Markus 1

Kiyotǝm Kɛl Kwaamaɨ A Nyiyo Yohanaɨ Nǝ Yʊtǝm Mwɛ Sagsag

(Mat 3:1-12; Luk 3:1-9; Yoh 1:19-28)

1Wʊnɨ nǝn gɔ tǝltǝm fulon kɛl lǝmɨgɔ a dul Yesu Kiristii, Bʊla Kwaamaɨ.

2Kanga ja mʊla a langǝn bwangǝn Ishayaɨ nǝkuwotǝmkǝgagɨɨ gɔ,

“Mǝ twam twam bwɛ twama mǝndɨ a kǝga mʊn

wʊnɨ fɛka mʊn golagɔ lɛɨ.

3Nǝn gɔ diilɔ jo jangajǝng lɛ a mʊgɔ kuuli gɔ,

‘Jǝ́ fɛka Tɛlalɔ gǝm daagɔ yɔm lɛɨ,

jǝ́ fɛ golantɨnɔ sɨn.’ ”

4Yohana nǝ Yʊtǝm mwɛ Sagsagɔ a bɛ a mʊgɔ kuul, sʊwa nǝbɔ kɛl Kwaamaɨ lɛ gɔ, nǝbɔ a yǝla a bǝla bwɨlangkɛl jinɔ, sǝ ja yʊ ji mwɛ sagsag, sǝ ja kǝlǝm jim bwɨlangkɛltɨn jinɔ. 5Nǝbɔ a tǝm Yahudiyaɨ jǝbɔ tuulɔ Urushalimagɔ gwam, jǝ bɛ lɛ a daa gǝ woi. Jǝ sʊwa bwɨlangkɛl jinɔ lɛ, yʊ ji mwɛ sagsagɔ lɛ a Tiyo Urdun. 6Yohana gǝ dʊʊ dwang nɨ ja sʊʊl nǝn yitʌn namtenʌmi. A bwa kʊng gǝnɔ nǝn tɛ. Jǝjalǝn gǝnɔ n kʊgɨ jǝbɔ tɛlɨ. 7Kiyo jim kɛl Kwaamaɨ lɛ gɔ, “Nʊ nɨ bɛ lɛ a gul mɨ, a laa ɨ dʊʊnɔ, mǝ la bɔ nyɔ n gǝla n jʊng a kǝga gǝn, n kwɨ dwang twam gǝnɔ a naa gǝn. 8Mǝ yʊ jen mwɛ sagsagɔ nǝn mwɛ. A gǝnɔ ba yʊ jen nǝn Yʊwa Kwaamaɨ.”

Yohana A Yʊ Yesu Mwɛ Sagsag

(Mat 3:13-17; Luk 3:21,22)

9A mʊgɔ kumtɨn nɨɨ, Yesu a jel a mʊgɔ Nazarat a tǝm Galili, nǝngɔ Yohana ba yʊ gǝn mwɛ sagsagɔ a Tiyo Urduni. 10Kwama nɨ Yesu jelʌm lɛ a mʊgɔ mwɛɨ, nǝngɔ a kuwo kwamagɔ a wumoi, a kuwo Yʊwa Kwaamaɨ gǝla lɛ na kumfiyo a dul gǝnɨ. 11Nǝngɔ ja nyʊwa diilɔ a dʌbʌl kwama sʊwa lɛ gɔ, “Mʊ nǝn Bʊla mɨ nɨ mǝ swɨ lɛɨ. Mǝ nyʊwa lǝma lɛ nǝn mɔ dangǝn.”

Mammɔ A Tɛl Yesu

(Mat 4:1-11; Luk 4:1-13)

12A tʌgo a daa gɔ nǝngɔ Yʊwa Kwaamaɨ a shu nǝn gɔ a mʊgɔ kuuli. 13A yɨ a daa gɔ kumɔ fʊltǝnaal, Mammɔ tɛl gǝn nɛ. Yesu yǝm jǝbɔ namɔ kuuli. N bɛtɔ twama Kwaamaɨ tu gǝm twama lɛɨ.

