Genesis 20

Ebarahami No Abimeleki

1Sinani Ebarahami sa kesini ngoyni noyene sa nukoro voy la te kolabae Neqeve no sa la kuo te arakaluoboroa Kadese no Soya. Te rokusua sada noyene oye sa la kuo toko Qera, 2te ngoyni noyene Abarami sa kelikini Sera ona quolekutae oye, <<Oye sa vavini qu.>> Sa voy ta oye, buoe lata ni Qera Abimeleki sa soynani oyra moyra koype me Sera te kue tani.

3Kieke kose Bangara sa takabula te kue Abimeleki te ona parika no sa soynani oye, <<Re mo lei to, bati re ko pale quole goyti; oye sa quole kaji,>> sa voy.

4Ba Abimeleki kama la vatenge vo Sera, sa voy goyti oye, <<Buoe, be sa voy re mo vaupu tubia boysi tutungono ba? 5Kama oye vo te sa soynani aqo ro, <Sera sa vavini qu,> no Sera sa soyna <Ebarahami sa vavini qu ba>? Aro kama zaqala vo ka nanana te pongo qu no aro ko dalo to,>> sa voy.

6No Bangara sa voy te kue oye te ona parika, <<O, aro ko utini re kama zaqala vo ka nanana te pongom, si, aro ko sedeni amo re moyna ko joyjuni ka pita me zaqala te kue ro. Sa voy ta oye si, aro kama vamoyo qo amo re mo tebe oye. 7Ba sinani re mo vavelini la ona quolekutae leike ta, bati oye sa kieke poropita, no oye me vivisini amo soy re kasi mo lei. Ba moyna re kama vavelini mo quole ta ne, aro ko vabanabanani amo re, re no oyra taba kini te re mina lei to,>> sa voy.

8Belanae te saruku pipi, Abimeleki sa keleike araququni ni oyra taba ona boysi matamata, no oye sa soynani oyra taba pita goyti si oyra ka ase oyra pita oye sa soyna no oyra ka isi varoka. 9No Abimeleki sa keleike Ebarahami no sa tanani oye, <<Ata pita re ko joyjuni te kue rami, ne? Ata ka pita zaqala aro ko joyjuni te kue re, soy oye re ko vame te kue ro no te qo kuo buoe ro soy zaqala poyu sua goyti ne? Re kama gaevo mo joyjuni pita re ko joyjuni te kue ro.>> 10No Abimeleki sa tanani Ebarahami, <<Be sa voy re ko joyjuni pita sa seva goyti ne?>> sa voy.

11Ebarahami sa vatavele la, <<Bati aro ko soynani noypo taqo, <Oyra boysi ka kuo te ngoyni goyti tuna to kama padapada ni doyra Bangara, no sa voy ta oye oyra moyra voyevale aqo ro voy moyra pale qo quolekutae.> 12Sa tuna oye sa vaviniqu, toytuquole tamaqu ba kama keike vo sinae maru; no oye sa qo quolekutae. 13No sada Bangara sa koype loyluni vaoyle aqo ro te kue oyra ona boysi tamaqu, Aro ko soynani oye, <Sa seva goyti re ko majala vatakabola mo noynea aqo ro: Te oyra ngoyni katu tae, re mo soyna: Oye sa vavini qu mo voy,> >> sa voy Ebarahami.

14Sinani Abimeleki sa koype sipi no bulumakao no oyra sika leike no oyra sika quole no sa la koyna Ebarahami, no sa koype vavelini la Sera ona quolekutae Ebarahami te kue oye. 15No sa voy goyti Abimeleki, <<Vanata! Goyti poyua qo vodu; re mo kuo te ka ngoyni ko soyko kue,>> sa voy.

16Oye sa soynani Sera, <<Vanata! Aro ko koyna vavinim keike mau kisa siliva. Sa seva tutunaea re sa kareo mo zaqala te tarakenakae doyra oyra boysi, soy moyra utini re kama joyjuni mo ka pita zaqala,>> sa voy.

17Sinani Ebarahami sa vivisi la te kue Bangara, no Bangara sa ole Abimeleki no ona quolekutae, no oyra ona sika quole soy moyra tungene noypo so, 18bati Iaova sa kupene moyna pipisia doyra oyra quole te taotao te Abimeleki kasi doyra tungene so, bati te pita Abimeleki sa joyjuni moyna te kue Sera quolekutae te Ebarahami.

Currently Selected:

Genesis 20: BAA

Highlight

Copy