada te oyra quole moyra juolo me, moyra sope bi.

12No nabulu sa vivisi, savoy goyti oye, <<Iaova, Bangara te qo buoe Ebarahami, mo vavoto vanoyi qo soyko te tava ini, no mo vatakabola mo vatonoyi te kue qo buoe Ebarahami. 13Mia! Aro ko deire goyti vatanga te quarae bi te ngoyni oyra toytuquolea doyra oyra boysi te kumala lata moyra me sope ni bi. 14So quole varoqa oye aro me voy te kue oye <Kei, mo voykovajele mo koybo, mo koyna aqo ro bi me turepe> no oye me voy, <Re mo turepe bi, no aro me sope vele koyna bi oyra mo kamele>- vamoyo oye to me quole re ko vene koyna mo nabulu Aisake. Be doka pita goyti ne, aro me utini re ko vatakabola mo vatonoyi te kue qo buoe,>> sa voy.

15Korovita bito vo vivisi oye, da soy Ribeka sa la puqele me no oye sa iro ona koybo te avarae. Oye toytuquole Betuele, no Betuele toytuleike Melika, quolekutae te Naoa likae Ebarahami. 16Ribeka sa kaluole sua no mamaruku, korovita vatengevo ka leike. Oye sa juolo la te quarae bi sa vapoda ona koybo no sa puka vele napu me.

17Nabulu te Ebarahami sa dada la soy me tepere oye, <<Kei, mo kea aqo ro ngoyni bi te mo koybo me turepe,>> sa voy.

18Sa voy goyti oye, <<Turepe bi, qo buoe>> no sa dada vajele koybo te koyrisia, no sa koyna oye bi.

19Te rokusua Ribeka sa koyna oye bi, sa voy goyti oye, <<Aro me sope vele koyna bi oyra mo kamele, doka sada oyra moyra beito turepe bi,>> sa voy. 20Oye sa dada nite la te parepare bi sa kuo te ona koybo, no sa jikele vele la te quarae bi sa la sope vataba bi, no sa sope bi sa gae beito tabae oyra ona kamele. 21Nabulu kama ngeoro vo, sa mia vale to oye, me mia utini moyna Iaova sa vavoto ona zozo, ba kareo.

22Sada oyra kamele ka beito turepea bi, nabulu sa pale keike solongo qolu sa poyu kisae no keri zeku qolu sa gae mano kisa siliva. 23Oye sa tanani quole, <<Kei mo soynani aqo, ada ona soquole te re ne? be sa voy te toke te tamam sa kuo kuqulumo kami majala latu poymo rami kose ini ba?>> sa voy.

24Oye sa vatavele la te kue oye, <<Aro toytuquole Betuele, toytuleike Melika sa vapuodo koyna Naoa,>> sa voy. 25No sa voy vele goyti oye, <<Rami sa kuo te mami toke taba sisiu kava ka majala poymo oyra mo kamele no pitanaki moyra oyke, no sa seva to kuqulomo ram kam majala poymo kose ini,>> sa voy.

26Sinani nabulu sa kapata juolo no sa vazaka Iaova, 27no sa voy goyti oye, <<Vazaka Iaova, ona Bangara qo buoe Ebarahami, bati oye kama lure vo ona vatonoyi no kuovanadu te kue qo buoe. Iaova sa kinikini me qo zozo te ona toke toraea qo buoe,>> sa voy.

28Soquole varoqa sa jikele la te toke te sinae, no sa soynani oyra pita sa doka. 29Ribeka sa kuo vavini leike ka kelikini Lebani, no Lebani sa jikele la te paqarani te kue nabulu te bi quara. 30Sada oye sa mia soypa solongo qolu te zengoa no keri zeku zozongo qolu te koyrisi vavini, no sa ase soypa vatana Ribeka sa soyna, pita nabulu sa soynani oye, oye sa zo la te kue nabulu te Ebarahami, da soy! Oye sa deire koype oyra kamele te tavelea bi quara. 31No sa voy goyti oye, <<Zo me, koype aqo ro, re keike boysi sa manani amo Iaova. Be sa voy re aba ko deire to te paqarani goyti? Aro ko vanama soypa koyna amo re toke no sa kuo ngoyni moyra kue oyra mo kamele soy,>> sa voy.