Yesu A Tǝl Maajɨ Gǝnɔ A Galili

(Mat 4:12-17; Luk 4:14,15)

14Nǝn kwama ja kubʌl Yohana a lɔsomii, Yesu a dɔ mʊgɔ Galili kiyo nǝbɔ gǝm fulon kɛl lǝmɨ Kwaamaɨ lɛ. 15Sʊwa lɛ gɔ, “Kwamagɔ a la! Fɔlɔn lɔ Kwaamaɨ a dwama! Jǝ́ yǝla jǝ́ bǝla bwɨlangkɛl jenɔ, jǝ́ nǝ bɨlǝngkɛl nǝn fulon kɛl lǝmɨ nɨɨ.”

Yesu A Jo Bɛtɔ Mɛlalɨ Tɨkǝgam Gǝnɔ

(Mat 4:18-22; Luk 5:1-11)

16Nǝn kwama Yesu shu lɛ a kʌng Wɨma Galilii, a kuwo Saminu jǝbɔ kɨla gɔ Andarawas jǝ mal lɨyal lɛ a wɨma, jǝ nǝb tabatǝm jʌngi. 17Nǝngɔ Yesu a sʊwa ji gɔ, “Jǝ́ bwang mɨ, mǝ dǝg jen ya jǝ́ bɛ nǝn nǝb a daa mɨ woi.” 18A ta bɔ bʊtɔ, nǝngɔ ja bǝla lɨyaltɨn jinɔ ja bwang gǝmɨ.

19A yɔ a kʌng wɨma dǝmɨ, nǝngɔ a kuwo Yakubu bʊla Zabadii jǝbɔ kɨla gǝ Yohana, ji a mʊgɔ tɨyamwɛng, jǝ fɛka lɨyaltɨn jinɔ lɛ. 20Mɨ tatǝm bʊtɔ wo a jo jii, nǝngɔ ja bǝla tɨya ji Zabadi a mʊgɔ tɨyamwɛng jǝbɔ nǝb maajɨ gǝnɔ, ja bwang gǝmɨ.

Yesu A Jǝg Yʊwa Bwɨlagɔ

(Luk 4:31-37)

21Yesu jǝbɔ nǝb nɨ bwang gǝm lɛɨ, ja dɔ mʊgɔ Kafarnahum. Nǝngɔ a dɔ kan mɛlalɨ nǝn Kum Fǝbtǝm a tǝl mɛla jim lɛɨ. 22Ja ta kang a nyiyo nǝn mɛlalɨ gǝnɔ, jʊ a bwɨɨ gǝ sʊwa ji kɛlɔ na nʊ nɨ nǝn fɔlɔnɨ, ke bɔ na a nǝb mɛlalɨ diili. 23Tʌgo a kang nǝngɔ kaa nǝl a mʊgɔ kan mɛlalɨ nǝngǝn nǝn yʊwa bwɨla a ga kwaalɨ 24sʊwa lɛ gɔ, “Yesu, bwɛ Nazarat, n wɛ a dǝg ń wo jǝbɔ nǝnɨ? Mʊ bɛ sǝ ba ń jʌbo nǝn ka? N nyǝm mʊ nǝn nuwo! Mʊ nǝ Sagsag Kwaamaɨ.”

25Nǝngɔ Yesu a ga yʊwa bwɨlagɔ gǝm wulong gɔ, “Yɨ shig! Jelʌm a bʊtɔ nʊ nɨ gǝm!” 26Nǝngɔ yʊwa bwɨlagɔ a ga nʊ nɨɨ, bʊtɔgɔ ka lɛ kʌbkʌb, a ga kwaalɨɨ, nǝngɔ a jelʌm a bʊtɔ gǝnɨ.

27Gwam jinɔ ja ta kang a nyiyo, jǝ bʌbko lɛ gɔ, “Jʊ nɨ n wɛ nyɨɨ? Dwiyen kaa jǝ fɨ wɔ! Bwɛ nɨ nǝn fɔlɔn, wɔ ga yʊwa bwɨlantɨnɔ gǝm wulong lɛ, yʊwa bwɨlantɨnɔ tʌji jǝ nyʊwa diil gǝnɔ lɛ.” 28A kʊta bɔ nǝngɔ fulon gǝnɔ a wa mʊgɔ tǝm Galiligɨɨ.

