Kan Kôranh Oh Mon 9

Y-Sôl sĭt chroh

1Rnôk nây, Y-Sôl hôm thăm jêh ri nkhĭt phung oh mon Kôranh Brah. Păng hăn ta kôranh ƀư brah toyh lơn, 2dăn samƀŭt nkoch lor ma phung ngih rƀŭn ta ƀon Đamas, gay ma tơlah tâm mâp mbu moh jêng Bunuyh Nau Chroh, mâu kơp bu ur mâu lah bu klâu, păng mra nhŭp chăp têk leo khân păng ta ƀon Yêrusalem. 3Ƀiălah dôl Y-Sôl hăn tât dăch tât ƀon Đamas, ƀât lât geh nau ang tă bơh trôk nchrat jŭm păng. 4Păng cha lôt ta neh jêh ri tăng nau ngơi lah ma păng: “Hơi Y-Sôl, Y-Sôl, mâm ƀư may ƀư djơh ma Gâp?” 5Păng ơh: “Ơ Kôranh Brah, mbu May?” Kôranh Brah lah: “Gâp jêng Brah Yêsu Nơm may ƀư djơh. 6Ƀiălah dâk hom may, lăp tâm ƀon, bu mra lah ma may lĕ nau may mra ƀư.” 7Phung bunuyh hăn ndrel ma păng gŭ nsrŭng jêh ri hih rhâl ngăn, yor khân păng tăng nau ngơi, ƀiălah mâu saơ bunuyh ôh. 8Y-Sôl dâk tă bơh ta neh, măt păng hôm lin ƀiălah mâu saơ ôh. Bu kuăn ta ti njŭn leo păng sĭt ta ƀon Đamas. 9Tâm pe nar, păng mâu dơi saơ, mâu sông sa, jêh ri mâu lĕ nhêt dak.

Y-Ananias ƀư ƀaptem ma Y-Sôl

10Rnôk nây, ta ƀon Đamas geh du huê oh mon, amoh păng Y-Ananias. Kôranh Brah lah ma păng tâm nau tâm saơ pô aơ: “Ơ Y-Ananias!” Păng mplơ̆ lah: “Ơ Kôranh Brah, gâp ta aơ.” 11Kôranh Brah lah: “Dâk hom, hăn tât ta ngih Y-Yuđas tâm trong bu rnha trong Sŏng, joi du huê amoh păng Y-Sôl gŭ ta ƀon Tars. Ri, păng gŭ mbơh sơm, 12jêh ri tâm nau tâm saơ hŏ saơ du huê bunuyh, tâm amoh Y-Ananias hăn lăp pah ti ta păng gay ăn păng dơi saơ ang tay.” 13Y-Ananias ơh: “Ơ Kôranh Brah, gâp tăng jêh âk bunuyh lah ma nơm nây ƀư djơh hâu ngăn ma phung kloh ueh May tâm ƀon Yêrusalem. 14Aƀaơ aơ păng gŭ ta aơ, geh nau dơi bơh phung kôranh ƀư brah toyh jao gay nhŭp chăp lĕ rngôch bunuyh kuăl mbơh sơm ma amoh May.” 15Ƀiălah Kôranh Brah lah: “Hăn hom, yorlah Gâp săch jêh nơm aơ jêng ndơ Gâp dŏng gay djôt leo amoh Gâp tât ma phung bu năch, phung hađăch, jêh ri phung kon Israel; 16Gâp mra tâm mpơl ma păng gĭt âk nau rêh ni, păng mra dơn yor amoh Gâp.” 17Y-Ananias du luh hăn; păng hăn lăp tâm ngih jêh ri pah ti ta Y-Sôl jêh ri lah: “Hơi nâu Y-Sôl, Kôranh Brah jêng Brah Yêsu, hŏ tâm mpơl jêh ma may ta trong dôl may văch ta aơ, njuăl gâp văch gay ma may dơi saơ ang tay jêh ri bêng ma Brah Huêng Ueh.” 18Ƀât lât geh ndơ nâm bu nsiap tŭp tă bơh trôm măt Y-Sôl jêh ri păng dơi saơ ang tay; jêh nây păng dâk jêh ri dơn nau ƀaptem. 19Jêh păng sông sa nhêt, păng lĕ dăng tay n'hâm suan.

Lĕ nau Y-Sôl nti lah lor lơn

20Y-Sôl gŭ bar pe nar ndrel ma phung oh mon tâm ƀon Đamas. Păng ntơm mbơh nkoch ro tâm lĕ ngih rƀŭn pô aơ Brah Yêsu jêng Kon Brah Ndu. 21Lĕ rngôch phung gŭ iăt nau nti hih rhâl ngăn, jêh ri lah pô aơ: “Di lĕ păng nơm hŏ tă ƀư djơh ma phung kuăl mbơh sơm ma amoh aơ ta ƀon Yêrusalem, jêh ri păng văch đŏng ta aơ gay chăp khân păng jêh ri têk leo ma phung kôranh ƀư brah toyh?” 22Ƀiălah Y-Sôl lơ hâu ntop ktang, rblang kloh rah vah đah phung Yuđa ta ƀon Đamas, jêh ri mpơl pô aơ Brah Yêsu jêng Brah Krist.

