Yôhan 10

Bunuyh rmăk biăp ueh

1“Nanê̆ ngăn, Gâp lah ngăn ma khân may, mbu moh mâu lăp ta mpông n'gar biăp, ƀiălah hao ta ntŭk êng, păng nây jêng bunuyh ntŭng. 2Ƀiălah bunuyh lăp ta mpông n'gar biăp jêng bunuyh rmăk biăp. 3Bunuyh gak njrăng pơk mpông jêh ri biăp tăng bâr bunuyh rmăk biăp. Bunuyh rmăk biăp kuăl amoh biăp păng nơm jêh ri njŭn leo luh padih. 4Nôk hŏ njŭn leo jêh biăp luh padih lĕ rngôch, bunuyh rmăk biăp hăn lor panăp, biăp tĭng pakơi, yorlah biăp gĭt năl jêh bâr păng. 5Biăp mâu tĭng bu êng ôh, ƀiălah, khân păng nchuăt yorlah biăp mâu gĭt năl ôh bâr bu êng.” 6Brah Yêsu ngơi nau hôr aơ ma khân păng, ƀiălah khân păng mâu gĭt rbăng ôh moh nau Brah Yêsu ŭch ngơi.

7Pôri, Brah Yêsu lah đŏng: “Nanê̆ ngăn, Gâp lah ngăn ma khân may, Gâp jêng mpông biăp. 8Lĕ rngôch phung bunuyh văch lor Gâp, khân păng jêng phung ntŭng, ƀiălah biăp mâu iăt nau khân păng ôh. 9Gâp jêng mpông, tơlah mbu nơm lăp ta Gâp păng mra geh nau tâm rklaih. Khân păng mra lăp luh jêh ri mâp ndrêch gơ̆ nse. 10Bunuyh ntŭng knŏng văch gay ntŭng, nkhĭt, jêh ri ƀư rai, bi Gâp hŏ văch gay ma biăp geh nau rêh jêh ri nau rêh âk rmeh. 11Gâp jêng bunuyh rmăk biăp ueh, bunuyh rmăk biăp ueh jao nau rêh păng nơm ma biăp păng nơm. 12Nơm rmăk biăp bu nkhôm mâu di jêng bunuyh rmăk biăp ôh; biăp mâu lĕ jêng biăp păng, yor ri lah saơ so bri tât, păng chalơi nchuăt du. So bri kăp biăp jêh ri ƀư nchah rai khân păng. 13Yorlah păng jêng rmăk bu nkhôm, rĭ dĭng păng mâu meng uănh ma biăp ôh. 14Gâp jêng bunuyh rmăk biăp ueh. Gâp gĭt năl biăp Gâp, jêh ri biăp Gâp gĭt năl Gâp; 15tâm ban ma Mbơ̆ gĭt năl Gâp, jêh ri Gâp gĭt năl Mbơ̆. Gâp jao nau rêh Gâp nơm ma phung biăp.#Mat 11:27; Luk 10:22. 16Gâp hôm geh đŏng biăp êng mâu gŭ tâm n'gar aơ ôh; Gâp mra njŭn leo khân păng plơ̆ sĭt đŏng. Biăp nây mra tăng bâr Gâp, jêh nây mra knŏng geh du phung biăp jêh ri du huê rmăk dơm. 17Mbơ̆ rŏng ma Gâp, yorlah Gâp jao nau rêh Gâp nơm gay dơi sŏk tay. 18Mâu geh bunuyh dơi pit nau rêh Gâp ôh, ƀiălah Gâp nđơr êng jao săk. Gâp geh nau dơi jao nau rêh jêh ri geh nau dơi sŏk tay păng đŏng. Gâp hŏ dơn jêh nau vay tă bơh Mbơ̆ Gâp.”

19Yor lĕ nau ngơi aơ, phung Yuđa lŏ geh nau tâm nkhah. 20Âk tâm phung khân păng lah: “Păng geh brah mhĭk lơh, păng brŭt jêh; mâm ƀư khân may gŭ iăt păng?” 21Ƀaƀă bunuyh lah: “Aơ mâu di nau ngơi tă bơh du huê bunuyh geh brah mhĭk lơh ôh. Mâm brah mhĭk dơi pơk măt ma bunuyh chieh?”

