Luk 1
1
Errilo
1Tiofilọs ne ọ ghan:
Emwa ni bun, hia buan nẹ, ne iran na gbennẹẹn iyẹn emwi ni sunu vbe ehe ne ima ye ye otọ. 2Emwi ne iran ne aro ẹre sẹ avbe emwi na vbe omuhẹn, gha kpe orhu ẹre khian, ne iran vbe tama ima, ọre iran gbẹnnẹ ye otọ. 3Banbanna nian, Evbavba, vbene imẹ ghi na vbe gbe aro ke otọ gualọ otọ avbe emwi na hia ke omuhẹn ọnrẹn gha dee, I yayi wẹ emwi ne ọkere nọ ne I mwamwa ehia ọsegbe ọsegbe gbẹnnẹ ye ebe guẹ. 4Emwi ne ọ ra ya mwẹ ru ẹe ọrọre wẹẹ, I ho ne u rẹn uhunmwu ẹmwẹ ni rre avbe emwi ni hia ne iran na ma ruẹn re nẹ.
A Do Kha Ighẹ A Gha Biẹ Jọn Ne Ọsamẹ
5Ẹghẹ ne Hẹrọd na gha re Ọba Judia, ohẹn ne a tie ẹre Zẹkaraia kegha rrọọ vbe oka ne ọ laghe uviẹn Abija. A kegha tie eni ọvbokhan rẹn Elizahẹt, Okhuo na keghi vbe re ọmwa ne a biẹe vbe uniẹn ne a na rri ohẹn. 6Iran eva kegha yin ẹse vbe odaro Osanobua. Iran kegha ye iyi ke ilele Osanobua hia ru emwi. 7Iran i mwẹ emọ rhunmwuda Elizabẹt ma biẹ, ke irẹn kevbe Zẹkaraia vbe khian ọmaẹn nẹ ẹsẹse.
8Ẹdẹ ọkpa, Zẹkaraia kegha winna iwinna ohẹn ọnrẹn vbe odaro Osanobua, ọ na gha ru nọ kan rẹn vbe ugamwẹ ikpẹdẹ ikpẹdẹ. 9Zẹ vbe obọ ne avbe ohẹn ru emwi la, rẹn ọre uta mu wẹ ne ọ ya giẹn eturari vbe ogiukpo. Rhunmwuda ọnii, rẹn keghi la uwu Ọgua Osa Osanobua. 10Vbe ẹghẹ na, emwa ke gbe ẹbu ye ore gha na erhunmwu vbe a giẹn eturari nii. 11Odibo Nọyaẹnmwa ọkpa keghi rhie egbe ma rẹn, ọ mudia ye obọ erha ọmwa ogiukpo ne a na giẹn eturari nii. 12Ugbẹn vbe Zẹkaraia bẹghe ẹre, udu ẹre mu waa, ohan kegha mu ẹn. 13Sokpan odibosa nii tama rẹn wẹẹ, “Ghẹ gie ohan mu ẹn Zẹkaraia, Osanobua họn erhunmwu ruẹn nẹ, Elizabẹt ne amwẹ ọẹn gha biẹ ọmọ okpia nuẹn. U ghi he ẹre Jọn. 14Ẹko gha sẹ uwẹ ọyẹnmwẹ ẹsẹse, ẹko gha vbe rhiẹnrhiẹn emwa ni bun ye ubiẹmwẹ ọmọ ni. 15Rhunmwuda okpọmwa rẹn khian gha khin vbe odaro Osanobua. A ghẹ giee ye unu kan ayọn, a ma ghi wẹ ayọn ne ọ wo vbe egbe. Orhiọn Ne ọ huanrẹn gha hin yan rẹn wa ke ẹghẹ ne a ya biẹ ọe kpao. 16Ọ gha viọ enibun vbe ivbi Izrẹl dọlegbe bu Nọyaẹnmwa Osanobua iran gha dee. 17Rẹn gha ladian zẹ vbe akhasẹ Osanobua ne ọ wo vbe egbe kevbe ne ọ mwẹ ẹtin zẹ vbe Elaija ne akhasẹ. Rẹn gha dọlọ erha kevbe emọ kugbe. Iran ni ze vbe ẹkoko udu, ọ gha fi iran ekhọe werriẹ ne iran gha ro iro zẹ vbe adazẹ ọmwa. Ọ gha mu emwa Nọyaẹnmwa egbe ye otọ khẹ ọre.”
