Luk 2

Ubiẹmwẹ Jesu

(Matiu 1:18-25)

1Ẹghẹ nii, Ọgbaisi Ọgọstọs keghi yi iyi wẹ ne emwa ni rre otọe irẹn hia ya gbẹnnẹ eni ye otọ vbene a ra ya ka ẹvbo. 2Vbe ẹghẹ ne a na ka ẹvbo okokaro na, Kirenios ọre ọ gha khaemwisẹ vbe Siria. 3Dọmwadẹ ọghọe keghi rhunmwuda ọnii ya gha gbẹn eni ye otọ vbe ẹvbo ne a na bie ọe.

4Josẹf keghi rhunmwuda ọnii kpao vbe Nazarẹt ne Galili gha die Bẹtlẹhẹm ẹvbo ne a na biẹ Devid, vbe otọe Judia. Emwi nọ ye Josẹf gha rrie evba ọrọre wẹ, uniẹn Devid ọre irẹn khin. 5Ọ keghi ya gbẹnnẹ eni ọghọe kevbe ọghe Meri ne a ya nẹẹn ne ọ vbe hanmwa vbe ẹghẹ ni ye otọ. 6Ẹghẹ ne iran na gha rre Bẹtlẹhẹm na, ẹdẹ ne ọ gha ya biẹ keghi sẹ. 7Ọ keghi biẹ ọmọ ọdiọn ọmọ okpia, ọ keghi ye ukpọn vbuẹ uẹ ọre ọ keghi wa ẹre vbe aza emwirri rhunmwuda owa ekhẹn ma ghi gua iran.

Avbe Ọsuohuan Kevbe Avbe Odibosa

8Avbe Ọsuohuan eso keghi rre otọe ẹvbo nii, iran kegha gbe aro ghe ohuan iran vbe oha vbe asọn. 9Odibosa e Nọyaẹnmwa rhie egbe ma iran, awanwan Nọyaẹnmwa keghi wan lẹga iran, ohan keghi mu iran ẹsẹse. 10Sokpan odibo e Nọyaẹnmwa ni tama iran wẹẹ, “Wa ghẹ gie ohan mu uwa rhunmwuda iyẹn oghọghọ ne ọ gha sẹ emwa hia ọyẹnmwẹ, ọre I do na ma uwa. 11Vbe ẹdẹnẹrẹ na, a biẹ Kristi Nọyaẹnmwa ne ọre Ọmiọnmwafan uwa, vbe ẹvbo Devid. 12Ne uwa miẹn ehe ne tie ẹre ẹmwata, wa gha do vba ọmọ obọ ne a ye ukpọn vbuẹ vbe a mu ẹn lovbiẹ vbe aza emwirri.”

13Vbe udomwurri, ivbiyokuo ni bun ọghe odibosa ni rre ẹrinmwi keghi rhie egbe ma ba odibosa nii, iran kegha rho Osanobua vbe uyi wẹẹ:

14“Uyi nọ ne Osanobua vbe ẹrinmwi ne ọ yo sẹ.

Kevbe ọfumwegbe ne emwa ne ẹko ẹre rhiẹnrhiẹn ghe vbe agbọn!”

15Ugbẹn vbe avbe odibosa ni ghi kpao sẹ iran rae gha rrie ẹrinmwi nẹ, avbe ọsuohuan keghi gba tae wẹẹ, “Wa gie ima gha rrie Bẹtlẹhẹm ne a ya ghe emwi ne Nọyaẹnmwa do tama ima na ighe ọ sunu.”

