Yôhan 6

Brah Yêsu gŭ ta n'gor Galilê. – Păng njêng kapŭng ma prăm rbăn bunuyh sa

(Mathiơ 14:13-21; Markôs 6:30-44; Luka 9:10-17)

1Jêh ta nây, Brah Yêsu hăn rgăn kăl tê̆ dak mƀŭt Galilê, jêng dak mƀŭt Tibêrias. 2Du mpôl bunuyh âk ngăn hăn tĭng Brah Yêsu, yorlah khân păng hŏ tă saơ jêh lĕ nau mbên khlay Brah Yêsu ƀư ma phung bunuyh ji kuet. 3Brah Yêsu hao klơ yôk jêh ri gŭ ndrel ma phung oh mon ta nây. 4Nôk nây, dăch tât rƀŭn Nau Găn, jêng nau rƀŭn toyh tâm phung Yuđa. 5Brah Yêsu n'gơr uănh, saơ du phung mpôl bunuyh âk ngăn văch ma Păng, Păng lah ma Y-Philip: “Mbah ntŭk he mra rvăt piăng let, gay ma ăn phung bunuyh aơ sa?” 6Brah Yêsu lah kơt nây gay ma rlong uănh Y-Philip, yor Păng hŏ gĭt jêh moh nau Păng mra ƀư. 7Y-Philip ơh: “Bar rhiăng đơniê#6:7 Uănh rblang ta Mat 18:28. rvăt piăng let ăt mâu tŏng ôh ma ăp nơm nđâp tơlah tâm pă djê̆ djê̆.” 8Y-Andrê, oh Simôn Pêtrôs, du huê tâm phung oh mon, ơh pô aơ: 9“Geh du huê oh kon se ndăm geh prăm mlâm piăng let ba ôrgơ jêh ri bar mlâm ka, ƀiălah âk bunuyh tâm ban pônây, mâm dơi tŏng ma khân păng?” 10Brah Yêsu lah: “Ntăm hom ma lĕ rngôch bunuyh gŭ.” Ta ntŭk nây geh âk gơ̆. Pôri phung ƀon lan gŭ, rnoh bunuyh klăp lah prăm rbăn bunuyh. 11Brah Yêsu sŏk piăng let, nhhơr nau lah ueh, jêh tâm pă ma phung gŭ ta nây, Păng sŏk ka tâm pă kơt nây, tĭng nâm khân păng ŭch sa. 12Lah khân păng sa hŏ hơm jêh, Brah Yêsu lah ma oh mon: “Dônh rgum hom lĕ glo piăng let ndăk lơi ăn roh ôh.” 13Pôri, khân păng dônh rgum lĕ njah tă bơh prăm mlâm piăng let ba ôrgơ bu sa hôm rmeh, geh jât ma bar bĭ. 14Lĕ phung bunuyh saơ nau mbên khlay Brah Yêsu hŏ ƀư jêh ri lah: “Aơ ngăn jêng Nơm mbơh lor#6:14 Uănh rblang ta 1:21. hŏ văch tâm neh ntu.” 15Brah Yêsu gĭt năl nau mĭn khân păng ŭch nchâp ăn Brah Yêsu ƀư hađăch, pôri Păng du ndĕ hao êng klơ yôk du huê.

Brah Yêsu hăn klơ mpiăt dak mƀŭt

(Mathiơ 14:22-33; Markôs 6:45-52)

16Tât kêng măng, phung oh mon hăn ta dak mƀŭt, 17hao ncho du mlâm plŭng, hăn lor rgăn ta kơh mpeh kăl tê̆, mpeh ma ƀon Kapernum. Trôk hŏ măng jêh, ƀiălah Brah Yêsu hôm ê hŏ văch ma khân păng ôh. 18Dak mƀŭt rbuh yorlah sial khôm ktang. 19Nôk khân păng vah plŭng hŏ ngai klăp lah prăm mâu lah prao kilômet#6:19 Nrn: 25 mâu lah 30 êchtađơ; du êchtađơ klăp lah 185m. ri mơ saơ Brah Yêsu hăn ta klơ mpiăt dak mƀŭt văch dăch ta plŭng. Khân păng klach ngăn. 20Ƀiălah Brah Yêsu lah pô aơ: “Gâp yơh aơ, lơi klach ôh!” 21Khân păng ŭch vơt Brah Yêsu ncho tâm plŭng, ƀât lât plŭng nây njơh ta kơh, jêng ntŭk khân păng ŭch hăn.

