Gẹnẹsis 17

Arhuẹ, Ama Ne A Ya Yi Ile Okhi

1Ugbẹn vbe Ebram ghi rre ukpo ọkpairrọvbiyisẹn, e Nọyaẹnmwa keghi rhie egbe ma rẹn, Ọ wẹẹ, “Mẹ ọrọre Osanobua Noghodua. U ghi gha họn ẹmwẹ mwẹ vbe ẹghẹ hia ne u gha ya vbe agbọn, ne u vbe gha ru emwi ne ọ gbae vbe ẹghẹ hia, 2I gha guẹ ta ile, I ghi vbe viọ emọ ivbi uniẹn ruẹn nibun nuẹn.” 3Ebram keghi diguẹ mu aro rhu otọ, ẹre Osanobua na kha wẹẹ, 4“Ile ne I ra gue ta ọna khin: I yan rẹn wẹẹ, erha odede ọghe okpẹvbo nibun ọre uwẹ khian gha khin. 5A i ghi ra gha tie ruẹ Ebram ọvbehe sokpan Ebraham. Ọna ọre ọ ghi re eni ruẹn rhunmwuda, I ra ya a ru erha odede ọghe okpẹvbo nibun. 6I gha viọ uniẹn nibun nuẹn, eso vbe uwe iran ghi gha re ọba, u gha mwẹ uniẹn nibun sẹrriọ wẹ iran gha khian okpẹvbo nibun.

7“I gha mu eyan mwẹ sẹ ne uwẹ kevbe avbe ivbi uniẹn ruẹn vbe orre ne ọ dee zẹ vbe ile itẹbitẹ. Mẹ gha re Osanobua ruẹ kevbe Osanobua ọghe uniẹn ruẹn. 8I gha mu otọe ne uwẹ ye na zẹ vbe orhunmwuyẹn ne uwẹ vbe uniẹn ruẹn. Otọe Kenan hia ghi gha re ọwuẹ ẹdẹdẹmwẹdẹ, mẹ ghi vbe gha re Osanobua iran.”

9Osanobua tama Ebraham wẹẹ, “Wẹ tobọ ruẹ ghi vbe kue yọ ne u rhie ile ne u gun mwẹ ta mwẹ, wẹ kevbe uniẹn ruẹn vbe orre ne ọ dee. 10Emwi ne uwẹ kevbe uniẹn ruẹn gha rhie obọ yi ne uwa ru ọre ọna khin: ọmọ okpiaikọmọ okpia vbe uwe uwa, te a gha rhuẹ ọre. 11-12Ke ẹghẹ na kpao, te u gha rhuẹ emọ ikpia ruẹ hia vbe ọ gha sẹ ọmọ ikpẹdẹ erẹnrẹn nẹ, kevbe eviẹn ne a biẹe vbe owa kevbe ne a dẹlẹ ke ore rre, vbe obọ avbe orhunmwuyẹn. Ọna ọre ọ gha rhie ma wẹẹ, mẹ vbe uwa gba ta ile. 13Te a gha rhuẹ dọmwadẹ ọghọe, ọna ghi gha re ama vbe egbe uwa ne ọ rhie ma ile ne I gu uwa ta, ọghe ẹdẹdẹmwẹdẹ nọ. 14Okpia ne a ma he rhuẹ, a ghi wannọẹn hin uwe ẹbu emwa rẹn rre rhunmwuda ọ ma họn ẹmwẹ mwẹ.”

15Osanobua keghi tama Ebraham wẹẹ, “Ghẹ ghi tie amwọn Serai ọvbehe, Sera ọre a ghi tie ẹre. 16I gha fiangbẹe, I gha giẹe biẹ ọmọ okpia nuẹn. I gha fiangbẹe, rẹn gha khian iye okpẹvbo nibun. A gha vbe miẹn avbe ọba vbe uniẹn ọnrẹn.”

17Ebraham keghi diguẹ mu aro rhuotọ, sokpan ogiẹ keghi fẹe vbe ọ ghi ro ẹre wẹẹ, “Ọmwa gha ye sẹtin biẹ vbe ọ sẹ ukpo iyisẹn nẹ? E Sera gha ye sẹtin biẹ vbe ọ sẹ ukpo ekigbesiyisẹn nẹ?” 18Ọ keghi nọ Osanobua wẹẹ, “I wẹ ne u gie Ismẹl gha re ne ọ gha rri ukhu mwẹ.” 19Sokpan Osanobua tama rẹn wẹẹ, “U baeku, Sera ne amwẹ ọn gha biẹ ọmọ okpia nuẹn, wẹ ghi he ẹre Aizik. I gha ye ile ne I tae rre vbe ẹghẹ ọre kevbe ọghe uniẹn ọnrẹn, ile etẹbitẹ nọ. 20-21U tama mwẹ nẹ wẹ ne I gbe ebe gue Ismẹl. Emwi ne I ra ru ọre ọna khin. I gha fiangbẹe, I gha viọ emọ kevbe uniẹn nibun nẹẹn. Rẹn gha khian erha ivbiọba iweva, I ghi vbe ye uniẹn ọnrẹn ru okpẹvbo ne ọ kpọlọ. I gha ya ile ne I tae rre vbe egbe Aizik ne ovbuẹ ne Sera ra biẹ vbe omwa ẹghẹ na vbe ukpo ne ọ dee.”

22Osanobua ghi gu Ebraham guan nẹ, Ọ na sọrae.

23Ẹdẹ nẹdẹrriọ zẹẹ, Ebraham keghi rhuẹ Ismẹl ne ovbi ẹre kevbe eviẹn ọnrẹn hia, kevbe ne a biẹlẹe vbe owa kevbe ne ọ ya igho dẹlẹ, emọ ikpia hia ni rre owa ẹre zẹ vbene Osanobua tama rẹn. 24Ukpo ọkpa irrọvbiyisẹn ọre Ebraham gha ye vbe ọ rhuẹre. 25Ismẹl ne ovbi ẹre keghi rre ukpo iwera. 26Ẹdẹ ikẹtin ọre a rhuẹ iran eveva. 27Ke avbe eviẹn Ebraham hia.

Currently Selected:

Gẹnẹsis 17: EDO96

Highlight

Copy