Gẹnẹsis 41

E Josẹf Rhan otọ Imina Ọghe Ọba

1Ukpo eva ghi gberra nẹ, ọba Igipt keghi mina wẹ, rẹn keghi mudia ye ọkpẹn Ẹzẹ Nail. 2Ẹmila ihinrọn ni tii kevbe ni mose keghi ke uwu ẹzẹ ladian do gha rri irunmwu vbe ọkpẹn ẹzẹ. 3Ẹmila ihinrọn ọvbehe keghi vbe ke uwu ẹzẹ nii ladian, iran wa khọrhiọn ehia ye kangunkangun. Iran keghi do mudia ke avbe ẹmila nekpa vbe ọkpẹn ẹzẹ nii. 4Avbe ẹmila ne kangunkangun nii keghi gbele avbe ẹmila ni tii nii re, ọ re ọba na rhiọrre. 5Ovbe kevbe dọlegbe rhie ẹre, ọ na vbe mina miẹn ọka ọkpa ne ọ mọ ọmọ ihinrọn, ehia wa kọnkọn, iran vbe wo. 6Ẹre ọka ihinrọn ọvbehe na vbe ladian, ehia ye hiahiahia, ẹhoho ato keghi wa bọnmwẹ iran an. 7Avbe ọka ne hiahiahia nii keghi minọ avbe ọka dẹudẹu nii re. Ọba keghi rhiọrre, ọna miẹn wẹ te irẹn mina. 8Owiẹ ghi rre, ekhọe ẹre hia keghi rhia, ẹre ọ na gie ne a tie avbe ọbo edunna kevbe umẹwaẹn ni rre Igipt hia. Ọ keghi ta imina rẹn ma iran, sokpan a ma miẹn ne ọ sẹtin rhan otọ ẹre na ẹn.

9Ẹghẹ nii, nọ siẹnro ayọn keghi tama ọba wẹẹ, “I gha wa ye unu mwẹ miẹnkue ẹre ighẹ emwi dan ọre I ru. 10Ohu eguọmwadia ruẹ muẹn ẹghẹ nii, ọ re u na hẹ ọkaolotu iran ni le ebrẹd kevbe imẹ ku ẹwẹdọ vbe owa ọkaolotu iran ni khẹ odẹ. 11Asọn ọkpa ghi rre, ma keghi mina, dọmwadẹ ọghọe keghi mina imina ne ọ mwẹ evba yae kha. 12Igbama, ovbi e Hibru ọkpa keghi gu ima rre evba, ọviẹn ọkaolotu iran ni khẹ odẹ nọ. Ma keghi ta imina ima ma rẹn. Ọ na rhan otọ ẹnrẹn ma ima, ọ tama dọmwadẹ ọghọe emwi ne a ya imina rẹn kha. 13Vbene ọ wa kha zẹẹ, ọ re emwi hia wa de. A rhie imẹ dọlegbe ye ukpo mwẹ, a keghi si ne ọ le ebrẹd rrọọ.”

14Ọba keghi gie ne a tie Josẹf, iran keghi zẹgiẹ rhie ẹre ke uwu ẹwẹdọ ladian. Ugbẹn vbe ọ ghi zẹ ẹtu nẹ, ọ na fi ukpọn werriẹ ọ na bu ọba gha dee.

15Ọba keghi tama e Josẹf wẹẹ, “I minaẹn, I ma miẹn ọmwa ne ọ sẹtin rhan otọ ẹre ma mwẹ. A khama mwẹ wẹ u gha họn vbene a mina hẹ, u sẹtin rhan otọ ẹre.” 16E Josẹf keghi wanniẹn wẹẹ, “Ẹ i re imẹ Umogun, Osanobua gha rhie ewanniẹn esi ne ọba.” 17Ọba keghi kha wẹẹ, “I ghi rre imina, I keghi mudia ye ọkpẹn ẹzẹ Nail. 18Ẹmila ihinrọn ni tii kevbe ni mose keghi ke uwu ẹzẹ ladian iran na gha rri irunmwu ni rre ọkpẹn ẹzẹ. 19Ẹre ẹmila ihinrọn ọvbehe, iran ye zaghazagha, iran wa khọrhiọn, ehia ye kangunkangun. Iran keghi wa re ẹmila ne ọ rhia sẹ ne I he miẹn vbe otọ Igipt hia. 20Ẹmila ne kangunkangun nii keghi gbele avbe ẹmila ni tii nii re, 21sokpan egbe ne iran ya rhie iran re, orhiọn ọkpa ne ọ gha rẹn i rrọọ rhunmwuda vbene iran ka kulo yi ọ re iran ye ye. Ọ re I na rhiọrre. 22I kevbe mina ba ẹre wẹ I miẹn ọka ne dẹudẹu ni vbe wo vbe erhan ọka ọkpa. 23Osuọka ọka ihinrọn ọvbehe kevbe yuo ladian, iran ye hiahiahia, ẹhoho ato ke bọnmwọn ruan. 24Avbe osuọka ne hiahiahia nii keghi minọ avbe ne dẹudẹu re. I ta imina na ma avbe ọbo edunna, sokpan, a ma miẹn ne ọ sẹtin rhan otọ ẹnrẹn ma mwẹ.”

