Matta 26

Dʊʊm Yahudawagɔ A Fwam Jʌtǝm Yesui

(Mar 14:1,2; Luk 22:1,2; Yoh 11:45-53)

1Nǝn kwama Yesu a dɨ sʊwatǝm katɨ nɨɨ, nǝngɔ a sʊwa bɛtɔ mɛlalɨ gǝnɔ gɔ, 2“Jǝ́ nyǝm Dikulom Yabtǝmɔ a bǝla kumɔ yo, jǝ nǝ nǝ Bʊla Nǝlɨ a daa nǝb kiim gǝnɔ woi, sǝ ja kʊʊ gǝn a dʌbʌl tɨya.” 3Nǝngɔ dʊʊm nǝbkǝlamɔ jǝbɔ nǝb dʊʊm nǝbɨɨ ba ja mʊrka a talɨ lɔ dʊʊn dalɨ nǝkǝlagɨɨ, dun gǝnɔ nǝn Kayafa. 4Ja nǝbka nyiyo, ja kiyom gɔ jǝ ta Yesu daddad, jǝ jʌ gǝn. 5Nǝngɔ ja sʊwa gɔ, “Mɨsɔ bǝ maa lɛ a kum dikulom, kage nǝbɔ a maa kutʌm.”

Kaa Nɔɔlɨ A Waa Yesu Gǝm Nwang A Betanya

(Mar 14:3-9; Luk 7:37,38; Yoh 12:1-8)

6Nǝn kwama Yesu a Betanya a lɔ Saminu wʊnɨ bʊtɔgɔ a mwata mwataɨ, 7nǝngɔ kaa nɔɔlɨ a bɛ a daa Yesu woi nǝn bɛ kwallangǝn, nǝn nwang waatǝm nɨ kunʌnɔ a lǝm nyɨɨ, kemʌn gǝnɔ a kwam nyɨɨ, nǝngɔ a tal Yesu gǝm nwang nɨ a duli, a kwama nɨ jam jǝjalǝn nɛɨ. 8Nǝn kwama bɛtɔ mɛlalɨgɔ a kuwo nyɨɨ, nǝngɔ nǝl jinɔ a kalaɨ, jǝ sʊwaka lɛ gɔ, “Wʊnɨ n kaltǝm kemʌn. 9Nwang nɨ na ja miyo gǝnɨ, jǝ nya nya kemʌnɔ a lada ja nɨ nǝb bʊnǝnɔ.”

10Yesu a kwɛl a nyǝm jʊ ja sʊwaɨ, nǝngɔ a sʊwa ji gɔ, “N wɛ a bwɨ jǝ́ kom nɔɔlɨ nɨ lɛɨ? N jǝ nya a maa mɨɨ. 11Nǝb bʊnǝnɔ jǝ na jǝbɔ jen kwangkwang. N ke bɔ kwangkwang mǝ dakini nǝbɔ jeni. 12Nwang waatǝm nɨ a tal mɨ a bʊtɔɨ gǝ fɛka fʌltǝm mɨ. 13Bɨlǝngkɛl mǝ sʊwa jen nɛɨ, daa nɨ jǝ kiyom fulon kɛl lǝmɨ nɨ lɛ a tǝmɔ gǝm gwamɨ, jǝ sʊwa sʊwa jʊ nɔɔlɨ nɨ a maaɨ, sǝ a yǝlam jʊ ya jǝ bʊʊla lɛ nǝn gɨɨ.”

Yahuza A Jǝla Gɔ Gǝ Lungto Lungto Yesu

(Mar 14:10,11; Luk 22:3-6)

14Nǝngɔ win a mʊgɔ kʊb jeli yo nɨ wʊnɨ jǝ jo lɛ gɔ Yahuza Iskariyotii, a yɔ a daagɔ dʊʊm nǝbkǝlamɔ woi, 15a sʊwa ji gɔ, “N wɛ jǝ́ nɨ ɨ lɛɨ, na n nǝ jen gɨɨ?” Nǝngɔ ja nǝ gǝn kemʌn sǝlǝnɔ fʊtǝtaalɨ. 16Nǝn di gɔ nǝngɔ Yahuza a tǝl saatǝm gola nɨ miyom Yesu lɛɨ.

Yesu A Ja Jǝjalǝn Dikulom Yabtǝmɔ Jǝbɔ Bɛtɔ Mɛlalɨ Gǝnɔ

(Mar 14:12-21; Luk 22:7-13; Yoh 13:21-30)

17Nǝn kum na win na Dikulom Kʊkkʊm nɨ mɨ Yisti woi, nǝngɔ bɛtɔ mɛlalɨ gǝnɔ a bɛ a daa Yesu woi gɔ, “Mʊ swɨ nǝn fɛka daa Dikulom Yabtǝmɔ a fee?”

