Markus 2
2
Yesu A Gung Nʊ Nɨ Bʊtɔgɔ A Swam Swamɨ
(Mat 9:1-8; Luk 5:17-26)
1Kumtɨnɔ a gǝlala bɔ, nǝngɔ Yesu a yǝla a bɛ a Kafarnahumi, nǝbɔ a nyʊwa fulon gǝnɔ gɔ gǝ na a lɔ. 2Nǝbɔ ba mʊrka a lada nyɔ, mɨ daa wo a mʊgɔ lɔng jǝbɔ nyanga lɔng. Yesu kiyo jim fulon kɛl lǝmɨgɔ lɛ. 3Nǝngɔ nǝbɔ naal a bɛ nǝn nʊ nɨ bʊtɔgɔ a swam swamɨ. 4Ja kuwo mɨsɔ jǝ nya dɔtǝm lɛ a daa Yesu woi jʊ a bwɨɨ, nǝbɔ a lada, nǝngɔ ja gwi ja kwɨ dul kanɨ, ja shig gǝn jǝbɔ wɨlǝn gǝnɔ a kǝga Yesui. 5Nǝn kwama Yesu a kuwo nǝtǝm bɨlǝngkɛl jini, nǝngɔ a sʊwa nʊ nɨ bʊtɔgɔ a swam swamɨ gɔ, “Bʊla mɨ, n kǝlǝm mʊn bwɨlangkɛl mʊnɔ.”
6Nǝngɔ kaam nǝb mɛlalɨ diilɔ yǝmam woi a tǝl bʊʊlatǝmɔ a nǝl jin gɔ, 7“N wɛ a bwɨ nʊ nɨ a sʊwa kɛl nɨ nyɨɨ? A kal dun Kwaamaɨ! Nuwo kǝlǝm bwɨlangkɛl lɛɨ na ke bɔ Kwaama kwaagɨɨ?”
8Yesu a kwɛl a nyǝm jʊ jǝ bʊʊla lɛ a nǝl jini, nǝngɔ a bʌ ji gɔ, “N wɛ a bwɨ jǝ́ maa bʊʊlalɨ nɨ lɛ nyɔ a nǝl jeni? 9Nʊ won a laa jǝlɨ, ja sʊwa nǝ twɨla gɔ, ‘Ja kǝlǝm mʊn bwɨlangkɛl mʊnɔ’ jǝbɔ a wʊnɨ ja sʊwa gǝn gɔ, ‘Gun do wɨlǝn mʊnɔ yiloi?’ 10Mǝ swɨ lɛ jǝ́ nyǝm gɔ, Bʊla Nǝlɨ nǝngǝn nǝn fɔlɔn kǝlǝmtǝm bwɨlangkɛl a tǝm nɨɨ.” Nǝngɔ a sʊwa balɨ nɨ bʊtɔgɔ a swam swamɨ gɔ, 11“Gun do wɨlǝn mʊnɔ shu a lɔ.”
12Nǝngɔ a gun tʌgo a kang dangǝn a do wɨlǝn gǝnɔ a jeli. Nǝbɔ woi dʌng gǝn nɛɨ, ja ta kang a nyiyo, jǝ bǝlá Kwaama lɛ jǝ sʊwa lɛ gɔ, “Bǝ kuwo bɔ kaa jǝl wo na jʊ nɨ a bwɨɨ.”
Yesu A Jo Lawi
(Mat 9:9-19)
13Nǝngɔ Yesu a yǝla a jel a shu a kʌng wɨma Galilii, nǝbɔ a lada nyɔ a mʊrka a daa gǝ woi, nǝngɔ mɛla jim lɛɨ. 14Kwamagɔ shum lɛɨ, nǝngɔ a kuwo Lawii, bʊla Halfaɨ, yǝm a daa yotǝm kemʌn tǝm. Nǝngɔ Yesu a sʊwa gǝn gɔ, “Bwang mɨ.” Nǝngɔ a gun a bwang gǝmɨ.
15Kaa di Yesu jǝbɔ bɛtɔ mɛlalɨ gǝnɔ jǝ ja jǝjalǝn nɛ a lɔ Lawii. Kaam nǝb yotǝm kemʌn tǝmɔ jǝbɔ nǝb bwɨlangkɛlɔ a lada jǝ ja jǝjalǝnɔ lɛ jǝbɔ gɔ jǝbɔ bɛtɔ mɛlalɨ gǝnɔ. Nǝbɔ a lada a mʊgɔ jin ja bwang gǝmɨ. 16Kaam nǝb mɛlalɨ diilɔ a kʊm jini n nǝbɔ Farisaɨ. Ja kuwo gǝn ja jǝjalǝn nɛ jǝbɔ nǝb bwɨlangkɛlɔ jǝbɔ nǝb yotǝm kemʌn tǝmɨ, nǝngɔ ja bʌ bɛtɔ mɛlalɨ gǝnɨ gɔ, “N wɛ a bwɨ gǝ ja lɛ jǝbɔ nǝb yotǝm kemʌn tǝmɔ jǝbɔ nǝb bwɨlangkɛlɨ?”