Kapŭng nau rêh

22Nar ôi taơ, phung ƀon lan gŭ ta kơh dak mƀŭt đah ri gĭt năl pô aơ ta nây knŏng geh du mlâm plŭng, jêh ri Brah Yêsu mâu ncho ôh plŭng ndrel ma phung oh mon, ƀiălah knŏng geh phung oh mon hăn dơm yơh. 23Ƀiălah geh lĕ plŭng ƀaƀă tă bơh ƀon Tibêrias tât nsrŭng dăch ntŭk khân păng sa piăng let jêh Brah Yêsu lah ueh. 24Pôri, nôk phung ƀon lan saơ Brah Yêsu mâu geh gŭ ta nây ôh, phung oh mon mâu saơ lĕ, khân păng ncho plŭng hăn ta ƀon Kapernum gay joi Brah Yêsu. 25Dôl khân păng saơ Brah Yêsu kăl tê̆ dak mƀŭt, khân păng ngơi pô aơ: “Hơi Nơm Nti, ndah jŏ May tât ta aơ?” 26Brah Yêsu plơ̆ lah: “Nanê̆ ngăn, Gâp lah ngăn ma khân may, khân may joi Gâp mâu di lah yor hŏ saơ lĕ nau mbên khlay, ƀiălah yor khân may hŏ sa piăng let tât hơm. 27Lơi ôh pah kan yor ma ndơ sông sa blau ôm, ƀiălah yor ndơ sông sa hôm mro tât nau rêh n'ho ro, jêng ndơ sông sa Kon Bunuyh mra ăn khân may; yor Nơm nây, Brah Ndu jêng Mbơ̆, hŏ tâp pŏng jêh.” 28Khân păng lah: “Mâm hên mra ƀư gay ma dơi pah kan ma Brah Ndu?” 29Brah Yêsu plơ̆ lah: “Nau pah kan Brah Ndu jêng khân may chroh ma Nơm Brah Ndu hŏ njuăl văch jêh.” 30Khân păng lah tay: “Lah ndrĭ, moh nau mbên khlay Nơm Nti ƀư gay ăn hên saơ jêh ri chroh? Moh nau kan May ƀư? 31Phung chô yau hên hŏ sa jêh mana tâm bri rdah, tĭng nâm hŏ nchih: ‘Păng hŏ ăn khân păng sa piăng let tă bơh trôk.’ ”#Nêh 9:15; Ngluh 16:4,15; Mprơ Ơm 78:24 (LXX); 105:40. 32Brah Yêsu lah: “Nanê̆ ngăn, Gâp lah ngăn ma khân may, mâu di Y-Môis ăn ôh ma khân may piăng let tă klơ trôk; ƀiălah Mbơ̆ Gâp hŏ ăn ma khân may piăng let ngăn tă klơ trôk. 33Yorlah piăng let Brah Ndu jêng piăng let jŭr tă klơ trôk, ăn nau rêh ma neh ntu.” 34Khân păng lah: “Hơi Kôranh Brah, dăn ăn piăng let nây ma hên ƀaƀơ.” 35Brah Yêsu lah: “Gâp jêng piăng let nau rêh. Mbu nơm văch ta Gâp, mâu hôm ji ngot ôh, mbu nơm chroh ma Gâp mâu hôm geh ji hir ôh. 36Ƀiălah Gâp hŏ lah jêh ma khân may pô aơ: Khân may hŏ saơ jêh Gâp, ƀiălah mâu ŭch chroh ôh. 37Lĕ rngôch bunuyh Mbơ̆ Gâp ăn ma Gâp, văch ma Gâp da dê; mbu nơm văch ma Gâp, Gâp mâu mra mƀăr padih ôh. 38Yorlah Gâp hŏ jŭr tă klơ trôk, mâu di gay ƀư tĭng nau mĭn Gâp ŭch ôh, ƀiălah ƀư tĭng nau mĭn Nơm hŏ njuăl jêh Gâp. 39Aơ jêng nau mĭn ŭch Nơm hŏ njuăl Gâp văch: Lĕ rngôch bunuyh Păng ăn jêh ma Gâp, Gâp mâu mra ăn roh du huê nuyh, ƀiălah Gâp mra ăn khân păng dâk rêh tay tâm nar nglĕ dŭt. 40Yor aơ jêng nau mĭn Mbơ̆ Gâp ŭch: Mbu nơm saơ Kon jêh ri chroh ma Kon mra geh nau rêh n'ho ro, Gâp mra ƀư ăn bunuyh nây dâk rêh tay tâm nar nglĕ dŭt.”

41Ƀiălah phung Yuđa ngơi ƀrôk ma Brah Yêsu, yor Brah Yêsu lah: “Gâp jêng piăng let jŭr tă klơ trôk.” 42Khân păng lah: “Mâu di hĕ bunuyh aơ jêng Brah Yêsu, kon Y-Yôsep? Mê̆ mbơ̆ păng, he gĭt lĕ, mâm ƀư aƀaơ aơ păng lah tay: ‘Gâp hŏ jŭr tă klơ trôk’?” 43Brah Yêsu lah đŏng ma khân păng: “Khân may lơi ôh ngơi ƀŭk dŭk suyh ndrăng khân may ôh. 44Tơlah Mbơ̆, jêng Nơm hŏ njuăl Gâp, mâu mphâk ôh pôri mâu hôm geh nơm dơi văch ma Gâp, jêh ri Gâp mra ƀư ăn bunuyh nây dâk rêh tay tâm nar nglĕ dŭt. 45Lĕ ndrom samƀŭt mbơh lor geh nchih: ‘Lĕ phung nây Brah Ndu hŏ ntĭm nti da dê.’#Êsai 54:13. Mbu nơm hŏ iăt jêh ri nti ta Mbơ̆ mra văch ma Gâp. 46Mâu geh ôh du huê bunuyh saơ Mbơ̆, knŏng Nơm hŏ văch jêh tă bơh Brah Ndu; Nơm nây hŏ saơ jêh Mbơ̆. 47Nanê̆ ngăn, Gâp lah ngăn ma khân may, mbu nơm chroh mra geh nau rêh n'ho ro. 48Gâp jêng piăng let nau rêh. 49Phung chô yau khân may hŏ sa jêh mana tâm bri rdah jêh nây khĭt đŏng. 50Aơ piăng let jŭr tă bơh trôk, gay mbu moh sa jêh ri mâu khĭt ôh. 51Gâp jêng piăng let nau rêh jŭr tă bơh trôk; tơlah mbu nơm sa piăng let nây mra rêh n'ho ro. Piăng let Gâp ăn nây jêng nglay săk Gâp nơm ŭch ăn nau rêh ma neh ntu.”