16Iran keghi zẹgiẹ gha khian, iran keghi do vba Meri kevbe Josẹf, iran keghi vbe miẹn ọmọ nii ne ọ lovbiẹ vbe aza emwirri. 17Ugbẹn vbe avbe Ọsuohuan ghi miẹn ọẹn, iran na iyẹn emwi ne avbe odibosa tama iran vbe ekpa ọmọ nii ma iran. 18Iyẹn ne avbe Ọsuohuan naẹn ma iran na keghi yan emwa hia ni họn ẹn unuan. 19Meri ma mianmian avbe emwi na, ọ keghi hẹko gha rria iran vbe ekhọe ẹre. 20Avbe Ọsuohuan keghi werriegbe, iran kegha so ihuan rho Osanobua rhunmwuda emwi ne iran họn ẹn kevbe ne aro iran sẹe ne ọ wa gha ye zẹ vbene avbe odibosa tama iran.

21Ọ ghi gba vbe uzọla ọkpa, vbe ẹghẹ ne a gha ya rhuẹ ọmọ nii ghi sẹ nẹ, iran keghi he ẹre Jesu, eni ne odibosa ni tie ẹre re vbe a te hanmwa ẹn.

Amu Jesu Gha Die Ọgua Osa

22Ẹghẹ ghi sẹ nẹ ne Meri kevbe Josẹf gha ya mu Uhi Mosis sẹ ne iran ya ru ugamwẹ akpehuan, iran keghi mu ọmọ ni gha rrie Jerusalẹm ne a ya mu ẹn gie Nọyaẹnmwa. 23Vbenian ọre agbẹn ọẹn ye uhi Nọyaẹnmwa, “Te a gha ye emọdiọn hia fiohan ne Nọyaẹnmwa.” 24Iran keghi vbe ya ye idu eva ra elikhukhu eva giẹrẹ zọ ese zẹ vbene uhi Nọyaẹnmwa kha re.

25Vbe ẹghẹ na, okpia ọkpa ne a tie ẹre Simiọn keghi rre Jerusalẹm. Rẹn keghi re ọmwa esiesi ne ọ mu ohan Osanobua kevbe ne ọ vbe rhie aro ye odẹ gha khẹ ẹghẹ ne a gha ya miẹn Izrẹl fan, orhiọn Ne ọ huanrẹn keghi rrọọ yaba ẹre. 26Orhiọn Ne Ọ Huanrẹn vbe tama rẹn wẹẹ ọ ma miẹn Mẹzaia ne Nọyaẹnmwa yan eyan rẹn nẹ, ẹ i ra miẹn uwu. 27Zẹ vbe ne Orhiọn rhie ma rẹn, Simiọn kegha rrie uwu Ọgua Osa. Ugbẹn vbe evbibiẹ ọmọ ni ghi mu Jesu sẹ Ọgua Osa ne iran do ru nẹ zẹ vbene Uhi khare. 28Simiọn keghi mu ọmọ nii mwẹ obọ, ọ na kpọnmwẹ Osanobua wẹẹ:

29“Nọyaẹnmwa, u mu eyan ne u yan rẹn sẹ nẹ.

U sẹtin zẹ ọguọmwadia ruẹ urrie vbe ọfumwegbe nian.

30Rhunmwuda, I ye aro dẹghe imiẹnfan ruẹn nẹ.

31Ne uwẹ sirra emwa hia ni mu egbe ẹre ye otọ.

32Uwanmwẹ ne ọ gha ma avbe ni ma yayi odẹ ruẹ,

ne ọ gha vbe rhie uyi ne avbe Izrẹl emwa ruẹn.”

33Ẹmwẹ ne Simiọn tae vbekpa ọmọ nii keghi yan erha ẹe kevbe iye ẹe unuan. 34Simiọn keghi fiangbe iran, ọ keghi tama Meri ne iye ẹe wẹẹ, “Osanobua zẹ ọmọ na zẹ vbe ọmwa ne emwa eso gha la ekpa ẹre fuan kevbe ne enibun gha la ekpa ẹre miẹn imiẹnfan vbe Izrẹl. Rẹn gha re ama ne ọ ke obọ Osanobua rre, ama ne emwa ni bun gha gbe odan ghe. 35Ne agbọn miẹn ehe na rẹn iro ẹkhokho iran. Akhiẹ gha so uwẹ tobọ ruẹ ẹkoko udu zẹ vbe umozo ne ọ mu.”