17Yesu a nyʊwa nyɨɨ, nǝngɔ a sʊwa ji gɔ, “Nǝb nɨ kwamɨgǝnɨ mɨ jǝ yɔ lɛ a daa nǝ bʊʊ woi, n nǝbɔ mɨ kwamɨgǝnɨ gǝ yɔ lɛ woi. Mǝ bɛ bɔ sǝ ba n jo nǝb dǝngdǝng. Mǝ bɛ jotǝm nǝb bwɨlangkɛl.”
Bʌtʌm Kɛl A Dul Dotǝm Diil Mwɛ
(Mat 9:14-17; Luk 5:33-39)
18Bɛtɔ mɛlalɨ Yohanaɨ nǝ Yʊtǝm mwɛ Sagsag jǝbɔ a nǝbɔ Farisaɨ jǝ do diil mwɛ lɛ. Nǝngɔ kaam nǝbɔ a bʌ Yesu gɔ, “N wɛ a bwɨ bɛtɔ mɛlalɨ Yohanaɨ jǝbɔ a nǝbɔ Farisaɨ jǝ do diil mwɛ lɛ, a mʊnɔ mɨ jǝ do lɛɨ?”
19Nǝngɔ Yesu a jǝla ji gɔ, “Fatǝm balɨgɨɨ jǝ do do diil mwɛ na jǝ dakini jǝbɔ gɔ a daa bwatǝm naakanɨ ka? Kwamagɔ jǝ dakini jǝbɔ balɨgɨɨ, mɨsɔ jǝ do diil mwɛ lɛ. 20Kwamagɔ bɛ lɛ wo wʊnɨ ba jǝ dem jim balɨgɔ lɛɨ, nǝngɔ kwama gɔ jǝ dem diil mwɛ lɛɨ.
21“Mɨ nǝn nʊ nɨ baka bɛllɛ galɨ lɛ nǝn mwan dwang fɨɨ. Na ga maa nyɨɨ, mwan dwang fɨgɔ wʊl wʊl bɛllɛ galɨgɔ. Wʊlatǝm gǝnɔ laa laa a galɨgɔ bwɨlatǝmɔ. 22Mɨ nǝn nʊ nɨ tal bʊgɛ fɨ lɛ a sʊwa galɨɨ. Na ga maa nyɨɨ, sʊwagɔ fɛ fɛ, bʊgɛmɔ tǝlam tǝlam, sʊwagɔ kala kala. Bʊgɛ fɨgɔ jǝ tal a sʊwa fɨ.”
Bʌtʌm Kɛl A Dul Kɨlatǝm Kum Fǝbtǝm
(Mat 12:1-8; Luk 6:1-5)
23Nǝn Kum Fǝbtǝm Yahudawagɨɨ, nǝngɔ Yesu jǝbɔ bɛtɔ mɛlalɨ gǝnɔ jǝ shu lɛ a twam jaamɨ. Ji a mʊgɔ yɔmɔ gǝm nǝngɔ kaam bɛtɔ mɛlalɨ gǝnɔ a tǝl kwɛltǝm dul jaamɨ. 24Nǝngɔ nǝbɔ Farisaɨ a sʊwa Yesu gɔ, “Dʌng jʊ bɛtɔ mɛlalɨ mʊnɔ maa lɛɨ. N wɛ a bwɨ jǝ maa jʊ nɨ lɛ diilɔ a sʊwa gɔ ka ja maa lɛ nǝn Kum Fǝbtǝmɨ?”
25Nǝngɔ Yesu a jǝla ji gɔ, “Jǝ́ kiyo bɔ jʊ nɨ Dauda a maa kwama nɨ nǝngǝn nǝn komʌn, a nyʊwam jʊwan jǝbɔ fatǝm yɔm gǝnɨ ka? 26Nǝn kwama Abiyataɨ dalɨ nǝkǝlagɔ, Dauda a dɔ lɔ Kwaamaɨ, a ja kʊkkʊm nɨ diilɔ a sʊwa gɔ n nǝbkǝlam kwaaji maa lɛ nyɨɨ. Jǝ́ kuwo bɔ Dauda a ja, a nǝ fatǝm yɔm gǝnɨ ka?”
27Nǝngɔ a sʊwa ji gɔ, “Kum Fǝbtǝmɔ ja maam nǝfili, nǝfili ja maam bɔ Kum Fǝbtǝm. 28A na nyɔ Bʊla Nǝlɨ nǝn gɔ Tɛlalɔ a dul Kum Fǝbtǝmɨ.”
Currently Selected:
Markus 2: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