Yesu A Gung Yul Bitrusi

29Jeltǝm jinɔ nyɔ a kan mɛlalɨ jǝbɔ Yakubu, jǝbɔ Yohanaɨ, nǝngɔ ja shu a lɔ Bitrusi, jǝbɔ lɔ Andarawasɨ. 30Yul Bitrusi daam nǝn bɛsheni. Dɔtǝm Yesui, nǝngɔ ja nǝ gǝn fuloni. 31Nǝngɔ a shu a daa gǝ woi, a tɨka gǝn a guni, bɛshenigɔ a bǝla gǝn. Nǝngɔ a gun a nǝ ji jǝjalǝnɨ.

Yesu A Gung Nǝbɔ A Lada

(Mat 8:16,17; Luk 4:40,41)

32Nǝn kwaamɨ, kwama nu kwamagɔ a lɛɨ, nǝngɔ ja bɛ Yesu gǝm nǝn nǝb nɨ mɨ kwamɨgǝnɨ jǝbɔ nǝbɔ nǝn yʊwa bwɨlaɨ. 33Nǝngɔ nǝbɔ a tuulɔ gɨɨ gwam a mʊrka a nyanga lɔngɨ. 34Gung nǝb nɨ lɛ mɨ kwamɨgǝn twɨla jinɔ a gǝlalaɨ. A jǝg nǝblaamɔ a lada, a jǝla bɔ nǝblaamɔ a sʊwa kɛl, jʊ a bwɨɨ, ja nyǝm gǝn.

Yesu A Shu Maatǝm Keli A Daa Nɨ Mɨ Kaa Nǝl Woi

35Nǝn kumsʌl butʌb, nǝngɔ Yesu a gun a jel a shu a daa nɨ mɨ kaa nǝl woi, nǝngɔ a maa keligɔ woi. 36Nǝngɔ Saminu jǝbɔ nǝb nɨ jǝ dakinii ja yɔ saatǝm gǝnɨ. 37Kwama ja nya gǝnɨ, nǝngɔ ja sʊwa gǝn gɔ, “Nǝbɔ gwam saa ń nɛ.”

38Nǝngɔ Yesu a jǝla ji gɔ, “Bǝ ya a tuulɔtɨn nɨ a kǝgaɨ, sǝ n kiyo kɛl Kwaamaɨ wo. N jʊ a bɛ nǝn mǝɨ.” 39Kɛla lɛ a mʊgɔ Galili, kiyo kɛl Kwaamaɨ lɛ a kantɨn mɛlalɨ, jǝg nǝbɔ gǝm nǝblaamɔ lɛ.

Yesu A Gung Nʊ Nɨ A Mwata Mwataɨ

(Mat 8:1-4; Luk 5:12-16)

40Kaa nǝl wo wʊnɨ a mwata mwataɨ. A jʊng nǝngɔ a kela gǝn gɔ, “Na ń jǝlaɨ, mʊ nǝn kwaan nɨ mʊ gung i lɛɨ sǝ n yǝlam sagsag.”

41Nǝngɔ bʊnatǝmɔ a ta Yesui, nǝngɔ a mal kang gǝnɔ a ke gǝn nǝnɨ, a sʊwa gǝn gɔ, “N jǝla, gun.” 42Nǝngɔ mwatatǝmɔ a bǝla gǝnɨ, nǝngɔ nʊ nɨ a guni.

43Nǝngɔ Yesu a ywa gǝnɨ, a gʊ lɔl gǝnɔ a sʊwa gǝn nɛ gɔ, 44“Bɛ ka ń sʊwa lɛ kaa nǝl. A laa jǝl yɔ, ya nʊng dul mʊnɔ a daa nǝkǝlagɔ woi, sǝ ń tǝla twama butitǝm mʊnɔ, kanga Musa a nʊng gɔ ja maaɨ, sǝ a yǝlam nǝtǝm nyiyo a gungtǝm mʊnɔ gǝm.” 45Nʊ nɨ a maa bɔ kanga ja sʊwa gǝnɨ, a jel nǝngɔ sʊwa nǝbɔ fulon kɛl nɨ lɛ a daatɨnɔ gǝm gwamɨ. Jʊ nɨ ga maaɨ, a dǝg Yesu a dɔ bɔ kaa tuulɔ, gǝ yɨ a daa nɨ mɨ nǝb woi. Maatǝmɔ nyɨɨ, nǝbɔ a daatɨnɔ gǝm gwam bɛ lɛ a daa gǝ woi.

Currently Selected:

Markus 1: DBD

Highlight

Copy