36Akhasẹ nokhuo ọkpa keghi vbe rrọọ, Anna ne ovbi e Fanuẹl ne uniẹn Asia. Edede ghi nọ, ọ keghi ye ukpo ihinrọn vbe owa ọdọ. 37Ọdọ re ghi vbe wu nẹ, ọ keghi vbe ya ukpo enẹ yan iyenẹ ru ẹgbẹ. Ẹ ghi kpao vbe Ọgua Osa rre. Asọn vbe avan ọre ọ ya ga Osanobua vbe aguẹ kevbe erhunmwu. 38Vbe ẹghẹ ọkpa nii zẹẹ, rẹn keghi vbe rre, ọ rhie ekpọnmwẹ ne Osanobua, ọ keghi vbe guan vbekpa ọmọ ni ma emwa ni ghi rhie aro ye odẹ khẹ ne Osanobua, do miẹn Jerusalẹm fan.

Iran Dọlegbe Gha Die Nazarẹt

39Iran ghi ru emwi hia gba nẹ zẹ vbene Uhi Nọyaẹnmwa khare, iran keghi dọlegbe gha die Galili, iran na gha die Nazarẹt ne ọ wa re ẹvbo iran. 40Ọmọ ni keghi wan, ọ keghi vbe wo vbe egbe, ọ vuọn ne ẹwaẹn, afiangbe Osanobua kegha gu ẹe rrọọ.

Jesu Ne Ọvbokhan Ọkpia Vbe Uwu Ọgua Osa

41Ukpukpo ọre avbe evbibiẹ Jesu ya gha ru Emwiukpo Alagberra vbe Jerusalẹm. 42Jesu ghi rre ọmọ ukpo iweva, iran keghi vbe gha khian zẹ vbe ne iran ka ruẹe de yi. 43Iran ghi ru Emwiukpo fo nẹ, iran keghi werriegbe gha die owa sokpan Jesu keghi ya kọ vbe Jerusalẹm, sokpan evbibiẹ ọe ma rẹn. 44Iran te gha ro ighẹ ọ rre uwu ẹbu, iran khian okhian ikpẹdẹ hoho nẹ, iran keghi suẹn gha gualọ ẹe vbe ẹbu etẹn kevbe avbe ọse. 45Ugbẹn vbe iran ma ghi miẹn ọẹn, iran keghi werriegbe gualọ ẹe gha rrie Jerusalẹm. 46Vbe ikpẹdẹ nogieha, iran keghi do vba ẹre vbe uwu Ọgua Osa, ọ tota ba avbe emamwaemwi e Ju, ogha danmwehọ iran, ọ keghi vbe gha nọ iran ọta. 47Unu keghi yan emwa hia ni danmwehọ ẹre ye ẹwaẹn ne ọ ya rhie ewanniẹn ye inọta. 48Unu keghi yan avbe evbibiẹ ọe vbe iran miẹn ọẹn, iye ẹe keghi tama rẹn wẹẹ, “Ovbi mwẹ, vbe ua na ru ima vbe nian hẹ yi? Te imẹ vbe erha a wa mu udu kee gha gualọ ọ khian usin.”

49Rẹn keghi wanniẹn khama iran wẹẹ, “Vbe uwa gualọ mwẹ baa? Wa ma rẹn ighẹ uwowa erha mwẹ ọre ọ kere ne I gha ye.” 50Sokpan iran ma rẹn emwi ne ọ ya ẹmwẹ ne ọ tama iran kha.

51Jesu keghi lele iran dọlegbe gha rrie Nazarẹt, ọ kegha họn ẹmwẹ ne iran. Iye ẹe keghi ye emwi na hia ẹro. 52Jesu kegha wan vbe ikinnegbe kevbe ẹwaẹn, ẹmwẹ ọnrẹn kegha yẹ Osanobua kevbe emwa ne agbọn.

Currently Selected:

Luk 2: EDO96

Highlight

Copy