Ẹksọdọs 39

Ukpọn Ne A Se Ne Avbe Ohẹn

(Ẹksọdọs 28:1-14)

1Eto ohuan ne raghoragho kevbe ne ọ vboro rhan-an, kevbe ne ọ baa ọre a ya sele ẹwu ne mose mose ne avbe ohẹn lo vbe iran a gha ru emwi vbe uwu ehe ne ọ huanrẹn. Iran keghi se ẹwu iwinna ohẹn ne Errọn zẹ vbene Nọyaẹnmwa tama e Mosis. 2Ọ keghi ya ru ẹwu adaghọ iruemwi ne a ya igoru ru, kevbe eto ohuan ne raghoragho, ne ọ vboro rhan-an kevbe eto ovbiohuẹ ne amẹ. 3Iran keghi ya umọmọ dunmwu igoru ne ọ do vbẹ gbodoo, iran keghi do biẹnnọ ẹn wẹnrẹn wẹnrẹn, ne a ya ẹe do eto ohuan ne raghoragho, ne ọ vboro rhan-an, kevbe ne ọ baa giangiangian, kevbe eto ovbiohuẹ ne vbukhẹẹ.

4Iran keghi vbe ru ọza izabọ lele ẹwu adaghọ nii, iran keghi sele ẹe ginna ẹn vbe obọ eveva vbe ne ọ gha na gie a gha rri kugbe. 5Ugbẹkun ne a do mose mose nii ke wa vbe deba nene ẹwu adaghọ na, obọ ona ọkpa nii ọre a vbe ya ruẹe ne a na ye igoru, eto ohuan ne raghoragho, ne ọ vboro rhan-an kevbe ne ọ baa ruẹe, kevbe eto ovbiohuẹ ne vbukhẹẹ ne a mẹ, zẹ vbene Nọyaẹnmwa tama e Mosis ne ọ ru ẹe. 6Iran keghi ru ikpẹrọnmwọ kanelian, iran na yọyọ ẹe yọ uhanhan igoru, iran keghi sa eni ivbi e Jekọb ama lele ẹe vbe ne a na mu umọmọ gbe emwi ya ye ama yọ. 7Ọ na solo ẹe ginna ọza izabọ ọghe ẹwu adaghọ nii zẹ vbe ikpẹrọnmwọ ne ọ gha ye ọmwa eni ivbi Izrẹl rre zẹ vbe ne Nọyaẹnmwa tama e Mosis ne ọ ru.

Vbene A Ru Uhanhan Ẹwẹe Ukpọn Hẹ

(Ẹksọdọs 28:15-30)

8Iran keghi vbe ru uhanhan ẹwẹe zẹ vbene a vbe ru adaghọ, erriọ ọre a vbe do emwi lele ẹe. 9Iran keghi ru ẹe ne ọ gha re umwọmwẹ vbe igie enenẹ, iran keghi bun ẹnrẹn yan egbe, ọ kegha re akhuẹn obọ ihinrin vbe uvbẹmwẹ kevbe akhuẹn obọ ihinrin vbe utanmwẹ.

10Iran keghi mama uviẹn enẹ ọghe ikpẹrọnmwọ lele ẹe. Uviẹn nokaro, erubi, etopas kevbe ganẹt, 11vbe uviẹn ne ogieva, ẹmrald, e safaia kevbe daiamọn. 12Vbe uviẹn ne ogieha e tukuọis, ageti kevbe ametist. 13Ke uviẹn ne ogienẹ, e bẹril, e kanelian kevbe e jaspa. Igoru ọre a mama ehia ya. 14Ikpẹrọnmwọ iweva ọre ọ gha rrọọ ne a gbẹnnẹ eni ivbi Jekọb iweva ya. Ne iran mudia ye ihe ẹwae iweva ọghe Izrẹl. 15Iran keghi vbe ru eghan ọghe igoru ne a ba re zẹ vbe irri, ọ nii ọ ghe uhanhan ẹwẹe.

16Iran keghi ru akhuẹn eva igoru, a na vbe ru oroka igoru eva, iran keghi sele oroka eva na lele odukhunmwu ọghe uhanhan ẹwẹe nii. 17Iran keghi de eghan eva nii mu avbe oroka eveva nii, 18iran keghi vbe de obọ nọkpa ginna akhuẹn igoru eva nii, erriọ ọre iran ya sẹ ẹe ginna odaro ọza izabọ ọghe ẹwu adaghọ nii.

19Iran keghi ru oroka igoru eva, iran na sele ẹe ginna ototọ ehọ uhanhan ẹwẹe ukpọn nii vbe uwu ẹre, ehe ne ọ na dekan ẹwu nii. 20Iran keghi vbe ru oroka igoru eva ọvbehe, iran keghi vbe sele ẹe ye odaro ọza izabọ ọghe ẹwu nii vbe ọkpẹn ehe ne a na dọlọ ẹe vbe odukhunmwu ugbẹkun ne mose ne a do ne ọ rre ẹwu nii. 21Iran keghi ya irri ne raghoragho dele oroka ni rre uhanhan ẹwẹe nii ginna oroka ni rre ẹwu nii, vbe ne uhanhan ẹwẹe ukpọn gha na mudia vbe odukhunmwu ugbẹkun vbene ẹ i ghi na kuọghọ kua, zẹ vbene Nọyaẹnmwa tama e Mosis.