23Âk nar jêh nây, phung Yuđa tâm nchră ndrel gay ma nkhĭt Y-Sôl.#II Kô 11:32-33. 24Ƀiălah geh bunuyh mbơh ma Y-Sôl ma nau khân păng tâm nchră. Khân păng gak njrăng ta mpông ƀon măng nâm nar gay nkhĭt Y-Sôl. 25Ƀiălah dôl măng, phung oh mon dơm păng tâm du mlâm bĭ jêh ri njŭr păng padih mpêr ƀon.

26Tơlah Y-Sôl tât jêh ta ƀon Yêrusalem, păng ŭch hăn ndrel ma phung oh mon ta nây, ƀiălah lĕ rngôch khân păng klach da dê, mâu mĭn ôh ma păng jêng jêh du huê oh mon nanê̆ ngăn. 27Y-Ƀarnaƀas njŭn leo păng ma phung kôranh oh mon, nkoch bri ma khân păng nau Kôranh Brah hŏ tâm mpơl jêh ri ngơi ma Y-Sôl ta trong, jêh ri păng dăng janh mbơh nkoch jêh ma amoh Brah Yêsu ta ƀon Đamas. 28Ntơm bơh nar nây, Y-Sôl hăn ƀaƀơ ndrel ma phung oh mon tâm ƀon Yêrusalem, 29jêh ri păng nănh nti lah ma amoh Kôranh Brah. Păng ngơi jêh ri tâm rlăch đah phung Yuđa ngơi nau ngơi Grek, ƀiălah khân păng joi nau nkhĭt păng. 30Tăng nau nây, phung chroh djôt leo păng ta ƀon Sêsarê ro, jêh ri njŭn păng hăn ta ƀon Tars.

Nau ƀư bah Y-Ênê

31Pôri, Phung ngih Brah Ndu tâm n'gor Yuđa, Galilê, jêh ri Samari, geh nau đăp mpăn, văch ma toyh, hăn tâm nau klach yơk ma Kôranh Brah; yorlah Brah Huêng Ueh kơl, phung chroh jêng lơ nar lơ ntop âk.

32Dôl nây, Y-Pêtrôs nsong lam ntŭk, hăn tât lĕ ma phung kloh ueh gŭ ta ƀon Liđa. 33Ta nây, păng saơ du huê rvĕn, amoh păng Y-Ênê, lâng bê̆ch ta sưng pham năm. 34Y-Pêtrôs lah ma păng pô aơ: “Hơi Y-Ênê, Brah Yêsu Krist ƀư bah may; dâk hom, ƀư kloh sưng may!” Ƀât lât, Y-Ênê dâk ro. 35Lĕ rngôch phung ta Liđa jêh ri Sarôn saơ pônây, plơ̆ sĭt ma Kôranh Brah da dê.

Nau H'Tabitha dâk rêh tay

36Ta ƀon Jôpa, geh du huê bu ur oh mon, amoh păng H'Tabitha, nâm bu ntĭt Dôrkas; păng ƀư âk kan ueh jêh ri vay ăn ndơ ma phung o ach. 37Tâm lĕ nar nây, păng kuet jêh ri khĭt. Bu rao săk jăn păng, jêh ri ăn păng ta jrô klơ. 38Phung oh mon gĭt Y-Pêtrôs gŭ ta ƀon Liđa, dăch ƀon Jôpa, rĭ dĭng njuăl bar hê bunuyh hăn tât gay ŭch dăn păng: “Dăn jă păng văch gơnh.” 39Y-Pêtrôs dâk hăn ndrel ma bar hê khân păng. Tơlah păng tât ta ntŭk nây, bu njŭn leo păng ta jrô klơ nây. Lĕ rngôch phung bu ur ndrô dâk ta meng păng jêh ri nhĭm da dê, jêh ri ăn Y-Pêtrôs uănh dŭm âk ao rjai jêh ri kho ao êng H'Dôrkas hŏ jĭm ma khân păng dôl păng hôm gŭ rêh. 40Y-Pêtrôs đă lĕ rngôch bunuyh du luh padih, jêh ri chon kômâk mbơh sơm. Pakơi nây, păng n'gĭl uănh ta săk jăn bunuyh khĭt jêh ri lah: “Hơi H'Tabitha, dâk hom ay!” Păng lin măt saơ Y-Pêtrôs, dâk gŭ ro. 41Y-Pêtrôs yơr ti sâm rdâk păng dâk, păng kuăl phung kloh ueh nđâp ma phung bu ur ndrô văch, ntĭm ăn phung nây saơ păng dâk rêh. 42Nau nây tăng lư ma lĕ ƀon Jôpa, jêh ri geh âk bunuyh chroh ma Kôranh Brah. 43Bi Y-Pêtrôs ăt gŭ âk nar ta ƀon Jôpa tâm ngih Y-Simôn, nơm nkra ntâu.

Currently Selected:

Kan Kôranh Oh Mon 9: CMO2023

Highlight

Copy