Kan Kôranh Oh Mon 10

Y-Kôrnei sĭt chroh

1Ta ƀon Sêsarê, geh du huê bunuyh amoh Y-Kôrnei, kôranh tahan phung mpôl tahan Italy. 2Păng ơm jêng bunuyh ueh, lĕ rnăk vâl geh nau klach yơk ma Brah Ndu; păng vay ăn yô̆ âk ndơ ma phung ƀon lan jêh ri păng mbơh sơm kuăl Brah Ndu ƀaƀơ. 3Klăp lah mông pe kêng măng,#10:3 Nrn: mông rơh sĭn nôk nar. tâm du nau tâm saơ, păng saơ rah vah du huê tông mpăr Brah Ndu lăp tâm ngih păng jêh ri lah: “Hơi Y-Kôrnei!” 4Păng klach ntrâng uănh ta tông mpăr Brah Ndu jêh ri ơh: “Ô Kôranh Brah, moh nau geh?” Tông mpăr plơ̆ lah: “Nau may mbơh sơm jêh ri ndơ may ăn yô̆ hao tât ta Brah Ndu jêh ri Brah Ndu kah gĭt nau nây. 5Aƀaơ njuăl hom bunuyh hăn ƀon Jôpa jêh ri jă Y-Simôn, tâm amoh Y-Pêtrôs. 6Păng dôl gŭ ndrel ma Y-Simôn, bunuyh blau nkra ntâu, tâm ngih dăch dak mƀŭt.” 7Tơlah tông mpăr ngơi đah păng lĕ du jêh, Y-Kôrnei kuăl bar hê bunuyh tâm phung oh mon păng jêh ri du huê tahan klach yơk tâm dâng nau dơi păng, 8nkoch bri lĕ nau nây ma khân păng, jêh ri păng njuăl khân păng hăn ta ƀon Jôpa.

9Ôi taơ, tâm nôk pe bunuyh nây hăn trong, dăch tât ta ƀon, ri mơ Y-Pêtrôs hao ta klơ chor ngih gay mbơh sơm, nôk nây, di tâm nar nklang bôk.#10:9 Nrn: mông rơh prao. 10Păng ji ngot jêh ri ŭch sông sa, ƀiălah dôl bu ƀư nkra ndơ sông sa păng geh nau tâm saơ. 11Păng saơ trôk pơk mpơl, jêh ri geh ndơ tâm ban ma du blah bok toyh kât puăn njônh ndrel jŭr tât ta neh, 12tâm nây geh phung mpô mpa puăn jâng ăp ntil, phung mpa vơr ta neh, jêh ri sĭm klơ trôk. 13Geh đŏng bâr ngơi lah ma păng pô aơ: “Hơi Y-Pêtrôs, dâk hom, sreh sa hom.” 14Ƀiălah Y-Pêtrôs ơh: “Ơ Kôranh Brah, mâu dơi! Yorlah gâp mâu mâp sa ôh mpa ƀơ̆ mâu lah mâu kloh.” 15Bâr ngơi nây lah tay ma păng rơh bar pô aơ: “Moh mpa ndơ Brah Ndu ƀư kloh jêh, lơi uănh păng ƀơ̆ ôh.” 16Nau ngơi nây tât geh pe tơ̆; jêh ri bok nây hao sĭt ta klơ trôk.

17Dôl Y-Pêtrôs hôm gŭ mĭn rvê ma nau rblang nau păng tâm saơ, ri, phung bunuyh Y-Kôrnei njuăl hăn, hŏ joi ngih Y-Simôn jêh ri khân păng tât ta mpông. 18Khân păng kuăl huy ôp gĭt lah ta nây Y-Simôn, tâm amoh Y-Pêtrôs gŭ. 19Dôl Y-Pêtrôs mĭn ma nau tâm mpơl nây, Brah Huêng Ueh lah ma păng: “Aơ, geh pe nuyh joi may.#10:19 Geh ƀaƀă nau rblang ntơm saơm nchih: bar bunuyhmâu lah ƀaƀă bunuyh. 20Pôri, dâk hom, trŭnh gay hăn ndrel ma khân păng, lơi vĭ vĕ yorlah Gâp yơh hŏ njuăl khân păng văch.” 21Y-Pêtrôs trŭnh hăn ndrel ma khân păng jêh ri lah: “Gâp yơh jêng nơm khân may joi. Moh nau khân may văch ta aơ?” 22Khân păng plơ̆ lah, “Kôranh tahan Kôrnei jêng bunuyh sŏng srăng, klach yơk ma Brah Ndu, lĕ rngôch phung Yuđa mbơh nkoch ueh ma păng. Geh tông mpăr kloh ueh, đă kuăl may hăn ta ngih păng, ŭch iăt nau may nti lah.” 23Y-Pêtrôs jă khân păng lăp tâm trôm ngih, rom khân păng bê̆ch măng ta nây. Ôi taơ, Y-Pêtrôs dâk, hăn ndrel ma khân păng; geh ƀaƀă phung oh nâu tâm ƀon Jôpa hăn ndrel. 24Nar pakơi nây, khân păng tât ta ƀon Sêsarê. Y-Kôrnei ndrel ma phung ndŭl mpôl păng jêh ri phung mĭt jiăng păng tâm rgum, tâm ngih, dôl gŭ kâp khân păng. 25Y-Pêtrôs hăn lăp, Y-Kôrnei luh vơt, chon mon păn mbah ta jâng păng. 26Ƀiălah Y-Pêtrôs rdâk păng jêh ri lah: “Dâk hom, gâp ăt jêng bunuyh dơm.” 27Jêh ngơi ndrel đah Y-Kôrnei, Y-Pêtrôs lăp tâm ngih, saơ âk bunuyh tâm rƀŭn. 28Păng lah ma phung nây: “Khân may gĭt phung Yuđa mâu dơi vay ôh tâm rnglăp đah phung bu năch mâu lah lăp ngih păng; ƀiălah Brah Ndu hŏ tâm mpơl ma gâp jêh, lơi ăn uănh du huê bunuyh ƀơ̆ ƀơch mâu lah mâu kloh. 29Yor nây, tơlah bu jă gâp văch ro, mâu dun ôh. Pôri gâp ôp, moh nau khân may ŭch jă gâp văch.” 30Y-Kôrnei plơ̆ lah: “Puăn nar pa năp aơ dơh, klăp lah mông aơ, jêng pe mông mhaơ, dôl gâp mbơh sơm tâm ngih gâp,#10:30 Geh ƀaƀă nau rblang ntơm saơm nchih: ât sông sa jêh ri mbơh sơm. ƀât lât geh du huê bunuyh nsoh ao rmah ƀlĭp tâm mpơl tanăp gâp 31jêh ri lah: ‘Hơi Kôrnei, Brah Ndu tăng jêh nau may mbơh sơm jêh ri Păng kah gĭt ma nau may ăn yô̆ ma bu. 32Pôri, njuăl hom bunuyh hăn ta ƀon Jôpa gay ma kuăl Y-Simôn, bu amoh Y-Pêtrôs, văch ta aơ. Păng gŭ ndrel ma Y-Simôn, bunuyh blau nkra ntâu, ngih dăch dak mƀŭt.’ 33Pôri gâp njuăl bunuyh jă may, jêh ri may hŏ geh nuih n'hâm ueh văch ta aơ. Pôri aƀaơ, lĕ rngôch hên gŭ tanăp Brah Ndu, gay ma iăt lĕ rngôch nau Kôranh Brah hŏ ntăm jêh ma may.”