18Nǝngɔ a sʊwa ji gɔ, “Jǝ́ yɔ a mʊgɔ tuulɔ a daa kaa nǝl woi, jǝ́ sʊwa gǝn jengɔ, ‘Feyigɔ a sʊwa gɔ, Kum mǝndɨ a dwama, mǝ swɨ lɛ n ja Dikulom Yabtǝmɔ jǝbɔ bɛtɔ mɛlalɨ mǝndɨ a lɔ mɔ.’ ”

19Nǝngɔ bɛtɔ mɛlalɨgɔ a maa kanga Yesu a sʊwa jii, nǝngɔ ja fɛka Dikulom Yabtǝmɨ.

20Nǝn kwaamɨ, nǝngɔ a yɨ jatǝm jǝjalǝnɔ jǝbɔ kʊb jeli yo nɨɨ. 21Kwama jǝ jam jǝjalǝnɔ lɛɨ, nǝngɔ a sʊwa ji gɔ, “N bɨlǝngkɛl mǝ sʊwa jen nɛɨ, win a kʊm jen lungto i lungto i.”

22Nǝl jinɔ a kala, nǝngɔ ja tǝl jǝ bʌ gǝn nɛ win wini, “Nǝmǝ ka, Tɛlalɔ?”

23Nǝngɔ Yesu a jǝla ji gɔ, “Nʊ nɨ a dǝg kang gǝnɔ jǝbɔ mǝ a mʊgɔ kʌshii, nǝn gɔ lungto i lɛɨ. 24Bʊla Nǝlɨ shu shu kanga ja mʊla a dul gǝnɨ. N mwɛ nʊ nɨ a lungto Bʊla Nǝlɨ! Na a bʊm nyɔ ja bʌ gǝn bɔ.”

25Nǝngɔ Yahuza nɨ a lungto gǝnɨ a bʌ gǝn gɔ, “Feyi nǝmǝ ka?” Nǝngɔ Yesu a jǝla gǝn gɔ, “Mʊ tǝmʊn ń sʊwa.”

Nɔɔtǝm Mwɛ Fogfogi Sagsag Tɛlalɔɨ

(Mar 14:22-26; Luk 22:14-20; 1Kor 11:23-26)

26Nǝn kwama jǝ jam jǝjalǝnɔ lɛɨ, nǝngɔ Yesu a do kʊkkʊmɔ, a maa keligɨɨ. A kǝlsa a tǝga bɛtɔ mɛlalɨ gǝnɨ, sʊwa ji lɛ gɔ, “Jǝ́ yo jǝ́ ja. Wʊnɨ n bʊtɔ mɨ.”

27Nǝngɔ a do kʌshi nɔɔtǝm mwɛ fogfogigɨɨ, a maa keligɨɨ, a nǝ jii, sʊwa ji lɛ gɔ, “Jǝ́ nɔɔ a kʌshi nɨ gwam jenɔ. 28Wʊnɨ n tʊʊm swatǝm yaa mǝndɨ, wʊnɨ ja tǝla nǝbɔ gǝm lɛ a lada a kɛl kǝlǝmtǝm bwɨlangkɛl jini. 29Mǝ sʊwa jen nɛ, jʊ a ta a kǝngkɨɨ mɨsɔ mǝ yǝla lɛ n nɔɔ mwɛ tʊʊl fogfogi nɨ wo tag, ba mǝ nɔɔ a fɨ jǝbɔ jen a fɔlɔn lɔ Tɛtɛ mɨɨ.”

30Nǝn kwama ja mam nafɨgɨɨ, nǝngɔ ja jel ja shu a Yem Zaituni.

Bitrus Kana Kana Nyǝmtǝm Yesui

(Mar 14:27-31; Luk 22:31-34; Yoh 13:36-38)

31Nǝngɔ Yesu a sʊwa ji gɔ, “Jǝ́ mwala mwala jǝ́ bǝla ɨ nǝn kum nɨɨ, a jʊ bwɨ lɛ nǝn mɨɨ, a mʊla mʊlaɨ gɔ,

“ ‘Mǝ ga ga nǝ tɔɔtǝm kwamɨgɔ,

sǝ kʌm kwamɨtɨnɔ a kwɨya

tǝmɔ nǝn kwan.’

