Yôhan 19

Nau Pilat tâm nal

1Nôk nây, Pilat đă bu dong Brah Yêsu ma mâng. 2Phung tahan tanh du mlâm đon hađăch ma lok, ndô ta bôk Brah Yêsu, jêh ri ăn Păng nsoh ao chăng. 3Khân păng văch dăch ta Brah Yêsu jêh ri lah: “Mbah ma hađăch phung Yuđa!” Jêh nây khân păng tap ta măt Păng.

4Pilat hăn luh du tơ̆ đŏng jêh ri lah ma phung ƀon lan: “Aơ, gâp njŭn leo păng padih ma khân may, gay ma khân may gĭt gâp mâu saơ păng geh nau tih.” 5Pôri, Brah Yêsu luh padih, bôk ndô đon hađăch ma lok, păng nơm nsoh ao chăng. Pilat lah ma khân păng: “Uănh hom bunuyh aơ.” 6Ƀiălah dôl phung kôranh ƀư brah toyh jêh ri phung kôranh saơ Brah Yêsu, khân păng nter huy: “Pâng păng ma kđĭn ta si tâm rkăng! Pâng păng ma kđĭn ta si tâm rkăng!” Pilat đă ma khân păng: “Khân may sŏk djôt păng ma khân may nơm jêh ri pâng kđĭn, yor gâp mâu ôh saơ păng geh nau tih.” 7Phung Yuđa plơ̆ lah: “Hên geh nau vay, tĭng nâm nau vay nây păng mra khĭt, yorlah păng mbơh êng păng nơm jêng Kon Brah Ndu.”

8Lah tăng nau nây, Pilat lơ hâu klach đŏng. 9Păng plơ̆ lăp đŏng tâm ngih kôranh jêh ri lah ma Brah Yêsu pô aơ: “Mbah tă luh may?” Ƀiălah Brah Yêsu mâu hôm plơ̆ lah ôh. 10Yor ri, Pilat lah ma Brah Yêsu: “Mâm ƀư may mâu ŭch ngơi đah gâp? May mâu gĭt gâp geh nau dơi yô̆ an, geh đŏng nau dơi pâng may lĕ ƀơh?” 11Brah Yêsu plơ̆ lah: “Lah tă bơh klơ mâu ăn, may mâu geh nau dơi klơ Gâp ôh, mbu nơm jao Gâp ma may jêng geh nau tih jru lơn đŏng.” 12Ntơm bơh nây, Pilat joi nau gay mƀơk Brah Yêsu, ƀiălah phung Yuđa nter huy: “Lah may mƀơk bunuyh aơ, may mâu jêng bunuyh răp jăp#19:12 Nrn: mĭt jiăng. đah Sêsar ôh, yor mbu nơm mbơh êng păng nơm jêng hađăch jêng nơm tâm rdâng đah Sêsar.”

13Nôk Pilat tăng nau nây păng njŭn leo Brah Yêsu luh padih, jêh păng gŭ ta ntŭk phat dôih, ta ntŭk bu moh Ntŭk Lăk Lŭ, nau ngơi Hêbrơ kuăl jêng Gabatha. 14Nôk nây jêng nar Ndrăp Nkra ma rƀŭn Nau Găn, klăp lah nklang bôk nar.#19:14 Nrn: mông rơh prao. Pilat lah ma phung Yuđa pô aơ: “Aơ jêng hađăch khân may!” 15Khân păng lŭng nter: “Ngroh lơi Păng, ngroh lơi Păng! Pâng păng ma kđĭn ta si tâm rkăng!” Pilat lah: “Gâp mra pâng hađăch khân may ta si tâm rkăng lah?” Phung kôranh ƀư brah toyh plơ̆ lah: “Hên mâu hôm geh hađăch êng ôh, knŏng Sêsar.” 16Pilat jao Brah Yêsu ma khân păng, ăn khân păng pâng ta si tâm rkăng.

Pôri khân păng têk leo Brah Yêsu hăn.

Bu pâng Brah Yêsu ta si tâm rkăng

(Mathiơ 27:32-44; Markôs 15:21-32; Luka 23:26-43)

17Brah Yêsu tuy si tâm rkăng hăn tât ta du ntŭk bu kuăl jêng Ntŭk Nting Bôk, nau ngơi Hêbrơ kuăl jêng Gôgôtha. 18Ta nây, khân păng pâng Brah Yêsu. Geh bar hê bunuyh êng bu pâng ndrel ma Păng, du huê pa chiau, du huê pa ma, bi Brah Yêsu gŭ ta nklang. 19Pilat ăn bu nchih du rlat kađar jêh ri pla klơ si tâm rkăng. Tâm rlat kađar geh nchih pô aơ: “YÊSU BUNUYH NASARET, HAĐĂCH PHUNG YUĐA.” 20Yorlah ntŭk bu pâng kđĭn Brah Yêsu dăch ƀon toyh, jêh ri rlat kađar nchih tâm nau ngơi Hêbrơ, nau ngơi Latin jêh ri nau ngơi Grek, rĭ dĭng geh âk phung Yuđa rŏ. 21Phung kôranh ƀư brah toyh phung Yuđa lah ma Pilat: “Dăn lơi nchih: ‘Hađăch phung Yuđa,’ ƀiălah nchih hom: ‘Păng nơm lah: Gâp jêng hađăch phung Yuđa.’ ” 22Pilat plơ̆ lah: “Nau gâp lĕ nchih, gâp hŏ nchih pônây yơh.”

