Gẹnẹsis 42

Etẹn Josẹf Rrie Igipt Do Dẹ Ọka

1Ugbẹn vbe Jekọb ghi họn ighẹ ọka rre otọ Igipt, ọ keghi tama ivbi ẹre nikpia wẹẹ, “Vbe uwa na bu aroa hẹ mwa na yi? 2Ihọẹn ighẹ ọka rre Igipt; wa gha khian ne uwa ya dẹ rre vbọ ne ohanmwẹ ghẹ gbele ima an.” 3Ẹre igbe vbe avbe etẹn e Josẹf nikpia na gha rrie Igipt ya dẹ ọka. 4E Jekọb ma gie Bẹnjamin ne ovbiye Josẹf gha khian rhunmwuda ohan muẹn wẹ emwi gha sunu vbe egbe ẹre. 5Ivbi Izrẹl keghi deba emwa ọvbehe vbe gha de ne iran do dẹ ọka rhunmwuda ukhunmwu wa gha fi vbe otọ e Kenan. 6Zẹvbe enọkhaemwisẹ yan Igipt, e Josẹf ghi rre, iran keghi viọ ẹko rhu otọ vbe odaro ẹre. 7Ugbẹn vbe Josẹf ghi bẹghe etiọnrẹn, ọ keghi rẹn iran, sokpan ọ keghi ru vbe nọ ma rẹn iran. Ọ kegha ya ọkan gu iran guan, “Vbe uwa ke rre yi?” Iran tama rẹn wẹẹ, “Kenan ma kegha de do dẹ evbare.”

8E Josẹf rẹn etiọnrẹn sokpan iran ma ghi rẹn ọnrẹn. 9Ọ keghi ye imina ne irẹn minaẹn vbe ekpa iran rre, ọ na kha wẹẹ, “Ọrhẹ wa khin, te uwa do ghe ehe ne ọ gha rọkhọ ne uwa na dekun ẹvbo mwa.” 10Iran wanniẹn tama rẹn wẹẹ, “Ẹ i re erriọ, te ima rre zẹ vbe eguọmwadia ruẹ, ne ima do dẹ evbare. 11Etẹn ọkpa ma hia khin. Ma i re ọrhẹ, emwa ẹmwata ma khin.” 12E Josẹf ke tama iran wẹẹ, “Hiehiere! Te uwa do baba ima ghe ne uwa miẹn na rẹn ehe ne ọ gha rọkhọ ne uwa na dekun ẹvbo mwa.” 13Iran tama rẹn wẹẹ, “Etẹn iweva ma khin, okpia ọkpa ọ re ọ biẹlẹ ima vbe otọ Kenan. Ne ọ ghi ru ọvbokhan sẹ vbe ima hia gu erha ima vbe owa, ọtẹn mwa nọkpa wu nẹ.”

14E Josẹf keghi wanniẹn wẹẹ, “Erriọ I wa kha, ọrhẹ wa khin. 15Vbenian ọre ima gha ya danmwẹ uwa ghe: I ya eni Fero yan wẹ wa i ra kpao vbe emwa rre deghẹ ẹ i re te ọtẹn uwa nekherhe gha die edinran. 16Wa gie ọkpa vbe uwu uwa ya rhie ẹre rre. A gha viọ uwa ni dekẹe ne emwa viọ mwẹ rhinrin a tedo rẹn ẹmwata ne ọ rre ẹmwẹ ne uwa tae. A deghẹ ẹ i re erriọ, omwa vbene Fero na ye rrọ, ọrhẹ wa Khin.” 17Ọ ghi guan vberriọ nẹ, ọ keghi khui iran ye uwu ẹwẹdọ la ikpẹdẹ eha.

18Ọ ghi sẹ ikpẹdẹ ne ogieha e Josẹf keghi tama iran wẹẹ, “Osanobua ọ re I ga, wa gha miẹn uhunmwu a deghẹ wa ru vbenian. 19A deghẹ emwa esi wa gele khin, ọkpa kẹkan vbe uwu uwa gha mudia vbe uwu ẹwẹdọ vbe owa ne a viọ uwa yi, wa nekpa ghi gha rrie owa ne u wa viọ evbare ne uwa dẹlẹe gie ẹgbẹe uwa ne ohanmwẹ ghẹ gbe le iran an. 20Wa ghẹ mwẹ wa ma rhie ọtẹn uwa nekherhe gunmwẹ ne I miẹn ehe na rẹn wẹ, ẹmwata wa tae ne a ghẹ gbele uwa a.” Iran ke ya obọ yọ vberriọ. 21Iran keghi gu egbe iran guan wẹẹ, “Emwi ne ima ru ọtẹn mwa re i maa. Aro ima sọe vbene obọ dae sẹ hẹ vbe ẹghẹ ne ọ na gha rinmwian ima ne a lahọ vbe egbe irẹn, sokpan ma ma danmwehọ ẹre. Ọnii ọ re ọ si ọlọghọmwa na ye ima egbe.” 22Riubẹn keghi kha wẹẹ, “I tama uwa ne uwa ghẹ ye obọ kan ọmọ nii ru ẹre emwi rhọkpa, sokpan wa ma họn. Banbanna nian, uwu ne ọ wu ọ re ima rri oya yi na.” 23E Josẹf họn ẹmwẹ ne iran ta, sokpan iran ma rẹn irẹn. Rhunmwuda ọzedu ọ re ọ gha zedu ne iran. 24E Josẹf keghi kpao sẹ iran rae, ọ na ya viẹ; ugbẹn vbe ọ ghi vbe sẹtin gha guan nẹ, ọ keghi bu iran gha de ọ keghi mu Simiọn, ọ na sirra iran hia gbae.