25E Josẹf keghi tama ọba wẹẹ, “Emwiọkpa ọre a ya imina eveva na kha. Te Osanobua tama ruẹn emwi ne irẹn khian ru. 26Ẹmila ni tii ihinrọn nii, ukpo ihinrọn ọ re nọ kevbe osuọka ọka ne dẹudẹu ihinrọn nii, ukpo ihinrọn, ọre vbe nọ, emwi ọkpa ọre a ye iran kha. 27Ẹmila ne kangunkangun ihinrọn, ni do ladian vbe okiekie kevbe osuọka ọka ne hiahiahia ihinrọn, ne ẹhoho ato bọnmwuan, kegha re ukpo ihinrọn ọghe ukhunmwu. 28Vbene I ka tama ruẹn nọ. Te Osanobua tama ruẹn emwi ne irẹn khian ru. 29Ukpo ihinrọn ne emwi na kpọ kua gha rrọọ vbe Igipt, 30vbe iyeke ọnii, ukpo ihinrọn ọghe ukhunmwu ghi do rre, ẹghẹ nii, avbe ukpo esiesi nii ghi khian ne a mianmiaẹn vbe Igipt. Ukhunmwu nii gha mu otọ na hia rhia. 31A ghi wa mianmian ẹghẹ ne emwi na te kpọ fẹẹrẹ, rhunmwuda ukhunmwu ne ọ ra fi gha mu ohan gbe. 32Ne a na miẹn wẹ igbaeva ọre u minaẹn, ọba, rhiema wẹ Osanobua mwamwa ẹn nẹ kevbe wẹ, ọ gha giẹe sunu vbe ọ ma he kpẹe wan.

33“Banbanna na nian, gualọ ọmwa ne ẹdẹgbe vbe ẹko kevbe ne ọ mwẹ ẹwaẹn ne u mu ẹmwẹ Igipt ye ọre obọ. 34U ghi vbe zẹlẹ ewọe lele otọe ẹvbo na hia ne u ghae emwiokọ ne a gha miẹn vbe ẹghẹ ne emwi gha na kpọ ye ihe isẹn, u ghi viọ obọkpa vbọ. 35Tama iran ne iran gha viọ avbe evbare hia la ukpo ni maa nii rre, iran ghi gha winna vbe asẹ ruẹ ne iran si ọka gbo hinrre zẹ vbe evbare vbe ẹvbo hia, ne emwa vbe gha bodẹ gbearoghe ẹre. 36Evbare nii ghi gha re evbare ne a ya gbakhua hinrre, ne a ya koko otọe ẹvbo na vbe ukpo ihinrọn ne ukhunmwu ra fi la vbe otọ Igipt. A gha ruẹe vberriọ ohanmwẹ i ra gbe emwa.”

