Yôhan 20

Nau Brah Yêsu dâk rêh tay

(Mathiơ 28:1-8; Markôs 16:1-8; Luka 24:1-12)

1Ơm ôi nar tal nguay tâm pơh, dôl trôk hôm ngo, H'Mari Mađala hăn ta môch, saơ bu trơn lơi lŭ toyh rdâl trôm môch. 2Pôri, păng nchuăt văch ta Y-Simôn Pêtrôs jêh ri oh mon ri, jêng bunuyh Brah Yêsu rŏng, jêh ri lah: “Bu sŏk jêh Kôranh Brah tă bơh trôm môch nây, hên mâu gĭt ôh mbah ntŭk bu ăn Păng aƀaơ.”

3Y-Pêtrôs ndrel ma oh mon êng nây du luh, hăn tât ta môch. 4Lĕ bar hê khân păng nchuăt da dê, ƀiălah oh mon êng nây nchuăt ngăch lơn ma Y-Pêtrôs jêh ri tât lor ta môch. 5Păng kŭnh uănh tâm trôm môch, saơ bok njor hôm ta nây, ƀiălah păng mâu hŏ lăp ôh. 6Y-Simôn Pêtrôs groi pakơi, lăp tâm môch, saơ lĕ bok njor hôm ta nây, 7bok nkŭm bôk Brah Yêsu mâu geh ăn ndrel ma bok njor Păng ôh, ƀiălah hŏ klôn lơi ăn êng ta du ntŭk. 8Nôk nây, oh mon êng nây tât lor ta môch, hăn lăp đŏng, saơ jêh ri chroh. 9Ƀiălah khân păng ê hŏ gĭt rbăng ôh nau ngơi tâm Nau Brah Ndu Ngơi nchih ma Brah Yêsu dâk rêh tay tă bơh nau khĭt. 10Jêh nây phung oh mon plơ̆ sĭt ta ngih.

11H'Mari gŭ dâk padih ta môch jêh ri nhhiăng nhĭm. Nkre nhĭm nkre kŭnh mêt uănh tâm trôm môch, 12saơ bar hê tông mpăr ueh nsoh ao nglang gŭ ta ntŭk hŏ n'gân săk Brah Yêsu, du huê gŭ ta bôk, du huê gŭ ta jâng. 13Bar hê tông mpăr ueh ôp: “Hơi bu ur nây, mpa nau ay nhĭm?” H'Mari lah: “Yorlah bu sŏk leo jêh Kôranh Brah gâp, mâu gĭt mbah ntŭk bu ăn Păng!” 14Dôl lah nau nây, păng n'gĭl uănh, saơ Brah Yêsu gŭ dâk ta nây, ƀiălah păng mâu gĭt năl ôh nây jêng Brah Yêsu. 15Brah Yêsu ôp păng: “Hơi bu ur, moh nau ay nhĭm? Mbu ay joi?” H'Mari nđôn lah păng jêng nơm ƀư n'gar, pôri păng lah: “Hơi kôranh, lah may sŏk leo jêh Păng, dăn mbơh ăn gâp gĭt mbah ntŭk may ăn Păng gay ma gâp mra hăn sŏk Păng.” 16Brah Yêsu kuăl: “Hơi H'Mari!” H'Mari n'gĭl uănh jêh ri lah tâm nau ngơi Hêbrơ: “Rabuni” (nâm bu ntĭt: Nơm Nti)! 17Brah Yêsu đă: “Lơi pah ta#20:17 Mlr: djôt prăp. Gâp, yorlah Gâp ê hŏ hao ma Mbơ̆! Ƀiălah hăn hom tâm mâp jêh ri mbơh ma phung oh nâu Gâp, lah ma khân păng pô aơ: Gâp hao ma Mbơ̆ Gâp jêh ri Mbơ̆ khân may lĕ, nđâp ma Brah Ndu Gâp jêh ri Brah Ndu khân may lĕ.” 18H'Mari Mađala hăn jêh ri mbơh ma phung oh mon pô aơ gâp hŏ saơ jêh Kôranh Brah, jêh ri Păng mbơh jêh ma gâp lĕ nau nây.

Nau Brah Yêsu tâm mpơl ma phung oh mon

(Mathiơ 28:16-20; Markôs 16:14-18; Luka 24:36-49)

19Dăch kêng nar nây, nar tal nguay tâm pơh, lĕ mpông ta ntŭk phung oh mon gŭ nchăng lĕ, yor klach ma phung Yuđa. Brah Yêsu văch dâk ta nklang phung khân păng jêh ri lah: “Ăn nau đăp mpăn ma khân may!” 20Lah jêh ngơi, Păng nhhơ mpang ti jêh ri pŭng vĕ ăn ma khân păng uănh. Nôk saơ Brah Yêsu, phung oh mon răm rhơn ngăn. 21Brah Yêsu lah đŏng ma khân păng: “Ăn nau đăp mpăn ma khân may! Nâm bu Mbơ̆ hŏ njuăl Gâp, Gâp njuăl đŏng khân may kơt nây lĕ.” 22Jêh lah nau nây, Păng khôm n'hâm ma khân păng jêh ri lah: “Dơn hom Brah Huêng Ueh. 23Tơlah khân may yô̆ an nau tih bu, khân păng mra dơi geh nau yô̆ an; tơlah khân may djôt prăp nau tih bu, nau tih khân păng mra hôm nâm ơm.”#Mat 16:19; 18:18.

24Nôk Brah Yêsu văch ta nây, Y-Thômas kuăl jêng Điđim, du huê tâm phung jât ma bar kôranh oh mon, mâu geh ta nây ôh ndrel ma khân păng. 25Phung oh mon êng lah ma păng: “Hên hŏ saơ jêh Kôranh Brah.” Ƀiălah Y-Thômas lah: “Lah gâp mâu saơ ôh têl kđĭn ta mpang ti Păng, lah gâp mâu lŏk ôh nglau ti gâp ta ntŭk têl kđĭn, jêh ri lah mpang ti gâp mâu bi ta ntŭk pŭng vĕ Păng, gâp mâu mra chroh ôh.” 26Pham nar pakơi, phung oh mon rgum đŏng tâm ngih, geh Y-Thômas lĕ gŭ ndrel ma khân păng nđâp tơlah mpông hôm nchăng, Brah Yêsu văch dâk ta nklang khân păng jêh ri lah: “Ăn nau đăp mpăn ma khân may!” 27Jêh ri Brah Yêsu lah ma Y-Thômas: “Pah hom nglau ti may ta aơ jêh ri uănh mpang ti Gâp. Yơr hom mpang ti may jêh ri pah ta pŭng vĕ Gâp. Lơi ta mâu chroh, ƀiălah chroh hom!” 28Y-Thômas ơh pô aơ: “Ơ Kôranh Brah gâp jêh ri Brah Ndu gâp ơi!” 29Brah Yêsu lah: “Di lĕ yorlah may saơ jêh Gâp, rĭ dĭng may chroh? Ueh maak ngăn ma phung bunuyh mâu mâp saơ, ƀiălah chroh jêh!”

30Brah Yêsu ƀư âk nau mbên khlay êng tanăp phung oh mon Păng đŏng, ƀiălah mâu nchih ôh tâm ndrom samƀŭt aơ. 31Ƀiălah lĕ nau dơi nchih jêh gay ma khân may chroh ma Brah Yêsu jêng Brah Krist, Kon Brah Ndu, jêh ri gay ma nôk khân may chroh tâm amoh Păng, khân may geh nau rêh.

Currently Selected:

Yôhan 20: CMO2023

Highlight

Copy