Luka 2

Nau jŭr deh Brah Yêsu

(Mathiơ 1:18-25)

1Nôk nây, Sêsar Ôgustus ăn samƀŭt nau ntrŭnh gay kơp rnoh bunuyh tâm lam neh ntu. 2Aơ jêng nau kơp lor lơn dơi ƀư tâm nôk Y-Kirinius jêng kôranh toyh chiă uănh n'gor Siri. 3Lĕ rngôch bunuyh plơ̆ sĭt ta ƀon tơm gay nchih amoh khân păng. 4Yor Y-Yôsep jêng noi deh ngih Y-Đavit, rĭ dĭng tă bơh ƀon Nasaret, n'gor Galilê, hăn ta ƀon Đavit, rnha jêng Ƀêtlêhem, tâm n'gor Yuđa, 5gay ma nchih amoh păng ndrel ma H'Mari hŏ ndrôi jêh đah păng nơm, păng ntreo jêh. 6Dôl khân păng gŭ ta nây, nar H'Mari deh dăch jêh. 7Păng deh kon bu klâu bôk rah, sŏk bok nkŭm kon păng nơm jêh ri n'gân lâng tâm hip gơ̆, yor ntŭk njưh mâu hôm tŏng ntŭk ma khân păng. 8Tâm ban đŏng n'gor nây, geh ƀaƀă bunuyh rmăk biăp gŭ tâm ndrêch, gŭ rngeh măng njrăng uănh phung biăp. 9Du huê tông mpăr Kôranh Brah tâm mpơl ma khân păng, nau chrêk rmah Kôranh Brah nchrat ang văr jŭm rĭ dĭng khân păng klach hâu ngăn. 10Ƀiălah tông mpăr lah ma khân păng: “Lơi klach ôh! Aơ, gâp mbơh ma khân may du Nau Mhe Mhan Ueh, aơ mra jêng nau răm maak toyh ma lĕ rngôch bunuyh. 11Yorlah nar aơ ta ƀon Đavit, bu deh jêh ma khân may du huê Nơm Tâm Rklaih jêng Brah Krist, jêng Kôranh Brah. 12Aơ jêng nau mbên gay ma khân may dơn gĭt Păng: Khân may mra tâm mâp du huê kon se jê̆ nkŭm ma bok gŭ bê̆ch tâm hip gơ̆.” 13Ndrel nôk aơ, geh âk ngăn tahan klơ trôk ndrel ma tông mpăr nây mprơ rnê ma Brah Ndu jêh ri pô aơ:

14“Tâm rnê ma Brah Ndu klơ trôk,

Nau đăp mpăn ta neh ntu, nau yô̆ ăn ma bunuyh!”

15Jêh phung tông mpăr nkhah khân păng plơ̆ sĭt ta klơ trôk, phung rmăk biăp tâm lah ndrăng khân păng pô aơ: “He hăn hom tât ta ƀon Ƀêtlêhem uănh nau hŏ tât jêh, Kôranh Brah mbơh jêh ma he gĭt.” 16Pôri, khân păng hăn ndal tât ta nây, saơ H'Mari, Y-Yôsep, jêh ri saơ kon se jê̆ gŭ bê̆ch tâm hip gơ̆. 17Dôl saơ kơt nây, khân păng nkoch bri ro lĕ nau tông mpăr ngơi ma kon se jê̆ nây. 18Mbu tăng nau phung rmăk biăp nkoch bri geh nau hih rhâl da dê. 19Bi H'Mari djôt prăp lĕ nau ngơi nây jêh ri mĭn rvê tâm nuih n'hâm. 20Phung rmăk biăp plơ̆ sĭt, tâm rnê jêh ri mprơ rnê ma Brah Ndu ma lĕ nau khân păng hŏ tăng jêh ri saơ, di nâm nau bu mbơh jêh ma khân păng.

21Tât pham nar, dôl bu koh ntâu kon se jê̆, khân păng tâm amoh jêng Yêsu, jêng amoh tông mpăr mbơh jêh êlor nôk kon se jê̆ geh tâm trôm ndŭl mê̆.#Lêvi 12:3; Luk 1:31.

Nau rƀŭn nhhơr Brah Yêsu tâm ngih brah

22Nôk lĕ nar ƀư kloh tĭng nâm nau vay Y-Môis ƀư lôch jêh, mbơ̆ mê̆ păng njŭn leo kon se jê̆ ta ƀon Yêrusalem gay nhhơr ma Kôranh Brah, 23tĭng nâm nau nchih jêh tâm nau vay Kôranh Brah pô aơ: “Lĕ rngôch kon bu klâu bôk rah dơi prăp êng kloh ueh ma Kôranh Brah”,#Ngluh 13:2,12. 24jêh ri nhhơr du kôp sĭm ntơp, mâu lah sĭm plŭk kon, nâm nau vay Kôranh Brah ntăm hŏ ntrŭnh jêh.#Lêvi 12:6-8.