32Sa voy ta oye si, nabulu sa zola te toke, no aquru sa kuo te totakae doyra oyra kamele ka pale vajele. Lebani sa pale me ukea sisiu kava no pitanaki sa purini oyra kamele, no beito ta oye sa iro me koyna oye no oyra ona boysi bi moyra qoluni nikini doyra. 33Sinani pitanaki sa nama te tarakenakae oye, ba oye sa voy goyti, <<Aro kama voyqo da aki, korovita soynani qo ram vatana aro me soyna.>>

Sa voy goyti Lebani <<Soynani rami,>> sa voy.

34Sa voy goyti oye, <<Aro ko nabulu te Ebarahami. 35Iaova sa manani varoka qo buoe no sa vatutupari varoka oye. Iaova sa koyna oye vaua sipi no bulumakao, siliva no qolu oyra sikaleike no sikaquole, no oyra kamele no dongki soy. 36Sera, quolekutae te qo buoe, sa vapuodo koyna oye keike toytuleike sada oye sa balava varoka, no qo buoe sa koyna toytu pisipita taba oye sa tungene. 37No qo buoe sa moynini aqo ro me maulu te kue oye, no sa voy goyti oye, <Kasi poyta koyna toquleike quolekutae te kue toytua doyra oyra boysi ni Kenani, oyra ka kuo te vodu aro ko kue sinani, 38ba re mo la te sinaqi te tamaqu ro, te kue oyra qo juojuolo, soy re mo poyta koyna toqukeike ona quolekutae,> sa voy.

39<<Ko voy goyti ro te kue qo buoe, <Be sa voy sada quole ta sa pejae koype me aqo ro ne?> Ko voy.

40<<Oye sa vatavele me te kue ro, <Iaova, oye aro ko vauteve, me peqani ona matizana me zo una amo re no me vavoto mo zozo, soy re mo poyta koyna ona quolekutae toquleike te kue oyra boysi te qo juojolo no pupu te tamaqu. 41No sada re ko la te kue oyra qo juojuolo, re ko talopu te qo maulu, pita ulomo oyra kama vamoyo doyra oye te kue re, re mo talopu te qo maulu soy,> sa voy.

42<<Sada aro ko me doka te quarae bi tava ini, Aro ko voy goyti, <Kei, Iaova, Bangara te qo buoe Ebarahami, be mao te kue re, mo vavoto zozo aro ko zoyzoyini. 43Mia, Aro ko deire vatanga te bi quara goyti, sada keike soquole sa me puqele me sope bi, no aro me voy goyti te kue oye, <<Kei mo koyna aqo ro ngoyni bi te mo koybo me turepe.>> 44No sada oye sa voy te kue ro, <<O, re mo turepe bi, no aro me sope bi koyna oyra mo kamele.>> Vamoyo oye to ta me quole Iaova sa vene koyna toytuleike qo buoe,> ko voy.

45<<Korovita bito qo ro vivisi te pongoqu, da soy, Ribeka sa me puqele, sa kuto te avarae ona koybo bi. Sa juolo la te quarae bi no me la sope bi sa voy, no Ko voy goyti ro te kue oye, <Kei, mo koyna aqo ro ngoyni bi me turepe,> ko voy.

46<<Oye sa dada vajele me ona koyboa bi te avarae no sa voy goyti oye, <Re mo turepe bi, no aro me sope vele bi me koyna oyra mo kamele.> Sa voy ta oye, Aro ko turepe bi, no oye sa koyna bi oyra qo kamele soy.

47<<Aro ko tanani oye, <Ada ona soquole te re ne?>

<<No oye sa tuqeni me, <Aro toytuquole Betuele, toytuleike Melika sa vapuodo koyna Naoa,> sa voy.

