Kan Kôranh Oh Mon 5

Y-Ananias jêh ri H'Saphira

1Ƀiălah geh du huê amoh păng Y-Ananias, ndrel ma ur păng jêng H'Saphira, tăch drăp ndơ khân păng nơm. 2Păng iăt nau ur păng prăp tay du kô̆ rnoh prăk tăch neh, jêh ri djôt leo kô̆ hôm e dơm ta jâng phung kôranh oh mon. 3Y-Pêtrôs lah: “Hơi Y-Ananias! Mâm ƀư ăn Satan bêng tâm nuih n'hâm may, kŏ tât may ngơi mƀruh Brah Huêng Ueh gay prăp tay du kô̆ rnoh prăk tăch neh nây? 4Lah ê hŏ tăch neh nây, di lĕ păng ăt hôm ma may? Lah may tăch jêh, may mâu geh nau dơi dŏng prăk nây? Mâm ƀư may mĭn tâm nuih n'hâm tâm ban pônây? May ngơi mƀruh mâu di ma kon bunuyh ôh, ƀiălah may ngơi mƀruh ma Brah Ndu yơh.” 5Dôl Y-Ananias tăng nau ngơi nây, păng cha lôt ta neh jêh ri khĭt. Lĕ rngôch phung tăng nau nây klach da dê. 6Phung bu klâu ndăm dâk put njor săk jăn păng jêh ri tung hăn tâp lơi.

7Klăp lah tâm pe mông jêh nây, ur Y-Ananias hăn lăp, păng mâu hŏ gĭt moh nau tât jêh. 8Y-Pêtrôs lah ma păng: “Nkoch hom ma gâp, di lĕ khân ay tăch neh nây rnoh dah aơ dơm?” Ur păng plơ̆ lah: “Ơ, rnoh dŭm nây.” 9Y-Pêtrôs lah: “Mâm ƀư khân ay du ai tâm chră jêh gay ma rlong uănh Brah Huêng Ueh Kôranh Brah? Ri, jâng phung bunuyh hăn tâp jêh sai ay dôl gŭ padih mpông, khân păng mra tung tâp ay đŏng.” 10Tâm nôk nây, păng cha lôt ta jâng Y-Pêtrôs jêh ri khĭt. Phung bu klâu ndăm sĭt jêh ri saơ đŏng bu ur nây hŏ khĭt, tung păng hăn tâp dăch ta môch sai păng. 11Lĕ rngôch Phung Ngih Brah Ndu jêh ri phung bunuyh tăng lư lĕ nau nây geh nau klach dŭt hâu ngăn.

Nau chăt jêng phung chroh ma Kôranh Brah

12Nôk nây, phung kôranh oh mon ƀư âk nau khlay jêh ri nau mbên khlay ta nklang phung ƀon lan. Lĕ rngôch phung chroh du nau mĭn tâm rƀŭn tâm dâng ndring mpông Salômôn. 13Mâu geh bunuyh êng ôh janh lăp ndrel ma khân păng, ƀiălah phung ƀon lan tâm rnê ma khân păng hâu ngăn. 14Phung chroh ma Kôranh Brah ƀrư̆ nar lơ hâu ntop âk râk, nđâp ma bu ur bu klâu, 15kŏ tât bu tung phung bunuyh ji dơm ta trong sâng, ăn bê̆ch ta klơ sưng toyh mâu lah jê̆, gay ma tơlah Y-Pêtrôs prot rgăn, gui păng dơi nkŭm klơ bar pe bunuyh ji. 16Phung ƀon lan gŭ ta ƀon toyh jŭm nây rgum ndrel ta ƀon Yêrusalem, njŭn leo phung ji kuet, jêh ri phung huêng djơh ƀư rêh ni jêh ri lĕ rngôch dơi bah da dê.

Bu nhŭp phung kôranh oh mon jêh ri geh nau tâm rklaih. – Nau Y-Gamaliel kơl mĭn

17Nôk nây kôranh ƀư brah toyh lơn jêh ri phung bunuyh tĭng păng, nâm bu ntĭt phung Sađusê,#5:17 Uănh rblang ta Mat 3:7. bêng ma nuih n'hâm mâu nach, dâk 18nhŭp phung kôranh oh mon krŭng tâm ndrung. 19Ƀiălah dôl măng geh du huê tông mpăr Brah Ndu pơk mpông ndrung djôt leo phung kôranh oh mon luh du jêh ri ntĭnh pô aơ: 20“Hăn hom, dâk ta ngih brah jêh ri mbơh nkoch ma phung ƀon lan lĕ rngôch nau ngơi rêh aơ.” 21Tăng nau nây, phung kôranh oh mon hăn lăp tâm ngih brah dôl ƀhit rvi ang jêh ri ntơm nti lah. Nôk kôranh ƀư brah toyh lơn jêh ri phung hăn ndrel ma păng tât, khân păng kuăl rgum phung Kôranh Phat Dôih ndrel ma lĕ rngôch phung bu ranh tâm phung Israel, jêh nây khân păng njuăl bu lăp tâm ndrung gay leo phung kôranh oh mon luh bơh ndrung. 22Ƀiălah phung lăp tâm ndrung, mâu saơ phung kôranh oh mon ta nây ôh, plơ̆ sĭt mbơh 23pô aơ: “Hên saơ jêh ndrung nchăng nâp ngăn jêh ri phung tahan gak ăt gŭ padih mpông, ƀiălah dôl pơk mpông, hên mâu saơ du huê bunuyh tâm nây ôh.” 24Kôranh chiă uănh ngih brah jêh ri phung kôranh ƀư brah toyh tăng lĕ nau ngơi nây, geh nau uh ah ma phung oh mon jêh ri mâu gĭt nau nây mra tât mâm nau. 25Ƀiălah geh du huê văch tât mbơh ma khân păng pô aơ: “Ri, phung bunuyh khân may krŭng jêh tâm ndrung, aƀaơ khân păng gŭ tâm ngih brah nti ma phung ƀon lan!” 26Kôranh mât uănh ngih brah ndrel ma phung kôranh hăn ro tât ta nây jêh ri nhŭp phung oh mon gay ma njŭn leo, ƀiălah mâu ƀư mhĭk ôh, yorlah khân păng klach ma phung ƀon lan klŭp khân păng ma lŭ.

