Matta 27

Yesu A Kǝga Bilatusi

(Mar 15:1; Luk 23:1,2; Yoh 18:28-32)

1Nǝn kumsʌl butʌb, nǝngɔ dʊʊm nǝbkǝlamɔ jǝbɔ nǝb dʊʊm nǝbɨɨ ja mʊrkam nyiyo a dul Yesui, sǝ jǝ jʌ gǝn. 2Nǝngɔ ja bwa gǝn ja shu nǝn ya ja nǝ Bilatusi, gwamnagɔ.

Bwaa Yahuzaɨ

(Mbt 1:18,19)

3Kwama nɨ Yahuza nʊ nɨ a lungto Yesui a kuwo ja mwatɨ Yesu gǝm borang bwaaɨ, nǝngɔ a fʌto bʊʊlalɨ gǝnɔ a yǝla ya nǝ dʊʊm nǝbkǝlamɔ jǝbɔ nǝb dʊʊmɔ kemʌn sǝlǝn nɨ fʊtǝtaalɨ tʌgoi. 4A sʊwa gɔ, “N maa bwɨlangkɛl mǝ lungto nʊ nɨ mɨ nǝn bwɨlangkɛlɨ ja jʌ gǝnɨ.”

Nǝngɔ ja sʊwa gǝn gɔ, “N wɛ a dǝg nǝn woi? Nǝmɔ mʊ nyʊwaɨ.”

5Nǝngɔ a wa jim kemʌn nɨ a Kan Kwaaman, a jel ya kwa mɨyaɨ.

6Dʊʊm nǝbkǝlamɔ a wɔɔ kemʌnɔ, nǝngɔ ja sʊwa gɔ, “A bʊm bɔ bǝ ya kemʌn nɨ a daa yatǝm kemʌn na Kan Kwaaman. N kemʌn tʊʊm.” 7Nǝngɔ ja kiyo gɔ jǝ ten talɨ nǝ mɔtǝm goli sǝ a yǝlam talɨ fʌltǝm faabǝmɨ. 8A bɛ nǝn a kǝngkɨɨ jǝ jo talɨ nɨ gɔ talɨ tʊʊm. 9Wʊnɨ a yii sʊwatǝm nǝkuwotǝmkǝga Irimiyaɨ gɔ, “Ja do kemʌn sǝlǝnɔ fʊtǝtaal, kemʌn nɨ nǝbɔ Israilaɨ a ya a dul gǝnɨ. 10Ja do ja tenʌm talɨ nǝ mɔtǝm goli, kanga Tɛlalɔ a sʊwa ɨ gɔ n maaɨ.”

Bilatus A Bʌbo Yesu Kɛltɨn

(Mar 15:2-5; Luk 23:3-5; Yoh 18:33-38)

11Nǝngɔ Yesu a tɨ a kǝga gwamnagɨɨ, gwamnagɔ a bʌ gǝn gɔ, “Nǝmɔ mʊ fɔlɔ Yahudawagɨɨ ka?”

Yesu a sʊwa gǝn gɔ, “Kanga mʊ sʊwaɨ.”

12Nǝngɔ dʊʊm nǝbkǝlamɔ, jǝbɔ nǝb dʊʊmɔ a yɔ nǝn kɛl gǝnɨ, a sʊwa bɔ kaa kɛl. 13Nǝngɔ Bilatus a sʊwa gǝn gɔ, “Mʊ nyʊwa bɔ katɨ nɨ jǝ sʊwa lɛ a dul mʊnɨ ka?” 14Yesu a gar jim bɔ kaa kɛl wo win. Gwamnagɔ a ta kang a nyiyo dangǝn.

Ja Mwatɨ Yesu Gǝm Borang Bwaa

(Mar 15:6-15; Luk 23:13-25; Yoh 18:39; 19:16)

15Nǝn kwama dikulomɔ, gwamnagɔ gǝ dem dem kang win a nǝb nɨ gǝm ja bwaba ja tal a lɔsomii, wʊnɨ nǝbɔ swɨ lɛɨ. 16Kwama gɔ kaa nǝl wo a lɔsomi, wʊnɨ n nǝ kutʌmi, dunɔ nǝn Barabas. 17Ja mʊrkaɨ, nǝngɔ Bilatus a bʌ ji gɔ, “Nuwo jǝ́ swɨ lɛ n dem jem kangɨ? Nǝn Barabas ka? Nǝn Yesu wʊnɨ jǝ jo lɛ gɔ Kiristii ka?” 18A kwɛl a nyǝm nyǝmɨ n kɛl nungon ja bwa Yesu ja nǝ gǝnɨ.