Etẹn E Josẹf Dọlegbe Gha Rrie Kenan

25E Josẹf keghi wẹ ne a viọ ọka vuọn ẹkpo iran, ne a vbe dọlegbe rhie igho dọmwadẹ ọghọe ye ẹkpo dọmwadẹ ọghọe, kevbe ne iran vbe viọ evbare ne iran gha re vbe odẹ ne iran, a ke ru vberriọ. 26Etiọnrẹn nii keghi kun emwi ne iran dẹlẹe yan ekẹtẹkẹtẹ iran, iran na kpao. 27Iran ghi sẹ ehe ne iran vbiẹre, ọkpa vbe uwu iran keghi rhan ẹkpo ẹre ne ọ rhie evbare ne ekẹtẹkẹtẹ ọre, ọ keghi miẹn igho ẹre vbe uwu ẹkpo irẹn. 28Ọ keghi tama etiọnrẹn wẹẹ, “Iran kie igho mwẹ dọlegbe mẹ, ghe ẹre vbe uwu ẹkpo mwẹ!” Udu iran ke kpan fi ẹko. Ọna ghi ye ohan ghe ọna, ọna ghe ọna, iran na nọọn wẹẹ, “Wẹ miẹn emwi ne Osanobua ru ima ẹre na.” 29Iran ghi sẹ ehe ne Jekọb ne erha iran ye vbe Kenan, iran keghi na iyẹn emwi ne iran miẹn wẹẹ, 30“Nọkhaemwisẹ yan otọ Igipt wa ya izaro gu ima guan, ọ na ba ima ifi ẹzọ wẹ ọrhẹ ma khin ighẹ te ima do ba otọe ni ghe. 31Ma keghi tama rẹn wẹẹ, ‘Emwa ẹmwata ma khin ighẹ ẹ i re ọrhẹ; 32etẹn iweva ma te gha khin, erha ọkpa ọre ọ biẹlẹ ima. Ọkpa vbe uwu ima wu nẹ, nọ ọ ghi kanmwa sẹ gu erha ima vbe Kenan.’ 33Okpia nii keghi wanniẹn wẹẹ, ‘Vbene I gha ya rẹn ighẹ emwa ẹmwata ọre uwa gele khin ọre ọna khin, ọkpa vbe uwu uwa gha tota ke mwẹ, nekpa ghi viọ ọka gha rrie owa bu emwa uwa ne ẹ i mwẹ evbare. 34Wa ghi rhie ọtẹn uwa nekherhe bu mwẹ gha dee, ọnii ọ re I gha ya rẹn ighẹ wa ire ọrhẹ ighẹ emwa ẹmwata wa khin, I ghi rhie ọtẹn uwa ne uwa. Wa sẹtin gha do ẹki vbe ẹvbo na.’ ”

35Ugbẹn vbe iran ghi fannọ ẹkpo, ẹsiso igho edọmwadẹ ọghọe kegha rre uwu ẹkpo ẹre, ugbẹn vbe iran ghi miẹn avbe ẹsiso igho ni, ohan keghi mu iran kevbe erha iran.

36Erha iran keghi kha ma iran wẹẹ, “Te uwa ra ya mwẹ khian ne ẹ i ghi mwẹ emọ hiehiere. E Josẹf kpaa, Simiọn I ghi rrọọ, Bẹnjamin ọ re uwa ghi ho ne uwa vbe rhie, uhunmwu mwẹ ọre usẹ na ye!” 37E Riubẹn keghi tama erhae wẹẹ, “U ghi gbele ivbimwẹ nikpia e eva a, a deghẹ I ma rhie ẹre werriegbe rre ka ẹe ye obọ mwẹ, I gha dọlegbe rhie ẹre gue.” 38Sokpan e Jekọb wanniẹn wẹẹ, “Ovbi mwẹ i lele uwa rae, ọtiọnrẹn nokpia wu nẹ, rẹn ọkpa kẹkan ọre ọ ghi kẹe. Iran sẹtin gbe ẹe rua vbe odẹ, I khian ọmaẹn gbe nẹ ne ọ gha sẹtin ziengbe akhiẹ ne uwa gha si yọ mwẹ egbe, ọnii ọre I lele rrie.”

Currently Selected:

Gẹnẹsis 42: EDO96

Highlight

Copy