Luk 4
4
Edanmwẹ Jesu
(Matiu 4:1-11; Mak 1:12-13)
1Jesu keghi werriegbe ke Jọdan gha dee, Ọ vuọn ne Orhiọn Ne ọ huanrẹn, Orhiọn keghi gban ẹre uhunmwu gha rrie uwu ato. 2Ehe ne Esu na ya danmwẹ ọẹn ghe la ikpẹdẹ iyeva. Vbe uwu ẹghẹ na hia, ọ ma rri evbare rhọkpa, sẹrriọ ne ohanmwẹ ghi na gha gbe ẹe vbe a ghi do ehia fo nẹ.
3Esu keghi tama rẹn wẹ, “A deghẹ Ovbi Osanobua wẹ khin, tama okuta na ne ọ khian ebrẹd.”
4Jesu wanniẹn wẹẹ, “Ebe tae wẹẹ, ‘Ebrẹd ọkpa i sẹ ọmwa ye egbe yan.’ ”
5Esu keghi tọn ẹn mu, ọ keghi ya ye ifuanro ọkpa rhie arriọba otọ agbọn hia ma rẹn. 6Esu Tama rẹn wẹẹ, “A viọ ena hia mẹ nẹ, mẹ sẹtin vbe viọ iran ne ọmwa ne ọ yẹ mwẹ, Mẹ gha viọ ẹfe kevbe ẹtin na hia nuẹn. 7A deghẹ u diguẹ mẹ, ehia ghi gha re ọwuẹ.”
8Jesu wanniẹn tama rẹn wẹẹ, “Ebe khare wẹẹ, ‘Osanobua Nọyan ruẹn ọkpa uwẹ gha gaa, ne u gha vbe gha ye uhunmwu rhanmwẹ otọ na!’ ”
9Esu keghi vbe mu ẹn gha rrie Jerusalẹm, ọ keghi mu ẹn yan ehe ne ọ yo sẹ vbe Ọgua Osa, ọ tama rẹn wẹẹ, “A deghẹ Ovbi Osanobua wẹ khin, ke evba san fi otọ. 10Rhunmwuda Ebe tae nẹ wẹẹ, ‘Osanobua gha gie avbe odibo ẹre ne iran gha gbe aro ghe ruẹ,’ 11kevbe wẹẹ, ‘Iran gha da obọ rra ruẹ vbene a gha na miẹn ighe u ma ghi mu owẹ gbe okuta.’ ” 12Jesu wanniẹn tama rẹn wẹẹ, “Ebe tae ne ‘Ohan igie uwẹ danmwẹ nọyan ruẹn Osanobua ruẹ ghe.’ ”
13Ugbẹn vbe Esu ghi la odẹ hia danmwẹ Jesu ghe nẹ, ọ keghi sẹ ọ rae vbe ẹghẹ kherhe.
Jesu Suẹn Iwinna Rẹn Vbe Galili
(Matiu 4:12-17; Mak 1:14-15)
14Jesu keghi werriegbe gha die Galili. Ẹtin Orhiọn Ne Ọ Huanrẹn keghi rrọọ yaba ẹre. Ẹmwẹ ọnrẹn keghi titi gba iwewe nii hia. 15Ọma emwa emwi vbe uwu Ọgua ediọn iran, emwa hia kegha tian rẹn.
Nazarẹt Ma Rhan Obọ Miẹn Jesu
(Matiu 13:53-58; Mak 6:1-6)
16Jesu kegha rrie Nazarẹt ne ọre ẹvbo ne irẹn na wan, ọ ghi sẹ Ẹdẹ Ikẹtin, ọ kegha rrie Ọgua ediọn. Zẹ vbe ne ọ ka ru yi, ọ keghi mu ebe ne ọ tie ẹre. 17Iran keghi we ebe Aizaia ne akhasẹ nẹẹn ne ọ tie, ọ ghi rhan iki ebe ni, ọ miẹn eke ne a gbẹn ọẹn yi wẹẹ:
18“Orhiọn Nọyaẹnmwa hin yan mwẹ.
Ọ zẹ mwẹ nẹ ne I ya kpe orhu
Iyẹn Ne ọ maa ma ivbiogue,
ọ gie mwẹ ne I ya na iyẹn afanvbirri ma avbe oghunmwu,
a dọlegbe bẹghe ne avbe arhuaro,
ne afannọ iran na zẹ kpokpo ye otọ,
19ne I vbe ta ẹghẹ ne Nọyaẹnmwa gha ya miẹn emwa rẹn fan ladian.”
20Jesu keghi kie iki ebe ni, ọ keghi mu ne ọkpọmwa ọkpa, rẹn keghi ya tota. Emwa hia ni rre Ọgua ediọn na wa tọn aro ye ọre egbe. 21Rẹn keghi suẹn gha gu iran guan wẹẹ, “Ẹmwẹ ebe na sẹe ẹrẹna zẹ vbene uwa họn ẹn vbe a tie ẹre hẹ ban.”
22Ẹmwẹ ọnrẹn keghi rhiẹnrhiẹn iran ẹsẹse, unu keghi yan iran ye ẹmwẹ, nọ rhiẹnrhiẹn ne ọ guan, iran wẹẹ “Ọna i re ovbi e Josẹf?”
