Ẹksọdọs 38

Aka Ne A Na Giẹn Emwi Izọhẹ

(Ẹksọdọs 27:1-8)

1Ọ keghi ya erhan akesia ru aka ne a na giẹn emwi izọhẹ. Ọ kegha re abọkpa vbe igienenẹ, ibata ihinrọn vbe ukhiọnmwẹ vbe utanmwẹ, ibata ihinrọn vbe ukhiọnmwẹ vbe uvbẹmwẹ, kevbe ibata enẹ vbe ukhiọnmwẹ vbe uyomwẹ. 2Ọ keghi vbe ru ehe ne ọ na zẹ ukpẹ ye igienenẹ ọnrẹn vbene iran na gha re ọkpa yaba aka nii. Ọ keghi ya oze rhu ehia.

3Ọ keghi vbe ru emwi ne a lo vbe nene aka yọ, avbe ọkpan, ovbẹvbẹ, ọkpan nọkhua, avbe awan ke ẹe kevbe ọkpan ne a mu ye erhẹn. Oze ẹre ọ ya ru avbe emwi na hia. 4Ọ keghi ru akesia ye aka nii, ọkiakia ọghe oze, ọ na muẹn ye ototọ ehọ ẹre ne ọ vbe sẹ adesẹneva uyomwẹ aka. 5Ọ keghi ru ẹgba ne a ya mu emwi enẹ, ọ na kan rẹn lele igienenẹ ọghe ọkiakia nii ne ọ sẹtin da avbe ọkpọ yi. 6Erhan akesia ọre ọ ya ru avbe ọkpọ na, ọ keghi ya oze rhu ẹe. 7Ọ na filo ẹe lele uvun ẹgba nii vbe obọ eva ọghe aka, ne a ya gha mu ẹẹn. Aka nii keghi mwẹ uvun vbe uwu ẹre, uhanhan ọre a ya kan rẹn.

Uwawa Akhuẹ Oze Ne A Ru

(Ẹksọdọs 30:18)

8Ọ keghi ru uwawa akhuẹ oze kevbe uhe ẹre ọghe oze, ughegbe avbe ikhuo ni winna vbe onurho ne a la la Owa Ukpọn Ehe ne Nọyaẹnmwa ye ọre ọ ya ru ẹe.

Ogba Ne Ọ Lẹga Owa Ukpọn Ehe Ne Nọyaẹnmwa Ye

(Ẹksọdọs 27:9-19)

9Ọ keghi gba ogba lẹga ẹre. Ukpọn ne ọ rre odẹ ekẹn, eto ovbiohuẹ ne a mẹ ọre a ya ru ẹe, ọ keghi re ibata ekigbe siyeha vbe utanmwẹ. 10Ọkpọ ugie ni rrọọ kevbe ẹzi iran ugiugie, oze ẹre a ya ru iran, aban ne a kan mu avbe ọkpọ ni rrọọ. kevbe avbe nene ọkpọ, esiliva ọre a ya ru ẹe. 11Erriọ ọre ogba ọlẹga vbe gha ye vbe odẹ okuọ. 12Vbe odẹ orrie vbọ, ukpọn onurho ne ọ rrọọ kegha re ibata ekesọgban, a keghi ya ọkpọ igbe kevbe ẹzi igbe ne a ya esiliva ru. deba aban. ni rre ọkpọ nii, kevbe ọkpọ nii. 13Odẹ ahọ vbọ, obọ ne onurho ye, ọ kegha re ọkpọ ekesọgban. 14-15Vbe obọ eveva ehe ne a la larọ, ukpọn onurho ne ọ re ọkpọ ihinrọn vbe ukhiọnmwẹ ke gha rrọọ deba ogba deba erhan kevbe ehe ne a ba ẹre yi eha. 16Ukpọn onurho ni lẹga ogba ọlẹga nii keghi re ne a ya eto ovbiohuẹ ne a mẹ do. 17Ẹzi avbe ọkpọ ni rrọọ keghi re ne a ya oze ru, erhan ni rrọọ kevbe emwi ne a ya gue ẹre uhunmwu, a ke ghi ya aban esiliva dele ehia kugbe. 18Ukpọn onurho ne a rhie ye onurho ogba ọlẹga nii, ne a do emwi lele ya munọ ona yi, eto ohuan ne raghoragho, ne ọ vboro rhan-an kevbe ne ọ baa, ke eto ovbiohuẹ ne vbukhẹẹ ne a mẹ ọre a ya rru iran. Ọ kegha re ọkpọ igbe vbe utanmwẹ, ọkpọ eva vbe ukhiọnmwẹ vbe uyomwẹ, zẹ vbe ukpọn onurho ọghe ogba ọlẹga nii. 19A kegha ya ọkpọ enẹ ne a mu yan ẹzi oze enẹ da ẹe yi. Aban ni rrọọ, emwi ne ya gue ẹre uhunmwu kevbe ogba ni rrọọ kegha re ọ ghe esiliva. 20Ukeke ọghe ehe ne Owa Ukpọn nii, kevbe ọghe ogba ni lẹga ẹre kegha re ọghe oze.