32Na kwama mǝ gun a bwaagɔ gǝmɨ, ya mǝ laa jen laa a Galili.”

33Nǝngɔ Bitrus a jǝla gǝn gɔ, “Na gwam jǝ mwal mwal ja bǝla ńɨ, mɨsɔ mǝ bǝla ń nɛ.”

34Yesu a sʊwa gǝn gɔ, “N bɨlǝngǝn mǝ sʊwa ń nɛɨ, a mʊgɔ kum nɨ, mʊ kana kana nyǝmtǝm mǝndɨ naagɔ taal, dɨsɔ la kwalɨ jangagɔ a ma kamɨ.”

35Nǝngɔ Bitrus a jǝla gǝn gɔ, “Na jǝ jʌ i jʌ i jǝbɔ mʊɨ, mɨsɔ mǝ kana nyǝmtǝm mʊnɔ lɛ wo.” Nǝngɔ tangǝn bɛtɔ mɛlalɨgɔ a jǝla nyɨɨ.

Yesu A Maa Keli A Gatsemani

(Mar 14:32-42; Luk 22:39-46)

36Nǝngɔ Yesu jǝbɔ bɛtɔ mɛlalɨ gǝnɔ a yɔ a kaa daa nɨ jǝ jo lɛ gɔ Gatsemanii. Nǝngɔ a sʊwa ji gɔ, “Jǝ́ yɨ fɔ jǝ́ yam ɨ, ya mǝ maa keli fʌlen.” 37A yɔ jǝbɔ Bitrus jǝbɔ bɛtɔ lɔ Zabadii nɨ yoi, Yakubu jǝbɔ Yohana, nǝngɔ a tǝl kaltǝm nǝl jǝbɔ komtǝmɨ. 38Nǝngɔ a sʊwa ji gɔ, “Fitǝm nǝl nɨ mǝ nyʊwa lɛ nǝnɨ, maamɔ jʌ i jʌ i. Jǝ́ yɨ fɔ, jǝ́ maa tɔɔtǝm jǝbɔ mǝ.”

39A kʊwatǝn nǝn dǝm nyɨɨ, nǝngɔ a gǝla a jʊng, kǝga gǝnɔ a tǝm, a maa keligɨɨ gɔ, “Tɛtɛ mɨ, na daa daa tʌgo dǝngdǝngɨ, dem mɨ kʌshi gaalan nɨ mǝ nyʊwa lɛ nǝnɨ. Maa jʊ mʊ swɨ lɛɨ, ke bɔ jʊ mǝ swɨ lɛɨ.”

40A yǝla a bɛ a daa bɛtɔ mɛlalɨ gǝnɔ woi, ba nya ji jǝ daa dum lɛ. Nǝngɔ a bʌ Bitrus gɔ, “Mɨsɔ jǝ́ dwal lɛ jǝ́ yɨ kʊlɨgǝn jǝ́ tɔɔ tǝmɔ jǝbɔ mǝ a kǝlɨ kwama ka? 41Jǝ́ tɔɔ tǝmɔ, jǝ́ maa keli kage jǝ́ yal a mʊgɔ tɛltǝm. Nǝlɔ swɨ maatǝmɔ lɛ, bʊtɔgɔ a gɨya.”

42Nǝngɔ a yǝla a shu ya maa keli na yogɨɨ gɔ, “Tɛtɛ mɨ, na mɨsɔ mʊ dem mɨ kʌshi nɨ lɛ a dul mɨɨ, mʊ swɨ lɛ n nɔɔ mwɛ nɨ a mʊgɔ gǝnɨ, maa kanga mʊ swɨ lɛɨ.” 43Nǝn kwama a yǝla a bɛ tagɨ, ba nya ji jǝ daa dum lɛ jʊ a bwɨɨ nu jinɔ a yiilo nǝn dum.

44Nǝngɔ a bǝla ji a shu ya maa keli na taalɨ, a maa keligɔ kanga ga maa nǝn tɨkǝgaɨ. 45Nǝngɔ a yǝla a bɛ a daa bɛtɔ mɛlalɨgɔ woi. A bʌ ji gɔ, “Jǝ́ daa dum lɛ jǝ́ fǝb lɛ dwal ka? Kwama a la, ja lungto Bʊla Nǝlɨ a kang nǝb bwɨlangkɛlɨ. 46Jǝ́ gun bǝ ya! Nʊ a lungto i n wɔ bɛ lɛ.”