19Nǝn kwama nɨ gǝ yǝm a daa yɨm maatǝm borangɨ, nǝngɔ nwala gɔ a twam gǝm gɔ, “Jelʌm a gola nǝ dǝngdǝng nɨ gǝm, jʊ a bwɨɨ dwiyen n dɔta nǝn dʊgam a dul gǝn.”

20Nǝngɔ dʊʊm nǝbkǝlamɔ jǝbɔ nǝb dʊʊmɔ a nǝ mʊrkalɨ nǝbɨɨ lǝma nyiyo gɔ ja kel Bilatus a dem kang a Barabas gǝm, a jʌ Yesui.

21Nǝngɔ gwamnagɔ a yǝla a bʌ ji gɔ, “Nuwo nyɨ a kʊm nǝb nɨ yoi jǝ́ swɨ lɛ n dem jem kangɨ?”

Nǝngɔ ja sʊwa gɔ, “Barabas.”

22Bilatus a bʌ ji gɔ, “N wɛ mǝ maa lɛ nǝn Yesu wʊnɨ jǝ jo lɛ gɔ Kiristii?” Gwam jinɔ ja jǝla gɔ, “Ja kʊʊ gǝn.”

23A bʌ ji gɔ, “A maa wɛ? N bwɨlangkɛl wɛ a maaɨ?”

Ja sʊtǝn gatǝm wulongɔ jǝ sʊwa lɛ gɔ, “Ja kʊʊ gǝn!”

24Bilatus a kuwo ga laa bɔ kwaan jinɔ, kutʌmɔ swɨ lɛ a guni, nǝngɔ a dʊwa mwɛmɔ a saalǝm kang gǝnɔ a kǝga nǝbɨɨ, a sʊwa gɔ, “A mǝndɨ n jelʌm mɨ mwɛ mɨ wo a tʊʊm nʊ nɨ gǝm. Wʊnɨ n mwɛ jen.”

25Nǝngɔ nǝbɔ gwam a jǝla gɔ, “Bɛ tʊʊm gǝnɔ a yɨ a dul nǝn jǝbɔ bɛtɔ lɔ nǝnɨ.”

26Nǝngɔ a dem jim kang a Barabas gǝmɨ. A maa Yesu gǝm banjangɨ, nǝngɔ a nǝ ji sǝ ya ja kʊʊ gǝnɨ.

Sʊwajaamtɨnɔ A Mog Yesu

(Mar 15:16-20; Yoh 19:2,3)

27Nǝngɔ sʊwajaamtɨn nɨ tɔɔ gwamnagɔ lɛɨ, ja yɔ nǝn Yesu a mʊgɔ lɔ fɔlɔn gwamnagɨɨ, nǝngɔ ja mʊr sʊwajaamtɨnɔ a dul gǝnɨ. 28Nǝngɔ ja jǝgǝm dwang gǝnɨ, ja mal gǝm kaa belʌn felii. 29Nǝngɔ ja bwa gǝm dwang dul sholaɨ, ja dǝg gǝm a duli, ja dǝg gǝm dwamɔ a kang jajǝngɨ, ja jʊng a kǝga gǝnɨ, ja mog gǝn gɔ, “Bɛ kʊlɨ mʊnɔ a kʌl, fɔlɔ Yahudawagɨɨ!” 30Ja tɛɛ gǝm tuum, ja yem dwamɔ, ja jǝga gǝn nǝn a dul. 31Ja dɨ mogtǝm gǝnɨ, nǝngɔ ja jǝgǝm belʌn nɨ ja mal gǝmɨ, ja mal gǝm bɛllɛ gǝnɨ, ja shu nǝn gɔ sǝ ya jǝ kʊʊ gǝnɨ.