A Ya e Josẹf Ru Ne Ọkhaemwisẹ Vbe Igipt

37Ọba kevbe ewọe ẹre keghi rhie iro ne a zẹe na. 38Ọ keghi khama iran wẹẹ, “De ehe ne a gha na miẹn ọmwa ọvbehe nẹ ọ maa sẹẹ Josẹf ne ọ mwẹ orhiọn Osanobua.” 39Ẹre ọba na khama Josẹf wẹẹ, “Vbene Osanobua ghi na rhie emwi na ma ruẹn nẹ, ọmwa ọvbehe ne ẹdẹgbe vbe ẹko ra ne ọ wan sẹẹ ruẹ, ẹ i ghi rrọọ. 40I gha mu ẹmwẹ ẹvbo mwẹ yuẹ obọ, emwa mwẹ ghi gha ru vbene u khare. Wẹ ọ re ọ ghi ra gha zẹ lele mwẹ.” 41Ọba ke khama e Josẹf wẹẹ, “Banbanna na nian, I ya a ru ne ọ khaemwisẹ yan Igipt.” 42Ọba keghi yuo oroka asẹ ne ọ ya ye ẹmwẹ okhi, hin ikpinhianbọ ẹre rre, ọ keghi rhie ẹre ye ikpinhianbọ ọghe Josẹf, ọ keghi ye ukpọn etianran yiẹe, ọ keghi mu emwi urhu ọghe igoru ye ọre urhu. 43Ọ ke wẹ ne ọ hin ikẹkẹ okhuae nogieva ọghe ọba, iran ni wan ẹvbo hin odẹ rre ke odaro nẹẹn gha go wẹẹ, “Wa wan ruan.” Erriọ ọre a ya ye Josẹf ru enọkhaemwisẹ yan Igipt. 44Ọba keghi khama rẹn wẹẹ, “Mẹ ọrọre ọba, vbe ẹ i re te uwẹ kue yọ, orhiọnkpa i rre otọ Igipt ne ohan gha giẹe nẹ obọ ra owẹ.” 45Ọ keghi he Josẹf eni gha tiẹre Zafenat-Pania. Ọ keghi rhie okhuo ne a tiẹre Asẹnat nẹẹn, ovbi e Pọtifera ne ohẹn ẹvbo ne a tiẹre Helio-polis. 46Ukpo ọgban ọre Josẹf gha ye vbe ọ suẹn gha winna ne ọba Igipt. Ọ keghi kpao ya khian la otọe nii gaa. 47Vbe ukpo ihinrọn ne emwi ya kpọ nii, otọe keghi ma emwiokọ ẹsẹsẹmwẹse. 48E Josẹf keghi viọ evbare hia vbe ukpo ihinrọn nii ne emwi na kpọ vbe otọ Igipt, ọ keghi siẹe gboo ye ọ re ẹvbo. Ọ ke ghi si evbare ni rre iwewe ni lẹga dọmwadẹ okpẹvbo nii rre. 49Ọka ne ọ viọ hin rre ke bun sẹrriọ wẹẹ ọ keghi yevbe ikpekhae ni rre okun. Ọka bun sẹrriọ ne ọ na ma ghi zẹdẹ gha mwa rẹn rhunmwuda a i sẹtin mwa rẹn.

50Ukpo ne ukhunmwu na fi ghi te do suẹn, Asẹnat keghi biẹlẹ emọ ikpia eva ne Josẹf. 51E Josẹf keghi kha wẹẹ, “Osanobua gunmwe mianmian oya ne I re hia kevbe ẹgbẹe erha mwẹ.” Ọ na he ovbi ẹre nọdiọn Manasẹ. 52Ọ keghi vbe kha wẹẹ, “Osanobua viọ emọ gunmwẹ vbe ẹvbo ne I na miẹn ọlọghọmwa.” Ọ keghi he ovbi ẹre ne ukpogieva Ifreim.

53Ukpo ihinrọn ne emwa Igipt na gha zọmọ vbe ọwọrhọwọrhọ keghi do gberra. 54Ukpo ihinrọn ọghe ukhunmwu keghi suẹn vbene Josẹf wa tae zẹẹ. Ukhunmwu kegha fi vbe ẹvbo nekpa hia, sokpan evbare kegha rre Igipt la ehe ne ọ sẹe ehe ne ọ rhanmwẹ. 55Ugbẹn vbe ohanmwẹ ghi suẹn gha gbe ivbi Igipt hia, emwa nii hia keghi tu bu ọba ne ọ rhie evbare ne iran. Ọ ke tama emwa Igipt wẹẹ, “Wa bu e Josẹf gha khian ne u wa vbe ru vbe ne ọ ghi kha.” 56Ugbẹn vbe ukhunmwu ghi gba ẹvbo nii hia nẹ, e Josẹf keghi kie avbe aza ọka hia, ọ na gha khiẹn ọka ne ivbi Igipt dẹ rhunmwuda te obọ ukhunmwu ghi dotọ vbe Igipt. 57Emwa kegha ke otọ agbọn hia rrie Igipt ne iran do gha gu e Josẹf dẹ ọka, rhunmwuda obọ ukhunmwu nii keghi wa vbe dotọ vbe otọ agbọn hia.

Currently Selected:

Gẹnẹsis 41: EDO96

Highlight

Copy