18Zẹkaraia keghi khama odibosa ni wẹẹ, “Vbe i a gha ya rẹn hẹ ighẹ ẹmwata ọ na khin? I khian ọmaẹn nẹ, ọvbokhan mwẹ vbe khian ọmaẹn.” 19Odibosa nii wanniẹn tama rẹn wẹẹ, “Mẹ ọrọre Gebriẹl, odaro Osanobua ọre I mudia yi, rẹn ọre ọ gie mwẹ ne I do na iyẹn oghọghọ na ma ruẹn. 20Sokpan, wẹ ma ya ẹmwẹ ne I do tama ruẹn yi, ẹmwẹ ne ọ gha sẹ vbe ẹghẹ a sẹ. Rhunmwuda ne u ma na yayi na, u gha khian odin. Te u ra ye kitikpọ, rhinrin ya sẹ ẹdẹ ne eyan ne I yan ma ruẹn na gha sẹ.”
21Vbe ẹghẹ ne a kha na, emwa kegha mudia khẹ Zẹkaraia vbe ore wẹ a ma rẹn emwi ne ọ ghi yae kpẹe sẹrriọ vbe uwu Ọgua Osa. 22Ugbẹn vbe ọ ghi ladian, ọ ma sẹtin gu iran guan, iran ghi na la evba rẹn ighe te ọ miẹn umian vbe uwu Ọgua Osa. Ugbẹn vbe ọ ma ghi sẹtin guan, obọ ọre ọ ghi ya zẹ edu ma iran.
23Ugbẹn vbe ẹghẹ ne ọ gha winna la vbe Ọgua Osa ghi gba nẹ, Zẹkaraia kegha rrie owa. 24Ọ ghi kpẹe kherhe, Elizabẹt ne amwẹ ọnrẹn kegha hanmwa, ọ ma rhie owẹ ladian vbe owa vbe uki isẹn gbalaka. 25Rẹn keghi kha wẹẹ, “Banbanna nian, Nọyaẹnmwa do yọ mwẹ obọ vbe nian, ọ han ukpọn ozan hin mwẹ ẹkun rre.”
A Tae Ighe A Gha Biẹ Jesu
26Ẹko Elizabẹt ghi rre uki ehan, Osanobua keghi gie Gebriẹl ne odibo gha rrie ẹvbo ne a tie ẹre Nazarẹt ne ọ rre otọ Galili. 27A keghi gie ẹre uhunmwu gha rrie ọghe ọmọ okhuo ọkpa ne a ya ne okpia ọkpa ne a tie ẹre Josẹf, ọmwa ne ọre uniẹn Devid. A keghi tie ọmọ okhuo nii Meri. 28Odibosa keghi bu ẹre gha dee, ọ tama rẹn wẹẹ, “Ọfumwegbe nọ nuẹn. Nọyaẹnmwa yaba ruẹ, ọ vbe fiangbe uẹ ẹsẹse.”
29Ẹmwẹ ne odibosa na tama Meri keghi rueghe ẹre orhiọn ẹsẹse, ọ kegha rorẹe wẹ, De emwi ne a yae kha. 30Odibosa nii na tama rẹn wẹẹ, “Ghẹ mu ohan Meri, Osanobua ruẹ ẹse nẹ. 31U gha hanmwa, u gha biẹ ọmọ okpia ọkpa, u ghi he ẹre Jesu. 32Rẹn gha khian okpọmwa, a ghi vbe gha tie ẹre Ovbi Osanobua Ne Ọ Yọ Sẹ, Nọyaẹnmwa Osanobua gha ma ẹn re ọba zẹ vbe ne Devid ne erhae odede vbe gha ye. 33Rẹn gha rriọba yan ivbi e Jekọb ẹdẹdẹmwẹdẹ, arriọba ẹre ẹ i ra mwẹ ufomwẹ.”
