Kan Kôranh Oh Mon Nau ngơi nhhơ
Nau ngơi nhhơ
Kan Kôranh Oh Mon jêng kô̆ thoi tay tĭng ndrom samƀŭt Nau Mhe Mhan Ueh Luka. Nau ŭch tâm ndrom samƀŭt aơ jêng nkoch tay nau phung oh mon brah Yêsu, geh Brah Huêng Ueh njŭn leo, mbơh nkoch Nau Mhe Mhan Ueh ma nau Kôranh Brah Yêsu jêng Nơm Tâm Rklaih “ta ƀon Yêrusalem, lĕ n'gor Yuđa, n'gor Samari, kŏ tât dŭt rplay neh” (1:8). Aơ jêng nkoch bri ma nau kan phung chroh tĭng ndô̆ Brah Yêsu, ntơm bơh phung Yuđa, chăt hao jêng âk bunuyh gĭt, jêh ri jêng du nau rnơm ma lĕ rngôch neh ntu. Nơm nchih ăt nkoch mbơh rah vah đah phung uănh sam ƀŭt pô aơ nau rnơm bơh phung bunuyh tĭng Brah Yêsu mâu di jêng nau tŭn jot ma nau dôih bri tât nau rnă njrăng bơh ƀon bri hađăch Rôm, ƀiălah nau rnơm Brah Krist jêng play tâm nau kan n'hêl nê̆ bơh nau phung Yuđa chroh.
Ndrom Samƀŭt Kan Kôranh Oh Mon dơi pă jêng pe kô̆ khlay, nkoch nau pơk huy tâm lĕ n'gor ta nây ma Nau Mhe Mhan Ueh ma Kôranh Brah Yêsu jêng Nơm Tâm Rklaih dơi mbơh nkoch jêh ri lĕ Phung Ngih Brah Ndu dơi ndâk njêng: (1) Ntơm saơm geh Brah Krist ta Yêrusalem jêh nau Brah Yêsu hao sĭt ta klơ; (2) Nau chăt hao jêng lam huy tâm lĕ n'gor ƀaƀă ta Palestine; (3) Nau lư huy ngai rlau lơn tâm lĕ neh ntu jŭm Dak Mƀŭt Tâm N'gul jêh ri tât ta Rôm.
Du ntil nau khlay tâm ndrom samƀŭt Kan Kôranh Oh Mon jêng nau ƀư kan bơh Brah Huêng Ueh, jêng Nơm jŭr gŭ ma nau brah ta phung chroh Yêrusalem tâm nar Pantơkôt jêh ri ntĭm đŏng, ƀư nâp lơn Phung Ngih Brah Ndu nđâp ma phung kôranh chiă uănh Phung Ngih Brah Ndu tă bơh nau kan dơi nkoch bri tâm ndrom samƀŭt aơ. Nau mbơh ma nau rnơm Brah Krist dơi nkoch mbơh tâm âk nau nti lah bơh phung kôranh oh mon, jêh ri lĕ nau kan dơi nchih tay tâm ndrom samƀŭt gay saơ nau brah bơh nau mbơh aơ tâm nau rêh phung chroh jêh ri nau tâm rnglăp tâm Phung Ngih Brah Ndu.
KÔ̆ DĂP
Nau ndrăp lor ma nau mbơh nkoch (1:1-26)
a. Nau Brah Yêsu ntĭnh đă tâm nglĕ dŭt (1:1-14)
b. Săch kôranh oh mon ntrok Y-Yuđas (1:15-26)
Nau mbơh mpơl ta Yêrusalem (2:1 – 8:3)
Nau mbơh mpơl ta Yuđa jêh ri Samari (8:4 – 12:25)
Nau pah kan kôranh oh mon Y-Pôl (13:1 – 28:31)
a. Trong hăn mbơh nkoch tal nguay (13:1 – 14:28)
b. Nau tâm nchră ta Yêrusalem (15:1-35)
c. Trong hăn mbơh nkoch tal bar (15:36 – 18:22)
d. Trong hăn mbơh nkoch tal pe (18:23 – 21:16)
e. Y-Pôl ta Yêrusalem, Sêsarê, jêh ri Rôm (21:17 – 28:31)
Currently Selected:
Kan Kôranh Oh Mon Nau ngơi nhhơ: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.