Yôhan 9

Brah Yêsu ƀư bah bunuyh chieh măt ntơm bơh deh

1Dôl Brah Yêsu hăn trong, Păng saơ du huê bunuyh chieh măt ntơm nôk deh. 2Phung oh mon ôp Brah Yêsu: “Hơi Nơm Nti, mbu nơm jêng bunuyh ƀư tih, bunuyh aơ mâu lah mê̆ mbơ̆ păng, dĭng păng geh chieh măt ntơm bơh mhe deh?” 3Brah Yêsu plơ̆ lah: “Mâu di yor bunuyh aơ, mâu lah mê̆ mbơ̆ păng ƀư tih; ƀiălah gay ma mpơl kan Brah Ndu tâm păng. 4Nôk trôk hôm ang, ăn he ƀư hom lĕ kan ma Nơm hŏ njuăl Gâp; măng tât, mâu hôm geh bunuyh dơi pah kan ôh. 5Dôl Gâp hôm gŭ ta neh ntu, Gâp jêng nau ang ma neh ntu.”#Mat 5:14; Yôh 8:12. 6Jêh Păng lah nau nây, Păng soh dak diu ta neh, mpli dak diu đah neh jêng bŏk jêh ri mhĭng ta măt bunuyh chieh, 7jêh nây lah ma păng: “Hăn hom jêh ri rao ta dak nglao Silôê” (rplay ngơi aơ nâm bu ntĭt “dơi njuăl hăn”). Pôri, păng hăn jêh ri rao, jêh nây plơ̆ tay ri mơ saơ ang. 8Phung chiau meng jêh ri phung alor saơ lĕ păng kâp dăn ndơ sa, lah pô aơ: “Di lĕ aơ jêng bunuyh gŭ kâp dăn ndơ sa?” 9Ƀaƀă lah: “Di ngăn păng”; bunuyh êng lah: “Mâu di, ƀiălah geh du huê nuyh uănh tâm ban ma păng.” Bi păng nơm lah: “Gâp yơh.” 10Khân păng ôp păng: “Mâm ƀư măt may dơi saơ ang jêh?” 11Păng plơ̆ lah: “Geh du huê bunuyh rnha Yêsu hŏ lai bŏk mhĭng ta măt gâp, jêh ri đă gâp hăn rao hom ta dak nglao Silôê. Pôri gâp hŏ hăn, rao jêh ri gâp saơ ang.” 12Khân păng ôp tay: “Mbah ntŭk păng aƀaơ?” Păng lah: “Gâp mâu gĭt ôh.”

13Khân păng njŭn leo bunuyh chieh măt alor tât ta phung Pharisi. 14Nar Brah Yêsu lai bŏk jêh ri pơk măt bunuyh chieh măt jêng nar saƀat. 15Phung Pharisi ôp đŏng mâm ƀư măt may dĭng dơi saơ ang. Păng plơ̆ lah: “Păng mhĭng bŏk ta măt gâp, gâp rao, jêh ri saơ ang.” 16Ƀaƀă bunuyh tâm phung Pharisi lah: “Bunuyh nây mâu di luh tă bơh Brah Ndu ôh, yorlah mâu djôt prăp nar saƀat.” Phung êng lah: “Du huê bunuyh tih mâm dơi ƀư lĕ nau mbên khlay kơt nây?” Jêh ri khân păng geh nau tâm nkhah ndrăng khân păng. 17Yor ri, khân păng ôp đŏng bunuyh chieh măt: “Kay may, moh nau may lah ma bunuyh hŏ ƀư jêh ma măt may saơ ang?” Păng lah: “Păng jêng nơm mbơh lor.”

18Ƀiălah, phung Yuđa nây mâu chroh ôh ma nau nơm chieh măt dơi saơ ang, ma tât nôk khân păng kuăl mê̆ mbơ̆ păng tât 19jêh ri ôp pô aơ: “Di lĕ aơ jêng kon bu klâu khân ay may, bunuyh khân ay may lah hŏ chieh măt ntơm nôk mhe deh? Mâm ƀư aƀaơ aơ măt păng dơi saơ?” 20Mê̆ mbơ̆ păng plơ̆ lah: “Hên gĭt aơ jêng kon bu klâu hên nơm, păng chieh măt ntơm nôk mhe deh. 21Ƀiălah hên mâu gĭt ôh mâm măt păng dơi saơ ang. Hên mâu gĭt lĕ mbu nơm pơk măt ma păng. Khân may ôp păng, păng lĕ toyh jêh, păng mra êng ngơi.” 22Mê̆ mbơ̆ păng lah pônây yor klach ma phung Yuđa, yor phung Yuđa hŏ tâm lăp nau tơlah mbu nơm mbơh Brah Yêsu jêng Brah Krist, bu mprơh lơi păng luh bơh ngih rƀŭn. 23Pôri, mê̆ mbơ̆ păng lah: “Păng lĕ toyh jêh, khân may ôp êng păng nơm.”

