Yôhan 21

Brah Yêsu tâm mpơl ta kơh dak mƀŭt Tibêrias

1Jêh nau nây, Brah Yêsu tâm mpơl đŏng ma phung oh mon Păng ta ntŭk kơh dak mƀŭt Tibêrias. Nau Păng tâm mpơl kơt aơ: 2Y-Simôn Y-Pêtrôs, Y-Thômas bu kuăl jêng Điđim, Y-Nathanel, bunuyh ƀon Kana tâm n'gor Galilê, phung kon bu klâu Y-Sêƀêđê, jêh ri bar hê oh mon êng dôl rgum ndrel. 3Y-Simôn Pêtrôs lah ma khân păng: “Gâp hăn seng ka.” Phung bunuyh ri plơ̆ lah: “Hên hăn ndrel ma may lĕ!” Khân păng hăn, hao ncho ta klơ plŭng, ƀiălah tâm măng nây mâu geh ka ôh.#Luk 5:5.

4Tât kêng ôi, Brah Yêsu gŭ ta kơh dak nây, ƀiălah phung oh mon Păng mâu gĭt năl Brah Yêsu ôh. 5Brah Yêsu ôp: “Hơi phung kon, mâu hĕ geh ka?” Khân păng plơ̆ lah: “Mâu geh ôh.” 6Brah Yêsu lah: “Khân may gŭ seng hom jal pa ma plŭng nây khân may mra geh ka.” Pôri, khân păng seng jal, geh ka âk kŏ tât uih jal mâu dơi ôh.#Luk 5:6. 7Oh mon Brah Yêsu rŏng, lah ma Y-Pêtrôs: “Nây jêng Kôranh Brah!” Nôk Y-Simôn Pêtrôs hŏ tăng jêh nây jêng Kôranh Brah, Păng nsoh ao ro (dôl gŭ săk hưl), jêh ri păng nsăt trŭnh tâm dak mƀŭt. 8Phung oh mon êng hăn ma plŭng, đŏt jal geh bêng ka, yorlah knŏng ngai đah kơh klăp lah tâm sĭn jât met.#21:8 Nrn: bar rhiăng pêcut; du pêcut ma 457 mm. 9Mhe hao ta kơh, khân păng saơ ta nây geh ŭnh sa ônh rnga nđâp ma ka nđông klơ nây, jêh ri geh piăng let đŏng. 10Brah Yêsu đă ma khân păng: “Djôt leo hom tât aơ djê̆ ka khân may mhe geh nây.” 11Y-Simôn Pêtrôs hao tâm plŭng, đŏt jal bêng du rhiăng prăm jât ma pe mlâm ka toyh let ta kơh. Nđâp lah geh âk ka kđôi lĕ, jal mâu geh hêk ôh. 12Brah Yêsu đă: “Khân may văch hom ta aơ sa.” Mâu geh du huê tâm phung khân păng nănh ôp ma Păng: “Mbu may jêng?” Yorlah khân păng gĭt jêh Păng jêng Kôranh Brah. 13Brah Yêsu hăn dăch, sŏk piăng let ăn ma khân păng, jêh ri ăn ka tâm ban lĕ. 14Aơ jêng tơ̆ tal pe Brah Yêsu tâm mpơl ma phung oh mon Păng, lah jêh Păng dâk rêh tay tă bơh nau khĭt.

Brah Yêsu jêh ri Y-Pêtrôs

15Lah jêh sa, Brah Yêsu lah ma Y-Simôn Pêtrôs pô aơ: “Ơ Y-Simôn, kon Y-Yôhan, may rŏng ma Gâp âk lơn ma phung aơ lĕ?” Y-Pêtrôs ơh: “Ơ Kôranh Brah, May gĭt jêh gâp rŏng ma May.” Brah Yêsu đă: “Mât mray hom phung kon biăp Gâp.” 16Brah Yêsu ôp đŏng ma păng rơh bar: “Ơ Y-Simôn, kon Y-Yôhan, may rŏng lĕ ma Gâp?” Y-Pêtrôs ơh: “Ơ, Kôranh Brah, May gĭt jêh gâp rŏng ma May.” Brah Yêsu lah ma păng: “Chiăp hom phung biăp Gâp.” 17Brah Yêsu ôp đŏng ma păng rơh pe: “Y-Simôn kon Y-Yôhan, may rŏng lĕ ma Gâp?” Y-Pêtrôs rngot yor Brah Yêsu ôp păng tât pe tơ̆: “May rŏng lĕ ma Gâp?” Păng ơh pô aơ: “Ơ Kôranh Brah ơi, May gĭt lĕ rngôch ndơ; May gĭt jêh gâp rŏng ma May.” Brah Yêsu lah ma păng: “Mât mray hom phung biăp Gâp. 18Nanê̆, Gâp lah ngăn ma may, dôl hôm ndăm, may rêt êng rse bŭt may nơm, may hăn mbah ntŭk may ŭch hăn; ƀiălah tât ranh jêh, may mra yơr ti, gay ma bu êng rêt rse bŭt jêh ri njŭn leo may ta ntŭk may mâu ŭch hăn ôh.” 19Brah Yêsu lah nau nây ŭch mbơh mâm nau Y-Pêtrôs mra khĭt gay ma tâm rnê Brah Ndu. Pakơi nây, Brah Yêsu đă ma păng pô aơ: “Tĭng hom Gâp.”

20Y-Pêtrôs n'gĭl uănh saơ du huê oh mon Brah Yêsu rŏng tĭng groi pakơi, jêng nơm nsing ta ntang ntơh Brah Yêsu dôl khân păng gŭ nhêt sa kêng măng jêh ri ôp: “Ơ Kôranh Brah, mbu moh jêng nơm rlăng May?”#Yôh 13:25. 21Lah saơ bunuyh nây, Y-Pêtrôs ôp Brah Yêsu: “Ơ Kôranh Brah, bi bunuyh aơ moh nau mra tât ma păng?” 22Brah Yêsu plơ̆ lah: “Lah Gâp ŭch bunuyh nây gŭ rêh tât Gâp plơ̆ văch, mpa kô̆ tât nau nây ma may? Bi may, tĭng hom Gâp.” 23Pôri, geh nau nây bu tăng lư tâm phung oh nâu ma oh mon nây mâu mra khĭt ôh. Ƀiălah Brah Yêsu mâu mâp lah ôh ma Y-Pêtrôs pô aơ: “Bunuyh nây mâu mra khĭt ôh,” ƀiălah Brah Yêsu lah: “Lah Gâp ŭch ma bunuyh nây gŭ rêh tât Gâp plơ̆ văch, mpa kô̆ tât nau nây ma may?” 24Oh mon nây mbơh nkoch lĕ nau aơ, jêh ri hŏ nchih lĕ nau kan nây. He gĭt ma nau bunuyh nây mbơh nkoch jêng di ngăn. 25Brah Yêsu hŏ ƀư âk kan êng đŏng. Lah bu nchih lĕ rngôch nau Păng ƀư nây, lĕ neh ntu mâu dơi tŏng ôh ntŭk ma prăp lĕ ndrom samƀŭt bu nchih.

Currently Selected:

Yôhan 21: CMO2023

Highlight

Copy