<<Sinani aro ko toyro sologno te zengo no keri zeku zozongo te koyrisi oye. 48No aro ko kapata juolo no ko vazaka Iaova. Aro ko vazaka Iaova, Bangara te qo buoe Ebarahami, oye sa kinikini vanoyi aqo te zoka tutungono, sa koype me aqo te kue babunuquole likae qo buoe me reke toytuleike. 49Sinani, sada ram kam tuqe, mam vatakabola vatonoyi no tutungono te kue qo buoe, mam soynani aqo ro; sada kama tuqini mina, ba mam soynani aqo, soy aro me utini be zoka aro me tae,>> sa voy.

50Lebani no Betuele kuru tuqini la, <<Pita goyti sa tae me te kue Iaova; kareo ka pita noyi ba roka raru maru soyna vele te kue re. 51Vanata! Goyti Ribeka; mam koype oye no mam zo, no oye me ona quolekutae toytuleike mo buoe, sa seva Iaova sa soyna,>> kuru voy.

52Sada nabulu te Ebarahami sa ase ngeoro oyru kuru soyna, oye sa kapata juolo te lua te tarakenakae Iaova. 53Sinani nabulu sa iro me qolu no siliva, oyra pita malemale no oyra bubute no sa koyna Ribeka; Oye sa kea vele oyra keke majamajala te kue vavini no sinae oye soy. 54Sinani, nabulu no oyra leike ka koype una oye ka aki no turepe luka, no te kose oyra ka kuo te toke noyene. Sada oyra ka joykava te saruku belanae, sa voy goyti nabulu, <<Vamoyo aqo me vele la te kue qo buoe,>> sa voy.

55Ba kuru voy goyti oyru sinae no vavinia Ribeka, <<Soquole me kuo aba ne gae mano tava te kue rami; sinani oye ram mam zo,>> kuru voy.

56Ba sa voy goyti nabulu, <<Kasi sede aqo, sinani Iaova sa vavoto qo zo. Vamoyo aqo soy me zo vele la te kue qo buoe,>> sa voy.

57Ka voy goyti oyra, <<Ita mata keleike me soquole, no mata tanani no mata ase ata pita me soyna.>> 58Si, oyra ka keleike Ribeka no ka tanani oye, <<Be sa voy re ko soyko koype boysi goyti ba?>> ka voy.

<<O, aro me zo to,>> sa voy.

59Sa voy ta oye, oyra ka vamoyo torae doyra Ribeka no ona nabulu quole muru koype una nabulu te Ebarahami no oyra ona boysi. 60No oyra ka manani Ribeka no ka voy goyti te kue oye,

<<Re torae mami, re mo vazadeve

Taba mau boysi;

Oyra sokutu arasumam re

Moyra tungene oyra kumala te oyra doyra kana>> ka voy.

61Sinani Ribeka no oyra ona sikaquole ka aquru, no ka gae puka te oyra doyra kamele, no ka vele koype nabulu te Ebarahami. No nabulu te Ebarahami sa koype Ribeka sa zo to.

62Sinani Aisake sa zo voy me te kadalesana ni Bia-lahai- roi, bati oye sa kuo te kolabae Neqeve. 63Te viluvilu oye sa juolo la te sanoyqa voy me la maduili, no da soy, oye sa mia la oyra kamele ka la vatanga me. 64Ribeka sa mi la no sa mia Aisake. Oye sa suqa juolo te ona kamele, 65no sa tanani nabulu, <<Ada boysi kata mia la te sanoyqa sa la zo me me tepere ita,>> sa voy. Nabulu sa vatavele la, <<Oye ta qo buoe ro.>> No Ribeka sa pale ona bubute no sa sapeneni tarakenakae.

66Nabulu sa vatanani beito Aisake oyra pita oye sa la joyjuni. 67Aisake sa koype la Ribeka te toypaka pua te sinae oye Sera, no oye sa reke Ribeka. Si oye sa ona quolekutae oye, no oye sa noyne varoka oye; no Aisake sa kuo muomuotongo napu te rokusua lenae sinae.

Currently Selected:

Genesis 24: BAA

Highlight

Copy