Ẹrọnmwọ Owa Ukpọn Ehe Ne Nọyaẹnmwa Ye

21Vbene a ka ẹe hẹ ighẹ ẹrọnmwọ ne a lo ro vbe Ehe Nọhuanrẹn vbe Owa Ukpọn ehe ne Nọyaẹnmwa ye ọ re ena khin, ehe ne a viọ avbe uhanhan ne a gbẹnnẹ uhi Igbe yi e Mosis ọre ọ ta ẹe vbene a gha ru ẹe hẹ, avbe Livai keghi ru ẹe vbene Itama, ne ovbi Errọn ne ohẹn na gha ma iran re vbene a gha ru ẹe hẹ. 22E Bezalẹl ne ovbi Uri, kevbe eyẹ Họ ne ovbi uniẹn Juda keghi ru emwi hia ne Nọyaẹnmwa wẹ ne a ru. 23Ọmwa ne ọ gha yi ẹre obọ, Oholiab ne ovbi Ahisamak ne uniẹn Dan, kegha re ọmwa ne ọ sa emwi ye ama, ne ọmwa emwi, ne ọ do eto ohuan ne raghoragho, ne ọ vboro rhan-an, kevbe ne ọ baa, kevbe eto ovbiohuẹ ne vbukhẹẹ. 24Igoru hia ne a lo ya ru emwi vbe uwu ehe ne ọ huanrẹn (igoru ne emwa ya fi ohan ne Nọyaẹnmwa nọ) keghi sẹ uwan isẹn irrọvbe uri yan arriaisẹn eva (2,195) zẹ vbene a ya mwa emwi.

25Esiliva ni ke obọ emwa ne a ka ẹe rre, keghi sẹ uwan ekigbe siyeha irrọvbe arriaeha yan arria isẹn ihinrọn (7,550) zẹ vbene a ya mwa emwi. 26Ọna kegha re igho hia ne emwa ne a gbẹnnẹ vbe ẹghẹ ikẹvbo zẹe, dọmwadẹ ọghọe keghi ha inu igho ne a ho, zẹ vbe ne a ya mwa emwi. Inu ikpia nii rre ikpugie kevbe nii vbe sẹ ọnii kegha re ekigbe siyeha irrọ vbe arria eha yan arria isẹn eha kevbe arria isẹn vbe ihe arria eha (603,550) iran ne a ka ẹe vbe ẹghẹ ikẹvbo.

27Vbe ọghe esiliva ne ọ rrọọ, a keghi ya uwan arria isẹn ihinrọn deba iyisẹn isẹn (7,500) ru ẹzi iyisẹn ye Owa Ukpọn ne ogihinrọn nii kevbe ukpọn onurho, uwan isẹn irrọvbe iyenẹ ọre a ya ru ẹzi ọkpọkpa. 28E Bezalẹl keghi ya uwan ekigbesiyeha ni dekẹe ru ọkpọ kevbe aban ne avbe erhan na a baba lele otọ kevbe emwi ne a ya gue iran. 29Avbe oze ne a ya fi ohan ne Nọyaẹnmwa kegha re uwan arriaisẹn isẹn deba igbe yan iyisẹn eha (5,310). 30Enii ọre ọ ya ru ẹzi ye onurho owa ukpọn ehe ne Nọyaẹnmwa ye, aka ọghe oze kevbe ọkiakia oze ne ọ rrọọ kevbe emwi hia ne a lo vbe aka. 31Ẹzi avbe ogba ọlẹga ne ọ rrọọ kevbe onurho ọlẹga nii, ke avbe ukeke ne a ya so Owa Ukpọn kevbe ogba ọlẹga ẹre.

Currently Selected:

Ẹksọdọs 38: EDO96

Highlight

Copy