34Meri keghi khama odibosa nii wẹẹ, “I ma he rẹn okpia, vbe ọ na a gha na sẹtin gha ye rriọ hẹ.” 35Odibosa ni keghi wanniẹn wẹẹ, “Orhiọn Ne Ọ Huanrẹn gha rhuẹ yan ruẹn. Ẹtin Osanobua gha hin yan ruẹn. Rhunmwuda ọnọna, a gha tie ọmọ ne ọ huanrẹn ni Ovbi Osanobua. 36Ghe, Elizabẹt ne ọtuẹn, ne agbọn hia tie ẹre agan, ẹko uki ehan ọre ọ guee na, egbe ne ọ ya khian ọmaẹn nẹ. 37Rhunmwuda emwi ọkpa i rrọọ ne ẹ i gie Osanobua ru.” 38Meri keghi kha wẹẹ, “Ọguọmwadia ọre I khin, gie ẹe gele sẹ vbe egbe mwẹ vbe ne u khare na.” Odibosa nii keghi kpa sẹ ọe rae.
Meri Ya Tuẹ Elizabẹt
39Ọwarọkpa vbe iyeke ọnii, Meri keghi mu egbe, ọ na giẹgiẹ gha rrie ẹvbo ọkpa ne ọ rre uhunmwu oke, vbe otọe Judia. 40Rẹn keghi la uwu owa Zẹkaraia, ọ keghi nien urhu tuẹ Elizabẹt. 41Ugbẹn vbe Elizabẹt ghi wa họn urhu otuẹ e Meri, akpa ne ọ rre ẹre ẹko na guakpao. Elizabẹt keghi vuọn ne orhiọn Ne ọ huanrẹn. 42Ọ keghi ye urhu nọ la guan wẹẹ, “Ne a fiangbe ọre uwẹ khin vbe uwu avbe ikhuo. Ne a fiangbe ọre ọmọ ne u gha biẹ vbe khin. 43Vbe ọ zẹ ne emwi ne ọ kpọlọ vbe nian na sunu vbe egbe mwẹ, ne iye Nọyaẹnmwa na gha de do tuẹ mwẹ? 44Rhunmwuda, ọwarọkpa vbe I wa họn vbe u tuẹ mwẹ, akpa ne ọ rrọ mwẹ ẹko keghi guakpao vbe oghọghọ. 45A miẹn vbe uhunmwu ruẹn ma hẹẹ, ne u na yayi ighe ẹmwẹ ne Nọyaẹnmwa tama ruẹn gha sẹ!”
Ihuan Urhomwẹ Ne Meri Soo
46Meri keghi kha wẹẹ:
“Ekhọe mwẹ rho Nọyaẹnmwa vbe uyi,
47ẹko mwẹ vbe sọyẹnmwẹ ghe Osanobua Ọmiọnmwafan mwẹ,
48rhunmwuda, ọ ye imẹ rre,
mẹ ne ọguọmwadia ẹre ne ẹ mwẹ esa!
Ke ẹghẹ na gha khian nian,
agbọn hia gha tie mwẹ ene afiangbe.
49Rhunmwuda, emwi nọkhua ne Osanobua ne ọ kpọlọ ru mẹ.
Ne ọ huanrẹn ọre eni ẹnrẹn vbe khin.
50Ọ tohan iran hia ni mu ohan rẹn.
Ke orre ya sẹ orre.
51Ọ nien obọ ẹre ne ọ wegbe ladian.
Ọ keghi zagha iran ni tọn egbe mu kevbe emwamwa iran kua.
52Ọ silo iran ne ọba nekhua hin ẹkete iran rre.
Ọ keghi tọn avbe emwa ne ẹ i mwẹ esa mu.
53Ọ ye emwi ni maa koko iran ne ohanmwẹ gbe ne ẹko vuọn.
Ọ keghi gie iran ni fe fi abọ gha rrie.
54Ọ mu eyan ne ọ yan ma avbe erhamwa odede sẹ.
Ọ rre do ye Izrẹl ne eguọmwadia ẹre obọ.
55Ọ yerre ne ọ ya mwẹ itohan ghe Ebraham.
Kevbe uniẹn ivbi ẹre ẹdẹdẹmwẹdẹ!”
56Meri ghi gbe uki eha vbe ehe ne Elizabẹt ye nẹ, ọ na gha rrie owa.
