Yôhan 7

Brah Yêsu ta ƀon Yêrusalem. – Rƀŭn Ngih Ndưp

1Jêh ma nau nây, Brah Yêsu hăn tâm n'gor Galilê; Păng mâu ŭch hăn ôh tâm n'gor Yuđa, yorlah phung Yuđa joi ŭch nkhĭt Păng. 2Rƀŭn Ngih Ndưp phung Yuđa hŏ dăch jêh.#Lêvi 23:34; Nkah 16:13. 3Yor ri, phung oh Brah Yêsu lah ma Păng pô aơ: “May du hom tă bơh ntŭk aơ jêh ri hăn rgăn n'gor Yuđa gay ma phung oh mon may dơi saơ kan may ƀư, 4Yorlah mbu nơm ŭch ăn bu gĭt năl păng mâu geh ƀư kan ndâp ôh. Tơlah may ƀư lĕ kan nây ăn may mpơl hom may nơm ma phung neh ntu gĭt ƀă.” 5Nđâp ma phung oh Păng ăt mâu hŏ chroh ma Păng ôh. 6Brah Yêsu lah ma khân păng: “Mông gâp ê tât, ƀiălah mông khân may geh ƀaƀơ. 7Neh ntu mâu dơi tâm rmot ma khân may ôh ƀiălah tâm rmot ma gâp, yorlah gâp hŏ mbơh ma neh ntu gĭt pô aơ nau kan khân păng jêng djơh mhĭk. 8Khân may hăn hom gŭ tâm rƀŭn, bi gâp ê hŏ hăn râng ôh, yorlah mông gâp ê hŏ tât.” 9Lôch jêh ngơi, Păng hôm gŭ ta n'gor Galilê.

10Ƀiălah jêh phung oh Păng hŏ hăn hao râng tâm rƀŭn jêh, Păng hăn hao lĕ, ƀiălah hăn ma nau ndâp, mâu ăn bu saơ ôh. 11Phung Yuđa joi Brah Yêsu tâm năng rƀŭn, jêh ri lah: “Mbah ntŭk Păng gŭ?” 12Geh âk nau ngơi ƀŭk dŭk suyh ma Brah Yêsu ta nklang phung âk. Nơm lah: “Păng jêng bunuyh ueh ngăn;” nơm êng lah tay: “Mâu, păng jêng nơm ndơm phung ƀon lan.” 13Ƀiălah yor klach ma phung Yuđa, pôri mâu geh bunuyh nănh ngơi mpơl ma Păng.

Brah Yêsu nti lah tâm ngih brah

14N'gul nau rƀŭn, Brah Yêsu hăn hao tâm ngih brah jêh ri ntĭm nti. 15Phung Yuđa hih rhâl âk ngăn jêh ri lah pô aơ: “Bunuyh aơ ê hŏ nti, mâm ƀư dơi gĭt Nau Brah Ndu Ngơi?” 16Brah Yêsu plơ̆ lah: “Nau Gâp nti lah mâu di tă bơh nau Gâp nơm ôh, ƀiălah tă bơh nau Nơm tơm njuăl Gâp văch. 17Tơlah mbu nơm ŭch ƀư tĭng nau Brah Ndu ŭch, nơm nây mra gĭt nau Gâp nti luh tă bơh Brah Ndu mâu lah tĭng nau mĭn Gâp nơm ŭch. 18Mbu nơm nkoch tĭng nau păng nơm ŭch jêng joi nau chrêk rmah ma păng nơm, bi mbu nơm joi nau chrêk rmah ma Nơm hŏ njuăl păng jêng bunuyh nanê̆ ngăn, tâm bunuyh nây mâu geh ôh du ntil nau kue. 19Di lĕ Y-Môis ăn nau vay ma khân may? Ƀiălah mâu geh du huê tâm phung khân may djôt prăp nau vay nây ôh? Mâm ƀư khân may joi nau ƀư nkhĭt Gâp?” 20Phung ƀon lan plơ̆ lah: “May geh brah mhĭk lăp jêh! Mbu nơm joi ŭch nkhĭt may?” 21Brah Yêsu plơ̆ lah: “Gâp hŏ ƀư du ntil kan lĕ khân may hih rhâl da dê. 22Y-Môis hŏ ăn jêh nau vay koh ntâu ma khân may (nanê̆ nau vay nây mâu di tă bơh Y-Môis, ƀiălah tă bơh phung chô yau khân may), jêh ri khân may ƀư nau koh ntâu ma phung bu klâu tâm nar saƀat.#Lêvi 12:3; Ntơm 17:10. 23Tơlah bunuyh bu klâu dơn nau koh ntâu tâm nar saƀat gay ma mâu ƀư tih tâm nau vay Y-Môis, pôri mâm ƀư khân may ji nuih tâm nôk Gâp ƀư bah lĕ săk jăn ma du huê bunuyh tâm nar saƀat?#Yôh 5:9. 24Lơi ta phat dôih tĭng padih, ƀiălah phat dôih hom tĭng nau sŏng srăng.”

