Luk 5

Jesu Tie Avbe Erhuanegbe Ni Ke Aro

(Matiu 4:18-22; Mak 1:16-20)

1Ẹghẹ ọkpa vbe Jesu mudia vbe ọkpẹn odighi e Gẹnẹsarẹt, emwa hia kegha sua egbe yo sua egbe rre ne iran miẹn ehe na sikẹ ọre họn ẹmwẹ Osanobua. 2Rẹn keghi ya bẹghe okọ eva ne a dere, avbe ọgbehẹn kpao hin uwu ẹre rre nẹ, iran ra ya họ ọga ne a ya gbe ehẹn ọghe iran. 3Jesu keghi la ọkpa vbe avbe okọ nii, ọghe Saimọn, ọ na wẹ ne ọ sua ẹre la uwu ẹzẹ kherhe. Jesu keghi tota ye uwu okọ nii ọ na ke evba gha ma emwa ni bun ni emwi.

4Ọ ghi guan fo nẹ, ọ tama Saimọn wẹẹ, “Sua okọ sikẹ uwu odin ne uwẹ kevbe avbe ihua fi ọga ya munọ ehẹn.”

5Saimọn wanniẹn wẹẹ, “Arowa, vbe ne ima winna sẹ ne asọn, ma ma mu emwi rhọkpa, sokpan vbene u ghi na tae nẹ, I gha fi nene ọga.” 6Iran keghi fi ọga ni, ehẹn ne iran munọ ẹn keghi bun sẹrriọ wẹ te ọga ghi te ra sọọ. 7Iran keghi ye obọ tie ihua iran ni rre okọ nọkpa ne iran do yi iran obọ, iran keghi rre, iran keghi viọ ehẹn ni ye nene okọ eva vuọn sẹrriọ wẹ te iran ghi te ra dinmwi. 8Ugbẹn vbe Saimọn Pita ghi miẹn emwi ne ọ sunu, ọ fan fi igue vbe odaro Jesu, ọ wẹẹ, “Kpao vbe ehe ne imẹ ye rre Nọyaẹnmwa rhunmwuda ọmwa orukhọ mẹ khin!”

9Unu keghi yan ẹn kevbe iran ni gu ẹe rre evba ye ubunmwẹ ehẹn ne iran gbe. 10Erriọ gha ye ne avbe ogieva ẹre ighẹ Jems vbe Jọn ne ivbi e Zẹbede. Jesu keghi tama Saimọn wẹẹ, “Ghẹ mu ohan, ke ẹghẹ na kpao emwa ne agbọn u ghi ra gha munọ.”

11Iran keghi si okọ de ye oke, iran sẹ emwi hia rae, iran na lele Jesu.

Jesu Sinmwi Ọkhọnmwọ Alalọ

(Matiu 8:1-4; Mak 1:40-45)

12Jesu keghi sẹ ẹvbo ọkpa ne okpia ọkpa ne alalọ wa gba ẹre egbe ye, ugbẹn vbe okpia na ghi miẹn Jesu, ọ mu ẹko rhu otọ rinmwian ẹn wẹẹ, “A deghẹ u ho, u gha sẹtin ya mwẹ khian ne ọ huanrẹn.”

13Jesu keghi nien obọ ẹre ya kan rẹn, ọ wẹẹ, “I wa ho ẹsẹse, khian ne ọ huanrẹn.” Ọwarọkpa nii, alalọ nii keghi fo. 14Jesu keghi tama rẹn wẹẹ, “Ghẹ tama ọmwa rhọkpa, sokpan, bu ohẹn gha khian ne ọ ghe ruẹ egbe, iyeke ọnii, u ghi ya zọ ese ne Mosis mwamwa yọ ne u ya rhie ma emwa hia ighe u huan nẹ!”

15Sokpan otiti Jesu keghi dọlegbe gha vẹ khian, emwa kegha vẹ bu ẹre rre ne iran do danmwehọ ẹmwẹ ọnrẹn kevbe ne ọ vbe sinmwi iran hin ohọ emianmwẹ ne iran khuọnmwi rre. 16Sokpan, rẹn ghẹ ghi gualọ ehe ne ọ divbiẹ, ọ ghi hẹko gha khian ya na erhunmwu vbe evba.

Jesu Sinmwi Omwa Ne Arọ Kinmwi

(Matiu 9:1-8; Mak 2:1-12)

17Ẹdẹ ọkpa, ugbẹn vbe Jesu ghi ma emwa emwi, avbe Farisi kevbe iran ni ma emwa uhi keghi vbe tota ye evba, ẹvbo ne iran ke rre keghi re Galili, Judia kevbe Jerusalẹm. Ẹtin e Nọyaẹnmwa ne a ya sinmwi ọkhọnmwọ keghi gha gue Jesu. 18Emwa eso keghi ye ewa dada okpia ọkpa ne aroọ kinmwi rre. Iran keghi te ho ne iran mu ẹn la owa ne iran ya mu ẹn ye otọ vbe odaro Jesu. 19Sokpan iran ma miẹn odẹ la mu ẹn la owa rhunmwuda ubunmwẹ ẹvbo. Iran keghi dada ẹe hin odukhunmwu, iran ghi fannọ ihie nẹ, iran keghi la evba ya mu ẹn sẹ otọ vbe odaro Jesu vbe uwu ẹbu emwa ni. 20Ugbẹn vbe Jesu ghi miẹn vbene iran mwẹ iyayi hẹ, ọ tama nene okpia wẹẹ, “Ọse mwẹ, a ye orukhọ ruẹ hia bọọ.”

