Kan Kôranh Oh Mon 4

Y-Pêtrôs jêh ri Y-Yôhan tanăp Mpôl Kôranh Phat Dôih

1Dôl Y-Pêtrôs jêh ri Y-Yôhan ngơi đah phung ƀon lan, phung kôranh ƀư brah, kôranh mât uănh ngih brah, jêh ri phung Sađusê#4:1 Uănh rblang ta Mat 3:7. văch. 2Khân păng ji nuih ngăn yorlah bar hê khân păng ntĭm nti ma phung ƀon lan jêh ri mbơh pô aơ Brah Yêsu geh nau dâk rêh tay tă bơh nau khĭt. 3Khân păng nhŭp bar hê khân păng krŭng tâm ndrung kŏ tât nar ôi taơ, yorlah nôk nây ngo jêh. 4Nđâp tơlah kơt nây, geh âk bunuyh tâm phung khân păng hŏ tăng jêh nau Kôranh Brah ngơi jêh ri chroh, jêh ri rnoh phung bu klâu chroh tât prăm rbăn nuyh.

5Nar ôi taơ, phung kôranh chiă uănh, phung kôranh bu ranh, jêh ri phung kôranh nchih samƀŭt rgum ta ƀon Yêrusalem, 6nđâp ma Y-Anas jêng kôranh ƀư brah toyh lơn, Y-Kaipe, Y-Yôhan, Y-Aleksandrơ jêh ri lĕ rngôch phung bunuyh jêng phung tâm rnăk vâl kôranh ƀư brah toyh lơn. 7Khân păng nhŭp Y-Pêtrôs ndrel ma Y-Yôhan dâk ta nklang khân păng jêh ri sek ôp: “Moh tă nau brah mâu lah ma mbu amoh khân may ƀư nau aơ?” 8Nôk nây Y-Pêtrôs, bêng ma Brah Huêng Ueh, lah pô aơ: “Hơi phung kôranh chiă uănh jêh ri phung kôranh bu ranh! 9Tơlah nar aơ khân may ôp sek hên yorlah hên hŏ ƀư ueh ma du huê bunuyh lŭt jâng ti, jêh ri mâm ƀư păng hŏ bah jêh, 10dăn ma khân may jêh ri lĕ rngôch phung Israel gĭt ma nau nây, ma amoh Brah Yêsu Krist, bunuyh Nasaret, Nơm khân may hŏ pâng kđĭn ta klơ si tâm rkăng, jêh ri Brah Ndu hŏ ƀư ăn dâk rêh tay tă bơh nau khĭt; tâm amoh nây bunuyh aơ hŏ bah jêh ri aƀaơ gŭ dâk tanăp khân may aơ.

11Brah Yêsu jêng lŭ khân may jêng phung ƀư ngih mƀăr lơi,

Ƀiălah jêng lŭ ta njônh ngih.#Mprơ Ơm 118:22.

12Mâu hôm geh nau tâm rklaih tâm nơm êng ôh, yorlah tâm dâng trôk mâu geh ôh amoh êng ăn jêh ma kon bunuyh, gay ma he tă bơh nĕ geh nau tâm rklaih.”

13Lah khân păng saơ nau janh Y-Pêtrôs jêh ri Y-Yôhan, gĭt rah vah bar hê khân păng jêng phung ƀon lan dơm, mâu mâp nti ôh, khân păng hih rhâl da dê jêh ri gĭt năl jêh bar hê khân păng nây hŏ tă gŭ ndrel ma Brah Yêsu. 14Ƀiălah saơ bunuyh rvĕn bah jêh gŭ dâk êp ta meng bar hê nây, pôri khân păng mâu hôm geh nau dơi tâm rlăch. 15Jêh đă bar hê nây luh bơh mpôl Kôranh Phat Dôih, khân păng nchră ndrăng khân păng nơm 16jêh ri lah: “Mâm nau he mra ƀư ma phung bunuyh aơ? Yorlah lĕ rngôch bunuyh gŭ ta ƀon Yêrusalem gĭt da dê khân păng hŏ ƀư du nau mbên khlay rah vah nanê̆ jêh ri he mâu dơi rlăch ôh. 17Nđâp lah kơt nĕ, gay ma nau nây mâu lư đŏng ôh tâm phung ƀon lan, ăn he buay khân păng mâu dơi ôh sŏk amoh nây nti lah ma ăp nơm đŏng.” 18Pôri, khân păng kuăl bar hê khân păng lăp jêh ri buay lơi sŏk amoh Brah Yêsu gay ma ngơi mâu lah nti đŏng. 19Ƀiălah Y-Pêtrôs jêh ri Y-Yôhan plơ̆ lah: “Dăn khân may sek uănh hom, moh nau di tanăp Brah Ndu, tông bâr ma khân may hĕ, mâu lah tông bâr ma Brah Ndu? 20Yorlah hên mâu dơi mâu ngơi ma lĕ nau hên nơm hŏ saơ jêh ri tăng.” 21Jêh nau thăm tay, khân păng mƀơk bar hê khân păng, mâu dơi joi mâm nau gay ma tâm rmal phung nây ôh, yor klach phung ƀon lan, lĕ rngôch tâm rnê Brah Ndu ma nau tât geh jêh. 22Bunuyh bu klâu bah jêh ma nau mbên khlay nây lĕ rlau puăn jât năm.