Ja Kʊʊ Yesu

(Mar 15:21-32; Luk 23:26-43; Yoh 19:17-27)

32Jǝ shu lɛɨ, nǝngɔ ja tǝga kaa bwɛ Kuranei dunɔ nǝn Saminu, nǝngɔ ja sɨna gǝm a do tɨya kʊʊtǝm Yesui. 33Ba ja la daa nɨ jǝ jo lɛ gɔ Golgotaɨ, wʊnɨ nʊng lɛ gɔ n daa kwasɨ duli. 34Nǝngɔ ja nǝ gǝn bʊgɛ wʊnɨ ja shɛka nǝn jǝ tuuli, sǝ ga nɔɔ. A twɨ nyɨɨ, nǝngɔ a kɔ nɔɔtǝmɨ. 35Ja kʊʊ gǝnɨ, nǝngɔ ja wɔɔ dwang dʊʊl gǝnɔ ja gam kwannya nǝnɨ. 36Nǝngɔ ja yɨ a daa gɔ jǝ tɔɔ gǝn nɛɨ. 37A dʌbʌl dul gǝnɔ gǝm ja mʊla kɛl katǝm wo a dul gǝn gɔ, “wʊnɨ nən yesu, fɔlɔ yahudawagɨɨ.” 38Nǝngɔ ja kʊʊ nǝbkuumɔ yo jǝbɔ gɨɨ, win a kang jajǝng gǝn, win a kang fɔlɔng. 39Nǝb nɨ shu lɛɨ, jǝ sʊwala gǝn bwɨlang katɨ lɛ, jǝ mǝg dul jinɔ lɛ. 40Jǝ sʊwa lɛ gɔ, “Mʊ nɨ mʊ kʌb Kan Kwaamanɔ lɛ ń yǝla ń mɔ tʌgo a mʊgɔ kumɔ taalɨ, bʊʊ nǝn dul mʊnɔ! Na mʊ nǝn Bʊla Kwaamaɨ, gun gǝla a dʌbʌl tɨya kʊʊtǝm nɨɨ.”

41Dʊʊm nǝbkǝlamɔ tʌji jǝbɔ nǝb mɛlalɨ diilɔ jǝbɔ nǝb dʊʊmɔ jǝ mog gǝn nɛ gɔ, 42“A bʊʊ nǝn kaam nǝbɔ. A dwal bɔ a bʊʊ nǝn dul gǝnɔ. Na nǝn gɔ gǝ fɔlɔ Israilaɨ, bɛ ga gǝla a dʌbʌl tɨya kʊʊtǝm kǝngkɔ sǝ bǝ nǝ bɨlǝngkɛl nǝn gɔ. 43A ya nǝl a daa Kwaama woi, bɛ Kwaama a jǝg gǝn kǝngkǝnɨ na swɨ gǝn nɛɨ. Kanga a sʊwa gɔ, gǝ nǝn Bʊla Kwaamaɨ.”

44Nǝbkuum nɨ tʌji ja kʊʊ ji dakinii, ja sʊwala gǝn bwɨlang katɨ tʌji.

Bwaa Yesui

(Mar 15:33-41; Luk 23:44-49; Yoh 19:28-30)

45Nǝn sɨmang kɔkɔ kumtojiligɔ a sumʌm tǝmɔ gwam, a yɔ nǝn a kemʌnɔ taal na kwaamɨ. 46Kemʌnɔ taal nǝngɔ Yesu a gung diilɔ nǝn kwaan a sʊwa gɔ, “Eloi, Eloi, lama sabaktani?” Wʊnɨ gǝ nʊng gɔ, “Kwaama mɨ Kwaama mɨ, n wɛ a bwɨ mʊ bǝla ɨɨ?”

47Nǝb nɨ tɨlam wo ja nyʊwa nyɨɨ, nǝngɔ ja sʊwa gɔ, “Bwɛ nɨ jo Iliya lɛ.”

48Nǝngɔ kaa win a kʊm jin a mwal ya do fʊgɔgɔ a dǝg a mwɛ fwalɨɨ, a gal a dwam sǝ a nǝ gǝn a nɔɔ. 49Nǝngɔ kaamɨ gɔ, “Jǝ́ bǝla wo bǝ kuwo kɛna Iliya bɛ ba bʊʊ lɛ nǝn gɨɨ.”

50Nǝngɔ Yesu a yǝla gung diilɔ nǝn kwaan, nǝngɔ a dem kang a kʊlɨ gǝnɔ gǝmɨ.