Urumwe Avbe Ẹwu Ohẹn Ni Dekẹe

(Ẹksọdọs 28:31-43)

22Ọ keghi ya eto ohuan ne raghoragho do ẹwu ne ọ de yan ọghe ọkotọ ne ọ rrọọ. 23Uvun ne ọ gha rre adesẹneva ẹwu keghi yevbe uvun ne ọ rre ẹwu ohian. Ehọ uvun nii keghi re ne a ya emwi ne a mẹ baa lẹga ne ọ ghẹ miẹn ehe na sẹ e. 24-26Vbe ehọ ẹre ne ọ ke otọ, iran keghi ru emwi ne ọ yevbe ọmọ erhan ne a ye eto ohuan raghoragho kevbe ne ọ vboro rhan-an kevbe ne ọ baa kevbe eto ovbiohuẹ ne vbukhẹẹ mẹ. Iran keghi ya igoru ne a ma gua dunmwu ẹroro sele ye ẹkpo zẹ vbene Nọyaẹnmwa tama e Mosis.

27Iran keghi sele ẹwu ne Errọn kevbe ivbi ẹre. 28Ukugba uhunmwu, ẹrhu, utalawẹ eto ovbiohuẹ. 29Ebuluku ne a ya eto ovbiohuẹ ne vbukhẹẹ ne a mẹ ru, eto ovbiohuẹ ne raghoragho, ne ọ vboro rhan-an kevbe ne ọ baa ne a do emwi ya mu ona lele zẹ vbene Nọyaẹnmwa tama e Mosis.

30Iran keghi ya igoru ne a ma gua ru emwi ne a ya te owa, ama ne ọ huanrẹn ọ ghe a ya fiohan, iran keghi gbẹn yan rẹn zẹ vbene a gbẹn yan ama ase wẹẹ, “A ya ẹe fi ohan ne Nọyaẹnmwa.” 31Iran keghi ya okun ne raghoragho de ẹre ye odukhunmwu ukugba uhunmwu, zẹ vbene Nọyaẹnmwa tama e Mosis.

A Winna Nene Iwinna Fo

(Ẹksọdọs 35:10-19)

32A keghi winna iwinna hia ni rre Owa Ukpọn e Nọyaẹnmwa fo. Ivbi Izrẹl keghi wa winna ehia zẹ vbene Nọyaẹnmwa tama e Mosis. 33Iran keghi mu nene Owa Ukpọn kevbe avbe emwi ne a ya ru emwi hia nii rrọọ, bu e Mosis gha dee, avbe aban, edọnmwẹ ogba ugbugbe, ọkpọ, kevbe ẹzi nii rrọọ. 34Ohian ọghe na a ye ẹmu ne ọ baa gbe, ne a mu rhu ẹe, ohian ẹmila ne vbukhẹẹ ne a mu rhu ẹe, kevbe avbe ukpọn onurho ne a mu gu odẹ. 35Ẹkpẹti ne a viọ avbe uhanhan ayere yi, ọkpọ ẹre kevbe ugue ẹre. 36Eteburu kevbe avbe emwi ne a ya ru emwi vbọ hia, ebrẹd ne a ya yo imuohan gie Osanobua. 37Erhan ọmukpa ọghe igoru ne a ma gua, ukpa ni rrọọ, avbe ukpa ne a gha tẹn ye uviẹn, kevbe avbe emwi ne a ya ru emwi vbọ hia, ofigbọn ne a sa ye ukpa. 38Aka ọghe igoru, ofigbọn ne a nọnọ yan emwa uhunmwu, eturari ne ọ winhin ẹsẹse, ukpọn onurho ne ọ rre onurho Owa Ukpọn. 39Aka ọghe oze kevbe ọkiakia ọghe oze, avbe ọkpọ ni rrọọ, kevbe avbe emwi ne a ya ru emwi vbọ, uwawa akhuẹ ke emwi ne a muẹn yan. 40Ukpọn onurho ni rre ogba ọlẹga ẹre, ọkpọ ni rrọọ, ẹzi ẹre. Ukpọn onurho ni rre onurho ẹre, okun ẹnrẹn, ukeke Owa Ukpọn, kevbe emwi ne a ya ru emwi vbe uwu ugamwẹ vbe Owa Ukpọn nii. 41Avbe ukpọn ughughan ne avbe ohẹn ya ru ugamwẹ vbe uwu ehe ne ọ huanrẹn. Ukpọn ne ogihinrọn ọghe Errọn ne ohẹn, kevbe ẹwu ne ivbi ẹre yọ vbe iran a gha ru ugamwẹ zẹ vbe ohẹn. 42Ivbi Izrẹl keghi wa winna iwinna nii hia hia zẹ vbene Nọyaẹnmwa tama e Mosis. 43E Mosis keghi ghe emwi hia ne iran ru ghe, ọ keghi miẹn wẹ zẹ vbene Nọyaẹnmwa khare ọre iran wa ru ehia. E Mosis keghi na erhunmwu ne iran.

Currently Selected:

Ẹksọdọs 39: EDO96

Highlight

Copy