52Pôri, geh nau tâm djrel ta nklang phung Yuđa. Khân păng lah: “Mâm ƀư bunuyh aơ sŏk nglay săk păng nơm ăn he sa?” 53Brah Yêsu lah ma khân păng: “Nanê̆ ngăn, Gâp lah ngăn ma khân may, tơlah khân may mâu sa nglay săk jêh ri mâu nhêt dak mham Kon Bunuyh, pôri mâu geh ôh nau rêh n'ho ro tâm khân may. 54Mbu nơm sa nglay săk jêh ri nhêt dak mham Gâp, păng geh nau rêh n'ho ro; Gâp mra ăn păng dâk rêh tay đŏng tâm nar nglĕ dŭt. 55Yorlah nglay săk Gâp jêng ndơ sa ngăn, mham Gâp jêng dak nhêt ngăn. 56Mbu nơm sa nglay săk Gâp jêh ri nhêt dak mham Gâp ri mơ gŭ tâm Gâp, jêh ri Gâp gŭ tâm bunuyh nây. 57Tâm ban ma Mbơ̆ nơm gŭ rêh mro mrăng hŏ njuăl Gâp jêh, jêh ri Gâp gŭ rêh yor Păng, pôri lĕ, mbu nơm sa nglay săk Gâp mra rêh yor Gâp. 58Aơ jêng piăng let jŭr tă bơh trôk, mâu tâm ban ma piăng let phung chô yau khân may hŏ sa jêh ri khĭt; mbu nơm sa piăng let aơ mra gŭ rêh n'ho ro.” 59Brah Yêsu ngơi lĕ nau aơ dôl Păng ntĭm nti tâm ngih rƀŭn ta ƀon Kapernum.

60Âk phung oh mon Păng iăt nau aơ jêh ri lah: “Nau aơ jêr ir, mbu dơi sŏk dơn?” 61Ƀiălah Brah Yêsu gĭt êng phung oh mon Păng ngơi ƀŭk dŭk suyh ma nau nây, Păng lah: “Nau aơ ƀư chêh prah khân may lĕ ƀơh? 62Pôri, tơlah khân may saơ Kon Bunuyh hao ta ntŭk Păng gŭ bơh saơm mâm mêh? 63Brah huêng yơh ƀư ăn nau rêh, nglay săk mâu khlay ôh. Lĕ nau Gâp ngơi jêh ma khân may jêng huêng brah jêh ri nau rêh. 64Ƀiălah geh ƀaƀă bunuyh tâm phung khân may mâu chroh ôh.” Yorlah bơh saơm, Brah Yêsu hŏ gĭt jêh mbu nơm mâu ŭch chroh jêh ri mbu nơm mra ƀư rlăng ma Păng. 65Brah Yêsu lah tay: “Yor nây, Gâp hŏ lah jêh ma khân may pô aơ tơlah Mbơ̆ mâu ăn, mâu geh bunuyh dơi văch ma Gâp ôh.”

Nau Y-Pêtrôs mbơh

66Ntơm nau nây, âk phung oh mon plơ̆ rŭch, mâu hôm tĭng Păng ôh. 67Brah Yêsu lah ma jât ma bar oh mon: “Bi khân may ŭch đŏng plơ̆ rŭch hĕ?” 68Y-Simôn Pêtrôs plơ̆ lah: “Ơ Kôranh Brah, mbu moh hên mra hăn tĭng? Kôranh Brah geh nau ngơi rêh n'ho ro,#Mat 16:16; Mark 8:29; Luk 9:20. 69Hên lĕ chroh jêh ri lĕ gĭt năl Kôranh Brah jêng Nơm Kloh Ueh tă bơh Brah Ndu.” 70Brah Yêsu plơ̆ lah: “Mâu di hĕ Gâp hŏ săch jêh khân may jêng jât ma bar oh mon? Ƀiălah du huê tâm phung khân may jêng brah mhĭk?” 71Brah Yêsu ŭch lah tât ma Y-Yuđas, kon Simôn Iskariôt, jêng du huê tâm jât ma bar oh mon; bunuyh aơ yơh bah kơi mra ƀư rlăng ma Brah Yêsu.

Currently Selected:

Yôhan 6: CMO2023

Highlight

Copy