Gẹnẹsis 49

Ẹmwẹ Okiekie Ọghe Jekọb

1E Jekọb keghi tie avbe ivbi ẹre, ọ tama iran wẹẹ, “Wa do si koko ye emwa ne I tama uwa emwi ne ọ gha sunu vbe egbe uwa vbe ẹghẹ nọdee:

2“Wa si koko ne uwa danmwehọ ivbi e Jekọb.

Wa danmwehọ Izrẹl ne erha uwa.

3“E Riubẹn ovbi mwẹ nọdiọn, wẹ ọrọre ẹtin mwẹ,

ke ọmọ okaro ne I biẹe zẹ vbe ẹghele, ne ọ zọmọ sẹẹ,

kevbe ne ọ wegbe sẹẹ vbe uwu avbe ivbi mwẹ nikpia.

4Te u yevbe ogbigbi amẹ ne ọ hẹ yo hẹ rre,

sokpan wẹ i ra gha re ne ọ hiunkhuan sẹẹ,

rhunmwuda u gu amwẹ erha ru emwi awua.

U ru ukpo orọnmwẹ mwẹ awua, u keghi muẹn hin.

5Etẹn ọre Simiọn kevbe Livai khin.

Iran ye abẹkpẹn iran zẹ uza.

6Mẹ i ra mwẹ obọ vbe uma ẹkhokho iran

mẹ i ra yo iko ne iran ko rhunmwuda,

iran gbele emwa vbe ohu mu iran,

iran keghi kun avbe ẹkhuia ẹmila use ya gha gbogiẹ.

7I hẹn nọ ne ohu ne ọ mu iran rhunmwuda ọ wegbe gbe,

ke vbene okuosu iran, rhunmwuda ọ kan gbe.

I gha zagha iran la otọ e Jekọb hia

I gha duẹ iran an ye uwu ivbi Izrẹl.

8E Juda, avbe etuẹn gha tian ruẹn.

We gba avbe eghian ruẹn ẹho mwẹ,

avbe etuẹn gha ghughẹrre nuẹn.

9Te Juda yevbe oduma,

ọ gha gbe emwi nẹ, ọ ghi dọlegbe la irhu.

Ọ gha niẹn egbua, ọ ghi lovbiẹ

a i miẹn ne ohan giẹe rrẹrrọe.

10E Juda gha mu ọkpọ ọba mwẹ

uniẹn ọnrẹn ọ ra gha rriọba khian.

Avbe okpẹvbo gha ya imuohan giẹẹ

iran ghi ye a họn ẹmwẹ gbe uhunmwu kotọ nẹẹn.

11Ọ ghi de ovbi ekẹtẹkẹtẹ mu ovbi alimo.

Ye erhan alimo ne ọ maa sẹẹ vbọ.

Ọ ghi ye ayọn họ ukpọn rẹn vbe uwu ayọn ne ọ baa vbe esagiẹn.

12Aro ẹre viẹn uan kpaan ne ayọn

akọn rẹn fuọfua ne ọ ya wọn ewẹn ẹmila

13Ọkpẹn okun ọre Zẹbulọn ra yin.

Avbe emwiokọ gha yakọ vbe eghute ẹre

otọe ẹre gha niẹn sẹ Saidọn,

Isaka ma maa sẹẹ ekẹtẹkẹtẹ

14Ẹkhuia nọ wegbe ọ re Isaka khin.

Sokpan ọ lovbiẹ lọlọọlọ ye ẹkpo emwi

ne ẹsin ẹnrẹn ya kun ihẹ.

15Ọ ghi miẹn vbe ehe ne ọ na kẹtin maa hẹ,

ke vbe ne otọe nii mose hẹ,

ọ keghi vbẹrre ne ọ mu ihẹ,

ọ na khian ọviẹn nọ miẹn ẹsọn.

16Enogie ọre Dan ra gha khin ne emwa rẹn

te irẹn ra vbe gha ye vbe ẹvbo nekpa vbe Izrẹl.