Ja Ta Yesu

(Mar 14:43-50; Luk 22:47-53; Yoh 18:3-12)

47Nǝn kwama sʊwam kɛlɔ lɛɨ, nǝngɔ Yahuza, win a mʊgɔ kʊb jeli yo nɨ a bɛɨ. Nǝbɔ a lada bwang gǝm lɛ nǝn gulʌntɨn jǝbɔ dwamtɨn. N dʊʊm nǝbkǝlamɔ jǝbɔ nǝb dʊʊm nǝbɨɨ a twam jii. 48Nǝngɔ nʊ nɨ a lungto gǝnɨ a kwɛl a nʊng ji gɔ, “Nʊ nɨ mǝ kwal gǝn nɛɨ, n nʊgɔ, bɛ jǝ́ ta gǝn.”

49Nǝngɔ Yahuza a swa kǝga a daa Yesu woi, nǝngɔ gɔ, “Mǝ yal ń nɛ nǝ mɛlalɨ!” Nǝngɔ a kwal gǝnɨ.

50Nǝngɔ Yesu a jǝla gǝn gɔ, “Fwalgɔ, maa jʊ a bɛ nǝn mʊ ɨ.” Nǝngɔ nǝb nɨ ba ta Yesui. 51Win a kʊm nǝb mɛlalɨ Yesui a ku gulʌn gǝnɔ a kam lɔl bwɛ jwaalɛ dalɨ nǝkǝla nɨ nǝnɨ. 52Nǝngɔ Yesu a sʊwa gǝn gɔ, “Yǝla dǝgtǝn gulʌn mʊnɔ tʌgo a laa gǝnɔ gǝm. Nʊ nɨ a do gulʌni, n gulʌn jʌ gǝn nɛɨ. 53Jǝ́ kuwo lɛ mɨ mǝ nǝn kwaan nɨ mǝ saa tɨkalɨ lɛ a daa Tɛtɛ mɨ woi, mɨsɔ tʊng mɨ bɛtɔ twama gǝnɔ lɛ a shu nya sʊwajaamɔ kʊb jeli yo ka? 54Laa jǝ maa nyǝn jǝ yii mʊlalɨ kɛl Kwaamaɨ nɨ lɛ a sʊwa gɔ, kanjǝl nɨ bwɨ nyɨɨ?”

55Nǝngɔ Yesu a bʌ mʊrkalɨ nǝbɨɨ gɔ, “N wɛ a bwɨ jǝ́ bɛ lɛ nǝn gulʌntɨn jǝbɔ dwamtɨn sǝ ba jǝ́ ta ɨɨ? Kwangkwang mǝ yɨ yɨ a talɨ Kan Kwaaman mǝ maa mɛlalɨ lɛ wo, jǝ́ ta ɨ bɔ. 56Jʊ nɨ gwam a bwɨ sǝ mʊlalɨ nǝbkuwotǝmkǝgagɨɨ a yii.” Nǝngɔ bɛtɔ mɛlalɨ gǝnɔ gwam ja mwala ja bǝla gǝnɨ.

Ja Yɔ Nǝn Yesu A Kǝga Nǝb Borangɨɨ

(Mar 14:53-65; Luk 22:54,55,63-71; Yoh 18:13,14,19-24)

57Nǝbɔ a ta Yesui, nǝngɔ ja yɔ nǝn gɔ a daa Kayafa woi, dalɨ nǝkǝlagɔ, a daa gɔ tag nǝb mɛlalɨ diilɔ jǝbɔ nǝb dʊʊm nǝbɨɨ a mʊrka wo. 58Bitrus bwang gǝm lɛ a gul a kʊta, ba la a talɨ lɔngɔ dalɨ nǝkǝlagɔ yɨm lɛɨ. Nǝngɔ a dɔ a gǝla a yɨ wo jǝbɔ nǝb tɔɔtǝm Kan Kwaamanɨ, sǝ gǝ kuwo jʊ bwɨ lɛɨ. 59Dʊʊm nǝbkǝlamɔ jǝbɔ nǝb dʊʊm koteregɔ pʌd, jǝ saa gola nɨ lɛ jǝ nya Yesu lɛ nǝn bwɨlangkɛlɨ, sǝ jǝ saa gola nɨ jǝ jʌ gǝn nɛɨ, ja nya bɔ gola. 60Nǝbɔ a lada na a sʊwa gabakɛl a dul gǝn suli, ja nya bɔ gola. Nǝngɔ kaam nǝb yo a jel, 61a sʊwa ji gɔ, “Balɨ nɨ a sʊwa gɔ gǝ nǝn kwaan gǝ kʌb Kan Kwaaman Kwaamaɨ, sǝ gǝ yǝla gǝ mɔ tʌgo a mʊgɔ kumɔ taal.”