27Khân păng têk leo phung kôranh oh mon hăn jêh ri djôt leo ta Kôranh phat dôih. Phung kôranh ƀư brah toyh lơn sek ôp khân păng pô aơ: 28“Hên hŏ buay khân may ktang ngăn, mâu ăn nti lah ma amoh bunuyh nây ôh, ƀiălah aƀaơ ri khân may hŏ ƀư jêh ma ƀon Yêrusalem bêng ler nau khân may nti, khân may ŭch ăn mham Bunuyh nây nkhŭt tay ta hên!”#Mat 27:25. 29Y-Pêtrôs jêh ri kôranh oh mon plơ̆ lah: “Ăn he tông bâr Brah Ndu ueh lơn ma tông bâr bunuyh. 30Brah Ndu phung chô yau he hŏ ƀư ăn Brah Yêsu dâk rêh tay, jêng Nơm khân păng yông klơ si tâm rkăng jêh ri nkhĭt lơi. 31Brah Ndu hŏ njŭn leo jêh Nơm nây n'hao gŭ pa ma Păng gay ma ƀư Hađăch#5:31 Nrn: Kôranh chiă uănh. jêh ri Nơm Tâm Rklaih, gay ăn nau tâm rmal nau tih jêh ri nau yô̆ an ma nau tih ma phung Israel. 32Hên jêng phung mbơh ma lĕ nau nây ndrel ma Brah Huêng Ueh, Nơm Brah Ndu ăn ma phung bunuyh tông bâr ma Păng.”

33Jêh tăng lĕ nau nây khân păng ji nuih ngăn jêh ri ŭch nkhĭt lơi phung kôranh oh mon. 34Ƀiălah geh du huê Pharisi#5:34 Uănh rblang ta Mat 3:7. tâm amoh Y-Gamaliel, kôranh nti ma nau vay, nơm phung ƀon lan yơk, păng dâk ta nklang Kôranh Phat Dôih jêh ri ntrŭnh nau ntăm bu djôt leo phung oh mon luh padih ƀât lât. 35Jêh nây păng lah ma khân păng: “Hơi phung Israel, njrăng hom ma nau khân may mra ƀư ma phung aơ. 36Rnôk lor, geh Y-Thiôdas n'hao, yơk êng ma păng nơm jêng kôranh, geh klăp lah puăn rhiăng nuyh tĭng păng, ƀiălah bu nkhĭt păng, jêh ri lĕ rngôch bunuyh tĭng păng roh rai da dê, mâu hôm đê̆ ro. 37Jêh păng geh đŏng Y-Yuđas, bunuyh Galilê, dâk tâm rnôk bu kơp rnoh bunuyh jêh ri păng kuăl âk bunuyh tĭng ndô̆ păng; ƀiălah păng khĭt, lĕ rngôch bunuyh tĭng ndô̆ păng chah rai pru pra. 38Aƀaơ aơ gâp dăn nti nkah ma khân may: Der hom ngai phung bunuyh aơ, ăn khân păng kơt nĕ kđôi, yorlah tơlah nau gay ŭch jêh ri nau kan aơ luh tă bơh bunuyh mra geh nau rai yot; 39ƀiălah tơlah luh tă bơh Brah Ndu, khân may mâu dơi ƀư rai khân păng ôh; ƀiălah, khân may sân săk khân may nơm tâm lơh tâm rdâng đah Brah Ndu.” Pôri, khân păng iăt tĭng nau Y-Gamaliel nkah. 40Khân păng kuăl tay phung kôranh oh mon lăp, đă bu dong phung nây ma mâng jêh ri buay mâu ăn nti lah tâm amoh Brah Yêsu ôh, jêh nây mƀơk bar hê khân păng.

41Pô nây, phung oh mon du luh tă bơh phung Kôranh Phat Dôih, khân păng răm maak yorlah bu kơp khân păng khư dơn nau rêh ni yor amoh Kôranh Brah. 42Ăp nar, tâm ngih brah mâu lah ntơm bơh ngih aơ tât tâm ngih êng, phung kôranh oh mon ntĭm nti tay jêh ri nkoch mbơh Nau Mhe Mhan Ueh Brah Yêsu jêng Brah Krist.

Currently Selected:

Kan Kôranh Oh Mon 5: CMO2023

Highlight

Copy