21Avbe iran ni ma emwa Uhi kevbe avbe Farisi keghi suẹn gha kha wẹẹ, “Vbe ọna ghe okpia ke rre yi ne ọ fi unu gie Osanobua vbe nian? Ọmwa ọkpa ne ọ sẹtin ye orukhọ bọ ọmwa ẹ i rrọọ gberra Osanobua.” 22Jesu wa rẹn iro ne iran zẹ, ọ keghi tama iran wẹẹ, “Vbe uwa na ro iro vberriọ heẹẹ? 23De ne ọ rọkhọ sẹ yi, ne a kha wẹẹ, ‘A ye orukhọ ruẹ bọọ,’ ra ne a kha wẹẹ, ‘Kpaegbe ne u gha khian?’ 24I gha rhie ma uwa nian ighe Ovbi Ọmwa mwẹ ẹtin ne a ya ye orukhọ bọ ọmwa vbe agbọn.” Rhunmwuda ọnii ọ tama ọmwa ne arọ kinmwi ni wẹẹ, “I tama ruẹn, kpaegbe, mu ukpo ruẹ ne u gha rrie owa!”

25Vbe ọwarọkpa nii, okpia nii keghi sirra iran hia gua kpao, ọ gua ukpo ẹre ne ọ te lovbiẹ yi rhie, ọ na gha rrie, ọ na gha rho Osanobua vbe uyi. 26Unu keghi kakabọ yan iran hia. Iran rhe guọ nii, iran rho Osanobua vbe uyi wẹẹ, “Wẹ miẹn emwi ọyunnuan ne ima miẹn ẹrẹna!”

Jesu Tie Livai

(Matiu 9:9-13; Mak 2:13-17)

27Ugbẹn vbe Jesu ghi ladian vbe iyeke ọnọna, ọ miẹn okpia ọkpa ne a tie ẹre Livai ne ọ koko igho uhunmwu, ọ tota ye isi iwinna rẹn. Jesu tama rẹn wẹẹ, “Lele mwẹ.” 28Livai keghi guakpao, ọ sẹ emwi hia rae, ọ keghi lele ẹe.

29Livai keghi le evbare nọkhua tie Jesu sẹ owa. Ni bun vbe uwu iran ni koko igho uhunmwu kevbe emwa ọvbehe keghi tota ba iran. 30Eso vbe uwu avbe Farisi kevbe iran ni ma emwa Uhi ni deba iran gha rre evba, kegha gu avbe erhuanegbe gui, iran nọ iran wẹẹ, “Vbe a na miẹn hẹ yi ighẹ uwa vbe iran ni koko igho uhunmwu kevbe iran ne ẹwobi ọre ọ gba re gba da?”

31Jesu wanniẹn tama iran wẹẹ, “Emwa ne egbe rran rẹn i bu obọ, sokpan iran ni khuọnmwi. 32Ẹ i re avbe adazẹ ọre I rre to do tie sokpan iran ne ẹwobi ne iran fi uyinmwẹ werriẹ.”

Ẹmwẹ Aguẹ

(Matiu 9:14-17; Mak 2:18-22)

33Emwa eso keghi do tama Jesu wẹẹ, “Ẹghẹ hia ọre avbe erhuanegbe Jọn ya yo aguẹ, iran ghi vbe gha na erhunmwu, erriọ avbe erhuanegbe iran ne Farisi vbe ru sokpan avbe erhuanegbe ruẹ ghi gha re, iran ghi gha da.”

34Jesu wanniẹn tama iran wẹẹ, “Wa gha sẹtin wẹ ne emwa ne a tie do rri evbare irhiọha gha ye ohanmwẹ rri egbe vbe ọdafẹn ọha gu iran re evba? Hiehiere! 35Sokpan ẹghẹ dee ne a gha na rhie ọdafẹn ọha hin ehe ne iran ye rre, ẹghẹ ni ohanmwẹ gha gbe iran.”

36Jesu keghi vbe kpa itan na ma iran wẹẹ, “A i fian vbe ẹwu ọgbọn ya te ọwiẹyi, a gha danmwẹ ọẹn, te a yanghan ẹwu ọgbọn nii rhia kẹkan, ne afian vbọ nii, ẹ i vbe gua ukpọn ọwiẹyi ro. 37A i vbe ruẹn ayọn ne ọ fian ye ọgọ ohian nọ rẹnhun nẹ. A gha danmwẹ ọẹn, ne ọ fian ni ghi gbe ọgọ ohian nii, ayọn ghi hihiẹ kua, ọgọ ghi la ọrhiae rrie. 38Ọgọ ohian ọgbọn ọre a ruẹn ayọn ne ọ fian yi. 39Ọmwa gha da ayọn ne ọ kpẹe vbe owa nẹ, ne ọ fian i ghi yẹ ọre. Ẹmwẹ nọ ghi ra ta ọrọre wẹ, ‘Nọkpẹe vbe owa ni ọre ọ maa sẹ.’ ”

Currently Selected:

Luk 5: EDO96

Highlight

Copy