17E te Dan ra gha ye vbe ẹyẹn ne ọ rre ọkpẹn odẹ,

ẹyẹn ne ọ mwẹ obi vbe ọkpẹn ovbi odẹ,

ne ọ sa ẹsin vbe ighinghian owẹ,

nọhin ẹnrẹn ghi khian ne a fi la odieke fua.

18I diakhẹ ẹghẹ imiẹnfan ruẹn Osanobua.

19Otu izigan gha gu Gad gbinna,

sokpan rẹn gha dekun iran,

ọ ghi zẹ iran khu.

20Otọe Asia gha mọ ọmọ esiesi ladian,

ọ gha mọ emwiokọ ne ọ ke ye evbare ọba.

21Ẹrhuẹ ne ọ fe fua ọre Naftali khin,

ne ọ ye egbe gunnọ ọmwa ẹsẹse.

22Ekẹtẹkẹtẹ oha ọre Josẹf khin,

ekẹtẹkẹtẹ oha ne ọ rre ọkpẹn ẹzẹ,

ivbi e ekẹtẹkẹtẹ ni rre ọkpẹn oke.

23Avbe eghian rẹn lelẹe vbọ ọghe edan

iran ye uhanbọ kevbe ifẹnmwẹ iran khuẹe

24sokpan uhanbọ irẹn ma bẹghe,

a ya ekuabọ iran wegbe

vbekpa ẹtin ọghe Osanobua Noghodua ọghe Jekọb,

vbe obọ Osanobua nii, ọmwa ne ọ degue Izrẹl.

25Osanobua erhaa ọrọre ọmwa ne ọ yuẹ obọ,

Osanobua Noghodua, ọrọre ọmwa ne ọ fiangbuẹ.

Afiangbe ọghe amẹ ke odukhunmwu rre

kevbe ọghe avbe odin amẹ kevbe uwu otọ gha dee,

afiangbe ọghe ẹmila nibun kevbe emọ.

26A fiangbe ọghe ọka kevbe obobo

afiangbe ọghe avbe oke nẹdẹdẹ

emwi ose ọghe avbe oke etẹbitẹghori

te ehia gha mudia vbe uhunmwu e Josẹf

ye uharo ọmwa ne a zẹ ọre ughaẹn,

vbe ẹbu avbe etiọnrẹn nikpia.

27Oduma ne ọ gbe emwi ọre Bẹnjamin khin,

ota vbe owiẹ ọ re ọ ya gbe emwi re.”

28Enena ọrọre ẹwae iweva ni rre Izrẹl, ena ọ vbe re ẹmwẹ ne erha iran tama iran. Vbe ehe ne ọ na ya ẹmwẹ ne ọrhiẹnrhiẹn gbe ọ khian ẹdẹ hia ne iran.

Uwu Kevbe Uremwẹ Josẹf

29Ẹre Jekọb na yi iyi ne iran wẹẹ, “Te I ghi ra ya deba avbe emwa mwẹ ni wu nẹ nian, wa ghi ya re mwẹ ba avbe erha mwẹ vbe uvun okuta ne ọ rre ako oha Efrọn ne ọmwa Hiti. 30Vbe Makpẹla, ne olarre ovẹn Mamrẹ, vbe otọ Kenan. Ebraham ọre ọ gu Efrọn ne ọmwa Hiti de uvun okuta na kevbe otọe na ne a gha re emwa yọ. 31Evba nii i ọ re iran re Ebraham kevbe Sera ne amwẹ ọnrẹn yi, evba iran re Aizik kevbe Ribẹka ne amwẹ ọnrẹn yi, evba nii ọre I vbe re Lia yi. 32Emwa Hiti ọre a gu dẹ uvun okuta nii kevbe otọe nii.” 33E Jekọb ghi ru igiodẹ ma ivbi ẹre nẹ, ọ keghi ya iyeke ho otọ, ọ na zẹ ukpọn obọ.

Currently Selected:

Gẹnẹsis 49: EDO96

Highlight

Copy