Ubiẹmwẹ E Jọn Ne Ọsamẹ
57Uki ghi sẹ Elizabẹt nẹ, ọ keghi biẹ ọmọ okpia. 58Avbe emwa ẹdogbo kevbe etiọnrẹn ni họn vbene Nọyaẹnmwa ru ẹre ẹse hẹ keghi gue ẹe ghọghọ ẹsẹse.
59Ọ ghi rre uzọla ọkpa ne a biẹ ọe, iran keghi rre do rhuẹ ọmọ nii, iran te ra wa he ẹre Zẹkaraia ne a vbe tie erhae. 60Sokpan iye ẹe wanniẹn wẹ, “Ẹn o, Jọn ọre a gha he ẹre re.”
61Iran wanniẹn tama rẹn wẹẹ, “Wa i he mwẹ eni na vbe ẹgbẹe.” 62Iran keghi ye obọ zẹ edu nọ erha ẹe eni ne ọ ho ne a he ọmọ okpia ni re.
63Zẹkaraia keghi nọ uhanhan ne a gbẹn emwi yi, ọ keghi gbẹn wẹẹ, “Jọn ọre a tie ẹre.” Unu keghi wa yan iran hia. 64Vbe ọwarọkpa ni Zẹkaraia keghi suẹ dọlegbe gha guan, ọ kegha rho Osanobua vbe uyi. 65Emwi na keghi wa mu ẹdogbo nii hia ohan, ọ keghi wa titi gba ẹvbo uhunmwu oke Judia hia. 66Emwa ni họn ẹn hia kegha rria ẹre wẹ, “De emwi ne ọmọ na ra khian?” Rhunmwuda aro dae wẹ ẹtin Nọyaẹnmwa gu ẹe rrọọ.
Zekaraia Guan Ye Otọ Vbe Akhasẹ
67Zẹkaraia ne erha ẹe keghi vuọn ne Orhiọn Ne Ọ Huanrẹn, ọ keghi guan zẹ vbe akhasẹ wẹẹ:
68“Wa gie a rho Nọyaẹnmwa Osanobua ọghe Izrẹl.
Rhunmwuda ọ do ye emwa rẹn obọ,
ọ keghi fan iran vbe irri.
69Ọ gie Ọmiọnmwafan ne ọ wegbe ọkpa zọ ladian ne ima,
vbe uwu uniẹn Devid ne ọguọmwadia ẹre.
70Erriọ ọ la unu avbe akhasẹ ọre ni huanrẹn nẹdẹ tae ye otọ.
71Wẹ rẹn gha miẹn mwa fan vbe obọ avbe eghian mwa.
Kevbe hin obọ ẹtin ọghe iran hia ni khuiwu mwa.
72Ọ wẹ rẹn gha tohan avbe erha mwa odede.
Ọ ghi vbe ye ile ẹre ne ọ huanrẹn rre.
73Ọ yan ma Ebraham ne erha mwa odede.
74Ọ wẹ rẹn gha miẹn mwa fan vbe obọ avbe eghian mwa.
Ne ima miẹn otọ na gha gae vbe ne a i na fian afianma.
75Ne ima gha re emwata ni huanrẹn vbe odaro ẹre.
Vbe ẹdẹ agbọn ima hia.
76Wẹ ne ovbi mwẹ, akhasẹ Osanobua Ne Ọ Yo Sẹ,
ọre a gha tie ruẹ.
Wẹ gha ke aro ne Nọyaẹnmwa.
Ne u ya zẹ odẹ ye otọ khẹ ọre.
77Ne u khama emwa rẹn ighe a gha miẹn iran fan.
Vbe kpa ne a gha na ye orukhọ bọ iran.
78Rhunmwuda ọmẹhẹ ne ọmwa itohan ọre Osanobua mwa khin.
Rẹn gha gie uwanmwẹ imiẹnfan wan mu ima hia.
79Rẹn wan uwanmwẹ ke ẹrinmwi rre,
yan emwa hia ni rre ebiebi aghọnghọn uwu
ne ọ dia owẹ mwa lele uro odẹ ọfumwegbe.”
80Ọmọ nii keghi gha wan yiọ vbe egbe kevbe orhiọn, ọ na gha rre uwu ato, ọ te do sẹ ẹghẹ ne ọ gha na ye egbe ne ivbi Izrẹl miẹn vbe azagba.
Currently Selected:
Luk 1: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