34Y-Pêtrôs ntơm ngơi: “Nanê̆, gâp gĭt năl ma Brah Ndu mâu gŭ du ding ôh,#Nkah 10:17. 35ƀiălah tâm lĕ ntil mpôl bunuyh, mbu nơm klach yơk ma Kôranh Brah jêh ri ƀư nau sŏng srăng, Păng dơn bunuyh nây. 36Brah Ndu hŏ njuăl nau ngơi tât ma phung kon Israel, mbơh nkoch ma Nau Mhe Mhan Ueh đăp mpăn tă bơh Brah Yêsu Krist, jêng Kôranh Brah ma lĕ rngôch bunuyh. 37Khân may gĭt rah vah jêh nau hŏ tât ntơm bơh n'gor Galilê n'ho ma lam n'gor Yuđa, pakơi Y-Yôhan nti lah nau ƀaptem; 38mâm nau Brah Ndu hŏ tŏ dak ƀâu kah ma Brah Yêsu, bunuyh ƀon Nasaret ma Brah Huêng Ueh jêh ri nau brah, jêh Păng hăn lam ntŭk ƀư ueh jêh ri ƀư bah lĕ rngôch bunuyh brah mhĭk tŭn jot, yorlah Brah Ndu gŭ ndrel ma Păng. 39Hên jêng phung mbơh lĕ nau Păng ƀư jêh tâm n'gor Yuđa jêh ri ta ƀon Yêrusalem. Bu hŏ yông Păng klơ si tâm rkăng gay nkhĭt lơi. 40Ƀiălah ta nar rơh pe, Brah Ndu hŏ ƀư ăn Păng dâk rêh tay jêh ri tâm mpơl Păng nơm, 41mâu di ma lĕ rngôch bunuyh ôh, ƀiălah ma hên jêng phung mbơh Brah Ndu săch jêh bơh lor, nâm bu ntĭt phung bunuyh hŏ sông sa nhêt jêh ndrel ma Păng, pakơi Păng dâk rêh tay tă bơh nau khĭt. 42Păng ntăm jêh ma hên mbơh nkoch ma phung ƀon lan, jêh ri mpơl rah vah Păng jêng Nơm Brah Ndu hŏ njêng gay ma phat dôih ma phung rêh jêh ri phung khĭt. 43Lĕ rngôch phung kôranh nơm mbơh lor mbơh nkoch jêh ma mbu nơm chroh ma Păng geh nau yô̆ an ma nau tih ma amoh Păng.”

44Dôl Y-Pêtrôs ngơi, Brah Huêng Ueh jŭr ta lĕ rngôch phung gŭ iăt nau nti nây. 45Phung chroh geh nau koh ntâu jêh, jêng phung bunuyh hăn ndrel ma Y-Pêtrôs, hih rhâl ngăn yorlah ndơ Brah Huêng Ueh nkhŭt đŏng ta phung bu năch tâm ban lĕ. 46Phung chroh nây tăng khân păng ngơi nau bu năch,#10:46 Mlr: lĕ nau ngơi phung bu năch. jêh ri tâm rnê ma Brah Ndu. 47Nôk nây Y-Pêtrôs lah: “Dơi lĕ bu dun ƀaptem tâm dak ma phung bunuyh dơn jêh Brah Huêng Ueh tâm ban ma he ƀơh?” 48Pôri, păng đă bu ƀư ƀaptem ma khân păng ma amoh Brah Yêsu Krist. Khân păng jă păng gŭ ndrel ma khân păng bar pe nar đŏng.

Currently Selected:

Kan Kôranh Oh Mon 10: CMO2023

Highlight

Copy