Nau mprơ Y-Simêôn. – Nơm mbơh lor bu ur H'Anna

25Nôk nây, ta ƀon Yêrusalem geh du huê bunuyh sŏng srăng jêh ri gŭ sŏng, amoh păng Y-Simêôn. Păng kâp gân nau bonh leng phung Israel, jêh ri Brah Huêng Ueh gŭ ta klơ păng. 26Brah Huêng Ueh mbơh jêh ma păng gĭt lor pô aơ păng mâu mra khĭt ôh êlor saơ Brah Krist Kôranh Brah. 27Brah Huêng Ueh ntrôl ntrŭt, păng hăn ta ngih brah di nôk mbơ̆ mê̆ njŭn leo kon se jê̆ jêng Yêsu văch gay ƀư lĕ nau tĭng nâm nau vay Păng. 28Păng chông kon se jê̆ jêh ri tâm rnê ma Brah Ndu pô aơ:

29“Ơ Kôranh Brah, aƀaơ aơ dăn Kôranh Brah ăn ma oh mon May luh hăn tâm nau đăp mpăn,

Tĭng nâm nau May hŏ ngơi jêh;

30Yorlah măt gâp saơ jêh nau tâm rklaih bơh May,

31May ndrăp jêh tanăp lĕ rngôch ntil mpôl bunuyh,

32Jêng nau ang sol trong ma phung bu năch,#Êsai 42:6; 49:6; 52:10.

Jêh ri jêng nau chrêk rmah phung Israel, jêng phung ƀon lan May.”

33Mê̆ mbơ̆ kon se jê̆ hih rhâl ma lĕ nau Y-Simêôn lah ma kon se jê̆. 34Y-Simêôn ăn nau ueh uĭn ma khân păng jêh ri lah ma H'Mari, mê̆ kon se jê̆ pô aơ: “Kon se jê̆ aơ dơi lah nal gay ƀư ma âk bunuyh tâm phung Israel mƀăr nau nsing mâu lah dâk rêh tay, jêh ri jêng du nau tâm mbên ƀư nau tâm rdâng. 35Bi ay, du mlâm đao mra ntâp bluh nuih n'hâm ay, gay nau mĭn jru ndâp âk bunuyh tâm mpơl.”

36Geh đŏng nơm mbơh lor bu ur H'Anna, kon bu ur Y-Panuel, ndŭl mpôl Aser, hŏ ranh ngăn. Jêh gŭ ndrel sai, păng rêh đah sai dơi pơh năm, 37jêh nây păng gŭ ndrô, tât aƀaơ păng geh pham jât ma puăn năm. Păng mâu mâp du tă bơh ngih brah, ăt măng nâm nar pah kan ma Brah Ndu, ât sông sa jêh ri mbơh sơm. 38Tâm mông nây, păng văch đŏng ta nây, tâm rnê ma Brah Ndu jêh ri ngơi ma kon se jê̆ đah lĕ rngôch bunuyh dôl kâp gân nau tâm rklaih ma ƀon Yêrusalem.

39Nôk hŏ lôch jêh lĕ kan tĭng nâm nau vay Kôranh Brah, Y-Yôsep jêh ri H'Mari plơ̆ sĭt ta ƀon khân păng nơm jêng Nasaret ta bri Galilê.#Mat 2:23. 40Kon se jê̆ nây văch ma toyh jêh ri ktang; bêng nau blau mĭn, jêh ri nau yô̆ Brah Ndu#2:40 Mlr: nau yô̆. gŭ ndrel ma Păng.

Dôl Brah Yêsu geh jât ma bar năm

41Ăp năm tât nar rƀŭn Nau Găn, mê̆ mbơ̆ Brah Yêsu vay hăn ta ƀon Yêrusalem.#Ngluh 12:1-27; Nkah 16:1-8. 42Nôk tât jât ma bar năm, Păng ndrel ma mê̆ mbơ̆ hăn ta nây râng tâm rƀŭn tĭng nau vay. 43Nôk lĕ nar nau rƀŭn lôch jêh, mê̆ mbơ̆ plơ̆ sĭt, ƀiălah ndăm rah Yêsu gŭ ta ƀon Yêrusalem, ƀiălah mê̆ mbơ̆ Păng mâu gĭt ôh. 44Khân păng ăt mĭn Păng hăn ndrel ma phung mpôl hăn ndrel, pôri pakơi du nar hăn trong, khân păng joi Păng tâm ndŭl mpôl jêh ri phung bunuyh gĭt năl. 45Nôk mâu saơ Păng, khân păng plơ̆ tay ro ta ƀon Yêrusalem gay joi. 46Pakơi pe nar, khân păng saơ Păng tâm ngih Brah dôl gŭ ta nklang phung kôranh nti phung Yuđa, Păng iăt ƀă ôp ƀă. 47Lĕ rngôch phung tăng Păng ngơi hih rhâl da dê ma nau Păng gĭt rbăng jêh ri lĕ nau Păng plơ̆ sĭt lah. 48Nôk mê̆ mbơ̆ saơ Păng, khân păng hih rhâl jêh ri mê̆ Păng lah ma Păng: “Hơi nâu, mâm ƀư may ƀư ma hên nâm nđĕ? Mbơ̆ may jêh ri mê̆ hŏ mĭn rvê joi may!” 49Păng ơh: “Mâm ƀư mbơ̆ mê̆ joi gâp? Mbơ̆ mê̆ mâu gĭt hĕ gâp pah kan ma Mbơ̆ Gâp?”#2:49 Mlr: gâp di gŭ tâm ngih Mbơ̆ gâp lĕ ƀơh? 50Ƀiălah khân păng mâu gĭt rbăng ôh nau Păng mhe lah. 51Păng hăn tĭng mbơ̆ mê̆ plơ̆ sĭt ta Nasaret jêh ri Păng tông bâr khân păng. Mê̆ Păng kah gĭt prăp lĕ nau nây tâm nuih n'hâm.

52Brah Yêsu blau mĭn lơ hâu ntop, tâm săk jăn lơ hao toyh, lơ hô ƀư ueh nuih n'hâm Brah Ndu jêh ri bunuyh.#I Sa 2:26; Hôr 3:4.

Currently Selected:

Luka 2: CMO2023

Highlight

Copy