Gẹnẹsis 16
16
Hega Ke Ismẹl
1E Serai ne amwẹ Ebram ma biẹ nẹẹn. Sokpan rẹn kegha mwẹ ovbi Igipt nokhuo ọkpa ne a tiẹre Hega vbe ọviẹn, 2Serai keghi tama Ebram wẹẹ, “Ghe nian, Nọyaẹnmwa ma rhie ọmọ mẹ biẹ. Vbọzẹ ne u ma na tie ọviẹn mwẹ ovbe yi? U ghaghe ọ ghi biẹ mẹ.” 3Ẹre Serai ghi na rhie Hega ne ọviẹn ọnrẹn ne ovbi Igipt ne Ebram rhie rọnmwẹ (Emwi na sunu iyeke vbe Ebram gbe ukpo igbe nẹ, vbe Kenan). 4Ugbẹn vbe Ebram ghi tie Hega ovbe nẹ, ọ kegha hanmwa. Ugbẹn vbe irẹn ghi miẹn wẹ rẹn hanmwa, ọ keghi suẹn gha hio, ọ na gha zan Serai. 5Serai keghi tama Ebram wẹẹ, “Wẹ ọ siẹe ne Hega na zan mwẹ na. Mẹ ọre ọ tobọ mwẹ rhie ọviẹn mwẹ nuẹn, ke ne ọ ghi ya miẹn we rẹn hanmwa gha dee, te ọ ghi zan mwẹ. E Nọyaẹnmwa ọre ọ ghi bu ase ne nọ rri ase vbe uwe ima!” 6Ebram keghi wanniẹn wẹẹ, “Ọ wa maa nian, ọviọn ye nọ na, ototọ asẹ ruẹ ọre ọ ye, emwi ne ọ ghi khọn ruẹn yae ru.” Serai keghi rhunmwuda ọnii gha ru ẹe khọ, ọre Hega na lẹ kpao. 7Odibosa e Nọyaẹnmwa keghi miẹn Hega vbe ọkpẹn ẹzẹ ne ọ rre ato vbe odẹ ne a la sẹ Siọ. 8Ọ na kha wẹẹ, “Hega ne ọviẹn Serai, vbua rrie vbua ke dee?” Ọ keghi kha wẹẹ, “Te I lẹ kpa sẹ arowa mwẹ nokhuo rae.”
9Rẹn keghi kha wẹẹ, “Dọlegbe bu ẹre gha khian ne u ya gha re ọviẹn ọnrẹn.” 10Ọre ọ na kha wẹẹ, “I gha viọ uniẹn nibun sẹrriọ nuẹn wẹẹ, a i sẹtin ka iran. 11Ọmọ okpia u ra biẹ na, u gha he ẹnrẹn Ismẹl rhunmwuda Nọyaẹnmwa họn eve ọlọghọmwa ruẹn. 12Sokpan te ovbuẹ ra gha ru vbe ẹsin noha ọ ghi gha gu emwa hia khọn. Emwa hia ghi vbe gha gu irẹn khọn, rẹn i ra di ẹbu etiọnrẹn ya.”
13E Hega keghi nọ egbe ẹre ọta wẹẹ, “Te imẹ gele bẹghe Nọyaẹnmwa I na ye gha rre agbọn ne I ya na iyẹn ra?” Ẹre ọ na ghi tie eni Nọyaẹnmwa ne ọ gu ẹe guan vbenian, “Osanobua ne ọ bẹghe.”
14Ọnii ọ siẹe ne iran na tie uhae ne ọ rre ẹkpo Kadẹs vbe Bẹrẹd, “Uhae-ọmwa-nọrrọọ ne ọ bẹghe mwẹ?”
15Hega keghi biẹ ọmọ okpia ne Ebram, rẹn keghi he ẹre Ismẹl. 16Ukpo ehan yan iyenẹ ọre Ebram gha ye, vbe ẹghẹ na.
Currently Selected:
Gẹnẹsis 16: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