62Nǝngɔ dalɨ nǝkǝlagɔ a gun a tɨ tɨɨ, a sʊwa gɔ, “Mɨ mɔ nǝn jʊ nɨ mʊ gar lɛɨ ka? N nǝtǝm nyiyo wɛ nyɔ nǝb nɨ bɛla lɛ nǝn a dul mʊnɨ” 63Yesu a gar bɔ kɛl. Nǝngɔ dalɨ nǝkǝla nɨ a bʌ gǝn gɔ, “N mʊrka ń jǝbɔ Kwaama nɨ nǝn kʊlɨɨ, sʊwa nǝn, na mʊ nǝn Kiristi, bʊla Kwaamaɨ.”

64Nǝngɔ Yesu a jǝla gǝn gɔ, “Ɔɔ, nǝmǝ, kanga mʊ sʊwaɨ. Mɨsɔ kʊta lɛ jǝ́ kuwo kuwo Bʊla Nǝlɨ yǝm a kang jajǝng Nǝ Kwaan nɨɨ, bɛ lɛ a dʌbʌl a mʊgɔ lul.”

65Nǝngɔ dalɨ nǝkǝla nɨ a wʊlala dwang malǝng gǝnɔ nǝn kaltǝm nǝl, a sʊwa gɔ, “N nǝb nǝtǝm nyiyo wɛ bǝ saa lɛ tagɨ? Kǝngkɔ jǝ́ nyʊwa kanga a kal dun Kwaamaɨ. 66N wɛ jǝ́ kuwoi?” Nǝngɔ ja sʊwa gǝn gɔ, “A la nyɔ, ja jʌ gǝn.”

67Nǝngɔ ja tɛɛka gǝn nǝn tuum a kǝgaɨ, ja bʊg gǝnɨ, kaamɨ a jǝga gǝn. 68Jǝ sʊwa lɛ gɔ, “Kiristi, maa nǝm kuwotǝmkǝga, sʊwa nǝn nʊ nɨ a jǝga ńɨ!”

Bitrus A Kana Nyǝmtǝm Yesui

(Mar 14:66-72; Luk 22:56-62; Yoh 18:15-18,25-27)

69Nǝn kwama gɔ Bitrus yǝm a mʊgɔ talɨ lɔngɔ gǝm, nǝngɔ kaa bwɛnɔɔlɨ nɨ maa maajɨ lɛ a lɔgɨɨ, a bɛ a daa gǝ woi a sʊwa gǝn gɔ, “Mʊ tǝmʊn, mʊ na jǝbɔ Yesu, bwɛ Galilii nɨ!”

70Nǝngɔ Bitrus a kana a kǝga jin gwam gɔ, “Mǝ nyǝm bɔ kɛl nɨ mʊ sʊwa lɛɨ!” 71Jeltǝm gǝnɔ a nyanga lɔngɨ, nǝngɔ kaa bwɛnɔɔlɨ wʊnɨ maa maajɨ lɛ a lɔgɨɨ a kuwo gǝnɨ, nǝngɔ a sʊwa nǝb gǝ tɨlam woi gɔ, “Bwɛ nɨ tǝgǝn gǝ na jǝbɔ Yesu bwɛ Nazarat nɨ!”

72Nǝngɔ Bitrus a kana nǝn wɛɛlɨ tag gɔ, “Mǝ nyǝm bɔ nʊgɔ.”

73A ta bɔ bʊtɔ nǝngɔ nǝb gɔ tɨlam woi ja bɛ a daa Bitrus woi gɔ, “Bɨlǝngǝn, mʊ tǝmʊn mʊ na a kʊm jin. Ben mʊnɔ a nʊng mʊ na a kʊm jin.” 74Nǝngɔ a tǝl lagtǝm dul gǝnɨ, wɛɛla wɛɛlɨgɔ lɛɨ sʊwa lɛ gɔ, “Mǝ nyǝm bɔ nʊgɔ.” A ta bɔ bʊtɔ nǝngɔ kwalɨ jangagɔ a ma kamɨgɨɨ. 75Nǝngɔ Bitrus a bʊʊla nǝn kɛlɔ Yesu a sʊwa gǝn gɔ, “Mʊ kana kana nyǝmtǝm mǝndɨ naagɔ taal sǝla kwalɨ jangagɔ a ma kamɨ.” Nǝngɔ Bitrus a jel a yooli ya ji wigɔ nǝn bʊr nyɨɨ.

Currently Selected:

Matta 26: DBD

Highlight

Copy