Brah Yêsu ta ƀon Yêrusalem tâm rƀŭn nau kah gĭt ndray Nhhơr Ngih Brah

22Nôk nây ta ƀon Yêrusalem geh rƀŭn nau ndray Nhhơr Ngih Brah. Nôk nây jêng yan sial puh, 23Brah Yêsu hăn nsong tâm ntŭk ngih brah, tâm dâng ndring ngih Salômôn geh 24phung Yuđa gŭ jŭm Păng jêh ri ôp: “Ndah hôm jŏ Nơm Nti ăn hên kâp gân? Lah May jêng Brah Krist mbơh rah vah hom ma hên.” 25Brah Yêsu lah: “Gâp lah jêh ma khân may, ƀiălah khân may mâu ŭch chroh ôh; lĕ kan Gâp ƀư tâm amoh Mbơ̆ Gâp, lĕ kan nây mbơh ma Gâp. 26Ƀiălah khân may mâu chroh, yorlah khân may mâu di biăp Gâp ôh. 27Biăp Gâp tăng bâr Gâp, Gâp gĭt năl khân păng jêh ri khân păng tĭng ndô̆ Gâp. 28Gâp ăn ma khân păng nau rêh n'ho ro, khân păng mâu mra roh rai ôh, jêh ri mâu geh nơm pit sŏk khân păng bơh ti Gâp. 29Mbơ̆ Gâp, Nơm dŭt toyh lơn ma lĕ nơm êng,#10:29 Geh ƀaƀă nau rblang ntơm saơm nchih jêng: Nau Mbơ̆ Gâp hŏ ăn ma Gâp toyh lơn lĕ rngôch. hŏ ăn jêh biăp nây ma Gâp, jêh ri mâu hôm geh nơm êng dơi sŏk ntŭng khân păng bơh ti Mbơ̆ Gâp ôh. 30Gâp đah Mbơ̆ jêng nguay.”

31Phung Yuđa dônh lŭ gay klŭp ta Brah Yêsu. 32Brah Yêsu lah ma khân păng: “Gâp hŏ mpơl ma khân may âk kan ueh tă bơh Mbơ̆ Gâp. Pôri, moh nau dĭng khân may ŭch klŭp Gâp ma lŭ?” 33Phung Yuđa lah: “Hên mâu klŭp ôh may ma lŭ yor du nau kan ueh, ƀiălah yor nau ngơi sưr rlau; yorlah may jêng du huê bunuyh, ƀiălah may lah may jêng Brah Ndu.”#Lêvi 24:16. 34Brah Yêsu plơ̆ lah: “Mâu di hĕ tâm nau vay khân may nchih jêh: ‘Gâp hŏ lah khân may jêng brah,’#Mprơ Ơm 82:6. mâu lah mâu? 35Lah nau vay bu kuăl ma phung sŏk dơn Nau Brah Ndu Ngơi jêng brah, jêh ri nau Brah Ndu Ngơi bu mâu dơi chalơi ôh 36pôri Gâp yơh aơ, jêng Nơm Mbơ̆ prăp êng tâm nau kloh ueh jêh ri njuăl tât ta neh ntu, mâm ƀư khân may lah tay Gâp ngơi sưr rlau, nôk Gâp lah: ‘Gâp jêng Kon Brah Ndu’? 37Lah Gâp mâu ƀư lĕ nau kan Mbơ̆ Gâp, khân may lơi chroh ma Gâp ôh. 38Bi tơlah Gâp pah kan, lah khân may mâu chroh ma Gâp kđôi lĕ, chroh hom ma kan Gâp ƀư aơ, gay khân may dơi gĭt năl jêh ri gĭt rbăng Mbơ̆ gŭ tâm Gâp jêh ri Gâp gŭ tâm Mbơ̆.” 39Khân păng lŏ joi nau ŭch nhŭp Păng, ƀiălah Păng du tă bơh ti khân păng.

40Brah Yêsu hăn rgăn đŏng kơh rĭ dak krong Yurdan, ta ntŭk Y-Yôhan ƀư ƀaptem saơm ri, jêh ri gŭ ta nây.#Yôh 1:28. 41Âk bunuyh hăn tât ta Păng. Khân păng lah pô aơ: “Y-Yôhan mâu ƀư nau mbên khlay ôh, ƀiălah lĕ nau Y-Yôhan lah ma bunuyh aơ jêng ngăn.” 42Ta nây geh âk bunuyh chroh ma Păng.

Currently Selected:

Yôhan 10: CMO2023

Highlight

Copy