23Jêh bu mƀơk, bar hê khân păng hăn ta phung oh nâu jêh ri nkoch bri lĕ nau phung kôranh ƀư brah toyh jêh ri phung kôranh bu ranh hŏ lah. 24Jêh tăng, khân păng du nuih n'hâm mbơh sơm nteh ma Brah Ndu pô aơ: “Ơ Kôranh Brah, jêng Nơm rhăk njêng trôk, neh ntu, dak mƀŭt, jêh ri lĕ rngôch mpa tâm nây,#Ngluh 20:11; Nêh 9:6; Mprơ Ơm 146:6. 25May hŏ lah jêh ma Brah Huêng Ueh bơh bâr mbung chô yau Y-Đavit hên, jêng oh mon May,

‘Mâm ƀư lĕ bri dak hao ji nuih,

Jêh ri mâm ƀư phung mpôl băl bunuyh tâm nchră mâu khlay?

26Phung hađăch ta neh ntu dâk tâm lơh,

Phung kôranh chiă uănh tâm rgum tay,

Tâm rdâng đah Kôranh Brah jêh ri đah Nơm dơn nau tŏ dak ƀâu kah ăn Păng.’#Mprơ Ơm 2:1,2.

27N'hêl nanê̆ ngăn, Hêrôt jêh ri Pôns Pilat ndrel ma phung bu năch jêh ri phung Israel hŏ rgum ndrel ta ƀon aơ, gay ma tâm rdâng đah Oh Mon kloh ueh May jêng Brah Yêsu, Nơm May hŏ tŏ dak ƀâu kah#Luk 23:7-11; Mat 27:1-2; Mark 15:1; Luk 23:1; Yôh 18:28-29. 28gay ƀư ma lĕ rngôch nau kan ti May jêh ri nau mĭn May hŏ nal jêh bơh lor. 29Aƀaơ aơ, dăn Kôranh Brah sek uănh nau khân păng thăm rmat jêh ri ăn ma phung oh mon May mbơh nau May ngơi ma nau janh. 30Dăn yơr ti May gay ƀư bah jêh ri ƀư lĕ nau khlay, nau mbên khlay tâm amoh Oh Mon kloh ueh May jêng Brah Yêsu.” 31Lôch jêh mbơh sơm, ntŭk khân păng tâm rƀŭn mpât n'gơ, lĕ rngôch khân păng bêng ma Brah Huêng Ueh da dê, mbơh nau Brah Ndu ngơi ma nau nănh.

Nuih n'hâm phung chroh rŏng lor lơn

32Nôk nây, lĕ phung chroh geh du ai nuih n'hâm, du nau mĭn, mâu geh bu nuyh uănh drăp ndơ păng nơm jêng ndơ êng, ƀiălah kơp ma lĕ rngôch ndô ndơ jêng ndơ mpôl.#Kan 2:44-45. 33Phung kôranh oh mon sŏk nau brah toyh ngăn mbơh nkoch ma nau Kôranh Brah dâk rêh tay jêng Brah Yêsu, jêh ri Păng nkhŭt nau yô̆#4:33 Uănh rblang ta Luk 2:40. toyh klơ lĕ rngôch bunuyh. 34Yor nây, mâu geh du huê tâm phung chroh pưt, yorlah phung bunuyh geh mir lŏ mâu lah ngih vâl, tăch lơi da dê, djôt leo prăk khân păng geh 35dơm ta jâng phung kôranh oh mon; jêh nây prăk tâm pă tĭng nâm nau ăp nơm ŭch. 36Y-Yôsep, nơm phung kôranh oh mon tâm amoh Y-Ƀarnaƀas, nâm bu ntĭt, kon bu klâu nau bonh leng, jêng noi deh Y-Lêvi, ƀon tơm ta n'gor Syprơ, 37tăch du lôk mir lŏ jêh ri djôt prăk nây dơm ta jâng phung kôranh oh mon.

Currently Selected:

Kan Kôranh Oh Mon 4: CMO2023

Highlight

Copy