Genesis 21

Puodoa Aisake

1Sinani Iaova sa makoloni Sera sa seva oye sa soyna moyna, no Iaova sa joyjuni te kue Sera pita oye sa puini moyna. 2Sa voy ta oye, Sera sa iro so no sa vapuodo koyna Ebarahami keike toytuleike te sada oye sa valaka varoka, te sada noyene, sa voto pita Bangara sa puini moyna oye. 3Ebarahami sa vataritengeni Aisake, toytuleike sa vapoudo koyna oye Sera.#21.3 Te ngelu ni Iburu lolopoa taritongo Aisake ne Oye sa beire. 4Sada toytuleike oye Aisake sa viu tavae, Ebarahami sa pote koykoypa kopikae oye, sa seva Bangara sa voytuni moyna oye. 5Ebarahami sa keike ubi avea sada toytuleike oye Aisake sa puodo.

6Sa voy goyti Sera, <<Bangara sa kea aqo ro bireqom, no taba oyra moyra ase pita goyti moyra beire una aqo ro.>> 7No sa voy vele goyti oye, <<Ada me soyna te kue Ebarahami, Sera me vasoso oyra so ne? Sinani aro ko vapuodo koyna oye toytuleike te sada oye sa valaka varoka,>> sa voy.

Ega no Isimeli ka Peqani Va zo Oyru

8Sada so sa nukoro puka no sa soypa sosu no te tava Aisake sa soypa sosu Ebarahami sa joyjuni keike aki poyu. 9Ba sada Sera sa mia toytuleike Ega quole ni Ijipi sa pale moyna te kue Ebarahami sa beire kule no mia vajele toytuleike oye Aisake, 10no Sera sa voy goyti te kue Ebarahami, <<Re mo sure kesini quole sika goyti no toytuleike soy, bati toytuleike quole sika goyti kama majala vo me tungene una oyra tutupari te toquleike ro Aisake>> sa voy.

11Sa voy ta oye, pita goyti sa vaneqete varoka Ebarahami bati sa soyna qoylo zozoa toytuleike. 12Ba Bangara sa voy goyti te kue oye, <<Moyna ko neqitini re zozoa tom leike no mo quole sika. Vanata oyra pita me soynani amo Sera, bati te kue Aisake me takabulae me sokutu arasumam re aro ko puini. 13Aro me vazadeve toytuleike quolesika te keike tubia boysi bati oye sa sokutu arasumam re,>> sa voy.

14Te saruku pipi tava belanae Ebarahami sa suru tapa deire no sa vanama kavia pitanaki no bi sa kuo te koypae pita pupura no sa koyna Ega. Oye sa voyko la te avarae Ega no sa peqani vazo oye no so leike. Sinani oye sa zo no leilomo vaga te kadalesana ni Biaseba.

15Sada bi sa kuo te koypae pitapupura sa pasa sua, oye sa toyro la so te sarajuoloa ngoyni sa sanoyqae. 16Sinani oye sa zo la sa la tongunu vakoyu padae 100 mita, bati oye sa nanana, <<Aro kama soyko qo me mia qo soleike me lei,>> sa voy. Sada oye sa tongunu vakoyu, oye sa qila.

17Bangara sa ase qilae soleike, no Matizana te Bangara sa kuo te rani sa keileke Ega no sa voy goyti te kue oye, <<Ata ko voy re Ega? sa voy. Moyna ko isi re; Bangara sa vanata qilae soleike sada oye sa bokolo gei. 18Zo la mo la pale poka oye no mo kuto oye te koyrisim, bati aro me vazadeve te kue oye keike tubi poyua boysi,>> sa voy.

19Sinani Bangara sa deke matae oye no oye sa mia la quarae bi. Sa voy ta oye, Ega sa zo la sa la vapodani bi koypae pitapupura no oye sa me koyna ona so leike sa turepe.

20Bangara sa kuo una soleike sada oye sa nukoro puka te kaji. Oye sa kuo te Kadalesana no sa boysi taruini vajajua tona no lepu. 21Sada oye sa kuo te Kadalesana ni Parani, sinae oye sa koype me koyna oye ona quolekutae ni Ijipi.

Vatovato Vakeike ni Biaseba

22Te sada noyene Abimeleki no Pikolo boysi poyu te ona vai kuru voy goyti te kue Ebarahami, <<Bangara sa una amo re te tabae oyra pita re ko joyjuni. 23Sinani mo maulu te kue ro te tarakenakae Bangara soy re kasi mo soloykuni aqo ro no oyra qo so no sokutu arasumaqu soy. Mo vatere te kue ro no oyra qo boysi te vodu re ko me kuokapae vato noyi sa seva aro ko vatere te kue re,>> sa voy.

24Sa voy goyti Ebarahami, <<Aro ko maulu me tutuna te kue re,>> sa voy.

25Sinani Ebarahami sa noreke te kue Abimeleki te zozoa bi quara oyra ona nabulu Abimeleki ka buburutingini. 26Ba sa voy goyti Abimeleki, <<Aro kama utini moyna qo ada oye sa joyjuni pita goyti. Bati re kama soynani mo aqo ro, no aro kama ase qo ka pita doka te tava ini,>> sa voy.

27Sa voy ta oye si, Ebarahami sa iro me sipi no bulumakao no sa koyna Abimeleki, no oyru kuru vadere doyru vato- arapokitini. 28Ebarahami sa veileke vike vetu lami quole te vaua doyra oyra pitapupura, 29no Abimeleki sa tanani Ebarahami, <<Ata talopua oyra vetu lami quole re ko veileke vike oyra ne?>> sa voy.

30Oye sa vatavele la, <<Re mo tuqini to palea vetu lami quole goyti voy me lalae miae tutuna aro ko para bi quara goyti,>> sa voy.

31Si ka vataritegneni ngoyni noyene Biaseba, bati keri boysi kuru maulu te ngoyni ta.

32Rokusua sada Abarami no Abimeleki kuru vadere doyru vato- arapokitini Biaseba, Abimeleki no Pikolo boysi matamata te oyra vai kuru vele napu la te vodu ni Pilisitiani. 33Ebarahami sa teba azu tamarisiki te kumala ni Biaseba, no oye sa vazaka ni Iaova, Bangara Tu sua. 34No Ebarahami sa kuo vamonini te vodu ni Pilisitiani.

Currently Selected:

Genesis 21: BAA

Highlight

Copy