24Du tơ̆ đŏng, phung Pharisi kuăl tay bunuyh alor hŏ chieh măt, jêh ri lah: “Tâm rnê hom ma Brah Ndu! Hên gĭt bunuyh nây jêng bunuyh geh nau tih.” 25Bunuyh chieh plơ̆ lah: “Gâp mâu gĭt ôh păng jêng bunuyh geh nau tih mâu lah mâu. Gâp knŏng gĭt du ntil, bơh saơm dơh măt gâp chieh ƀiălah aƀaơ aơ dơi saơ ang.” 26Khân păng ôp đŏng: “Moh nau Păng ƀư ma may? Mâm ƀư Păng hŏ pơk măt ma may?” 27Păng plơ̆ lah: “Gâp lah jêh ma khân may, ƀiălah khân may mâu ŭch iăt ôh. Mâm ƀư khân may ŭch iăt đŏng? Di lĕ khân may ŭch jêng oh mon păng?” 28Phung khân păng suai rak păng jêh ri lah: “May ƀơh jêng oh mon păng, hên jêng oh mon Y-Môis. 29Hên gĭt Brah Ndu hŏ ngơi jêh đah Y-Môis, ƀiălah bi bunuyh aơ hên mâu gĭt mbah tă păng tât?” 30Bunuyh chieh măt plơ̆ lah: “Păng hŏ pơk jêh măt ma gâp ƀiălah khân may mâu gĭt mbah tă păng tât, mha ngăn nau nây. 31He gĭt Brah Ndu mâu iăt ôh phung bunuyh geh nau tih, ƀiălah tơlah mbu nơm klach yơk ma Păng, jêh ri ƀư tĭng nâm nau mĭn Păng ŭch ri mơ Brah Ndu iăt nau păng. 32Ntơm bơh saơm tât aƀaơ aơ, ê hŏ prot tăng ôh geh bunuyh pơk măt ma bunuyh chieh ntơm nôk mhe deh. 33Lah bunuyh aơ mâu geh văch tă Brah Ndu, păng mâu dơi ƀư du ntil nau ôh.” 34Khân păng plơ̆ lah: “Bu deh ma may tâm nau tih, may ŭch nti hên đŏng hĕ?” Jêh nây khân păng mprơh păng luh padih.

35Brah Yêsu tăng bu mprơh păng luh padih, jêh ri Brah Yêsu tâm mâp đah păng, Păng ôp: “May chroh lĕ ma Kon Bunuyh?”#9:35 Geh ƀaƀă nau rblang ơm nchih: Kon Brah Ndu. 36Păng plơ̆ lah: “Hơi Kôranh Brah, mbu moh bunuyh nây, gay ma gâp chroh ma păng.” 37Brah Yêsu plơ̆ lah: “May saơ jêh păng, jêh ri nây jêng bunuyh ngơi đah may aƀaơ aơ.” 38Păng lah: “Hơi Kôranh Brah, gâp chroh yơh,” jêh nây yơk mbah Brah Yêsu. 39Brah Yêsu lah: “Gâp văch ta neh ntu aơ gay phat dôih, ƀư ăn bunuyh chieh măt dơi saơ, bi bunuyh saơ jêng chieh măt.”

40Phung Pharisi gŭ dăch ta nây tăng kơt nây, lah ma Brah Yêsu: “Bi hên chieh măt ƀơh?” 41Brah Yêsu plơ̆ lah: “Lah khân may chieh măt mâu geh nau tih ôh, ƀiălah khân may lah: ‘Hên saơ,’ pôri nau tih khân may ăt hôm.”

Currently Selected:

Yôhan 9: CMO2023

Highlight

Copy