51Nǝngɔ dwang Kan Kwaamanɔ a bel yoi, a dʌbʌl a gǝla nǝn a tǝmɨ. Tǝmɔ a mǝga, gamtɨnɔ a wulola. 52Tuutɨnɔ a wumola, bʊtɔ nǝb nɨ sagsag a lada nyɔ a daa dumi, ja gun. 53Ja jela a mʊgɔ tuutɨn jinɔ gǝm. Nǝn kwama Yesu a gun a bwaaɨ, nǝngɔ ja dɔ mʊgɔ tuulɔ nɨ sagsagɨ, nǝbɔ a lada na a kuwo jii.

54Nǝn kwama nɨ nǝ dʊʊ sʊwajaam nɨ jǝbɔ nǝb nɨ jǝ dakini jǝ tɔɔ Yesu lɛɨ, ja kuwo tǝmɔ a mǝgaɨ, jǝbɔ jʊ nɨ a bwɨ gwamɨ, taalɔ a ta ji. Nǝngɔ ja sʊwa gɔ, “Bɨlǝngǝn bwɛ nɨ nǝn Bʊla Kwaamaɨ!”

55Nɔɔtǝmɔ a lada nyɔ wo, jǝ dʌng lɛ a kʊta. Ja jel a Galili jǝ bwang Yesu gǝm lɛ, jǝ maa gǝm maajɨ lɛ. 56A kʊm jin Maryamu bwɛn Magadaliyaɨ, jǝbɔ Maryamu nyɨya Yakubui jǝbɔ Yusufui, jǝbɔ nyɨya bɛtɔ lɔ Zabadii.

Fʌltǝm Yesui

(Mar 15:42-47; Luk 23:50-56; Yoh 19:38-42)

57Kwamagɔ dɔ lɛɨ, nǝngɔ kaa nǝ shilo n bwɛ Arimatiyaɨ, dunɔ nǝn Yusufu, gǝ tǝgǝn a yǝlam bwɛ mɛlalɨ Yesui. 58A yɔ a daa Bilatus woi, ya kela gɔ ja nǝ gǝn bʊtɔ Yesui. Nǝngɔ Bilatus a dǝg ji gɔ ja nǝ gǝnɨ. 59Yusufu a do bʊtɔ Yesui a kʊlʊm a dwang lilin fɨ nɨ sagsagɨ. 60A ya gǝn a kaa tuu fɨ nɨ ga wʊ dul gǝnɔ gǝmɨ, nǝngɔ a bʌl gʌleng tɛlɔ a swa a nyanga tuui, nǝngɔ a shui. 61Maryamu bwɛn Magadaliyaɨ jǝbɔ Maryamu wini jǝ yǝm dakini a kǝga tuugɔ gǝm.

Nǝb Tɔɔtǝm Tuugɔ

62Nǝn tǝmsɛlɨ, kum fɛkatǝmɔ a shui, nǝngɔ dʊʊm nǝbkǝlamɔ jǝbɔ nǝbɔ Farisaɨ ja mʊrka a kǝga Bilatusi, 63ja sʊwa gɔ, “Nǝ dʊʊ, nǝn bʊʊla kanga nǝ swagtǝm nɨɨ, a sʊwa a kwama nǝn kʊlɨɨ gɔ, kum na taalɔ gǝ gun gun a bwaa. 64A dul jʊ nɨ, sʊwa kɛl ya ja tɔɔ tɔɔɨ tuugɔ a la kumɔ taal, kage bɛtɔ mɛlalɨ gǝnɔ ba kuum bʌlʌnɔ sǝ ja sʊwa nǝbɔ gɔ a gun a bwaagɔ gǝm. Swagtǝm gulɔ laa laa na tɨkǝgagɔ bwɨlatǝm.”

65Nǝngɔ Bilatus a sʊwa ji gɔ, “A daa nyɔ. Jǝ́ wɔɔ sʊwajaamɔ ya ja tɔɔ gǝn dangǝn kanga jǝ́ swɨ lɛɨ.” 66Nǝngɔ ja shu ya ja tɔɔ tuugɨɨ, ja gatǝn mɛlɔ tʌgo a tɛlɔ gǝmɨ, ja dǝg sʊwajaamɔ tɔɔtǝmɔ.

Currently Selected:

Matta 27: DBD

Highlight

Copy