Phung Yuđa geh nau uh ah ma Brah Yêsu

25Geh ƀaƀă bunuyh tâm ƀon Yêrusalem lah pô aơ: “Mâu di hĕ aơ jêng bunuyh bu joi ŭch nkhĭt lơi ƀơh? 26Uănh ri, păng gŭ ngơi mpơl tanăp lĕ rngôch, ƀiălah mâu geh bunuyh lah Păng ôh! Di lĕ phung bunuyh geh nau dơi hŏ gĭt n'hêl nanê̆ ngăn ma păng jêng Brah Krist? 27Ƀiălah dôl Brah Krist văch, mâu geh bunuyh gĭt mbah tă ntŭk Păng văch ôh, ƀiălah bunuyh aơ he gĭt mbah tă ntŭk Păng văch.”

28Nôk Brah Yêsu gŭ ntĭm nti tâm ngih brah, Păng mbơh: “Khân may gĭt Gâp jêh ri gĭt đŏng mbah tă ntŭk Gâp văch! Gâp mâu geh văch êng, ƀiălah Nơm njuăl Gâp văch jêng nau nanê̆ ngăn, khân may mâu gĭt năl Păng. 29Bi Gâp gĭt năl Păng, yorlah Gâp văch tă bơh Păng, jêh ri Păng hŏ njuăl Gâp jêh.” 30Jêh nây khân păng joi ŭch nhŭp Brah Yêsu, ƀiălah mâu geh du huê nto ti pah ta Păng ôh, yorlah mông Păng ê hŏ tât. 31Ƀiălah geh âk bunuyh tâm phung ƀon lan chroh ma Păng jêh ri lah pô aơ: “Lah Brah Krist tât, Păng mra ƀư lĕ nau mbên khlay rlau lơn ma bunuyh aơ hŏ ƀư đŏng?”

Nau tâm nchră nhŭp Brah Yêsu

32Phung Pharisi tăng lĕ nau phung ƀon lan ngơi ƀŭk dŭk suyh ma Brah Yêsu, pôri khân păng jêh ri kôranh ƀư brah toyh njuăl phung kôranh king n'gang ngih brah hăn nhŭp Brah Yêsu. 33Yor ri, Brah Yêsu lah pô aơ: “Gâp hôm gŭ ndrel ma khân may jŏ djê̆ dơm, jêh nây Gâp plơ̆ sĭt ma Nơm hŏ njuăl Gâp. 34Khân may mra joi Gâp, ƀiălah mâu dơi saơ; ta ntŭk Gâp gŭ, khân may mâu dơi hăn ôh.” 35Phung Yuđa tâm ngơi ndrăng khân păng: “Mbah ntŭk păng mra hăn, dĭng he mâu dơi joi? Di lĕ păng tâm nal văch ta phung ƀon lan nsong mblêng tâm nklang phung Grek jêh ri nti ma phung Grek ƀơh? 36Moh nau păng mĭn nôk lah: ‘Khân may mra joi Gâp ƀiălah mâu dơi saơ,’ jêh ri ‘ta ntŭk Gâp gŭ, khân may mâu dơi hăn ôh’?”

