Genesis 22

Bangara sa Padani Ebarahami

1Sa paqolo soypa la oyra sada Bangara sa padani Ebarahami. Oye sa voy te kue oye <<Ebarahami!>> Sa voy.

Ebarahami sa vatavele la. <<Aro goyti,>> sa voy.

2Sinani Bangara sa voy, <<Mo koype tomleike, oye keike menea mo soleike, Aisake, oye re ko noyne, no mo zo la te kolabae Morae, re mo vavakatua me oye te ngoyni gei sa seva vavakatu katunuoro te kue ro te keike supu aro me vatereni amo,>> sa voy.

3Te saruku pipi tava belanae Ebarahami sa tapadeire sa vanama ona dongki. Oye sa koype una keri ona nabulu no Aisake toytuleike soy. Sada oye sa pote beito soypa oyra azu moyra vanako ni vavakatu katunuoro, oye sa tasoybaka la te ngoyni Bangara sa soynani moyna oye. 4Te vatulua tava Ebarahami sa mi puka la no sa mia vakoyu la ngoyni me dokae. 5Sa voy goyti oye te kue keri ona nabulu, <<Rabu mibu kuo koype dongki te ngoyni goyti, aro no so leike muru zola te ngoyni gei. Raru maru la vazaka ne, no muru vele napu me te kue rabu,>> sa voy.

6Ebarahami sa pale oyra azu nako moyra vajaju te vavakatu katunuoro no oye sa voyko la te avarae toytuleike oye Aisake, no tani sa iro nako katu no lato. Sinani oyru kuru vakeike zo la, 7sinani Aisake sa voy goyti te kue tamae oye Ebarahami <<Mama?>> Ebarahami sa vatavele la. <<Aro goyti toqu leike?>>

<<Mia! Nako katu no azua nako soy goyti ba be sa kue lami moyra vavakatu katunuoroa ne?>> Sa voy.

8Ebarahami sa vatavele la, <<Bangara me mia me lami moyra vavakatu katunuoroa, toqu leike,>> sa voy. No oyru kuru vakeike zo la.

9Sada oyru kuru la doka te ngoyni Bangara sa soynani moyna oye, Ebarahami sa joyjuni sara taboyna no sa pulete la azu nako te sara taboyna. Oye sa nukese Aisake toytuleike oye no sa vabekele la oye te sara taboyna, te sarapokae azu nako. 10Sinani oye sa kajarani koyrisi sa pale lato me poyqovale ni toytuleike sa voy. 11Ba Matizana te Iaova sa kuo te rani sa ngeoro me te kue oye, <<Ebarahami! Ebarahami!>> Sa voy.

Oye sa vatavele la, <<Aro goyti,>> sa voy.

12Oye sa voy, <<Kasi amani la koyrisim te kue soleike, kasi joyjuni ka pita te kue oye. Sinani aro ko utini re ko padapadani Bangara, bati re kama pale velini mo tomleike te kue ro, keike to mene tomleike,>> sa voy.

13Sinani Ebarahami sa mi puka no sa mi la no da soy te ngoyni ta keike sipi sa sanga kekeoa te azu. Sinani oye sa zo la no sa la pale sipi no sa vavakatua oye sa seva vavakatu katunuro sokani toytuleike. 14Sa voy ta oye si, Ebarahami sa vataritengeni ngoyni noyene Iaova me mia me. No te tava ini te ka kelikini ngoyni noyene <<Te supu te Iaova me mia me,>> ka voy.

15Sinani matizana te Iaova sa kuo te rani sa ngeoro napu me vakeria sada te kue Ebarahami 16no sa voy goyti, aro ko maulu napu taqo, sa voy Iaova, bati re ko joyjuni pita goyti no kama pale vavelini mo tomleike, keike to mene tomleike, 17<<Aro sa tuna to me manani amo re no sa tuna to me vazadeve oyra sokutu arasumam moyra seva tabae doyra oyra sisiriputu te rani no moyra seva tabae karakone te tapalanaburu. Oyra sokutu arasumam re moyra tungene korikini oyra kumala lata te oyra doyra kana, 18no te sokutu arasumam re taba oyra tubia boysi te vodu ni te lua moyra paleni mana, bati re ko ase vuanga qu ro,>> sa voy.

19Sinani Ebarahami sa vele napu la te kue keri ona nabulu, no oyra ka tapaki vakeike napu la Biaseba. No Ebarahami sa kuo Biaseba.

Oyra toytuleike Naoa

20Sa paqolo soypa la oyra sada, ka soynani Ebarahami, <<Vanata! Melika sa vapuodo oyra so lieke te likam Naoa: 21Soleike puodo kinaka ka kelikini Uzi, likae oye Buzi, no Kemuele (tamaea Aramu), 22Kesedi, Azo, Pilidasi, Jidilapi no Betuele.>> 23Betuele sa vapuodo Ribeka. Melika sa vapuodo viu toytuleike Naoa likae Ebarahami. 24Reuma ona quole sika sa tugnene vele oyra toytuleike, toritongoa doyra, Teba, Qahamu, Tahasi, no Maaka.

Currently Selected:

Genesis 22: BAA

Highlight

Copy