23Rẹn keghi tama iran wẹẹ, “I rẹnrẹn ighe itan ne uwa ra kpa ma mwẹ ọrọre ‘Ọbo sinmwi egbu ẹ’ Wa ghi tama mwẹ wẹẹ, ‘Emwi ne ima họn ẹn ighe u ru vbe Kapaniọn, vbe ruẹe nian vbe ẹvbo ruẹ.’ ” 24Jesu keghi rhie tẹe wẹẹ, “Ne I tama uwa, a i rhan obọ miẹn akhasẹ vbe ẹvbo ẹre. 25Wa danmwehọ mwẹ, wa rẹnrẹn wẹ avbe ẹgbẹ wa bu vbe Izrẹl vbe ẹghẹ Elaija, ẹkpo ne amẹ ma na rhọ vbe ukpo eha vbe ukhiọnmwẹ, ne ukhunmwu nọkhua na vbe gha fi vbe otọe nii hia. 26Sokpan ne a gie Elaija bu i rrọọ gberra ẹgbẹ nii ne ọ rre Zẹrafat vbe otọe Saidọn. 27Ọkhọnmwoti wa vbe bun vbe Izrẹl vbe ẹghẹ Elaisia ne akhasẹ, sokpan ọkpa ne a sinmwi i rrọọ gberra Naaman ne ovbi e Siria.”
28Okuosu keghi rri iran hia ni rre Ọgua ediọn vbe iran họn ẹmwẹ na. 29Iran keghi guakpao, iran si Jesu hin adesẹ ẹvbo rre iran keghi si ẹe gha rrie uhunmwu oke ne a bọ ẹvbo ni yan ne iran ya ke odọ sua ẹre fi otọ. 30Sokpan rẹn keghi la adesẹ ẹbu iran gberra, ọ na gha rrie.
Okpia Ọkpa Nọ Mwẹ Orhiọn Esu
(Mak 1:21-28)
31Jesu kegha rrie Kapaniọn ne ọ rre otọ Galili, rẹn kegha ma iran emwi vbe Ẹdẹ Ikẹtin. 32Vbe ne ọ ya ma iran emwi keghi yan iran unuan rhunmwuda asẹ wa rre ẹmwẹ ọnrẹn. 33Okpia ọkpa keghi rre uwu Ọgua ediọn ne orhiọn esu dan rre uwu ẹre, ọ keghi davan rhanrhananrhan: 34“De! vbọso mwa suẹ Jesu ne ovbi e Nazarẹt? Te u do fuẹn ima an ra? I rẹn ruẹn, odibo Osanobua ne ọ huanrẹn!”
35Jesu keghi wa fian ẹmwẹ nii ye ọre unu wẹẹ, “Gue unu ruẹn ne u ladian vbe uwu okpia na.” Esu nii keghi wa sirra iran hia rhie okpia nii fianmwẹ otọ, ọ keghi lahin uwu ẹre rre vbe ne ọ ma na kuanrẹn hiehie.
36Unu keghi yan emwa hia, iran keghi kha wẹ, “Vbe a tie ena vbe emwi? Ẹtin kevbe asẹ ọre okpia na ya gu avbe orhiọn esu guan, iran ghi gele ladian.” 37Ẹmwẹ Jesu keghi titi gba ehe hia vbe ikinkin nii.
Jesu Sinmwi Emwa Nibun
(Matiu 8:14-17; Mak 1:29-34)
38Jesu ghi kpao vbe ọgua ediọn rre, ọ kegha rrie owa Saimọn. Emwirraro keghi ru iye amwẹ Saimọn, iran na tama Jesu. 39Rẹn keghi ya mudia ye ọkpẹn ukpo ne ọ lovbiẹ yi, ọ keghi gu emwirraro ni guan, Emwirraro ni na sẹrae, ọwarọkpa nii, okhuo ni keghi guakpao, ọ na do gha mu ọghọ ye iran egbe.
40Ovẹn ghi dero nẹ, emwa hia ni ghi mwẹ ọmwa ne ọ khuọnmwi emianmwẹ ne ọ rhirhi ghi khin keghi viọ iran bu Jesu gha dee, ọ keghi viọ Obọ ẹre yan dọmwadẹ ọghọe vbe uwu iran, ọ keghi mu iran hia egbe rran. 41Avbe orhiọn esu kegha tu utumwẹ obalọ vbe iran a ladian vbe egbe emwa ni bun wẹ, “Wẹ ọrọre Ovbi Osanobua.” Jesu keghi gbe eta ye iran unu, ọ ma gie iran guan rhunmwuda iran rẹnrẹn ighẹ rẹn ọrọre nene Mẹzaia.
Jesu Kpe Orhu Vbe Ọgua Ediọn
(Mak 1:35-39)
42Ugbẹn vbe ẹdẹ ghi gbe, Jesu keghi ladian hin ore ẹvbo rre, ọ na gha rrie ehe ne ọ divbiẹ. Emwa nii keghi suẹ gha gualọ ẹe, ugbẹn vbe iran ghi miẹn ọẹn, iran ma ghi te ra gie ẹe kpao. 43Sokpan rẹn khama iran wẹẹ, “Ẹ i mwẹ I ma ya kpe orhu Iyẹn Ne ọ maa na ọghe Arriọba Osanobua vbe avbe ẹvbo ọvbehe rhunmwuda, ọnii ọre Osanobua gie mwẹ ne I do ru.”
44Rhunmwuda ọnii, rẹn keghi vbe ya kpe orhu vbe avbe Ọgua ediọn ni rre Judia.
Currently Selected:
Luk 4: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