37Tât nar nglĕ dŭt jêng nar dŭt khlay tâm năng rƀŭn, Brah Yêsu gŭ dâk ta nây jêh ri mbơh pô aơ: “Tơlah mbu nơm ji hir, văch hom ta Gâp jêh ri nhêt.#Lêvi 23:36. 38Mbu nơm chroh ma Gâp, ri mơ lĕ n'hor dak krong nau rêh mra hoch ler tă bơh tâm nuih n'hâm păng, di nâm Nau Brah Ndu Ngơi hŏ lah.”#Êsê 47:1; Sak 14:8. 39Păng lah nau aơ nchŏng ma Brah Huêng Ueh, lĕ phung bunuyh chroh ma Păng mra sŏk dơn; yorlah Brah Huêng Ueh ê hŏ jŭr, yorlah Brah Yêsu ê hŏ geh nau tâm rnê.

40Nôk phung ƀon lan tăng lĕ nau ngơi aơ, ƀaƀă lah: “Nanê̆ ngăn bunuyh aơ jêng du huê nơm mbơh lor.”#7:40 Uănh rblang ta 1:21. 41Ƀaƀă phung êng lah: “Aơ jêng Brah Krist.” Ƀiălah ƀaƀă phung êng lah tay đŏng: “Brah Krist văch tă bơh n'gor Galilê ƀơh? 42Mâu di hĕ Nau Brah Ndu Ngơi mbơh pô aơ Brah Krist Păng luh bơh noi deh Y-Đavit jêh ri văch tă bơh ƀon Ƀêtlêhem, jêng ƀon Y-Đavit ƀơh?”#II Sa 7:12; Mika 5:1. 43Pôri, yor Păng phung ƀon lan tâm nkhah ndrăng khân păng. 44Geh ƀaƀă phung tâm phung ƀon lan ŭch nhŭp Brah Yêsu, ƀiălah mâu geh nơm nto ti pah ta săk Păng ôh.

45Yor ri, phung kôranh king n'gang ngih brah plơ̆ sĭt ta phung kôranh ƀư brah toyh jêh ri ta phung Pharisi. Phung bunuyh aơ ôp khân păng: “Mpa khân may mâu têk leo păng plơ̆ sĭt ta aơ?” 46Phung kôranh aơ plơ̆ lah: “Ê hŏ mâp geh bunuyh ngơi tâm ban ma bunuyh aơ.” 47Phung Pharisi lah ma khân păng: “Khân may tŭp nau păng ndơm đŏng ƀơh? 48Geh lĕ du huê tâm phung kôranh mâu lah phung Pharisi chroh ma bunuyh nây? 49Bi phung ƀon lan aơ mâu gĭt nau vay, nanê̆ ngăn khư dơn nau rak rtăp!” 50Y-Nikôđem, alor hŏ văch jêh ta Brah Yêsu, jêng du huê tâm phung mpôl Pharisi, lah ma khân păng:#Yôh 3:1-2. 51“Nau vay he dơi lĕ phat dôih ma du huê bunuyh ƀiălah ê hŏ tăng nau păng ngơi jêh ri ê hŏ gĭt moh nau păng ƀư?” 52Khân păng plơ̆ lah: “May ăt jêng bunuyh n'gor Galilê lĕ ƀơh? Sek uănh hom may mra saơ pô aơ mâu geh ôh du huê nơm mbơh lor luh tă bơh n'gor Galilê.” [ 53Jêh lĕ rngôch bunuyh plơ̆ sĭt ta ngih khân păng.

Currently Selected:

Yôhan 7: CMO2023

Highlight

Copy