23Nôk phung tahan hŏ pâng Brah Yêsu ta si tâm rkăng jêh, khân păng sŏk kho ao Brah Yêsu tâm pă puăn kô̆, ăp nơm sŏk du kô̆. Khân păng sŏk lĕ ao jong Brah Yêsu, ƀiălah ao jong nây jêng du blah bok bu tanh păng knŏng nguay bơh klơ tât tâm dâng, mâu geh trong ndrem jĭm ôh. 24Pôri, khân păng lah ndrăng khân păng nơm: “Lơi nkhêk ôh, ƀiălah nchroh n'hôr hom, gay ma gĭt mbu moh geh ao aơ.” Pônây, nau aơ ƀư tât di ngăn nau ngơi tâm Nau Brah Ndu Ngơi:

“Khân păng tâm pă jêh kho ao Gâp ndrăng khân păng,

Tâm nchroh n'hôr sŏk ao jong Gâp.”#Mprơ Ơm 22:18.

Nây jêng kan phung tahan hŏ ƀư. 25Gŭ dăch ta si tâm rkăng Brah Yêsu geh mê̆ Păng, nur mê̆ Păng, ndrel ma H'Mari ur Y-Klôpas jêh ri H'Mari Mađala. 26Brah Yêsu saơ mê̆ Păng jêh ri du huê oh mon Păng rŏng gŭ dăch ta nây, Păng lah ma mê̆ Păng: “Hơi bu ur, nây jêng kon bu klâu ay!” 27Jêh nây Păng lah ma oh mon nây: “Aơ jêng mê̆ may!” Ntơm bơh mông nây, oh mon nây leo păng sĭt ta ngih păng nơm.

28Jêh nau nây, Brah Yêsu gĭt ma lĕ rngôch kan hŏ lôch jêh, jêh ri gay ma nau ngơi tâm Nau Brah Ndu Ngơi tât di ngăn, Păng lah: “Gâp ji hir.” 29Ta nây, geh du mlâm yăng n'gâr bêng dak srat, pôri khân păng sŏk du bok mli mbŭk tâm dak srat, kât ta n'gĭng hisôp, jêh nây njŭn tât ta mbung Brah Yêsu. 30Lah Brah Yêsu hŏ dơn jêh dak srat nây, Păng lah: “Lĕ rngôch nau kan hŏ lôch jêh!” Jêh nây Păng kŭnh bôk, tăch n'hâm.

31Nar nây jêng nar Ndrăp Nkra, yor ri phung Yuđa klach ma lĕ săk khĭt hôm yông ta klơ si tâm rkăng tâm nar saƀat, yorlah nar saƀat nây dŭt khlay. Yor nây, khân păng dăn ma Pilat ăn bu ƀư deh lơi jâng lĕ phung nây, jêh ri njŭr lơi. 32Pôri, phung tahan hăn ƀư deh lơi jâng bunuyh tal nguay, jêh ri tât bunuyh ri, jêng bunuyh bu pâng ndrel ma Brah Yêsu. 33Ƀiălah dôl tât ta ntŭk Brah Yêsu, khân păng saơ Păng lĕ khĭt jêh, khân păng mâu hôm ƀư deh jâng Păng ôh. 34Ƀiălah geh du huê tahan sŏk tak ntâp ta pŭng vĕ Brah Yêsu, mham jêh ri dak luh hoch ro. 35Nơm saơ nau nây păng mbơh nkoch ma nau aơ ma bu — nau păng mbơh nkoch jêng di ngăn, jêh ri bunuyh nây gĭt păng nơm ngơi nau ngăn — gay ăn khân ay may chroh tâm ban lĕ.#19:35 Geh ƀaƀă nau rblang ntơm saơm nchih: thoi đŏng chroh. 36Lĕ nau aơ tât geh gay ma tâm di ngăn nau ngơi tâm Nau Brah Ndu Ngơi: “Mâu geh du mlâm nting Păng deh ôh.”#Ngluh 12:46; Kơp 9:12; Mprơ Ơm 34:20. 37Jêh ri ntop du nau ngơi ƀaƀă tâm Nau Brah Ndu Ngơi: “Khân păng mra saơ bunuyh khân păng hŏ ntâp jêh.”#Sak 12:10.

Nau tâp Brah Yêsu

(Mathiơ 27:57-61; Markôs 15:42-47; Luka 23:50-56)

38Jêh nau nây, Y-Yôsep bunuyh ƀon Arimathê, jêng oh mon tĭng Brah Yêsu ma nau ndâp, yor klach ma phung Yuđa, păng dăn ma Pilat gay ma dăn sŏk săk Brah Yêsu. Pilat ăn. Pôri, păng hăn sŏk săk Brah Yêsu ro. 39Y-Nikôđem, bunuyh nôk saơm hŏ văch ta Brah Yêsu dôl măng, hăn lĕ, djôt leo du rhiăng kilô dak si tăng tâm rlŭk đah dak si alôê.#Yôh 3:1-2. 40Khân păng sŏk lơi săk Brah Yêsu jêh ri sŏk bok mhay nđâp ma dak si ƀâu kah put tay tĭng nau vay ơm tâp bunuyh khĭt phung Yuđa. 41Ta ntŭk bu pâng Brah Yêsu geh du ntŭk n'gar, jêh ri tâm n'gar nây geh du ntu môch mhe, ê mâp tâp bunuyh ôh. 42Yor nar nây jêng nar Ndrăp Nkra phung Yuđa, jêh ri ntu môch nây dăch, pôri khân păng tâp Brah Yêsu ta nây.

Currently Selected:

Yôhan 19: CMO2023

Highlight

Copy