Gẹnẹsis 15

Ile Ne Osanobua Gu Ebram Ta

1Vbe iyeke ọnọna, Ebram keghi miẹn umian, ọ na họn vbe Nọyaẹnmwa guẹe guan wẹẹ, “Ghẹ mu ohan Ebram, Mẹ ọ re asa ne ọ gha degue ruẹ I gha ruẹ ẹse nọkpọlọ ẹsẹse.” 2Sokpan Ebram keghi kha wẹẹ, “Nọyaẹnmwa ne Udazi, I i mwẹ emọ, de esa ne ẹse ne u ra ru mẹ khin? Ọmwa ne I mwẹ ne ọ gha rri ukhu, ọrọre Eliezẹ ne ovbi e Damaskọs. 3U ma viọ emọ mẹ, ọkpa vbe uwu avbe eviẹn mwẹ ọre ọ ra rri ukhu mwẹ!” 4Ọ keghi vbe họn vbe Nọyaẹnmwa vbe dọlegbe guẹe guan wẹẹ: “Ọviẹn na i ra rri ukhu ruẹ ighẹ Eliezẹ, ovbuẹ nokpia vbe ẹko ọre ọ ra rri ukhu ruẹ.” 5Nọyaẹnmwa keghi rhie ẹre ladian ore, ọ wẹẹ, “Tọn aro mu ghe iso ne u ka inu orhọnmwẹ ni rrọọ; a deghẹ u gha sẹtin, uniẹn ruẹn gha bun vberriọ zẹẹ.” 6Ebram keghi ya ẹko e Nọyaẹnmwa rhiẹnrhiẹn ghe ẹre, rhunmwuda ọnii, e Nọyaẹnmwa keghi rhan obọ miẹn ẹnrẹn. 7Ẹre Nọyaẹnmwa na tama rẹn wẹẹ, “Mẹ ọrọre Nọyaẹnmwa ne ọ we ne u kpao vbe Babilonia rre, ne a miẹn ehe na mu otọe na nuẹn zẹ vbe ọwuẹ.” 8Sokpan Ebram wanniẹn wẹẹ, “Nọyaẹnmwẹ ne Udazi, vbia gha ya rẹn hẹ wẹ ọghomwẹ nọ?” 9Rẹn keghi wanniẹn wẹẹ, “Mu ovbi ẹmila ne sọguọsọguọ ọghe ikpira gunmwẹ, ẹwe ikpira, ogho ikpiara, idu kevbe elikhukhu.” 10Ebram keghi viọ avbe aranmwẹ na hia gie Osanobua, ọ keghi giagia iran ye ihe eveva, ọ keghi viọ avbe ukhiọnmwẹ nii aro da egbe vbe uniẹn eva; sokpan ọ ma giagia avbe ahianmwẹ. 11Avbe ugu kegha gho rri ehe ne avbe aranmwẹ na ye sokpan rẹn kegha ya iran kua.

12Ugbẹn vbe owẹn ghi ra defua, ovbe nọkhua keghi rhie Ebram, ohan nọkhua na gha muẹn. 13Nọyaẹnmwa keghi tama rẹn wẹẹ, “Uniẹn ruẹn gha khian ọrriọvbe vbe ẹvbo ẹrrẹ, iran gha khian eviẹn vbe evba, a ghi vbe ye ukpo uri eva sẹ iran usẹ. 14Sokpan mẹ gha rri ẹvbo ne ọ ru iran emwi na oya, iran ghi miẹn iran emwi ẹfe ne ọ kpọlọ vbe iran a khian kpao vbe ọfumwegbe. 15A gha re rue vbe u gha ghi tọ sẹ nẹ ẹsẹse. 16Ọ gha sẹ orre enẹ, uniẹn ruẹn ke dọlegbe gha die emwa; rhunmwuda mẹ I ra khulo emwa Amọri ladian, a te do miẹn wẹẹ, iran ru emwi dan ne ọ na kei ne a rri iran oya.”

17Ovẹn ghi dero nẹ vbe ebiebi ghi so, vbe udomwurri, akhe erhẹn ne ọ gbe ighogho kevbe ukpekhọe ne ọ baa keghi rre do la adesẹneva avbe aranmwẹ nii gberra. 18Ẹdẹ nẹdẹrriọ, Nọyaẹnmwa keghi gu Ebram ta ile wẹẹ, “I yanrẹn ighẹ I gha mu otọ na hia ne uniẹn ruẹn, ke ẹzẹ ne ọ rre ehe ne Igipt lae ya sẹ Yufretes ne okpẹzẹ. 19Deba otọe avbe Ken, Keniz, Kadomi, 20emwa Hiti, Pẹriz, Refeim, 21emwa Amọri, Kenan, Gigasi kevbe Jebus.”

Currently Selected:

Gẹnẹsis 15: EDO96

Highlight

Copy