Gẹnẹsis 50

1E Josẹf keghi de kinnọ erhae vbe otọ ọ na gha viẹ, ọ na gha ya unu soso ẹre uharo. 2Ẹre Josẹf na wẹ ne avbe ọbo ọghọe ka erhae mu ya. Avbe ọbo nii kevbe ru vberriọ. 3Ikpẹdẹ iyeva ọ re iran ya ruẹe zẹ vbene ẹghẹ ne a ya ka orinmwi ya wa vbe sẹ zẹẹ. Emwa Igipt keghi ye ikpẹdẹ ekigbesiyenẹ khiẹ ọre.

4Ẹghẹ ne a khiẹ erhae la ghi fo nẹ, e Josẹf keghi khama emwa iwinna ọba wẹẹ, 5“Ẹghẹ ne erha mwẹ ra na wu, ọ na ya mwẹ vẹn ihẹn wẹ I gha ya re irẹn ye idin ne ọ tobọ re fian vbe otọ Kenan, Lahọ gunmwẹ ya re erhamwẹ ne I vbe dọlegbe gha dee.” 6Ọba keghi wanniẹn wẹẹ, “Gha khian ya re erhae zẹ vbe ne u yan ma rẹn wẹ u gha ru.”

7Ẹre Josẹf na ya re erhae. 8Emwa iwinna Fero hia, iran ni ke odukhunmwu vbe ẹguae ẹre kevbe iran ni gba khia hia vbe Igipt keghi lele Josẹf gha khian, deba emwa ẹnrẹn hia kevbe avbe etiọnrẹn nikpia kevbe ẹgbẹe erhae hia. Sokpan ivbi iran negiẹrẹ ọkpa, avbe ohuan iran kevbe ẹwe iran kevbe ẹmila iran ọ re ọ ghi gha rre otọe Gosiẹn. 9Ikẹkẹ okhuae kevbe emwa ni hin ẹsin kevbe lelẹe, iran wa gha bun ẹsẹse.

10Ugbẹn vbe iran ghi sẹ ehe ne a na wiẹn ọka vbe Atad vbe olarre ovẹn Jọdan, iran keghi ru ugamwẹ irorinmwi ne ọ taẹn ẹsẹse, e Josẹf keghi ru iruemwi akhiẹ la ikpẹdẹ ihinrọn. 11Ugbẹn vbe emwa Kenan ghi miẹn iruemwi akhiẹ nii vbe Atad, iran keghi kha wẹẹ, “Iruẹmwi akhiẹ nekhuẹrhẹ ọghe emwa Igipt ọre ọna khin!” Ọ ni ọ zẹẹ ne a na gha tie evba nii Abel-mizrain. 12Erriọ ọ re ivbi Jekọb ru zẹ vbene ọ tama iran. 13Iran keghi muẹn gha rrie Kenan, irran na ya rre ẹre ye uvun okuta vbe ako oha vbe Makpẹla vbe odẹ ọlarre ovẹn Mamrẹ, ne Ebraham gu Efrọn ne ọmwa Hiti dẹ ne a gha re orinmwi yọ. 14Ugbẹn vbe Josẹf ghi re erhae nẹ, ọ keghi werriegbe gha die Igipt kẹe kevbe etiọnrẹn kevbe iran hia ni lelẹe yo irorinmwi.

E Josẹf Wẹ Ne Etiọnrẹn Ghẹ Fian Afianma

15Ugbẹn vbe erha iran ghi wu nẹ, etẹn e Josẹf keghi kha wẹẹ, “A deghẹ te ohu ima ye mu e Josẹf vbo, ọ na wẹ rẹn ra rria ikhi ye emwi dan ne ima ru ẹre re?” 16Iran keghi rhunmwuda ọnii gie uhunmwu gie Josẹf wẹẹ vbene erha ima te wu, ọ wẹẹ ne ima tama ruẹn wẹẹ, 17“Ma rinmwian an lahọ, mianmian emwi dan kevbe orukhọ ne avbe etuẹn ru ghe ruẹ. Banbanna nian, lahọ ya emwi dan ne ima ne eguọmwadia Osanobua erha a ru bọ mwa.” Iran ghi ta ẹmwẹ na ma e Josẹf, ọ na gha viẹ.

18Etiọnrẹn tobọ ẹre keghi rre, iran keghi vbokho egbe rriotọ nẹẹn, iran wẹẹ, “Banbanna nian, ghe ima vbe odaro ruẹ zẹ vbe eviẹn ruẹn.” 19Sokpan e Josẹf tama iran wẹẹ, “Wa ghẹ fian afianma, mẹ i ra sẹtin rhie egbe mwẹ ye ihe Osanobua. 20Te uwa te si uma ne uwa ru mwẹ emwi dan, sokpan Osanobua keghi fiẹe werriẹ yae khian emwi esi, ne ọ miẹn ehe na sinmwi emwa nibun ye agbọn, emwa na miẹn wẹ, ọnii ọ zẹe ne iran na rre agbọn ẹre na. 21Banbanna nian, wa ghe fian afianma, I gha gbearoghe uwa kevbe ivbi uwa negiẹrẹ.” Ọ keghi ye ẹmwẹ itohan rhie igiọdu ne ọ mu iran ekhọe ne iran.

Uwu Ọghe Josẹf

22E Josẹf kegha rre Igipt kẹe kevbe ẹgbẹe erha ẹe, ọmọ ukpo igbeyan iyisẹn ọre ọ gha ye vbe ọ wu. 23Ọ keghi tọ sẹrriọ ne ọ na miẹn emọ iwu kevbe eyẹ ọghe Ifreim. Aro ẹre keghi vbe sọe vbe a viọ ivbi Makia ne ovbi e Manasẹ, lao ẹgbẹe. 24Rẹn keghi tama etiọnrẹn wẹẹ, “Te i ghi ra wu na, sokpan Osanobua gha gbearoghe uwa vbe ne a i na gbe awẹawẹ, ọ ghi viọ uwa ke otọe na ladian gha rrie otọe nii ne ọ ve iran ẹre ighẹ Ebraham, Aizik kevbe Jekọb.” 25Ẹre Josẹf na ya emwa irẹn vẹn ihẹn, ọ wẹẹ, “Wa yan ma mwẹ wẹ, ẹghẹ ne Osanobua gha na viọ uwa, gha rrie otọe nii wa gha mu ikun mwẹ ba egbe kpao.” 26Ẹre Josẹf na fi ya vbe ọ rre ọmọ ukpo igbe yan iyisẹn, vbe Igipt. Iran keghi ka ikun ẹre ya, iran na wa ẹre ye ẹkpẹti orinmwi.

Currently Selected:

Gẹnẹsis 50: EDO96

Highlight

Copy